Aʻoaʻoina le Ala e Silisili Ona Lelei o le Alofa

O Kosovo, Lepanona, ma Aialani. O igoa nei o atunuu e masani ona aliali mai i tala fou i tausaga na seʻi faatoʻā mavae atu. Ua faamanatu mai e nei atunuu i mafaufau o tagata vaaiga o le toto masaa, tuʻiina i pomu, ma fasiotiga tagata. O le mea moni, o fetauaʻiga sauā ua faapogaia ona o feteenaʻiga i le va o lotu, le va o lanu, ma le va o tagata o ituaiga eseese, po o isi feeseeseaʻiga, e lē o ni mea fou. O le mea moni, ua faatumulia le talafaasolopito i na mea, ma ua aumaia ai mafatiaga e lē mafaamatalaina i le fanau a tagata.

I LE vaai atu i le iai pea o taua i le faagasologa o le talafaasolopito, ua faia ai e le toʻatele o tagata se faaiʻuga e faapea, ua matuā lē mafai lava ona ʻalofia taua ma ua avea o se mea masani le feitagaʻi o tagata. Ae peitaʻi, o na manatu, e matuā feteenaʻi lava ma aʻoaʻoga o le Afioga a le Atua, le Tusi Paia. Ua faalauiloa ma le matuā manino mai e le Tusi Paia e faapea: “O se le alofa ua le iloa e ia le Atua; auā o le Atua, o le alofa lava ia.” (1 Ioane 4:8) Ua manino mai lava, e finagalo Lē na Foafoaina Mea ina ia fealofani tagata uma.

Ua faaalia foʻi i le Tusi Paia e faapea, na foafoaina le tagata i le faatusa o le Atua. (Kenese 1:26, 27) O lona uiga, ua tuuina atu i le fanau a tagata le tomai e faaatagia atu ai uiga o le Atua, ma o le uiga e sili ona matilatila o le alofa. Talu ai o le tulaga lea, aisea la ua matuā lē taulau ai tagata i le faaalia o le alofa o le tasi i le isi i le faagasologa o le talafaasolopito? Ua toe saunia mai foʻi e le Tusi Paia se malamalamaga e tusa ai ma lenei mea. Talu ai na fouvale le uluaʻi ulugalii o Atamu ma Eva i le Atua, ma paʻūū atu ai i le agasala. Ma o le iʻuga, ua tuufaasolo mai ai i a la fanau uma le agasala ma le lē lelei atoatoa. Ua faamatala mai i le Roma 3:23 (LF) e faapea: “Ua agasala tagata uma lava, ma ua le oo i le mamalu o le Atua.” O lo tatou tomai na tuuina mai e le Atua e alolofa ai, ua faaleagaina ona o le agasala ma le lē lelei atoatoa ua tuufaasolo mai. Po o le uiga la o lenei mea ua lē toe mafai e tagata ona faaalia le alofa o le tasi i le isi? O le ā se faamoemoe o iai e faapea, o le a tatou olioli i se faiā filemu ma le alofa ma o tatou uso ā tagata?

E Tatau Ona Tatou Aʻoaʻoina ia Alolofa i le Atua

Ua silafia e Ieova le Atua e faapea, e ui lava i na mea uma, ae o loo mafai lava e tagata ona faaalia le alofa. O le pogai lena e manaʻomia ai e ia tagata uma o ē mananaʻo ia faafiafia o ia ina ia faaalia le alofa i se auala aupito sili latou te mafaia. Na faamanino mai lenei manaʻoga e le Alo o le Atua, o Iesu Keriso, ina ua fesiligia o ia po o le ā le poloaʻiga silisili o le Tulafono lea na tuuina atu ia Isaraelu. Na fetalai atu o ia: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili.” Ona ia faaopoopo atu lea: “E faapena foi lona lua, E te alofa atu i lē lua te tuaoi, ia pei o oe lava ia te oe. O nā poloaiga e lua ua autu ai le tulafono uma.”—Mataio 22:37-40.

