Aisea e Tausisia ai Au Folafolaga?

NA FAAPEA mai Bernard Baruch, o lē na avea muamua ma faufautua i le peresitene o le malo o Amerika: “Ia palota mo le tagata e lē tele ni ana folafolaga; o le a itiiti ai lou loto tiga ia te ia.” I le lalolagi i aso nei, e foliga mai na faia folafolaga ina ia solia. Atonu o ni tautoga tau faaipoipoga, maliega tau pisinisi, po o ni folafolaga faapea o le a faaalu le tele o le taimi ma fanau. Ua tele lava ina lē amanaia le mea o loo faaalia mai i le faaupuga masani e faapea, “E iloga lava le tagata lelei e tausisi i ana upu.”

O le mea moni, o le toatele o tagata e lē tāitai ona iai se faanaunauga e faataunuu a latou folafolaga. O isi e faavavevave i le faia o folafolaga e lē mafai ona latou tausisia pe e lē faataunuuina foi, talu ai o le auala lea e sili atu ona faigofie e mulimuli ai.

E ioeina e faapea, o le tausisia o se folafolaga e ono faigata pe a tulai mai ni tulaga e lē mailoa. Ae pe tele moni se faaleagaina e oo i ai pe a lē tausisia se folafolaga? Pe e tatau ona e manatu mamafa i au folafolaga? O se tagai puupuu atu i le faaaoaoga a Ieova le Atua, o le a fesoasoani ia i tatou e iloa ai le mafuaaga e tatau ai ona tatou manatu mamafa i lenei mataupu.

E Faataunuu e Ieova Ana Folafolaga

O loo tatou tapuai i se Atua o Lē o lona suafa e fesootai lelei lava ma le faataunuuina o ana folafolaga. I taimi o le Tusi Paia, o se igoa, e masani ona aumaia ai se faamatalaga e uiga i lē e ona le igoa. E faapena foi e uiga i le suafa o Ieova, lea o lona uiga “O Ia Lava ua Māfua ai Ona Iai.” O lea o le suafa tauatua e aofia ai le manatu e faapea, o le a faataunuuina e le Atua ana folafolaga ma faataunuuina ana fuafuaga.

I le ogatusa ma lona suafa, sa tausisia e Ieova folafolaga uma na ia faia i le nuu o Isaraelu anamua. E faatatau i nei folafolaga, na faailoa mai ai e le tupu o Solomona e faapea: “Ia faafetaia Ieova o le ua foaiina mai le malologa i lona nuu o Isaraelu, e tusa ma mea uma na ia fetalaia mai ai, e leai se upu e tasi ua le taunuu o ana upu lelei uma na ia folafolaina mai na faaoo mai e lana auauna o Mose.”—1 Tupu 8:56.

O lena maufaatuatuaina o Ieova ua mafai ona faapea mai ai le aposetolo o Paulo: “A o folafola mai e le Atua ia Aperaamo, ua le mafaia ona tauto o ia i se tasi e sili ia te ia, o lea na tauto ai o ia ia te ia lava.” (Eperu 6:13) Ioe, o le suafa lava o Ieova ia ma lona peresona o se faamaoniga lea e faapea, o le a ia lē solomuli i le faataunuuina o ana folafolaga, e ui lava e matuā telē se faataulagaina na te faia ona o na folafolaga. (Roma 8:32) Ona o le mea moni e faapea, e faataunuu e Ieova ana folafolaga ua aumaia ai ia i tatou se faamoemoe ua fai ma taula mo o tatou ola.—Eperu 6:19.

