Ua Lē Pine Ona Oo Mai Lea o “le Taimi mo le Filemu”!

“O le mea ma lona taimi atofaina mo mea uma, . . . o le taimi mo le taua, ma le taimi mo le filemu.”—FAILAUGA 3:1, 8, NW.

1. O le ā le tulaga tuufaafeagai ua iai a o faagasolo le senituri lona 20, e tusa ai o taua ma le filemu?

O LE toʻatele o tagata o loo faanaunau mo se filemu, ona o se māfuaaga lelei. E sili atu ona itiiti le filemu ua tofo i ai le lona 20 senituri, na i lo se isi lava senituri i le talafaasolopito. Ua matuā lē fetaui lava lena tulaga auā, e leʻi faapea muamua le tele o ni mea na fai ina ia puipuia ai le filemu. I le 1920 na faavaeina ai Malo Sosoo. I le 1928 na lagolagoina ai le maliega o le Kellogg-Briand Pact, lea e faaigoa e se tasi tusi, “o se tasi o faasologa e sili ona mataʻina o taumafaiga na fai e tausia le filemu ina ua mavae le Taua Muamua a le Lalolagi,” e le “toetoe lava o atunuu uma o le lalolagi . . . o loo malilie ia faamuta taua e avea o se ʻauupega mo āiāiga faalemalo.” Ma, i le 1945 na faatulaga ai le faalapotopotoga o Malo Aufaatasi ina ia suitulaga i Malo Sosoo lea ua lē toe faagaoioia.

2. O le ā le sini o loo folafola mai e Malo Aufaatasi, ma o le ā le telē o iai sona taulau manuia?

² I le pei o Malo Sosoo, sa avea foi ma sini o Malo Aufaatasi le puipuia o le filemu o le lalolagi. Peitaʻi e lē o matuā tele se tulaga o taulau manuia ai. O le mea moni, e matuā leai lava se isi taua a le lalolagi e tutusa le mataʻutia ma taua tetele e lua a le lalolagi. E ui i lea, e anoanoaʻi isi fetauaʻiga laiti o loo aveesea ai pea mai le faitau selau afe o tagata le filemu o o latou mafaufau, o a latou meatotino, ae maise foi le māumau ai o o latou lava ola. Faamata tatou te ono faamoemoe e mafai e Malo Aufaatasi ona liliuina le senituri lona 21 e avea ma “taimi mo le filemu”?

 Le Faavae mo le Filemu Moni

3. Aisea e lē mafai ai ona iai faatasi le filemu moni ma le feitagaʻi?

³ O le filemu i le va o tagata ma mālō e iai ma nisi mea e manaʻomia ai na i lo le tau ina faapalepale. Pe mafai e se tasi ona filemu moni ma se isi e ita i ai? E leai, pe a fua atu i le manatu o le 1 Ioane 3:15 (LF): “O i latou uma o e ʻinoʻino i o latou uso, o fasioti tagata i latou.” E pei ona faamaonia e talafaasolopito lata mai nei, o feitagaʻiga matuiā e faigofie lava ona sosolo atu i gaoioiga o faiga sauā.

4. Ua na o ai lava e mafai ona latou maua le filemu, ma aisea?

⁴ Talu ai o Ieova o ia o “le Atua e ona [foai maia] le manuia [filemu],” e na o tagata foi la o ē alolofa i le Atua ma faaaloalo loloto i ana mataupu silisili amiotonu, e mafai ona latou maua le filemu. E manino lava, e lē aumaia e Ieova le filemu i tagata uma. “Ua fetalai mai loʻu Atua, E leai se filemu i e amio leaga.” Ua māfua lenei tulaga talu ai e mumusu tagata amioleaga e taʻitaʻia i latou e le agaga paia o le Atua, o se tasi o ona fua, o le filemu lea.—Roma 15:33; Isaia 57:21; Kalatia 5:22.