Ae peitaʻi, e toʻatele tagata e iai le lagona faapea, e matuā faigatā lava ona alofa atu i se tasi e lē mafai ona latou vaai atu i ai, ma e lē mafai e i tatou o ni tagata ona vaai atu ia Ieova le Atua auā o ia o le Agaga. (Ioane 4:24) Ae o loo aafia pea i tatou i aso uma i mea ua faia e le Atua, ona tatou te faalagolago uma atu i le tele o mea lelei ua ia  faia mo lo tatou lelei. Na faasino mai e le aposetolo o Paulo lenei mea moni ina ua ia faapea mai: “Ua le tuu e [le Atua] o ona faailoga, i lona agalelei mai, ma foai mai o ua mai le lagi ia te i tatou, ma tausaga o fuata a le tau, ma ona ua faamalilie i o tatou loto i le mea e ʻai ma le olioli.”—Galuega 14:17.

E ui lava o loo maua ai e tagata uma aogā mai sauniuniga a Lē na Foafoaina Mea i auala eseese, ae matuā toʻaitiiti lava ni tagata pe a faatusatusa atu i ai, latou te faaalia atu ia te ia le loto faafetai pe uunaʻia foʻi e faafetai atu ia te ia. I lea, e manaʻomia ai ona tatou toe manatunatu i mea lelei uma ua faia e le Atua mo i tatou ma mafaufau loloto i uiga matagofie o loo iai i mea uma ua ia faia. O le faia faapea e tatau ona tatou iloa ai le atamai ma le malosi uigaese o Lē Sili na Foafoaina i tatou. (Isaia 45:18) Ae o le sili i mea uma lava, e tatau ona fesoasoani lenei mea ia i tatou e iloa ai, maʻeu se Atua alofa e iai o ia, e lē gata i lona foaʻiina mai o le ola ae ua na faia foʻi ina ia mafai ona tatou olioli i le tele o mea lelei o le olaga.

Mo se faaaʻoaʻoga, seʻi manatu i le matalasi o le anoanoaʻi o fugālaau matagofie na faia e le Atua i le lalolagi. Maʻeu le lelei mo i tatou ona o lona foaʻiina mai foʻi ia i tatou o le tomai e vaai ai ma maua le fiafiaga sili mai nei mea matagofie! Ua faapena foʻi ona saunia e le Atua ituaiga uma o meaʻai susua mo le fafagaina o i tatou. Maʻeu lona magafagafa i lona tuuina foʻi ia i tatou o le lagona o le tofo ina ia mafai ai ona tatou maua lena fiafia mai le taumafaina o meaʻai! Pe leʻi lava ea nei faamaoniga e faaalia ai e alofa moni le Atua ia i tatou ma e sili atu ona manatu mai mo lo tatou lelei?—Salamo 145:16, 17; Isaia 42:5, 8.

E lē gata i le faaalia mai o ia lava ia i tatou e ala i le “foafoaga o le natura,” ae ua faaalia mai ia i tatou e Lē na Foafoaina Mea, e ala i lana Afioga, le Tusi Paia, le ituaiga o Atua e iai o ia. Ua mafaia lenei mea ona o loo faamauina i le Tusi Paia le tele o gaoioiga alofa na faia e Ieova le Atua i aso ua mavae, faapea ma le anoanoaʻi o faamanuiaga ua ia folafola mai o le a maua e le fanau a tagata i le lumanaʻi lata mai. (Kenese 22:17, 18; Esoto 3:17; Salamo 72:6-16; Faaaliga 21:4, 5) O le sili o mea uma lava, ua faailoa mai lea e le Tusi Paia ia i tatou le faailoaga aupito sili o le alofa o le Atua i le fanau a tagata—i le foaʻiina mai o lona Alo pele o toʻatasi e avea ma o tatou Togiola ina ia mafai ona tuusaʻolotoina i tatou mai noataga o le agasala ma le oti. (Roma 5:8) O le mea moni, o le tele o lo tatou aʻoaʻoina e uiga i Lē na Foafoaina i tatou e alofa, o le tele foʻi lea o le uunaʻia o i tatou e alolofa atu ia te ia mai o tatou loto.

Aʻoaʻoina ia Alolofa i o Tatou Uso ā Tagata

E pei ona faasino mai e Iesu e faapea, e faaopoopo i lo tatou alofa i le Atua ma o tatou loto atoa, agaga atoa, ma le manatu atoa, e tatau ona tatou alolofa i o tatou tuaoi e pei o i tatou lava. O le mea  moni, o le alofa i le Atua, ua aumaia ai ia i tatou se matafaioi ina ia alolofa atu i o tatou uso ā tagata. Ua faamatala mai e le aposetolo o Ioane e faapea: “Le au pele e, afai ua faapea ona alofa mai o le Atua ia te i tatou, e tatau ai ona tatou fealofani.” Ua ia faamamafa atili mai: “Pe afai e faapea mai se tasi, ‘Ou te alofa i le Atua’, a e ʻinoʻino i lona uso, o le pepelo lava ia; auā o le le alofa i lona uso ua ia vaai atu i ai, e le mafai ona alofa o ia i le Atua ua ia le vaai atu i ai. O lenei foi le poloaiga ua tatou maua mai ia te ia, o lē alofa i le Atua ia alofa foi o ia i lona uso.”—1 Ioane 4:11, 20, 21, LF.