Folafolaga a Ieova ma lo Tatou Lumanai

O lo tatou faamoemoe, lo tatou faatuatua, ma o tatou lava ola e faalagolago uma lava i le faataunuuina o folafolaga a Ieova. O le ā le faamoemoe o loo pele ia i tatou? “A e faatalitali i tatou i le lagi fou ma le lalolagi fou, pei o lana [Atua] na folafola mai, e mau ai le amiotonu.” (2 Peteru 3:13) Ua aumaia foi i le Tusi Paia mo i tatou se faavae mo le faatuatua e faapea, “o le a toe tutū mai e ua amiotonu atoa ma e ua amioletonu.” (Galuega 24:15, LF) Ma e mafai ai ona tatou mautinoa, e iai se mea e sili atu na i lo o le olaga o loo iai nei. O le mea moni, o le mea e pei ona taʻua e le aposetolo o Ioane “o le mea . . . na folafola mai” o le “ola faavavau.” (1 Ioane 2:25) Ae peitai, o folafolaga a Ieova o loo i lana Afioga e lē o faatapulaaina na o le lumanai. Ua avea o se mea e mafai ona uigā ai o tatou olaga i aso taitasi i le taimi nei.

Na pese le faisalamo e faapea: “E latalata mai Ieova ia i latou uma o e valaau ia te ia, . . . e faafofoga foi o ia i la latou alaga atu [“mo se fesoasoani,” NW].” (Salamo 145:18, 19) Ua faamautinoaina  foi i tatou e le Atua e faapea, “na te avatua le malosi i e ua vaivai; a o e ua leai se malosi, na te faatuputele i ai le malosi.” (Isaia 40:29) Ma maeu se faamafanafanaga o le a iai i le iloa e faapea, o le ‘Atua na te lē tuuina atu tatou i le faaosoosoga e sili i se mea ua tatou lavatia, a e sauni foi faatasi ma le faaosoosoga se mea e sao ai’! (1 Korinito 10:13) Afai ua tatou tofo totino i le faataunuuga o nisi o nei folafolaga, ona tatou iloa ai lea e mafai ona matuā maufaatuatuaina Ieova. I le manatu atu i aogā ua tatou maua mai i le tele o folafolaga ua faia e le Atua ma tausia, o le ā la le manatu e tatau ona iai ia i tatou e uiga i a tatou folafolaga ia te ia?

Tausisia o a Tatou Folafolaga i le Atua

O lo tatou tuuina atu i le Atua, e lē taumatea, o se folafolaga e aupito sili lea ona tāua ua mafai ona tatou faia. O le faia o lenei laasaga, ua faaalia ai e tatou te mananao e auauna ia Ieova e faavavau. E ui e lē mamafa poloaiga a le Atua, ae atonu o le a lē faigofie pea ona faia lona finagalo, a o tatou ola ai i lenei faiga leaga o mea. (2 Timoteo 3:12; 1 Ioane 5:3) Peitai, o le taimi lava e ‘tago ai o tatou lima i le suotosina’ ma oo ina avea ma auauna tuuina atu a Ieova ma soo o lona Alo, o Iesu Keriso, e lē tatau lava ona tatou toe tepa i tua i mea a le lalolagi ia ua tatou lafoaia.—Luka 9:62.

Pe a tatou tatalo ia Ieova, e ono uunaia i tatou e folafola atu ia te ia e faapea, o le a tatou tau ina ia manumalo i se vaivaiga, atiina ae se uiga faa-Kerisiano, po o le faateleina o se vala o la tatou galuega faatiokarate. O le ā o le a fesoasoani ia i tatou e faatinoina nei folafolaga?—Faatusatusa i le Failauga 5:2-5.

O folafolaga faamaoni e sau mai le loto ma le mafaufau. O le mea lea, seʻi o tatou lagolagoina a tatou folafolaga ia Ieova e ala i le tatala atu o o tatou loto ia te ia i le tatalo, i le faaalia atu ma le faamaoni mea o tatou popole ai, o tatou faanaunauga, ma vaivaiga. O le tatalo atu e uiga i se folafolaga o le a faamalosia ai la tatou faaiuga e tausisia lea folafolaga. E mafai ona tatou manatu i a tatou folafolaga i le Atua o ni aitalafu. Afai e tetelē aitalafu, e manaomia ona totogi auauai. E faapena foi le tele o folafolaga tatou te faia ia Ieova, e umi se taimi e faataunuu ai. Ae o le tuuina atu e lē aunoa ia te ia o le mea tatou te mafaia, ua tatou faaalia ai e faia lava le mea tatou te fai atu ai, ma o le a ia faamanuia i tatou e tusa ai ma na folafolaga.