5. O le ā le mea e matuā lē mafaufauina lava mo Kerisiano moni?

⁵ O le sii taua atu i uso ā tagata—e pei ona faia soo e i latou ua faapea mai o Kerisiano, ae maise lava i le lona 20 senituri—o se faiga e matuā lē mafaufauina lava mo Kerisiano moni. (Iakopo 4:1-4) E moni, o loo latou tau e tetee atu i aʻoaʻoga o loo taʻuvalea ai le Atua, peitaʻi o lenei faigā taua ua fuafua ina ia fesoasoani ai i tagata, ae lē ina ia faaleaga ai i latou. O le sauāina o isi ona o ni eseesega faalotu pe ina ia faaoo ai ni manuʻa faaletino ona o ni māfuaaga faalotonuu, e matuā feteenaʻi lava ma le Faa-Kerisiano moni. Na faatonu atu Paulo i Kerisiano i Roma e faapea: “Afai e mafaia ia te outou, ia outou nofo lelei [filemu] ma tagata uma lava.”—Roma 12:17-19; 2 Timoteo 2:24, 25.

6. Ua na o fea lava e mafai ona maua i ai le filemu moni i aso nei?

⁶ I aso nei, e na o tagata tapuaʻi moni lava a Ieova le Atua e tatau ona maua i ai le filemu mai le Atua. (Salamo 119:165; Isaia 48:18) E leai ni feeseeseaʻiga faapolotiki e saveʻuina ai lo latou autasi, auā latou te solitū mai faiga faapolotiki i so o se mea lava o loo latou iai. (Ioane 15:19; 17:14) Talu ai latou te “maopoopo lava i le loto e tasi ma le manatu e tasi,” ua leai ai ni feeseeseaʻiga faalotu e mafai ona faamataʻuina lo latou filemu. (1 Korinito 1:10) O le filemu o loo olioli ai Molimau a Ieova o se vavega i ona po nei, o se vavega ua aumaia e le Atua ina ia ōgatusa ma lana folafolaga: “E avea foi e aʻu ou alii ia filemu, ma ou faipule ia amiotonu.”—Isaia 60:17; Eperu 8:10.

Aisea ua Māfua ai “le Taimi mo le Taua”?

7, 8. (a) E ui i lo latou tulaga fifilemu, ae faapefea ona manatu Molimau a Ieova i le taimi lenei? (e) O le ā le ʻauupega autū o le faigā taua a se Kerisiano?

⁷ E ui i lo latou tulaga fifilemu, ae o loo manatu Molimau a Ieova i le taimi lenei ua matuā avea lava ma “taimi mo le taua.” O le mea moni e lē o se faigā taua faaletino, auā o le avatu faamalosi o le feʻau a le Tusi Paia i isi e ala i le faaaogā o le pelu, o le a feteenaʻi lena ma le valaaulia a le Atua e faapea o “lē manao i ai, ina ave fua ia le vai o le ola.” (Faaaliga 22:17) E lē faia ai iinei ni liliuga fai faamalosi! O le faigā taua lea o loo tau ai Molimau a Ieova e na o le faaleagaga lava. Na tusi mai Paulo: “O auupega a lo matou nei taua e le faaletino ia, a e faamalolosia e le Atua e lepetia ai ʻolo.”—2 Korinito 10:4; 1 Timoteo 1:18.

⁸ O le ʻauupega autū i ʻʻauupega a lo tatou taua’ o “le pelu a le Agaga, o le afioga lea a le Atua.” (Efeso 6:17) E malosi tele lenei pelu. “O loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga, o gaugātino foi ma aano o ivi, o loo faamasino foi i manatu ma filifiliga o le loto.” (Eperu 4:12) E ala i le faaaogāina o lenei pelu, ua mafai ai e Kerisiano ona lepeti i lalo “masalosaloga, ma mea maualuluga uma ua faasiasia [“tetee,” NW] i le iloa  o le Atua.” (2 Korinito 10:5, LF) Ua mafai ai ona latou faaalialia aʻoaʻoga sesē, o faiga leaga, ma filosofia o loo atagia mai ai le poto faaletagata na i lo le poto tauatua.—1 Korinito 2:6-8; Efeso 6:11-13.

