Pe Mafai Ona E Auauna i se Isi Atunuu?

“SA OU moomoo pea i loʻu fia alu i le galuega faamisionare. A o nofo fua, sa ou galue ai i Texas, i le Iunaite Setete o Amerika, o iinā sa manaʻomia tele ai ni tagata talaʻi. Ina ua uma ona ou faaipoipo, sa aufaatasi atu ai loa laʻu avā ia te aʻu iinā. Ina ua fanau la ma tama teine, sa ou manatu loa faapea, ‘Ia ua uma ai foʻi iinei le avea o aʻu ma misionare.’ Ae peitaʻi, e mafai e Ieova ona faataunuuina moomooga o le loto, ae maise lava pe afai o ni moomooga e fesootaʻi atu ma le faia o lona finagalo.”—Iese, o loo auauna i le taimi nei i Ekutoa faatasi ma lana avā ma le fanau e toʻatolu.

 “Ou te leʻi manatu lava e mafai ona ou faia se mea faapena e aunoa ma le toleniina i le aʻoga faamisionare o Kiliata. Ina ua ou vaai atu i se tasi o aʻu tagata suʻesuʻe o le Tusi Paia o fai se lauga po o talaʻi foʻi, sa matuā faafiafiaina ai aʻu, ma sa ou faafetai atu ia Ieova ona o le tuuina mai ia te aʻu o lenei avanoa.”—Karen, o se tamaʻitaʻi e leʻi nofotane o lē sa paeonia mo le valu tausaga i Amerika i Saute.

“Ina ua uma ona talaʻi faataimi atoa mo le 13 tausaga i le Iunaite Setete, na ma lagona ai ma laʻu avā e faapea, ua ma manaʻomia se isi galuega e uunaʻia atili ai. Ua sili atu ona ma fiafia na i lo muamua; o se auala matuā matagofie moni lea o le olaga.”—Toma, o loo paeonia ma lana avā o Lina i le vaega o le Amasone.

O nei faamatalaga o le loto talisapaia, e mai tagata, o o latou tulaga sa lē mafai ai ona maua se toleniga faamisionare i le Aʻoga Faale-Tusi Paia a le Olomatamata o Kiliata. Ae ui i lea, ua latou tofo i le olioli ma luʻi o le auaunaga i isi atunuu. Na faapefea ona faia o lenei mea? Pe fetaui mo oe lena auaunaga?

E Manaʻomia Uunaʻiga Saʻo

E manaʻomia isi mea e sili atu ina ia taulau manuia ai i le auaunaga i se isi atunuu na i lo le tau ina iai se agaga o le fia iloa o se atunuu fou. O i latou o ē na finafinau ua latou faia faapea ona o le iai o uunaʻiga saʻo. I le pei o le aposetolo o Paulo, sa latou manatu ia i latou lava o ni ē o loo nofo aitalafu, e lē gata i le Atua ae faapea foʻi i tagata. (Roma 1:14) E mafai lava ona latou faataunuuina le poloaʻiga tauatua ina ia talaʻi e ala i le auai i le faiva i o latou lava nuu. (Mataio 24:14) Ae ua ia i latou se lagona e faapea o loo nofo aitalafu ma ua uunaʻia ai i latou ina ia aapa atu ma fesoasoani i ē o loo seāseā maua le avanoa e faalogo ai i le tala lelei.

O le faanaunauga ina ia galue i se oganuu e sili atu ona fua tele, e masani lava o se isi lea uunaʻiga—ma ua talafeagai lea. O ai se tasi o i tatou e lē manaʻo e sōsō atu e faalatalata i le ogasami lea e matuā taulau manuia ai le isi faifaiva? E faapena foʻi i lipoti faafiafia loto o faatelega mataʻina i isi atunuu ona faalaeiʻauina ai le toʻatele ina ia ō atu i le mea o iai “le au iʻa tele lava.”—Luka 5:4-10.

Ia Fuafua le Tau

E tele atunuu e lē faatagaina ai ni tagata faigaluega tauofo faalelotu mai isi atunuu e faigaluega totogi i o latou atunuu. O lea o i latou o ē mananaʻo e auauna i se isi atunuu e masani lava ona tatau ona iai ni a latou lava tupe e tausi ai i latou. Ua faapefea ona faafetaiaʻia lenei luʻi tau tamaoaiga? E toʻatele nisi ua faatau atu o latou fale pe tuu atu e mautotogi ai tagata ina ia maua ai tupe manaʻomia. O isi ua faatau atu a latou pisinisi. O isi ua faaputu tupe e faatatau i lo latou sini. A o isi foʻi o loo auauna i se isi atunuu mo se tausaga e tasi pe lua, ona toe foʻi atu lea i o latou lava atunuu e faigaluega ai ma faaputu ni tupe, ona toe alu foʻi lea e toe auauna ai iinā.