E mafai ona tatou faaalia atu e tāua ia i tatou a tatou folafolaga e ala i le tatalo atu e lē aunoa e uiga i na folafolaga, atonu i aso taitasi. O le a faaalia atu e lenei mea i lo tatou Tamā faalelagi e tatou te faamaoni. O le a avea foi lea o se faamanatu e lē aunoa ia i tatou. Na faataatia e Tavita mo i tatou se faaaoaoga lelei e tusa ai ma lenei mea. I se pese, na ia aioi atu ai ma le faamaoni ia Ieova e faapea: “Le Atua e, ia e faafofoga mai i laʻu alaga; ia e liliu mai i laʻu tatalo. Ona ou fai pesega ai lea i lou suafa e faavavau, ina ia ou avatua i lea aso ma lea aso o mea na ou tauto ai.”—Salamo 61:1, 8.

O le Tausisia o a Tatou Folafolaga e Ati ae ai le Maufaatuatuaina

Afai e lē tatau ona manatu māmā i folafolaga e faia i le Atua, e faapena foi la i folafolaga e tatou te faia i o tatou uso Kerisiano. E lē tatau ona ese le auala e tatou te feutagai ai ma Ieova, ese a tatou feutagaiga ma o tatou uso. (Faatusatusa i le 1 Ioane 4:20.) I lana Lauga i Luga o le Mauga, na fetalai ai Iesu: “A ia faapea la outou upu, Ioe, ioe; E Leai, e leai.” (Mataio 5:37) O le faamautinoa ua maufaatuatuaina pea a tatou upu, o le tasi lea o auala e ‘faia ai mea lelei i ē e aiga ma i tatou i le faatuatua.’ (Kalatia 6:10) O folafolaga uma tatou te tausia, e ati ae ai le maufaatuatuaina.

O le faaleagaina ua faia e ala i le solia o se folafolaga e masani ona faateleina pe afai e aafia ai ni mea tautupe. E tatau i se Kerisiano ona faamaoni i ana upu, pe i le toe totogiina atu o se nogatupe, faia o se galuega, po o le faataunuuina o se maliega faapisinisi. E faafiafia ai le Atua i lenei mea ma mausalī ai le fefaatuatuaai lea e tāua tele mo le ‘nonofo faatasi ma le autasi’ o uso.—Salamo 133:1.

Ae peitai, o le lē taulau ona tausisia o maliega, e mafai ona afaina ai le faapotopotoga faapea ma i latou o loo aafia tuusaʻo ai. Ua matauina e se ovasia femalagaai e faapea: “O fefinauaiga i faiga pisinisi—e tele lava ina māfua ona ua manatu le tasi itu ua lē faamaoni le isi itu i le faataunuuina o lana vaega o le maliega—e masani lava ona iloa e le lautele. O le mea ua iu i ai, ua  fevaevaeai uso, ma oo ai ina faigata le siomaga i le Maota o le Malo.” Maeu la le tāua o le iloilo ma le faaeteete o so o se maliega na tatou faia ma faia ni faamaumauga tusitusia! *

E tatau foi ona faaeteete pe a faatau atu ni oloa taugata pe fautuaina foi ni teuga tupe faafaigaluega tului, ae maise lava pe afai o loo tatou maua totino ai ni tupe faasili mai lea feagaiga. E faapena foi ona iai le manaoga ina ia matuā faaeteete ia aua neʻi soona gugutu i aogā o nisi o oloa faatau, po o ni oloa e fesoasoani ai i le soifua maloloina po o le faia o ni folafolaga lē moni i ni mea e maua e tusa ai ma tupe faafaigaluega tului. O le alofa e uunaia ai Kerisiano e faamatala atoatoa atu ni lamatiaga e ono aafia ai. (Roma 12:10) Talu ai o le toatele o uso e lē lava ni tomai tau pisinisi, atonu e latou te faatuatua ai i a tatou fautuaga ona tatou te aiga ma i latou i le faatuatua. Pagā se mafatiaga o le a iai pe afai e oia lenei maufaatuatuaina!