9. Aisea e lē tatau ai ona tatou faavaivai i la tatou taua e tetee atu i le tino agasala?

⁹ O le isi ituʻāiga o faigā taua faaleagaga o le taua lea o loo tau e tetee atu i le tino agasala. E mulimuli atu Kerisiano i le faaaʻoaʻoga a Paulo, o lē na taʻutino mai: “Ou te faatoilaloina loʻu nei tino, ma aʻu fai ai ma pologa, ina neʻi iu ina le faamaoni aʻu, o aʻu sa talaʻi atu i isi tagata.” (1 Korinito 9:27) Sa timaʻi atu i Kerisiano i Kolose ina ia fasiotia o latou “itu tino o i le lalolagi, o le faitaaga, o le amio leaga, o le faamatāitu, o le tuʻinanau leaga, ma le matapeapea, o le ifo i tupua lava lea.” (Kolose 3:5) Ma na apoapoaʻi atu Iuta le tusitala o le Tusi Paia i Kerisiano ina ia “faamalolosi ona finau mo le faatuatua na tuuina mai faatasi i le au paia.” (Iuta 3) Aisea e tatau ai ona tatou faia faapea? Ua tali mai Paulo: “Afai tou te amio i la le tino, e oti ai outou; a e afai e fasiotia e outou amioga a le tino e le Agaga, tou te ola ai.” (Roma 8:13) Pe a fua atu i lenei faamatalaga manino, e lē tatau la ona tatou faavaivai i la tatou taua e tetee atu i faanaunauga leaga.

10. O le ā na tupu i le 1914, e taʻitaʻia atu ai i le ā le mea o le a tupu i se taimi lata mai?

¹⁰ Peitaʻi o le isi māfuaaga e mafai ai ona manatu i lenei taimi o se taimi mo le taua talu ai ua matuā lalata mai lava “le aso e taui ai ma sui e lo tatou Atua.” (Isaia 61:1, 2) I le 1914, na taunuu ai le taimi atofaina a Ieova mo le faavaeina o le Malo Faa-Mesia ma avatu i ai le pule ina ia tauina se taua faifai pea e tetee atu ai i le faiga o mea a Satani. Na muta ai iinā le vaitaimi faatulagaina lea na tuu mai mo tagata e faia ai a latou pulega e aunoa ma le faalavelave mai i ai o le Atua. Na i lo le taliaina o le Pule Faa-Mesia a le Atua, o le toʻatele o tagata e tetee atu pea ia te ia, e pei foi ona faia e le toʻatele o tagata i le uluaʻi senituri. (Galuega 28:27) O le iʻuga, talu ai le tetee i le Malo, na agaʻi atu ai loa Keriso ina ia ‘pule i totonu o e ita ia te ia.’ (Salamo 110:2) O se fiafiaga, auā ua folafola mai e le Faaaliga 6:2 e faapea, “o le a manumalo pea ia.” O le a ia faia lenei mea a o faagasolo “le taua i le aso tele o le Atua e ona le malosi uma lava. . . . , ua igoa i le gagana Eperu o Amaketo.”—Faaaliga 16:14, 16.

Ua Oo Nei i “le Taimi e Tautala Ai”

11. Aisea ua matuā onosaʻi ai lava Ieova, ae o le ā e iʻu lava ina oo mai?

¹¹ Ua 85 nei tausaga talu ona mavae atu le 1914 lea sa avea o se taililiu i mataupufai a tagata. Ua matuā telē le onosaʻi mai o Ieova i tagata. Ua ia faailoa atoatoa mai i ana Molimau le faanatinati ua iai tulaga o mea. E faitau miliona ola o loo lamatia. Ua onomea ona lapataʻia lenei motu o tagata talu ai ‘e lē finagalo Ieova ia fano se tasi, a ia oo uma lava i le salamō.’ (2 Peteru 3:9) E ui i lea, ua lē o toe umi ona “faaalia [mai lea o] le Alii o Iesu mai le lagi, faatasi ma agelu o lona malosi.” Ma o i latou uma o ē tetee ma le loto i ai i le feʻau o le Malo o le Atua o le a oo ia i latou le “taui ma sui,” lea o le a tauia ai e Iesu i latou o “e ua le iloa le Atua, ma ua le anaana i le tala lelei a lo tatou Alii o Iesu.”—2 Tesalonia 1:6-9.

12. (a) Aisea e leai ai se aogā e taumatemate ai fua po o afea e ono amata ai le puapuaga tele? (e) O le ā le lamatiaga o lenei mea sa lapataʻia e Iesu?

