La Tatou Tauiviga mo se Olaga Faaumiumi Atu

“O le tagata ua fanau mai i le fafine, ua saasaa ona aso, mona ua tumu i le atuatuvale. E tupu ae o ia e pei o le fuga, a e salaeseina; e mavae atu foi o ia e pei o le ata, ma ua le tumau.”—Iopu 14:1, 2.

E OO lava i aso nei, o loo iai pea ni tagata toʻalaiti o le a latou lē ioeina lenei manatu i le puupuu o le olaga, e ui o se manatu na tusia pe ā ma le 3,500 tausaga ua mavae. E masani ona lē fiafia tagata talu ai le puupuu o le taimi e malaulau ai lona olaga seʻia oo ina matua ma oti. O le mea lea, a o faagasolo le talafaasolopito, ua faateleina metotia o loo faia ina ia faaumiumi ai le soifuaga.

I le vaitaimi o Iopu, sa ʻaina ai e tagata Aikupito seʻi tulou taufale o manu, i se taumafaiga sili ona valea e toe faafoʻisia mai ai lo latou olaga talavou. O se tasi o sini autū o se faiga sa fai i tuā i le va o le 500 ma le 1500 T.A. (Middle Ages) sa suia ai se uamea e avea ma auro, ina ia mafai ona maua mai ai se suāvai lea e mafai ona faaumiumi ai le ola o se tasi. E toʻatele tagata o loo faia lea sailiiliga e talitonu faapea, o le auro lea e maua mai le uamea o le a avatu ai se ola e lē mafai ona muta, ma o le taumafaina o se meaʻai o loo asu mai i ipu mafolafola auro e mafai ona faaumiumi ai le soifua. Sa manatu tagata Saina anamua o le lotu Tao e faapea, e mafai ona latou fesuiaʻiina le faatulagaga o le tino o le tagata e ala i le faaaogā o auala e pei o le mafaufau loloto, o le faamalosia lelei o le mānava, ma le fuafua lelei o taumafa tatau, ona maua ai lea o se ola e lē mafai ona oti.

Ua lauiloa le tagata suʻesuʻe Sepania o Juan Ponce de León i lana sailiiliga lē faamalieina mo se faavae mautū o le olaga talavou. O se fomaʻi o le senituri lona 18, sa faaofi mai sona manatu i lana tusi Hermippus Redivivus e faapea, e lelei pe a tuu taupou talavou i se tamaʻi potu i le vaitaimi o le tau e totogo ai laau, ma aoaoina uma ai i ni fagu le ea o loo latou mānavaina mai i fafo, ona avatu lea o na ea e faaaogā e fai ma vailaau e faaumiumi ai le ola. Ae pagā lea, e leai ma se tasi o nei taumafaiga na taulau manuia.

I aso nei, pe ā ma le 3,500 tausaga ua teʻa talu ona faamauina e Mose le faamatalaga a Iopu, ua mafai e le tagata ona savali i le masina, ua mafai ona ia fausia taavale ma komepiuta, ma mafai foʻi ona ia sailiilia maeʻaeʻa le atoma ma le sela. Peitaʻi, e ui i lena agaʻigaʻi i luma o le atamai i mea tau masini faaonaponei, ae o loo tatou ola lava i se olaga ‘saasaa ma tumu i le atuatuvale.’ E moni i atunuu tamaoaiga o loo mataʻina le faateleina atu o le umi o loo soifua ai tagata i le senituri na mavae atu. Peitaʻi o le māfuaaga autū o lena suiga ona ua faaleleia le tausiga o le soifua mālōlōina, ua faamamafaina atili le tausiga o le tumamā, ma le faaleleia atili o taumafa talafeagai. Mo se faaaʻoaʻoga, e faasolo mai tausaga ogatotonu o le senituri lona 19 e oo atu i uluaʻi tausaga mai le 1990, o le fua faatatau o le umi o le taimi e soifua ai tagata i Suetena na sii aʻe mai le 40 e oo atu i le 75 tausaga mo tamāloloa, ae 44 e oo atu i le 80 mo fafine. Ae pe o le uiga ea la o lenei mea, ua faamalieina le manaʻoga o le tagata ina ia faaumiumi atu ona ola?

E leai, auā e ui lava i nisi atunuu o loo toʻatele pea tagata o loo faaauau ona soifua seʻia oo ina aulia atu o latou tausaga matutua, ae o loo tumau pea le moni o upu a Mose na tusia i le tele o tausaga ua mavae e faapea: “O tausaga o matou olaga e fitugafulu ia tausaga; a e afai e valugafulu tausaga ona o le malosi . . . auā e vave ona mavae atu ia, ma matou lele ese.” (Salamo 90:10) I le lumanaʻi ua lata mai, pe o le a tatou vaaia ea se suiga? Po o le a mafai ea e le tagata ona soifua i se taimi e sili mamao atu ona umi? O le a talanoaina i le mataupu o loo sosoo mai na fesili.