Tupua Tauatua ma le Fuafuaga a le Atua

PE AFAI e lē iloa e se tasi le tali, ona avea lea ma luʻitau; ae afai na te iloaina, e lē o se luʻi la mo ia. O le ā lena mea? O se tupua.

E tusa ai ma le manatu o tagata e lē manatu mamafa i ona po nei, ua vaai ai tagata i matemategā tupua o ni taaloga a tamaiti, ae i taimi anamuā o le tupua “sa o se tofotofoga o le atamai,” e pei ona taʻua ai e le Interpreter’s Dictionary of the Bible.—Faatusatusa i le Faataoto 1:5, 6.

Na i lo le faailoa saʻo mai o lona finagalo po o ana fuafuaga, i nisi o taimi e faafaigatā ma le loto i ai e Ieova ana fetalaiga faavaloaga, i le faaaogāina o faatusatusaga, o “afioga e lē o manino mai,” po o faataoto e lavelave. (Salamo 78:2, King James Version; Numera 12:8, The Emphasized Bible) O le mea moni, e ui o le upu Eperu mo tupua ua faaaogāina i le na o le faasefulufitu taimi i le Tusi Paia, ae o le mea moni lava ua matuā faatumulia le Tusi Paia i tupua ma faataoto.

E Anoanoaʻi Tupua Faale-Tusi Paia

Na lipotia mai le mafai e le tupu o Solomona ona taliina fesili e oo lava i fesili e sili ona faigatā, po o tupua, na tuuina atu ia te ia. (1 Tupu 10:1, faaopoopoga i le pito i lalo, NW) Ma le mautinoa na māfua lenei mea ona o le atamai mai le Atua. Afai e faamaonia lipoti a tusitala o talafaasolopito anamua faapea na faatasi ona toʻilalo Solomona i se la matemategā tupua ma le tupu o Hiramo o Turo, e foliga mai na tupu lena mea ina ua lē toe iai ia te ia le agaga o Ieova ona o lona tulaga faaaposetasi. Sa faaalia se naunau fiafia faapena o le faamasino o Samasoni i matemategā tupua. I se tasi taimi, ona o le faamalosia e le agaga paʻia, na saunia ai e se tupua le avanoa mo ia e tāmau ai le mataʻu i loto o fili o le Atua.—Faamasino 14:12-19.

Peitaʻi, e tele tupua faale-Tusi Paia, o loo aafia tuusaʻo ai fuafuaga a Ieova. Mo se faaaʻoaʻoga, seʻi tomānatu i le Kenese 3:15. O lenei valoaga, lea o loo faavae aʻe ai le matua o le Tusi Paia, o loo avea foʻi e pei o se misitelio, o se “mealilo paia.” (Roma 16:25, 26) E lē gata na faaali atu i le aposetolo o Paulo ni vaaiga ma ni faaaliga mataʻutia, ae na ia vaai foʻi i vala patino o le fuafuaga a le Atua i ‘vaaiga faanenefu,’ po o lona uiga moni lava, o se “faamatalaga lavelave.” (1 Korinito 13:12; 2 Korinito 12:1-4) Ae faapefea le mau taumatematega e faatatau i le numera lilo o le manu feai—“ono selau ma le onogafulu ma le ono”—lea na faafuaseʻi ona faailoa mai ma e aunoa ma se faamalamalamaga i le Faaaliga 13:18? O ai na te mafaia ona faamatalaina nei tupua tauatua, ma o le ā lo latou fuafuaga na ala ai ona fai?

Malamalama i Mealilo Paʻia

Mo le toʻatele o i tatou, o le vaai o le lagona pito sili lea ona aogā i lagona uma e lima. Ae a lē seanoa ma le malamalama, ua lē aogā le vaai a le tagata. O le a toetoe lava o tatou tauaso. E faapena foʻi le mafaufau o le tagata. O loo iai se tomai mataʻina na te faavasega ai mea, faatatau mafaufauga talafeagai, ma foʻia ai ni mea lavelave. Peitaʻi, e iai se isi mea e sili atu e manaʻomia ina ia malamalama ai i mealilo paʻia. E ui atonu e tuuina mai e nisi ni tali i tupua o loo taʻua i le Tusi Paia, ae na o lo latou Tusitala, o Ieova, le Atua o le malamalama, na te mafaia ona faaalia lo latou uiga moni.—1 Ioane 1:5.

O le mea e faanoanoa ai, ua tele lava ina faamaualuluga naʻuā tagata ma fia tutoʻatasi ua lē fia faatalitali atu ia Ieova mo ni tali. Ona o le naunau fia iloa i mealilo, ua saili atu ai nisi i tali atamai e faagaee ai le fiafia ae lē faapea ai ua avea o ni mea moni, ua saili atu i ni tali e lē mai le  Afioga a le Atua. Mo se faataʻitaʻiga, o faiga faalilolilo faa-Iutaia o loo i le Cabala ua tau mafaufau ai nisi i le uiga faapitoa faataulāitu o numera ma mataʻitusi o loo i le alafapeta faa-Eperu. Ae i le isi itu, na faaaogā e le ʻau Gnostic o le senituri lona lua, Tusitusiga Eperu ma Tusitusiga Eleni i se taumafaiga ina ia maua mai ai uiga lilo.