I le avea o ni Kerisiano, e tatou te lē talia ai faiga pisinisi e lē faamaoni, po o le lē amanaiaina o manaoga totino tatau o isi. (Efeso 2:2, 3; Eperu 13:18) Ina ia maua le finagalo malie o Ieova i le avea o ni ‘malo i lona fale fetafai,’ e tatau ona maufaatuatuaina i tatou. ‘E tusa lava po ua tatou tauto i le mea e tiga ai i tatou, e tatou te lē ʻalo ai lava.’—Salamo 15:1, 4.

O Iefata le faamasino o Isaraelu, na tauto e faapea, afai e tuuina atu e le Atua le manumalo ia te ia i tagata sa Amonī, o le a ia foaiina atu ia Ieova e avea o se taulaga mū le tagata muamua e faafeiloaia o ia i lona foi atu nai le taua. Ma o lena tagata, e na o le pau lava lea o le fanau a Iefata, ae lei solomuli ai o ia i lana upu. I le loto malie atoatoa i ai o lona afafine, na ofoina atu ai e Iefata lona afafine i le auaunaga i le olaga atoa i le malumalu o le Atua—o se taulaga e lē taumatea sa tiga ma faigata i le tele o vala.—Faamasino 11:30-40.

Ae maise lava i ovasia o le faapotopotoga, e iai le tiute tauave ina ia pipiimau i a latou maliega. E tusa ai ma le 1 Timoteo 3:2, e tatau i se ovasia ona “le mataʻuleagaina.” O le faamatalaga lenei o le upu Eleni o lona uiga “o le lē mafai ona tuuaʻia, e lē mataʻuleagaina, e lē tāitai ona taʻuvalea.” Ua “faaalia ai i lea, e lē gata ina taʻuleleia le tagata, ae e tatau foi ona faia faapea ia te ia.” (A Linguistic Key to the Greek New Testament) Talu ai e tatau i se ovasia ona lē mataʻuleagaina, e tatau foi la ona maufaatuatuaina pea ana folafolaga.

Isi Auala e Tausia ai a Tatou Folafolaga

E ao faapefea ona tatou manatu i folafolaga tatou te faia ia i latou e lē o ni uso Kerisiano? Na fetalai Iesu e faapea: “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.” (Mataio 5:16) O le faamaonia atu e tatou te tausisia a tatou upu, e ono mafai ona tatou taaʻina mai ai isi i la tatou feau faa-Kerisiano. E ui lava i le paʻū maulalo o le lalolagi i tapulaa o le faamaoni, ae o le toatele o tagata o loo tumau pea ona tāua ia i latou le faamaoni. O le tausisia o a tatou folafolaga o se tasi lea o auala e faaalia ai le alofa i le Atua ma tuaoi ma taaʻina mai ai ē alolofa i le amiotonu.—Mataio 22:36-39; Roma 15:2.

I le faagasologa o la latou tausaga faaleauaunaga o le 1998, na faaalu ai e Molimau a  Ieova le sili atu i le piliona itula e folafola atu ai i le lautele le tala lelei o le Malo o le Atua. (Mataio 24:14) O nisi o nei talaʻiga atonu o le a faaleamanaia pe afai e tatou te lē tausia a tatou upu i feutagaiga faapisinisi po o isi mataupu. Talu ai o loo fai i tatou ma sui o le Atua o le upu moni, ua saʻo ai la ona faatalitalia i tatou e tagata ina ia gaoioi ma le faamaoni. O le avea o sē maufaatuatuaina ma faamaoni ua “viia ai i mea uma lava talu o i latou le mataupu a le Atua lo tatou Faaola.”—Tito 2:10.