I aso nei, o loo tatou ola ai i se lalolagi ua faaalia e le toʻatele o tagata le uiga, o aʻu e muamua, ua avea ai ma ē ‘alolofa ia i latou lava,’ e pei ona valoia e le Tusi Paia. (2 Timoteo 3:2) O le mea lea, afai tatou te mananaʻo e aʻoaʻo le ala silisili o le alofa, e tatau ona tatou faia se taumafaiga uigā e toe fuataʻiina ai o tatou mafaufau ma faataʻitaʻi i Lē na Foafoaina i tatou e alofa, na i lo le mulimuli atu i ala manatu faapito o tagata lautele. (Roma 12:2; Efeso 5:1) O le Atua, e ‘agalelei atu i ē agavale ma ē amioleaga,’ ma “na te faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu.” Talu ai ua faataatia e lo tatou Tamā faalelagi lena faaaʻoaʻoga maoaʻe mo i tatou, e tatau ai la ona tatou tauivi ina ia agalelei ma fesoasoani atu i tagata uma. O le faia faapea, e mafai ona faamaonia atu ai o i tatou ‘o atalii o lo tatou Tamā faalelagi.’—Luka 6:35; Mataio 5:45.

I nisi taimi, o na galuega alofa e iʻu ai i le fesoasoani atu i tagata e avea ma tagata tapuaʻi o le Atua moni. I ni nai tausaga ua mavae, sa taumafai ai se avā tausiaiga o ia o se tasi o Molimau a Ieova e faailoa atu le feʻau a le Tusi Paia i lona tuaoi, ae sa matuā teena lava e le tuaoi. Ae peitaʻi, sa leʻi faavaivai ai le tuafafine i le tali na ia maua. Na i lo lea, sa faaauau pea ona ia faaalia le agalelei ma taumafai e fesoasoani atu i le tuaoi. I se tasi taimi, sa fesoasoani ai o ia i lona tuaoi e siitia atu i se isi fale. I le isi taimi, sa ia fuafuaina mo se tasi e ō atu ma lona tuaoi i le malae vaalele e faatali aiga o lea tuaoi. Mulimuli ane, na talia e le tuaoi se suʻesuʻega faale-Tusi Paia ma iʻu ai ina avea ma Kerisiano maelegā e ui lava i sauāga ogaoga mai lana tane. Ioe, o na faaaliga o le alofa na faataatia ai se faavae mautū mo faamanuiaga e faavavau.

Afai tatou te faamaoni i lo tatou alofa, o le a tatou ioeina e faapea, e alofa le Atua ia i tatou e lē ona ua tele ni o tatou uiga lelei. Na i lo lea, e alofa o ia ia i tatou e ui lava i le tele o mea tatou te sesē ai ma o tatou vaivaiga. Ona o lea, e tatau ai ona faapea foʻi ona tatou aʻoaʻo e alolofa atu i  o tatou uso ā tagata e ui lava i le tele o o latou vaivaiga. Afai tatou te toleniina i tatou lava e iloa ma talisapaia uiga lelei o isi na i lo le vaavaai masei ia i latou, o le a tatou iloa ai le matuā sili atu ona faigofie ona lagona le alofa ia i latou. O o tatou lagona e uiga ia i latou e ono mafai ona sili atu i lo le alofa lea e faavae i mataupu silisili ma faaaofia ai se lagona māfana ma le fiafia lea e iai i le va o ni uō mamae.

