“E Iai le Taimi Atofaina mo Mea Uma”

“E iai le taimi atofaina mo mea uma, e iai foi le taimi mo mea uma lava e fai i lalo o le lagi.”—FAILAUGA 3:1, NW.

1. O ā faigatā o loo fesagaʻi ma tagata lē lelei atoatoa, ma o ā tulaga ua oo atu i ai ona o lenei mea?

E MASANI ona faapea mai tagata, “sa tatau lava ona ou vave faia.” Pe faapea foi ina ua uma ona tupu se mea, “sa tatau lava ona ou faatali.” O na lagona faaalia e faataʻitaʻia mai ai le faafaigatā mo tagata lē lelei atoatoa ona iloa tonu le taimi saʻo e fai ai nisi o mea. O lenei tulaga faatapulaa ua māfua ai le malepelepe o faiā. Ua oo ai i ni lagona tigā ma lagona fiu. Ae o le itu e sili ona leaga, ua faavāivaia ai le faatuatua o nisi tagata ia Ieova ma lana faalapotopotoga.

2, 3. (a) Aisea o se ala atamai ai le taliaina o le auala o loo filifilia ai e Ieova taimi atofaina? (e) O le ā le vaaiga paleni e tatau ona ia i tatou e tusa ai o le faataunuuga o valoaga a le Tusi Paia?

² Talu ai ua ia Ieova le atamai ma le malamalama lea e lē o maua e tagata, ua mafai ai ona ia muaʻi silafia, pe afai o lona finagalo lea, le iʻuga o gaoioiga uma. E mafai ona ia silafia “mai le amataga o mea e mulimuli.” (Isaia 46:10) O lea, e mafai ai ona ia filifilia e aunoa ma se sesē le taimi e sili ona lelei e fai ai so o se mea ua ia finagalo e fai. O lea la, na i lo le faatuatua atu i a tatou lava faauigaga sesē o taimi, e atamai pe a tatou talia le auala o loo filifilia ai e Ieova taimi atofaina!

³ Mo se faaaʻoaʻoga, o Kerisiano e taʻumatuaina latou te faatalitali ma le faamaoni i le taimi atofaina a Ieova e faataunuu ai nisi valoaga a le Tusi Paia. Latou te faia le tele o galuega i lana auaunaga, ae o loo manino pea i o latou mafaufau le mataupu silisili i le Auega 3:26 e faapea: “E lelei ona faamoemoe ma le faalologo i le olataga mai ia Ieova.” (Faatusatusa i le Sapakuka 3:16.) I le taimi e tasi, ua latou talitonu ma le mautinoa, o le faaooina mai o sala o le faamasinoga a Ieova lea na folafola mai, “e ui lava ina tuai mai, . . . e oo mai lava, e le faatuai mai.”—Sapakuka 2:3.

4. E tatau faapefea ona fesoasoani le Amosa 3:7 ma le Mataio 24:45 ia i tatou ina ia faatalitali atu ai ma le onosaʻi ia Ieova?

⁴ Ae i le isi itu, pe afai e lē mafai ona tatou malamalama atoatoa i nisi o mau po o ni faamalamalamaga a le Tusi Paia ua aumaia i lomiga a le Olo Matamata, pe iai ea la se māfuaaga tatou te lē onosaʻi ai? O se gaoioiga o le atamai le faatalitali atu i le taimi atofaina a Ieova e faamanino ai mataupu. “E le faia lava se mea e le Alii o Ieova, a e faaalia lona finagalo i ana auauna o perofeta.” (Amosa 3:7) Maʻeu se folafolaga inā ofoofogia! Peitaʻi e tatau ona tatou iloa lelei e faaalia mai e Ieova ana mataupu faalilolilo i le taimi na te silafia ua talafeagai. O le fuafuaga lena ua tuu atu ai e le Atua le pule i le “auauna faamaoni ma le mafaufau” ina ia saunia mo ona tagata “a latou mea e ʻai i ona itu aso.” (Mataio 24:45) O lea la, e leai se mafuaaga tatou te soona popolevale ai, pe soona atuatuvale foi, faapea e leʻi matuā manino mai le faamalamalamaina o nisi mataupu. Na i lo lea, e mafai ona tatou mautinoa pe afai tatou te faatalitali ma le onosaʻi ia Ieova, o le a ia saunia, e ala mai le auauna faamaoni, mea o loo manaʻomia “i ona itu aso.”