I la latou faiva, ua tatou maua ai avanoa e tausisia ai a tatou upu pe a tatou toe foi atu e asia i latou na faaalia le naunau fiafia i le feau o le Malo. Afai e tatou te fai atu o le a tatou toe asiasi atu, e tatau lava ona tatou faia faapea. O le toe foi atu e pei ona tatou folafola atu ai o se auala lea ‘e lē faafitia ai se mea lelei mai ia i latou ua tatau i ai.’ (Faataoto 3:27) Na faamatala mai e se tasi tuafafine le mataupu e faapea: “I nisi taimi matou te feiloai ai ma tagata loto fiafia o ē e faapea mai na folafola atu e se Molimau e toe asiasi atu ae e lei toe alu atu lava. Ioe, ou te iloa atonu sa lei iai lē ona le fale i le aiga pe atonu na iai ni tulaga na lē mafai ai ona toe foi atu. Ae peitai, ou te lē manao e fai mai faapena se tasi e uiga ia te au, o lea, ou te faia ai le mea sili ina ia toe maua atu le tagata i le fale. Ou te talitonu afai ou te faia se mea e lē fiafia ai se tasi, o le a taʻuleagaina ai Ieova ma oʻu uso atoa uma lava.”

I nisi o tulaga, atonu e lē o ia i tatou se faanaunauga e toe foi atu talu ai ua tatou faia se faaiuga e faapea, e lē fiafia moni le tagata. Ua faamatala mai e le tuafafine lava lea: “Ou te lē taumafai e fai se faaiuga po o le ā le tele o le fiafia o le tagata. E tusa ai ma le mea na ou oo totino i ai ua aʻoaʻoina ai aʻu e faapea e masani lava ona sese ia uluai faailoga vaaia. O lea ou te taumafai ai ina ia maua le vaaiga mautinoa, i le vaai i tagata taitoatasi o le a avea o se uso po o se tuafafine i le lumanai.”

I le faiva Kerisiano ma le tele o isi vala, e manaomia ona tatou faaalia atu e mafai ona maufaatuatuaina a tatou upu. E moni, e sili atu ona faigofie ona fai atu ni upu na i lo o le faatinoina. Na matauina e le tagata poto e faapea: “O le toatele o tagata, e taitasi o i latou ma alagaina lona agalelei; a o ai se na te iloa se tagata faamaoni?” (Faataoto 20:6) Faatasi ma le maumauai, e mafai ona tatou faamaoni ma tausisia a tatou upu.

Oa o Faamanuiaga Mai le Atua

O le faia ma le loto i ai o se folafolaga e aunoa ma le manatu e faataunuu, e ono faatusaina i le tusia o se siaki ae aunoa ma se tupe i le faletupe e tala ai. Ae maeu ni taui ma ni faamanuiaga e tatou te maua ona o le tausisia o a tatou folafolaga! O se tasi o faamanuiaga ona o le maufaatuatuaina, o le iai lea o se loto fuatiaifo lelei. (Faatusatusa i le Galuega 24:16.) Na i lo o le iai o ni lagona tiga o le salamō, e tatou te lagona le faamalieina ma le filemu. E lē gata i lea, o le tausisia o a tatou upu, e faia ai so tatou sao i le autasi o le faapotopotoga lea e faalagolago i lo tatou fefaatuatuaai. O a tatou “upu faamaoni” e taʻuleleia ai foi i tatou i le avea o faifeau a le Atua o le upu moni.—2 Korinito 6:3, 4, 7.

E faamaoni Ieova i ana folafolaga, ma e ʻinoʻino o ia i le “laulaufaiva pepelo.” (Faataoto 6:16, 17) E ala i le faataitai i lo tatou Tamā faalelagi, ua tatou vavalalata atu ai ia te ia. E mautinoa la, ua iai se mafuaaga lelei mo le tausisia o a tatou folafolaga.

[Faaopoopoga i lalo]

[Ata i le itulau 10]

Na tausia e Iefata lana folafolaga, e ui lava sa tiga ia te ia

[Ata i le itulau 11]

Afai na e folafola e te toe foi atu, ia sauniuni lelei e faia faapea