¹² O āfea o le a muta ai loa le onosaʻi o Ieova? E leai se aogā e taumatemate ai fua po o afea e ono amata ai le “puapuaga tele.” Na taʻua manino e Iesu faapea: “A o lea aso ma lea itu aso e le iloa e se tasi.” Ae i le isi itu, na ia timaʻi mai: “O lea, ia outou mataala ai; auā tou te le iloa po o le fea aso e sau ai lo outou Alii. . . . Ia outou nofo sauni ai; auā o le itu aso tou te le manatunatu ai, e sau ai le Atalii o le tagata.” (Mataio 24:21, 36, 42, 44) Pe a faafaigofie le manatu, o lona uiga o aso taʻitasi e tatau ai ona tatou mataala pea i mea o loo tutupu i le lalolagi ma ia manatunatu i le taimi o le a gāpā mai ai le puapuaga tele. (1 Tesalonia 5:1-5) Pagā le mataʻutia o le mafaufau faapea  e mafai lava ona tatou fāifai mālie, ia ola i se olaga ua taʻua o le olaga masani, ma faatalitali e vaai po o le a faapeī le faagasologa o tulaga o mea! Na fetalai Iesu: “Ia outou, neʻi mafatia o outou loto i le soona ulavale, ma le onā, ma le popole i mea a le olaga nei, neʻi faafuasei mai lea aso ia te outou e pei o se mailei.” (Luka 21:34, 35, LF) O le manatu lenei e mafai ona tatou mautinoa: O “matagi e fa” o le faaumatiaga o loo taofiofia nei e “agelu e toafa” a Ieova, o le a lē faavavau ai pea ona taofiofia.—Faaaliga 7:1-3.

13. O le ā ua iloatino e le toetoe ono miliona o tagata?

¹³ Pe a fua atu i lenei aso o le taui ma sui ua lalata tele mai, ua matuā uigā faapitoa ai upu a Solomona e uiga i “le taimi e tautala ai.” (Failauga 3:7, NW) Ona ua latou ioe o nei lava le taimi e tautala ai, ua toetoe ai ono miliona Molimau a Ieova o loo maelegā e tautala atu i le mamalu o le tulaga tautupu o le Atua ma lapataʻi atu e uiga i le aso o lana tauimasui. O loo latou faia taulaga ma le loto i lenei aso o le malosi o Keriso.—Salamo 110:3; 145:10-12.

I Latou o Loo Tāutala i le ‘Filemu, ae Leai se Filemu’

14. O ā perofeta pepelo ia sa iai a o faagasolo le senituri lona fitu T.L.M.?

¹⁴ A o faagasolo le senituri lona fitu T.L.M., na momoli atu ai e perofeta a le Atua, o Ieremia ma Esekielu ni feʻau tauatua o le faamasinoga ia Ierusalema ona o ona ala sesē o le lē usiusitaʻi i le Atua. O le faaumatiaga na la valoia sa faataunuuina i le 607 T.L.M., e ui lava sa feteenaʻi avefeʻau a le Atua ma taʻitaʻi lotu o ē sa lauiloa ma malolosi a latou taaʻiga. O nei taʻitaʻi lotu sa faamaonia le avea o i latou ma “perofeta vālea [o ē] . . . ua latou faasesēina le nuu [o le Atua], o loo faapea atu, ‘E filemu!’ ae leai se filemu.”—Esekielu 13:1-16, NW; Ieremia 6:14, 15; 8:8-12.