5. O le ā le aogā o le talanoaina o le Failauga 3:1-8?

⁵ Sa taʻua e le tupu poto o Solomona ni mea eseese e 28, o nei mea taʻitasi e tofu lava ma  lona “taimi atofaina.” (Failauga 3:1-8, NW) O lo tatou malamalama i le uiga ma faatatauga o mea na taʻua e Solomona, o le a fesoasoani lena ia i tatou e iloa ai le taimi tonu ma le taimi sesē mo nisi gaoioiga e pei ona silasila i ai le Atua. (Eperu 5:14) O le iʻuga, o le a tatou maua ai se avanoa ina ia faatulaga o tatou olaga ia ōgatusa ma na mea.

“O le Taimi e Tagi ai, ma le Taimi e ʻAtaʻata Ai”

6, 7. (a) O le ā ua māfua ai i aso nei ona ‘fetagisi’ tagata o loo manatunatu mamafa? (e) O faapefea ona taumafai le lalolagi e tau faamāmā le matuiā o tulaga ia ua latou iai nei?

⁶ E ui ina iai “le taimi e tagi ai, ma le taimi e ʻataʻata ai,” ae o ai se tasi e lē sili ia te ia le manaʻo i le taimi e ʻataʻata ai, na i lo le taimi e tagi ai? (Failauga 3:4, NW) E faanoanoa e faapea atu, o loo tatou ola i se lalolagi ua tele ina aumaia ai ia i tatou mafuaaga e tagi ai. Ua sili atu ona tele tala faanoanoa i faasalalauga. Ua tatou matuā fefefe a o faalogo atu i tala e faatatau i tamaiti talavou o loo tafanaina isi tamaiti aʻoga i a latou aʻoga, o tala i mātua o loo faia faiga leaga i a latou fanau, o tagata faatupu faalavelave o loo fasiotia ma faapogaia ni manuʻaga ogaoga tumau i nisi tagata e aunoa ma se māfuaaga, faapea foi mala faalenatura ua matuā faatamaʻia ai ola o tagata ma meatotino. O āta o tamaiti ua totō mata ona o le matelāina ma tagata ua tutuli ese mai o latou atunuu ma o loo sulufaʻi solo ua lē masino i la tatou vaai a o matamata atu i televise. O taʻu e pei o fasiotigā tagata i le va o ituaiga, le AIDS, o siama mataʻutia ua fai ma auupega o faiga taua, ma le El Niño, o taʻu na sa leʻi masani ai muamua, ae o lenei ua faapogai ai popolega i o tatou mafaufau ma loto—e tofu lava le mea ma lona tulaga e mataʻutia ai.

⁷ O le mea mautinoa lava, ua faatumulia le lalolagi i aso nei i mala ma lagona tigā. Ae ui i lea, i se faiga e peiseaī o loo tau faamāmā ai le matuiā o tulaga o loo iai, ua masani ai ona faaali e le ʻau faifaafiafiaga ni āta e matuā leai lava se aogā, e matagā, o le tele o taimi o ni āta o amioga lē mamā ma faiga sauā, ua fuafua e tataʻi ese ai o tatou mafaufau ina ia lē amanaʻia mafatiaga ia o loo mafatia ai isi. Peitaʻi o lagona fiafia e aunoa ma ni popolega, na o loo maua i tausuaga valea ma taliega matagā o loo aumaia e na faafiafiaga, e lē tatau ona fenumiaʻia ma le olioli moni. O le olioli lea e avea ma fua o le agaga o le Atua o se mea e lē mafai lava ona aumaia e le lalolagi a Satani.—Kalatia 5:22, 23; Efeso 5:3, 4.