O se aogā e lē mafesiligia le nofo i se atunuu tau atiaʻe ona e masani lava ona maulalo le tau o le soifuaga na i lo atunuu mauoloa. O lenei mea ua mafai ai e nisi ona maua le avanoa e ola ai i se penisiona talafeagai. O le mea moni, o tupe faaalu a se tagata o le a faalagolago tele i tulaga o le soifuaga ua filifilia e se tagata. E oo lava i atunuu tau atiaʻe, e mafai ona maua ai fale matuā lelei e nonofo ai, ae e matuā taugatā lava.

E manino mai la, e tatau lava ona fuafua tupe  faaalu a o leʻi gaoioi e siitia atu. Peitaʻi, e tele lava mea e aofia ai na i lo le tau ina fuafua le tau o le tamaoaiga. Atonu o le a avea faamatalaga a nisi o ē na auauna i Amerika i Saute ma faamalamalamaga.

Le Luʻi e Aupito Sili Ona Faigatā

E manatua e Markku, mai Finilani e faapea: “O le aʻoaʻoina o le gagana Sepania, sa avea o se luʻi moni lava ia te aʻu. Sa ou manatu e faapea, talu ai ou te lē iloa le gagana, o le a umi lava la se taimi ona faatoʻā avea lea o aʻu ma auauna o le faiva. Ae maʻeu se faateʻia o aʻu ina ua talosagaina aʻu ou te faia se suʻesuʻega tautusi ina ua mavae le na o le lua masina! O le mea moni, sa tele lava ni taimi na lagona ai le masiasi. O le mea sa avea ma faigatā faapitoa ia te aʻu, o le faaleoina o igoa. I le tasi aso na ou valaauina ai le uso o Sancho, o ‘Uso Chancho (puaa),’ ma o le a lē tāitai galo ia te aʻu loʻu faaigoaina o le tuafafine o Salamea, ‘o Malasea (amioleaga).’ Ae o le mea e lelei ai, ona sa faaalia pea e uso ma tuafāfine le onosaʻi.” Mulimuli ane, sa auauna ai Markku ma lana avā o Seline, o se ovasia matagaluega mo le valu tausaga i lena atunuu.

Ua faamatala mai e Chris, le avā a Iese lea na taʻua muamua e faapea: “Ou te manatua la matou uluaʻi asiasiga mai le ovasia matagaluega, ae ua faatoʻā tolu masina talu ona ma iai iinei. Sa mafai ona ou iloa na faaaogā e le uso ni tala faatusa ma sa ia faia se faamatalaga manaia e taumafai ina ia pāʻia ai o matou loto, ae sa lē mafai ona ou malamalama ia te ia. Iinā lava i le maota, sa ou tagi ai. Sa lē na ona maligiligi o oʻu loimata; ae sa ou matuā tagi masūsū lava. Ina ua uma le sauniga, sa ou taumafai e faamatala atu i le ovasia matāgaluega laʻu amio. Sa agalelei tele o ia ma taʻu mai ia te aʻu le tala lea e fai soo mai e isi tagata uma ia te aʻu, ʻTen paciencia, hermana’ (‘Ia onosaʻi tuafafine’). I le lua po o le tolu tausaga mulimuli ane, na matou toe feiloaʻi ai ma talanoa ai lava mo le 45 minute, ua matuā fiafia ona ua mafai ona matou talanoa.”

Ua mātauina e se tasi uso e faapea: “E tāua tele le suʻesuʻe. O le tele o taumafaiga tatou te faia i le aʻoaʻoina o le gagana, o le tele foʻi lea o le faaleleia o o tatou tomai e tautala atu ai.”

E ioeina e tagata uma e faapea o na taumafaiga e maua ai aogā e tele. A o tauivi se tasi e aʻoaʻoina se gagana fou, e ati aʻe ai le loto maulalo, le onosaʻi, ma le finafinau. Ua matala mai se faitotoʻa tele o avanoa e talaʻi atu ai le tala lelei i isi. Mo se faaaʻoaʻoga, o le aʻoaʻoina o le gagana Sepania e mafai ai e se tasi ona talanoa atu i se gagana e tāutala i ai le sili atu i le 400 miliona tagata i le lalolagi aoao. O le toʻatele o ē na toe foʻi atu mulimuli ane i o latou atunuu, o loo mafai pea ona faaaogāina lo latou tomai e tautala ai i lea gagana e fesoasoani atu ai i tagata o ē tāutala i le gagana Sepania.