15. Pe o iai ea foi i aso nei ni perofeta pepelo faapena? Faamatala mai.

¹⁵ I le pei o “perofeta vālea” o na taimi, ua faapena foi i le toʻatele o taʻitaʻi lotu o aso nei ona latou lē lapataʻia tagata i le aso o loo sau o le faamasinoga a le Atua. Na i lo lea, o loo latou folafola atu e peiseaī o loo faaali atu se āta mautinoa e faapea, o le a iʻu lava ina ausia e vaega faapolotiki le filemu ma le saogalemu. Ona o le naunau tele e faafiafia tagata na i lo le faafiafia o le Atua, ua latou taʻu atu ai i o latou tagata lotu mea latou te mananaʻo e faalogo i ai na i lo le faamatala atu faapea, ua faavaeina le Malo o le Atua ma ua toe o se aga ona faamaeʻa lea e le Tupu Faa-Mesia lona manumalo. (Tanielu 2:44; 2 Timoteo 4:3, 4; Faaaliga 6:2) I le avea o ni perofeta pepelo, ua latou tāutala ai foi i le “filemu, ae leai se filemu.” Peitaʻi o lo latou talitonuga maumauaʻi o le a lē pine ona suia lea i se gatete faafuaseʻi pe a oo ina latou fesagaʻi ma le toʻasā aasa o Lē na latou faia i ai faamatalaga sesē ma o lē ana le  suafa ua latou matuā faalumaina. O taʻitaʻi o le emepaea o lotu sesē a le lalolagi, lea e faamatalaina i le Tusi Paia o se fafine amio lē mamā, o le a taia i se mala e oti ai a o latou alagaina mai a latou lava alaga taufaasesē o le filemu.—Faaaliga 18:7, 8.

16. (a) O le ā ua lauiloa ai Molimau a Ieova? (e) Ua faapefea ona ese i latou mai ē o loo alalaga atu “ua filemu, ae leai se filemu”?

¹⁶ E tusa pe sili atu ona toʻatele taʻitaʻi lauiloa ma malolosi a latou taaʻiga o loo latou aumaia pea folafolaga pepelo o le filemu, ae lē maluelue ai lava le talitonuga mautinoa o i latou o ē faatuatua atu i le folafolaga a le Atua mo se filemu moni. Ua silia ma le senituri, o lauiloa Molimau a Ieova o ni ē faamaoni i le puipuia o le Afioga a le Atua, o ni ē loto tetele e tetee atu i lotu sesē, ma o ni ē maumauaʻi e lagolagoina le Malo o le Atua. Na i lo lo latou faaseeina o tagata i faaupuga molemole e faatatau i le filemu, ae ua latou tauivi maelegā e faamanatu ia i latou le mea moni faapea, o aso nei o le vaitaimi o le taua.—Isaia 56:10-12; Roma 13:11, 12; 1 Tesalonia 5:6.

Ua Muta le Taimi sa na Ona Faalologo ai Ieova

17. O le ā le uiga o le faaupuga, ua lē o toe umi ona muta loa lea o le taimi sa na ona faalologo ai Ieova?

¹⁷ Na faapea mai Solomona: “E faamasinoina e le Atua le ua amiotonu atoa ma le ua amio leaga; auā e taitasi ma ona lava po i mea uma.” (Failauga 3:17) Ioe, ua iai le taimi atofaina a Ieova mo le faaoo mai o le sala o le faamasinoga i lotu sesē ma i ‘tupu o le lalolagi [o ē] ua tutū mai . . . e tetee atu ia Ieova ma lē na ia faauuina.’ (Salamo 2:1-6; Faaaliga 16:13-16) O le taimi lava e oo mai ai lena taimi, ona uma loa lea o aso na ‘faalologo’ ai Ieova. (Salamo 83:1; Isaia 62:1; Ieremia 47:6, 7) E ala mai i lana Tupu Faa-Mesia faauuina, o Iesu Keriso, o le a ia ‘fetalai’ mai ai i le na o le tasi lava le gagana e foliga e malamalama ai ē o loo tetee ia te ia: “E afio atu Ieova pei se toa, e pei o le tagata tau na te faatupuina lona maelega; e alaga o ia, e ūʻūʻū, na te manumalo i e ua ita ia te ia. Ua leva loʻu faalologo; ua ou le gagana, ua ou onosai; ou te uio e pei o le fafine ua faatiga; ou te gaegae ma ou mapusela faatasi. E moana ia te au atu mauga ma mauga; e mamago ia te au o latou laau ʻaina uma lava; ou te liua vaitafe ma nuu tuloto; ou te faapaʻumatuina vailepa. Ou te taʻitaʻiina e ua tauaso i le ala sa latou le iloa; ou te aumaia i latou i magaala sa latou le iloa; ou te liua le pouliuli i le malamalama i o latou luma, ma ala piopio e fai ma ala saʻo; o mea lava ia ou te faia ia te i latou, ou te le lafoaiina foi i latou.”—Isaia 42:13-16.