8. Pe e tatau i Kerisiano i aso nei ona tuu le faamuamua i le tagi po o le ʻataʻata? Faamatala mai.

⁸ I le iloaina o le tulaga pagatia ua iai le lalolagi, e mafai ai ona tatou malamalama, o aso nei ua lē talafeagai ona avea ma taimi e soona faatāuaina ai le ata. E lē o se taimi e ola ai mo na o faiga mālōlōga ma faafiafiaga, pe ina ia avea ai le ‘mauaina o se taimi fiafia’ o se mea e sili atu na i lo le sailia o mea faaleagaga. (Faatusatusa i le Failauga 7:2-4.) Na faapea mai le aposetolo o Paulo: “O e fetagofi i mea a le lalolagi nei, ia peiseai ua le fetagofi i ai.” Aisea? Auā “o le a mavae atu le tu o le lalolagi nei.” (1 Korinito 7:31) O Kerisiano moni latou te ola i aso taʻitasi ma le malamalamaga atoatoa  i le tāua o taimi nei o loo tatou ola ai.—Filipi 4:8.

E Ui Ina Fetagisi, ae o Loo Fiafia Moni!

9. O le ā le tulaga faanoanoa sa iai i ona po a o leʻi oo mai le Lolo, ma o le ā le uiga o lena mea mo i tatou i aso nei?

⁹ O tagata na ola i le vaitaimi na oo mai ai le Lolo i le lalolagi aoao sa leʻi matuā uigā ia i latou le olaga. Sa fai a latou lava faasologa masani i aso taʻitasi ae ua lē fetagisi ai pe ʻinoʻino i le ‘leaga tele sa iai tagata i le lalolagi,’ ma sa lē āno ane a o ‘tumu le lalolagi i le sauā.’ (Kenese 6:5, 11) O le tulaga faanoanoa lena sa faasino atu i ai fetalaiga a Iesu, ma ia valoia ai se uiga foʻi faapena o le a faaalia e tagata i o tatou aso. Na ia lapataʻi mai e faapea: “E pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, na le iloa foi e i latou ina seia oo le lolo, ma aveesea i latou uma; e faapea foi pe a sau le Atalii o le tagata.”—Mataio 24:38, 39.

10. Na faapefea e tagata Isaraelu na ola i aso o Hakai ona faaalia mai lo latou lē talisapaia o le taimi atofaina a Ieova?

¹⁰ I ni tausaga pe ā ma le 1,850 talu ona mavae le Lolo, i aso o Hakai, e toʻatele tagata Isaraelu sa latou faaalia foi se uiga faapena o le leai o se manatu mamafa mo mea faaleagaga. Sa latou pisi naʻuā e saili o latou lava faanaunauga, ma galo ai ia i latou o le taimi lea sa latou ola ai, o se taimi sa tatau ona avatu ai le faamuamua i manaʻoga o Ieova. E faapenei ona tatou faitau i ai: “O loo faapea mai, Ua fai mai lenei nuu, E lei oo i ona aso, o aso e fai ai le fale o Ieova. Ona au mai ai lea o le afioga a Ieova e le perofeta o Hakai, o loo faapea, O ona po nei ea tou te nonofo ai i o outou fale ua tāpapa, a o lenei fale ua faatafunaina. O lenei, o loo faapea ona fetalai mai o Ieova o ʻau, Ia outou mafaufau i o outou ala.”—Hakai 1:1-5.

11. O ā fesili e ono talafeagai ona tatou fesiligia ai i tatou lava?

¹¹ I le avea o i tatou o Molimau a Ieova i aso nei, faatasi ai ma o tatou tiute tauave ma faaeaga i luma o Ieova e pei foi ona sa iai i le fanauga a Isaraelu i taimi o Hakai, o le a lelei ai foi mo i tatou ona mafaufau mamafa i o tatou ala, ma ia faia ma le uigā. Po o tatou ‘fetagisi’ ea ona o tulaga o loo iai le lalolagi ma le taʻuvalea ua aumaia e nei mea i le suafa o le Atua? Po o tigā ea o tatou loto pe a faafitia e tagata le soifua mai o le Atua po o lo latou lē amanaʻia ma le loto maaa o ana mataupu silisili amiotonu? Po o tatou faaalia ea uiga e pei ona sa faaalia e tagata na faailogaina, lea na vaaia e Esekielu i se faaaliga i le 2,500 tausaga ua mavae? E uiga ia i latou na ua tatou faitau ai e faapea: “Ona fetalai mai lea o Ieova [i le tagata o loo ia te ia le fagu vaitusi a le tusiupu], Ina ui ane ia i totonu o le aai, i totonu lava o Ierusalema, ma e faailogaina muaulu o tagata o e mapuitiga, ma feoi ona o mea inosia uma ua latou fai i ai.”—Esekielu 9:4.

