Aisea ua Matuā Utiuti ai le Taimi?

TAIMI. E ono faafaigatā ona tatou faamatalaina ma le saʻo lelei le uiga o le upu, peitaʻi ua tatou mautinoa lelei e foliga mai e lē o tāitai ona lava le taimi o loo tatou mauaina. Ua tatou iloa foi e vave tele le alu a le taimi. O le mea moni, e masani ona tatou faapea ifo, “O le matuā vave lava o le alu a le taimi.”

E ui i lea, e foliga mai sa sili ona saʻo le manatu o le fatusolo Peretania o Austin Dobson ina ua ia taʻua i le 1877 e faapea: “Ua mou atu le taimi, o lau tala lea a ea? Oi e leai! E tumau pea le taimi, ae o tatou e mou atu.” Talu mai lona maliu i le 1921, ua toetoe 80 tausaga talu ona mavae atu Dobson; ae o loo faagasolo pea le taimi.

O Loo Tele le Taimi

Ua taʻu mai ia i tatou e le Tusi Paia, e tusa ai o Lē na Foafoaina le tagata e faapea: “A o leʻi fanaua mai mauga, e leʻi faia foi e oe le lalolagi ma le atu laulau, o le Atua oe mai taimi e lē gata mai e oo atu i taimi e lē gata mai.” (Salamo 90:2, NW) Pe e pei foi ona faaupu ai e le New Jerusalem Bible, “o le Atua oe mai le vavau e oo i le faavavau.” O le a faaauau pea ona iai le taimi e pei ona iai pea le Atua lava ia—e faavavau!

I se matuā tuufaafeagai mai le Atua, o lē na te pulea le tulaga e faavavau o le taimi, ua tatou faitau ai e uiga i tagata e faapenei: “Auā ua mavae atu o matou aso uma a o e toasa mai; ua uma atu o matou tausaga e pei o se manatu. O tausaga o matou olaga e fitugafulu ia tausaga; a e afai e valugafulu tausaga ona o le malosi, a o lo latou malosi o i ai le tiga ma le puapuaga; auā e vave ona mavae atu ia, ma matou lele ese.”—Salamo 90:9, 10.

Aisea ua matuā puupuu ai le olaga i aso nei, ae o lea e manino le aʻoaʻoina e le Tusi Paia faapea o le fuafuaga a le Atua, ia ola e faavavau le tagata? (Kenese 1:27, 28; Salamo 37:29) Na i lo se olaga e lē faatapulaaina lona umi e pei ona sa fuafua ai e le Atua, aisea ua ola ai tagata i se umi, a lelei lava le olaga, o le itiiti ifo i le 30,000 aso? Aisea ua matuā utiuti ai le taimi e ola ai tagata? O ai, pe o le ā, e tuuaʻia mo lenei tulaga faanoanoa? O loo saunia mai e le Tusi Paia ni tali manino ma le faamalieloto. *

Ua Atili Utiuti Lava le Taimi

O le a faamautinoa mai e le ʻau matutua e faapea, i le faitau sefulu o tausaga talu ai nei, ua vave tele le gasologa o le olaga. Na taʻua e se tagata o lē na te sailia tala fou mo  le faasalalauina, o Dr. Sybille Fritsch e faapea, a o faagasolo le 200 tausaga talu ai, ua paʻū ifo itula faigaluega i le vaiaso mai le 80 i le 38 itula, “peitaʻi e lē o muta ai lava lo tatou faitio i le lē lava o le taimi.” Sa ia faamanino mai: “E lē o lava le taimi; e tāua tele le taimi; e matuā manaʻomia le taimi e pei ona matuā manaʻomia ona mānava; o se olaga ua matuā faanatinati lava.”

O fausaga fou ua mafai ai ona maua ni avanoa ma ni mea e mafaia sa leʻi mafaufauina lava e augātupulaga muamua atu. Peitaʻi, o le tele o le avanoa e auai ai i ni gaoioiga se tele, o le tele foi lena o le lē fiafia ona o le utiuti o le taimi e faia ai na gaoioiga. I aso nei, i le tele o vaega o le lalolagi, o loo ola ai tagata i se faasologa e matuā faanatinati mea uma e fai e tusa o le taimi faatulagaina. E tatau ona tā le 7:00 i le taeao ua alu ese atu Tamā mo le galuega, e tatau ona tā le 8:30 i le taeao ua alu Tinā e momoli tamaiti i le aʻoga, o Tamā Matua e tatau ona alu e vaai le fomaʻi pe a tā le 9:40 i le taeao, ma o tatou uma e tatau ona tapenapena mo se sauniga tāua i le 7:30 i le afiafi. E uma ane na gaioiga faanatinati uma e tulituli ai fuafuaga i o latou taimi, ua toetoe lava leai se taimi e totoe mo sina mālōlōga. Ae o loo tatou ōi foi i le fiu ma le vāivai mai le tele o mea na fai i aso taʻitasi.

