Pe Iai ea se Tasi o Manatu Moni Mai?

“O loimata o e ua sauaina” ua matuā maligi faavai. O loimata na o tagata ua aafia fua i le lē mafaitaulia o “sauaga” i le lalolagi atoa. O i latou ua sauaina e masani lava ona latou lagona ua “leai se na te faamafanafanaina” i latou—ua leai se isi o manatu moni ia i latou.—Failauga 4:1.

E UI i lenei matuā maligi faavai o loimata ae e lē o faapopoleina ai lava isi ona o puapuaga o o latou uso a tagata. Ua latou lē amanaiaina ma le loto i ai tiga o isi tagata, e pei ona faia e le ositaulaga ma le sā Levī i le tala faatusa a Iesu Keriso e faatatau i le tamaloa na fasia, fāoa ana mea, ma tuua toeitiiti a oti i tafatafa o le auala. (Luka 10:30-32) Talu ai o loo sologa lelei le tulaga o mea mo i latou ma o latou aiga, ua latou lē manatu mamafa ai i isi. O lona uiga, ua latou faapea mai, “O ai e popole i ai?”

E lē tatau ona faateʻia ai i tatou i lenei mea. Na valoia e le aposetolo o Paulo faapea i “aso e gata ai” e toatele tagata o ē o le a lē iai se “lotoaiga.” (2 Timoteo 3:1, 3) Na auē se tasi na matauina nei uiga lē popole ua tuputupu aʻe. Na ia faapea mai: “O le filosofia ma le tu masani sa iai i Aialani o le manatu mamafa ma le matamau, ua suia nei i se uiga fou o le manatu faapito.” I le lalolagi aoao, ua faia e tagata mea ma manatu  ifo ia i latou lava, ma ua toetoe lava aunoa ma sina manatu atu i le tulaga pagatia o isi.

Le Manaoga mo se Tasi e Manatu Mai

O loo iai moni se manaoga mo se tasi e manatu mai. Mo se faataitaiga, seʻi manatu i le tamaloa tuua toatasi i Siamani o lē na “maua o loo nofo i luma o lana televise—i le lima lena o tausaga talu ona maliu i le vaitaimi o le Kirisimasi.” O lenei “tagata ua tatala lana faaipoipoga, ma tuua toatasi ae lē atoatoa le malosi,” na tiga o ia ona o mea faanoanoa na oo i lona olaga, e lei manatu lava i ai se tasi seia oo ina uma le tupe lea sa i le faletupe e totogia ai le mea sa ia nofo ai. E leai ma se tasi na manatu moni ia te ia.

Seʻi manatu foi i ē ua lē mafesoasoania ona o pulega malolosi, ma pule sauā matapeapea. I se tasi o vaipanoa, e tusa ma le 200,000 tagata (tusa o le kuata o le faitau aofai o tagata i lena atunuu) “na maliliu ona o mafatiaga ma oge” ina ua faoa faamalosi o latou laueleele mai ia i latou. Po o le manatu foi i tamaiti o ē na tuuina atu i faiga sauā e matuā faigata ona talitonuina. Na faapea mai se tasi lipoti: “O le pasene o tamaiti i se [tasi o atunuu] o ē na latou vaaitino i faiga sauā eseese faamanu—fasiotia, fasi, ave faamalosi, i nisi o taimi o nei gaoioiga e faia e nisi o le tupulaga, e matuā faateʻia ai.” E mafai la ona e malamalama i le mafuaaga e ono tagi talatala ai se tasi na aafia fua i na faiga lē tonu e faapea, “Pe o iai ea se tasi o manatu moni mai ia te au?”

E tusa ai o se lipoti a Malo Aufaatasi, e 1.3 piliona tagata i atunuu tauatiae o loo tauivi ina ia ola i le aso i se tupe e itiiti ifo i le tasi le tālā Amerika pe a faatusatusa atu i ai. E tatau ona latou tau mānatu pe iai se isi o manatu mai. E faapena foi i le faitau afe o le au sulufai o ē, e pei ona taʻua e le lipoti a le Irish Times, “o loo feagai ma se filifiliga faigata ma le lē fiafia i ai po o le a nonofo i se nofoaga faatamaia o tagata sulufai pe i se atunuu lē alolofa, po o le toe foi i o latou nuu moni lea o loo fevaevaeai pea [po o le malepelepe] i taua po o feteenaiga i le va o ituaiga.” O le lipoti lava foi lena o loo aofia ai lenei faatulagaga faanoanoa: “Moeiini ou mata, faitau le tasi e oo i le tolu, e uma ane ua oti foi se isi tamaitiiti. O se tasi lena o le 35,000 o tamaiti o le a feoti i le asō ona o le lē lava o meaʻai tatau ma feoti foi ona o faamaʻi e mafai lava ona togafitia.” E lētioa a toatele i latou e alalaga ona o le faanoanoa ma le mapuitiga!—Faatusatusa i le Iopu 7:11.

Pe na fuafuaina ea nei mea uma ina ia tutupu i le tulaga ua iai nei? I se tulaga moni lava, pe o iai ea se tasi e lē gata e manatu mai ae o loo iai foi le malosi na te taofia ai mafatiaga ma foia tiga uma o loo feagai ma tagata?

 [Ē Ana le Ata i le itulau 2]

Faavaa ma le itulau e 32: Reuters/Nikola Solic/Archive Photos

[Ē Ana le Ata i le itulau 3]

A. Boulat/Sipa Press