12. O le ā le uiga tāua o i le Esekielu 9:5, 6 mo tagata i aso nei?

¹² O le faauigaina o lenei tala mo i tatou i aso nei ua oo ina manino mai a o tatou faitauina faatonuga na avatu i tane e toʻaono ia sa tofu ma lana mea e fasi aʻi: “Ui ane ia outou i le aai, ia mulimuli atu ia te ia, ma ia outou fafasi; aua tou te faasaoina, aua le faapelepeleina. Ia  outou matuā fasiotia lava toeaina, ma taulelea, ma taupou, ma tama iti, atoa ma fafine; a e aua le faalatalata i se tagata ua i ai le faailoga; ia amata foi i loʻu malumalu.” (Esekielu 9:5, 6) O lo tatou faasaoina atu i lena puapuaga tele ua matuā vave mai lava, e faalagolago i lo tatou amanaʻia e faapea, o aso nei ua avea ma taimi patino e fetagisi ai.

13, 14. (a) O ā ituaiga o tagata na taʻu atu e Iesu faapea o loo fiafia? (e) Ia faamatala mai le pogai e te manatu ai e fetaui lelei lenei faamatalaga i Molimau a Ieova.

¹³ O le mea moni, o le ‘fetagisi’ o auauna a Ieova ona o le tulaga faanoanoa ua iai mataupufai a le lalolagi e lē faapea ua taofia mai ai lo latou fiafia. E matuā tuufaafeagai lava! O le mea moni, o i latou o tagata o loo sili atu ona fiafia i luga o le lalolagi. Na taʻu mai e Iesu māfuaaga moni mo le fiafia ina ua ia fetalai: “E fiafia o ē iloa o latou manaʻoga faaleagaga, . . . o ē faanoanoa, . . . o ē agamalu, . . . o ē fia ʻaai ma fia feinu i le amiotonu, . . . o ē alolofa atu, . . . o ē loto mamā, . . . o ē faatupuina le filemu, . . . o ē ua sauāina ona o le amiotonu.” (Mataio 5:3-10, NW) O loo tele faamaoniga e faaalia ai o lenei faamatalaga e sili atu ona fetaui tonu i Molimau a Ieova, i lo latou tulaga tuufaatasi, na i lo se isi lava faalapotopotoga faalotu.

¹⁴ Ae maise lava talu mai ona toe faafoisia le tapuaʻiga moni i le 1919, ua maua ai e tagata fiafia o Ieova se māfuaaga e “ ʻataʻata” ai. I le itu faaleagaga, ua latou tofo i mea mananaia na tofo i ai i latou na toe taliu ane mai Papelonia i le senituri lona ono T.L.M.: “Na faafoisia mai e Ieova o Siona nai le tafeaga, ona tusa ai lea o i tatou ma tagata ua fai a latou miti. Ona tumu ai lea o tatou gutu i le featani, ma o tatou laulaufaiva i le leo fiafia. . . . Ua faia e Ieova mea tetele mo i tatou; ua tatou fiafia ai.” (Salamo 126:1-3) Peitaʻi, e tusa lava pe o matuā fiafia faaleagaga, ae atamai ona manatua pea e Molimau a Ieova le tāua o taimi o loo iai. O le taimi lava e oo moni mai ai le lalolagi fou ma maua e i latou o le a ʻaināina le lalolagi “le ola moni,” ona oo mai lea o le taimi o le a suia ai le tagi e avea ma ata e faavavau.—1 Timoteo 6:19; Faaaliga 21:3, 4.

“O le Taimi e Feāsogi ai, ma le Taimi e Lē Feāsogi Ai”

15. Aisea e filifilia ai ma le faaeteete e Kerisiano a latou uō?

¹⁵ E filifilia ma le faaeteete e Kerisiano po o ai latou te faaaofiaina i a latou faigauō. E teu pea i o latou mafaufau le lapataʻiga a Paulo e faapea: “Aua neʻi faaseseina outou, ‘O le feoai ma e amio leaga e leaga ai amio lelei.’” (1 Korinito 15:33) Na taʻua foi e le tupu poto o Solomona e faapea: “O lē latou te feoai ma tagata popoto, e poto lava ia; a o le uo a e valelea, e leaga ai lava ia.”—Faataoto 13:20.