E Lē na o Tatou e Utiuti le Taimi

O le Fili o le Atua, o Satani le Tiapolo, o lē ana le faufauga ua māfua ai ona faapuupuuina le umi o le olaga o le tagata, ua oo nei ina toe lavea i lana lava mea leaga na fai. (Faatusatusa i le Kalatia 6:7, 8.) I le taʻuaina o le fanau mai o le Malo Faa-Mesia i le lagi, ua aumai ai e le Faaaliga 12:12 ia i tatou se pogai mo le faamoemoe ina ua faapea mai: “O le mea lea ia outou olioli ai, le lagi e atoa ma e ua nonofo ai! Oi talofa ia te oulua le fanua ma le sami, auā ua alu ifo ia te oulua le tiapolo ua lotoa tele, auā ua na iloa ua saasaa ona po.”

I le faasologa o taimi e tusa ai o mea tutupu i talafaasolopito maufaatuatuaina a le Tusi Paia ma le faataunuuga o valoaga a le Tusi Paia, ua tatou ola nei i le faaiʻuiʻuga o lena “saasaa [o] ona po.” Maʻeu se olioli i le iloaina, ua toe o se āga ona faamutaina atoatoa loa lea o le taimi lea e saʻoloto ai Satani! O le taimi lava e lafo ai o ia i le to e lē gata, o le a toe faafoisia ai loa tagata usiusitaʻi i le lelei atoatoa, ma mafai ai ona latou maua le ola e faavavau lea na fuafuaina e Ieova mo i latou i le amataga. (Faaaliga 21:1-4) O le a lē toe avea le lē lava o le taimi o se faafitauli.

Pe mafai ona faaāta i lou mafaufau le mea o le a uiga i ai le ola e lē gata mai—le ola e faavavau? O le a lē tāitai ona e toe pagātia ona o ni mea ua tuu e leʻi faia. Afai e te manaʻomia atili se taimi, o le a iai lava le isi aso a taeao, po o le isi vaiaso o i luma, po o le isi tausaga o i luma—ioe, se olaga tele e faavavau o loo i luma mo oe!

Le Faaaogāina ma le Atamai o le Taimi o Loo Tatou Maua Nei

Ona ua iloa lelei e Satani e lē o toe tele sona taimi o totoe na te uunaiʻa ai tagata, o lea ua ia taumafai ai e faapisi olaga o tagata ina ia leai se taimi latou te faalogo atu ai i le tala lelei o le Malo ua faavaeina o le Atua. O lea, e lelei ai pe a tatou utagia le fautuaga tauatua: “Ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; ia faaaogaina e outou aso o lenei olaga, auā o ona po nei ua leaga. O lenei, aua neʻi faavalea outou, a ia outou iloa le finagalo o le Alii.”—Efeso 5:15-17.

Maʻeu le matuā tāua o lo tatou faaaogāina ma le atamai o le taimi mo mea e sili ona tāua na i lo le faamāumau i le sailia o mea e leai ni aogā ma leai se manuia tumau e maua mai ai! E tatau ona tatou ati aʻe le uiga lea sa ia Mose ina ua ia ʻaiʻoi atu ia Ieova i nei upu mai lona loto: “Ia faapea ona e aʻoaʻo mai ia i matou e faitauina o matou aso, ina ia maua ai le poto i o matou loto.”—Salamo 90:12.

O le mea moni, i le lalolagi i aso nei, o loo pisi uma tagata. Ae ui i lea, o loo uunaiʻa malosi oe e Molimau a Ieova ina ia faaalu sina vaega o lou taimi tāua ina ia e iloa ai mea o loo manaʻomia e le Atua mo le mauaina o le ola e faavavau i lalo o le pulega a lona Malo. O se itula o le vaiaso e fāifai pea ona faaalu i le suʻesuʻeina o le Tusi Paia, ina ia “iloa le finagalo o le Atua,” e ono mafai ai ona e tofo lava oe i le faataunuuga o nei upu: “Ia e ʻalo ese i mea leaga, ma e faia mea lelei; e te mau ai e faavavau. E fai lava le nuu mo tagata amiotonu, e nonofo ai pea i latou.”—Salamo 37:27, 29.

[Faaopoopoga i lalo]