Peitaʻi, o na sailiiliga uma, na taʻitaʻi atili atu ai i latou i faiga faalotu faapaupau po o faiga faanuupo ma agaʻi ese ai mai le upu moni tauatua. ‘Ioe, afai ua tumu le lalolagi i le amioleaga,’ ua manatu la tagata Gnostic, ‘o Lē na Foafoaina le lalolagi, o Iauē, e lē mafai ona avea ma se Atua lelei.’ Pe o se faaiʻuga e aupito sili ona lelei ea lenei e mafai ona latou faia? Pagā le papaʻu o mafaufauga faaletagata! E lētioa lapataʻi malosi atu le aposetolo o Paulo i ana tusi, ina ua ia finau atu ai e faatatau i manatu faaaposetate na mulimuli ane aliaʻe mai i vaega faa-Gnostic e faapea: “Ia le sili lo outou manatu i le mea ua tusia”!—1 Korinito 4:6.

Faamalamalamaina o “Afioga e Lē o Manino Mai”

E ui i lea, aisea o le a fetalai ai se Atua o le malamalama i ni “afioga e lē o manino mai”? O le tulaga masani lava o tupua e luʻia ai manatunatuga o se tasi ma ona tomai e fetālaʻi ai. O lea, o le salalau atu o tupua i vaega eseese o le Tusi Paia e pei o ni teuteu matagofie i se taumafataga susua, ua faapena ona faaaogāina ai tupua i nisi o taimi ina ia faagaee ai le naunau o le ʻau faitau po o le fesoasoani foʻi ina ia matuā faamanino ai le feʻau o loo avatu. I tulaga faapena, e masani lava ona mulimuli atu ai ma o latou faamatalaga.—Esekielu 17:1-18; Mataio 18:23-35.

Ua foaʻi mai ma le agalelei e Ieova le atamai ae na te lē soona tuulafoaʻiina mai. (Iakopo 1:5-8) Seʻi manatu i le tusi o Faataoto, o se tuufaatasiga faagaeeina o faamatalaga lavelave e tele ia ua manatu i ai nisi o ni tupua. O le a manaʻomia ai le faaaluina o le taimi ma le manatunatu loloto ina ia malamalama i ai. Ae o le ā le toʻatele o tagata o loo naunau e faia ni taumafaiga? O le atamai o loo i nei faataoto e mafai ona maua na o i latou o loo naunau e saili i ai.—Faataoto 2:1-5.

Na faapena foʻi ona faaaogā e Iesu tala faatusa ina ia faaalialia ai uiga sa i loto o lana ʻau faalogologo. Na lolofi atu le anoanoaʻi o tagata ia te ia. Na latou olioli i ana tala. Na latou fiafia i ana vavega. Ae peitai, e toʻafia na naunau e suia o latou olaga ma mulimuli atu ia te ia? Maʻeu se eseesega ma soo o Iesu, o ē na saili pea ina ia malamalama i aʻoaʻoga a Iesu ma naunau e lē toe pule i latou ia i latou lava ina ia avea ma ona soo!—Mataio 13:10-23, 34, 35; 16:24; Ioane 16:25, 29.

Vaai Atu i le Malamalama

Ua mātauina e se tasi tusi e faapea, “o le naunau fia iloa e faatatau i tupua e foliga mai e tupu tonu lava i taimi ia faatoʻā amata ona e malamalama ai i ni mataupu loloto.” I aso nei ua faaeaina ai i tatou e ola i se taimi “ua luluina [ai] le malamalama” faaleagaga mo tagata o le Atua. (Salamo 97:11; Tanielu 12:4, 9) Pe mafai ona tatou faatalitali ma le onosaʻi ia Ieova e faaali mai ana fuafuaga e tusa ai ma lana faasologa o taimi? E sili atu ona tāua, pe o tatou gāoioi ma le vave e suia o tatou olaga pe a tatou iloaina le auala e faaōgatusa atoatoa atu ai i le finagalo faaalia o le Atua? (Salamo 1:1-3; Iakopo 1:22-25) Pe afai tatou te faia faapea, o le a faamanuia e Ieova a tatou taumafaiga, pei lava ona faamanino e matatioata se vaaiga nenefu, o le a aumaia foʻi e le agaga paʻia le ata matagofie atoa o le fuafuaga manino tauatua i o tatou mata faalemafaufau, e faaleleia ai la tatou vaai faaleagaga.—1 Korinito 2:7, 9, 10.

O le mea moni, o tupua faale-Tusi Paia ua faamamaluina ai Ieova o “le na te faaalia mea ua lilo.” (Tanielu 2:28, 29) E lē gata i lena, o ia foʻi o Lē e Suʻesuʻe i loto. (1 Nofoaiga a Tupu 28:9) E lē tatau ona faateʻia ai i tatou e iloa faapea o loo faasolosolo pea i luma le faaalia mai o le malamalama o upu moni tauatua. (Faataoto 4:18; Roma 16:25, 26) Na i lo le sailia o le poto o mea loloto a le Atua e ala i faiga faalilolilo po o le poto faaletagata e gata mai, lea e na ona taʻitaʻiina atu ai i le iʻuvale, seʻi o tatou vaai atu ma le mautinoa ia Ieova le Atua ina ia faasusulu mai le malamalama o upu moni i ana “afioga e lē o manino mai,” ma faailoa atu i ana auauna faamaoni ana fuafuaga ofoofogia i lana taimi atofaina.—Amosa 3:7; Mataio 24:25-27.

[Ē Ana le Ata i le itulau 26]

Biblia Hebraica Stuttgartensia, Deutsche Bibelgesellschaft Stuttgart