16, 17. O le ā le manatu o Molimau a Ieova i faigauō, o tuugātala, ma faaipoipoga, ma aisea?

¹⁶ E filifili auauna a Ieova e faauō atu i tagata o ē tutusa lo latou alolofa ia Ieova ma lana amiotonu. A o latou talisapaia ma olioli i faauōga a a latou uō, latou te ʻalofia foi ma le atamai le manatu tuufau ma le lē pulea lelei e faatatau i tuugātala ua taatele i nisi atunuu i aso nei. Na i lo le matuā faamalieina ai e peiseaī o se fiafiaga e lē āfaina ai, ae ua latou manatu  i tuugātala o se laasaga uigā e agaʻi atu ai i le faaipoipoga, e faatoʻā uia lava pe afai ua nofo sauni se tasi i lona tino, le mafaufau, ma le faaleagaga—ma o loo saʻoloto foi e tusa o āiāiga faale-Tusi Paia—e ulu atu i se faiā tumau faalefaaipoipoga.—1 Korinito 7:36.

¹⁷ E ono manatu nisi faapea ua pasiā lena manatu e faatatau i tuugātala ma faaipoipoga. Peitaʻi e lē faatagaina e Molimau a Ieova aafiaga mai a latou aumea e taaʻina ai a latou filifiliga i uō po o a latou faaiʻuga e tusa ai o tuugātala ma faaipoipoga. Ua latou iloa, “e taʻuamiotonuina le poto i ana galuega.” (Mataio 11:19, LF) E silafia e Ieova mea e sili ona lelei i taimi uma, o lea ua latou faatāuaina ai lana fautuaga ina ia faaipoipo “tau lava i le ua i le Alii.” (1 Korinito 7:39; 2 Korinito 6:14) Latou te lē vavevave e faaipoipo faatasi ai ma se manatu sesē faapea o le talagā faaipoipoga po o se teteʻaga o ni itu e talafeagai ona uia pe a oo ina tulaga faaletonu le faaipoipoga. Latou te faaaluina o latou taimi e sailia ai se paaga talafeagai, ona ua latou iloa lelei, o le taimi lava e fai ai tautoga o le faaipoipoga, o le taimi foi lena e faatatauina ai le tulafono lenei a Ieova: “O lea e le toe toalua ai, a o le tino e tasi i laua; o lenei, o e ua faatasia e le Atua, aua neʻi faateaeseina e se tagata.”—Mataio 19:6; Mareko 10:9.

18. O le ā e mafai ona avea ma amataga mo se faaipoipoga fiafia?

¹⁸ O le faaipoipoga o se feagaiga mo le olaga atoa e matuā onomea ona fuafuaina ma le faaeteete. O le a talafeagai i se alii ona fesili ifo ia te ia lava, ‘Po o ia tonu lava le tamaʻitaʻi ua talafeagai mo aʻu?’ Ae faapena tonu foi le tāua o lona fesili ifo, ‘Po o aʻu tonu lava le alii ua talafeagai mo ia? Po o aʻu ea o se Kerisiano taʻumatuaina o lē e mafai ona tausia ona manaʻoga faaleagaga?’ E iai uma ia i laʻua o le a avea ma paaga se avega tauave i luma o Ieova ina ia la malolosi faaleagaga, ia mafai ona la fafau aʻe se faatasiga mausalī o le faaipoipoga, lea e mauaina ai le finagalo malie o le Atua. E faitauafe ulugalii Kerisiano e mafai ona molimau mai o le faiva faataimi atoa o se amataga sili lea ona lelei mo se faaipoipoga fiafia, ona o loo faatāuaina ai le foaʻi atu na i lo le talia mai.