Ia Faatupu Lou Alofa

O le alofa ma se faigauō e manaʻomia ona atiina aʻe ma tausia, ma o se tasi o mea e matuā tāua i le atiina aʻe o lea faiā, o le moni ma le faamaoni. O nisi e taumafai e nātia o latou vaivaiga ina ia taʻuleleia ai e tagata o latou fia faauō atu i ai. Ae peitaʻi, o na auala e masani ona toe lavea ai lava oe, pe a iʻu ina iloa ane e isi tagata mea moni e uiga ia te oe ma oo ai ina lē fiafia ona o lena uiga lē faamaoni. O le mea lea, e lē tatau ona tatou fefefe e faataga isi e iloa le ituaiga o tagata moni e iai i tatou—e ui lava e iai o tatou vaivaiga ia o loo tatou tauivi e foʻia. O lenei auala e mafai ona fesoasoani e faavae aʻe ai se faigauō ma i latou.

Mo se faataʻitaʻiga, o se tuafafine matua o se Molimau i se tasi o faapotopotoga i Sasaʻe Mamao, sa lē lelei sana aʻoaʻoga. Peitaʻi, sa leʻi taumafai lava o ia e nātia mai isi tagata lena mea moni. Mo se faaaʻoaʻoga, ua ia taʻu mai ma le faamaoni e faapea, e lē mafai ona ia faamatala atu i tagata le auala e faamautinoa ai mai valoaga o le Tusi Paia ma le talafaasolopito e faapea, na iʻu Taimi o Nuu Ese i le 1914. * Ae peitaʻi, ua ia faataatia se faaaʻoaʻoga lelei tele i le maelegā mo le faiva, faapea le alofa ma le limafoai i le auuso, lea ua taʻua ai o ia ma le māfana e faapea o sē e matuā viiviia i le faapotopotoga.

I nisi aganuu, o le faaalia faalauaitele o le alofa, o se mea e faitioina; ua aʻoaʻoina tagata ina ia faaalia pea le faaaloalo i a latou feutagaʻiga ma isi tagata. A o avea pea o se mea lelei le faaalia o uiga tausaafia ma le magafagafa, ae lē tatau ona avea lo tatou faaaloalo ma mea e taofia pe nātia ai lo tatou faaali atu o lagona māfana i isi. Sa leʻi mā Ieova e faaali atu ona lagona alofa mo ona tagata filifilia, o Isaraelu anamua, i lona fetalai atu ia i latou: “O le alofa e faavavau, ua ou alofa atu ai ia te oe.” (Ieremia 31:3) Na faapena foʻi ona taʻu atu e le aposetolo o Paulo i ona uso talitonu i Tesalonia: “Sa faapea lava lo matou maelega i le alofa ia te outou, na matou manao i le fia avatu ia te outou e le na o le tala lelei i le Atua, a o matou lava ola foi, auā na alofaina outou e i matou.” (1 Tesalonia 2:8) O lea, a o tatou taumafai e atiina aʻe le alofa moni mo uso ā tagata, ua sili atu ai ona talafeagai ma aʻoaʻoga a le Tusi Paia le faaali atu i auala e masani ai na lagona na i lo le taofiofia.

E Manaʻomia Taumafaiga Faifai Pea

O le aʻoaʻoina ina ia iai le lagona alofa ma ia faaali atu i isi, o se mea e faifai pea. O le faia o lena mea e manaʻomia ai ona faia ni a tatou taumafaiga se tele talu ai e tatau ona tatou galulue mamafa ina ia foʻia o tatou lava lē lelei atoatoa ma ia tetee atu i taaʻiga malolosi a lenei lalolagi e leai se alofa. Ae peitaʻi, o le tele o taui ua aumaia e lenei mea, ua matuā aogā moni ai lava.—Mataio 24:12.

E oo lava i lenei lalolagi matuā lē lelei atoatoa, e mafai lava ona tatou olioli i ni faiā ua faaleleia ma o tatou uso ā tagata, ma iʻu ai i le matuā tele o le olioli, filemu, ma le faamalieina o i tatou lava faapea ma isi. O le faia o na taumafaiga, e mafai ona faamaonia ai i tatou lava e taʻuaogāina mo le faamoemoe ofoofogia o le ola e faavavau i le lalolagi fou a le Atua. Ae o le sili i na mea uma, o le aʻoaʻoina o le ala silisili o le alofa, e mafai ai ona tatou maua le faamaoniga ma faamanuiaga a Lē na Foafoaina i tatou e alofa, i le taimi nei ma e oo i le faavavau!

[Faaopoopoga i lalo]

[Ata i le itulau 10]

E mafai ona faaali atu le alofa faa-Kerisiano e ala i galuega agalelei

[Ē Ana le Ata i le itulau 8]

UN PHOTO 186226/M. Grafman