18. I le ā le itu o le a lē pine ona “mapu” ai lea o tagata o le Atua?

¹⁸ Pe a ‘fetalai’ Ieova e puipuia lona tulaga o ia o le Atua, o le a lē toe manaʻomia loa ona tāutala atu ona tagata mo so latou lava puipuiga. O le taimi lea mo i latou e “mapu” ai. E pei ona sa faatatau atu nei upu i auauna a le Atua i taimi ua teʻa, o le a faatatau atu foi ia i latou: “E le tau outou i lenei taua; tutū ia outou, ma ia outou tumau, ma outou vaai atu i le olataga mai ia Ieova o loo ia te outou.”—2 Nofoaiga a Tupu 20:17.

19. O le ā le faaeaga ua lē o toe umi ona maua lea e uso faaleagaga o Keriso?

¹⁹ Pagā se toʻilalopopo mo Satani ma lana faalapotopotoga! O le a ʻauai uso faamamaluina o Keriso i le faatinoina o se manumalo mataʻina mo le amiotonu, ina ia ōgatusa ma le folafolaga: “E le pine foi ona solia  o Satani i lalo o outou vae e le Atua e ona le manuia [filemu].” (Roma 16:20) Ua iʻu lava ina oo mai le taimi ua leva ona tatālia mo le filemu.

20. O le ā le mea ua lē pine ona oo loa lea i lona taimi?

²⁰ Maʻeu se olaga faamanuiaina o ē uma o i le lalolagi o ē faasaoolaina atu i lenei faaaliga tele o le mana o Ieova! E lē pine mulimuli ane, ona aufaatasi atu lea ia i latou o tane ma fafine faatuatua o aso ua mavae, pe a oo mai le taimi atofaina mo le toe faatutūina aʻe o i latou. Ona avea moni ai lea o le Pulega a Keriso mo le Afe Tausaga ma “le taimi e totō ai . . . , le taimi e fofō ai . . . , le taimi e ati aʻe ai . . . , le taimi e ʻataʻata ai . . . , le taimi e osooso ai . . . , le taimi e feāsogi ai, ma . . . le taimi e alofa ai.” Ioe, ma o le a faavavau ona avea ma “taimi mo le filemu”!—Failauga 3:1-8, NW; Salamo 29:11; 37:11; 72:7.

O le ā Lau Tali?

□ O le ā le faavae mo le filemu tumau?

□ Aisea e manatu ai Molimau a Ieova i le taimi lenei ua avea ma “taimi mo le taua”?

□ O fea le taimi e ‘tautatala’ ai tagata o le Atua, ae o āfea le taimi latou te “mapu” ai?

□ O le a faapefea ma o afea o le a faamuta ai e Ieova lona faalologo?

[Fesili mo le Suʻesuʻega]

[Pusa i le itulau 13]

Ua Iai ia Ieova Lana Taimi Atofaina mo le

□ tataʻiina mai o Koku e osofaʻia tagata o le Atua.—Esekielu 38:3, 4, 10-12

□ tuuina i loto o pule faaletagata ina ia latou faaumatia Papelonia le Aai Tele.—Faaaliga 17:15-17; 19:2

□ faia o le faaipoipoga a le Tamaʻi Mamoe.—Faaaliga 19:6, 7

□ amataina o le taua o Amaketo.—Faaaliga 19:11-16, 19-21

□ fusifusia o Satani ina ia amata le Pulega a Iesu mo le Afe Tausaga.—Faaaliga 20:1-3

O nei mea tutupu o loo lisi atu i le faasologa o loo faasino mai ai i le Tusi Paia. E mafai ona tatou mautinoa o nei mea uma e lima o le a tutupu lava i le faasologa ua filifilia e Ieova ma le taimi tonu ua ia filifili ai.

[Ata i le itulau 15]

O le Pulega a Keriso mo le Afe Tausaga o le a avea moni o le taimi . . .

e ʻataʻata ai . . .

e feāsogi ai . . .

e alofa ai . . .

e totō ai . . .

e osooso ai . . .

e ati aʻe ai . . .