19. Aisea ua nonofofua ai pea nisi Kerisiano?

¹⁹ O nisi Kerisiano ‘ua lē feāsogi’ e ala i le filifili e nonofofua pea ona o le tala lelei. (Failauga 3:5) O isi ua toe tolopō a latou faaipoipoga seʻi oo ina latou lagona ua latou agavaa faaleagaga e tosina atu i se paaga e fetaui. Ae ia tatou manatua foi Kerisiano nofofua o ē o loo faanaunau atu mo ni mafutaga māfana ma ni manuia e maua mai le faaipoipoga, ae pagā lea ua lē mafai ona maua se paaga. E mafai ona tatou mautinoa, o loo fiafia mai le finagalo o Ieova ia i latou, talu ai lo latou lē lafoaʻia o mataupu silisili tauatua ona o le sailia o ni a latou faaipoipoga. E lelei foi ona tatou talisapaia lo latou faamaoni ma ia ofo atu ia i latou faalaeiʻauga talafeagai ua onomea ona latou mauaina.

20. Aisea e oo ai lava i paaga faaipoipo ua iai foi ni taimi e “lē feāsogi ai”?

²⁰ Pe tatau ea i ulugalii faaipoipo ona iai foi ni taimi e ‘lē feāsogi’ ai? E foliga mai o le manatu lena, auā na taʻua e Paulo faapea: “O laʻu lenei e fai atu ai, le au uso e, ua itiiti ona aso ua totoe; o lenei, o e ua fai avā, ia peiseai ua le fai avā.” (1 Korinito 7:29) O lea la, e iai ni taimi e tatau ai ona faatulaga lua fiafiaga o se faaipoipoga ae faamuamua tiute tauave faatiokarate. O se vaaiga paleni i lenei mataupu o le a lē faavaivaia ai se faaipoipoga, ae faamalosia ai auā e fesoasoani e faamanatu atu ai i paaga uma e  toʻalua, e ao lava ona avea Ieova ma faauluuluga i la laʻua faiā.—Failauga 4:12.

21. Aisea e lē tatau ai ona tatou faamasinosino atu i ulugalii i le mataupu o le faia o ni fanau?

²¹ E lē gata i lea, e iai nisi ulugalii faaipoipo ua lē faia ni a latou fanau, ina ia tele so latou saʻolotoga e faaauau ai pea la latou auaunaga i le Atua. O lona uiga ua latou faia se faataulagaina, ma o le a tauia mai foi i latou e Ieova. Manatua foi, e ui ina faalaeiʻauina e le Tusi Paia le nofofua ona o le tala lelei, ae leai se faamatalaga tuusaʻo o taʻua ai le lē faia o ni fanau ona o le tala lelei. (Mataio 19:10-12; 1 Korinito 7:38; faatusatusa i le Mataio 24:19 ma le Luka 23:28-30.) O lea la, e ao i ulugalii faaipoipo ona fai a latou lava filifiliga e faavae aʻe i o latou tulaga totino ma faalogona o o latou lava loto fuatiaifo. Po o le ā lava la lena filifiliga, e lē tatau ona faitioina ai fua ulugalii faaipoipo.

22. O le ā e tāua mo i tatou ona iloa?

²² Ioe, “e iai le taimi atofaina mo mea uma, e iai foi le taimi mo mea uma lava e fai i lalo o le lagi.” E iai foi “le taimi mo le taua, ma le taimi mo le filemu.” (Failauga 3:1, 8, NW) O le mataupu o loo sosoo mai o le a faamalamalama ai le māfuaaga e tāua ai mo i tatou ona iloa po o lē fea o na taimi o loo tatou ola ai nei.

Pe Mafai Ona E Faamatala?

□ Aisea e matuā tāua ai ona tatou iloa “e iai le taimi atofaina mo mea uma”?

□ Aisea ua avea tonu ai aso nei ma ‘taimi e fetagisi ai’?

□ Aisea e ui ai ina ‘fetagisi’ Kerisiano, ae o loo fiafia moni lava i latou?

□ Ua faaalia faapefea e nisi Kerisiano lo latou manatu i aso nei o “le taimi e lē feāsogi ai”?

[Fesili mo le Suʻesuʻega]

[Ata i le itulau 6, 7]

E ui ina ‘fetagisi’ Kerisiano ona o tulaga o loo iai le lalolagi . . .

. . . ae o le mea moni lava o i latou o tagata o loo sili atu ona fiafia i le lalolagi

[Ata i le itulau 8]

O le faiva faataimi atoa o se faavae sili ona lelei mo se faaipoipoga fiafia