“Na Outou Suia Loʻu Manatu e Faatatau i Molimau a Ieova”

O LE tali atu lena a se tasi alii leoleo o le falepuipui i Polani i se mataupu e faatatau i le galuega a Molimau a Ieova, e pei ona sa lipotia mai ai i la tatou lomiga o Oketopa 15, 1998. Na faamatalaina e le mataupu, “Ina ua Liliuina Loto Maaa e Avea ma Loto Talileleia,” le taulau o Molimau a Ieova i le galulue ai ma pagota i Wołów, i Polani.

A o lei tatalaina atu i le lautele le mekasini o Le Olomatamata e pei ona taʻua i luga, na fuafuaina ai se sauniga faapitoa ina ia tufaina atu lenei mekasini mo pagota i le falepuipui i Wołów, ia Setema 13, 1998. O i latou na valaaulia e auai sa aofia ai Molimau a Ieova i lena lava vaipanoa, o pagota ua papatisoina ma isi pagota sa faaalia le fiafia, ma nisi o leoleo o le falepuipui. O nisi nei o mea na matauina e i latou sa auai.

Na faapea mai Jerzy, o se tasi o Molimau a Ieova na papatisoina i le falepuipui i le silia ma le lima tausaga ua mavae: “Ua ou matuā fiafia lava, e pei ona ou faitau ai i le asō e faatatau i le tele o taumafaiga na saunia e o tatou uso mai faapotopotoga taulalata mai e fesoasoani ai ia te i matou.” Na ia faaopoopo mai: “O loo oʻu taumafai pea e faaleleia aʻu lava, ma e mafai ona ou vaaia le auala o loo faatonutonuina ai aʻu e Ieova.”

Na faapea mai le isi pagota e suafa ia Zdzisław, e tusa ai o le galuega o le molimau atu i le falepuipui: “I le taimi nei, e toafā ni alii pagota ua sauniuni atu mo le papatisoga, ma o loo faaauau pea ona auai mai ē fiafia i sauniga i lo matou maota. O lenei mataupu o se uunaiga malosi mo i matou mo nisi gaoioiga atili i lenei oganuu.” Maeu se uiga  mautinoa, pe a mafaufau atu o loo totoe pea tausaga e 19 o Zdzisław e faasalaina ai i le falepuipui!

Ina ua maeʻa le faitauina o le mataupu e faatatau i le falepuipui i Wołów, na faapea mai se alii leoleo o le falepuipui: “Ua faaeaina faapitoa lava i matou. Sa leai soʻu manatu o le a mauaina e lenei falepuipui se lipoti taʻuleleia ua faalauaitele atu i gagana e 130 i le lalolagi. Ou te fiafia ia te outou, ma ou te talisapaia a outou taumafaiga mo pagota.” Na faaopoopo mai le isi alii leoleo: “Ua outou suia loʻu manatu e faatatau i Molimau a Ieova. I le taimi muamua, na ou vaai ia te outou o se lotu maelega vālea. Ae o lea ua ou iloaina nei o outou o ni tagata e pulea e mataupu silisili.”

Na ʻataʻata le pule o le falepuipui i Wołów, o Marek Gajos ma faapea mai: “I le taimi muamua sa matou manatu o le a itiiti se mea o le a outou faataulauina. Na matou manatu o outou ua na o se isi lotu o loo iai se faanaunauga ina ia faaleleia olaga o pagota e ala i le Tusi Paia. Peitai, i le matauina o iuga o la outou uluai gaoioiga, ua matou filifili ai e soosoo tauʻau atu. Ua iva nei tausaga o tou ō mai pea ma le lē faavaivai, ma ou te matuā talisapaia le mea ua oo i ai a outou taumafaiga i le taimi nei.”

Ae na faapefea ona tali mai le lautele o isi o nonofo i le falepuipui i Wołów e tusa ai o lenei mataupu? Na matuā faateleina le fiafia o pagota ma o lea na alu uma ai mekasini a Molimau o loo i le falepuipui. Na faaalia foi e leoleo o le falepuipui le fiafia e ala i le faatalosagaina mai o nisi kopi faaopoopo se 40 mo i latou lava. Ina ia faafetaiaia le manaoga ua faateleina, na fesoasoani ane faapotopotoga i lena vaipanoa ma tuuina atu le 100 o isi kopi faaopoopo mo uso i le falepuipui. I le taimi e tasi, na faatuputupulaia foi le aofai o ē auai i sauniga na faia i le falepuipui.

Na faapea mai Piotr Choduń, o se leoleo o le falepuipui o lē e galulue vavalalata ma Molimau a Ieova: “Ua matou faia se faaiuga e faapipii lenei mataupu i luga o laupapa uma mo faasilasilaga i la matou falepuipui. Matou te faamoemoe o le a faitauina le mekasini e pagota uma ia tou te lei suesueina le Tusi Paia ma i latou.”

O faaaoaoga lelei a Molimau ma lo latou maumauai i le galuega talaʻi ua faaauau ai pea ona maua iuga lelei. E faaopoopo atu i pagota e toʻa 15 ua faia se agaigai i luma ma oo atu ai lava ina papatisoina, e toalua leoleo o le falepuipui ua tuuina atu o laua ola ia Ieova ae o le isi leoleo ua faatalosaga mai mo sana suesuega faale-Tusi Paia. O le mea moni, ua tuuina atu e uso o loo talaʻi i le falepuipui i Wołów le viiga uma ia Ieova le Atua mo lo latou taulau manuia.—Faatusatusa i le 1 Korinito 3:6, 7.

[Ata i le itulau 28]

Molimau e toatolu ma se pagota o loo faia se taulimaga o le tufaina atu o le mekasini i le fale e faia ai faatasitasiga i le falepuipui