 Ae Faapefea le Maʻi Manatu i le Aiga?

E manatua e Tepora o lē o loo auauna ma lana tane o Gary i le vaega o le Amasone e faapea: “Ina ua ma faatoʻā ō mai i Ekutoa i le 1989, sa masani ona ou maʻi manatu i loʻu aiga. Sa ou aʻoaʻoina ina ia sili ona ou faalagolago atu i uso ma tuafāfine o le faapotopotoga. Na oo ina avea i latou e pei o loʻu aiga.”

O Karen lea na taʻua i le amataga, ua ia taʻua e faapea: “Sa ou tauivi ma loʻu maʻi manatu i loʻu aiga e ala i loʻu auai i le faiva i aso uma. I lenei auala sa ou lē manatu ai i loʻu aiga. Sa ou manatua foʻi e faapea, o loo mitamita oʻu mātua o loo faamuli mai i lo matou aiga, i laʻu galuega lea o loo galue ai i se isi atunuu. E faalaeiʻau mai pea Tinā ia te aʻu i upu nei: ‘E sili atu ona lelei le tausiga a Ieova ia te oe na i lo laʻu tausiga.’”

Ua faaopoopo mai i se uiga tau faaʻata Makiko mai Iapani e faapea: “Pe a uma ona faaalu se aso atoa i le auaunaga i le fanua, ou te lagona le vāivai. O lea, pe a ou alu atu i le fale ma amata ona lagona le maʻi manatu i loʻu aiga, e masani lava ona ou faagalegalemoe atu ai loa. O le iʻuga, e lē umi ae toe teʻa ese atu loa lena faalogona.”

Ae Faapefea Tamaiti?

Pe afai e aafia ai tamaiti, e tatau ona manatunatu i o latou manaʻoga, e pei o aʻoaʻoga. E tusa ai o lenei mea, ua filifili ai nisi e aʻoaʻoina a latou fanau i le fale a o isi e avatu a latou fanau i aʻoga a le nuu.

Na siitia atu Al ma lana avā, ma le la fanau e toʻalua ma lona tinā i Amerika i Saute. Ua faapea mai o ia: “Na ma iloa, o le avatu o tamaiti i le aʻoga sa fesoasoani ia i latou e vave ona aʻoaʻoina le gagana. E na o le tolu masina, ae ua matuā sologa lelei la latou tautala i le gagana.” Peitaʻi, o le fanau tama talavou e toʻalua a Mika ma Carrie, e taʻisefulu ma ona tupu o la tausaga, sa aʻoaʻoina e ala i se aʻoga e faia mea aʻoga e ala i ni fetusiaʻiga. Ua mātauina e mātua faapea: “Ua ma iloa, o na aʻoaʻoga e lē mafai ona tuutiaʻi atu i la ma fanau. Sa tatau ona fai sa ma vaega i le gasologa o le lesona ma faamautinoa ua fai e tama a la mea aʻoga na aumai.”

Ua faaalia e Tavita ma Ianeta mai Ausetalia o la lagona e uiga i le la fanau tama e toʻalua e faapea: “Sa ma mananaʻo ina ia vāaitino la ma fanau i le auala o loo ola ai isi. E faigofie lava ona manatu faapea o le ituaiga o olaga lea o loo matou ola aʻe ai o se olaga masani, ae o le mea moni lava, e toʻaitiiti ni tagata o le lalolagi o loo ola e pei o i matou. Ua la vaai foʻi i le auala o loo faatinoina ai mataupu silisili faatiokarate i le lalolagi aoao, e tusa lava po o ai le atunuu po o le ā foʻi le aganuu.”

Ua manatua e Ken e faapea: “Sa na o le fā oʻu tausaga ina ua siitia ese lo matou aiga mai Egelani i le 1969. E ui lava sa ou lē fiafia ona sa matou leʻi nonofo i se fale e faia i palapala ma āto i vaovao e pei ona sa ou muaʻi manatu i ai, ae sa ou lagona, na ou maua le tausiga aupito sili ona fiafia ua mafai ona mauaina e se talavou. Sa ou lagona pea le tigā alofa mo isi tamaiti o ē latou te leʻi mauaina lea avanoa! Talu ai sa lelei le auaumea ma misionare ma paeonia faapito, na amata ai ona ou paeonia lagolago ina ua iva oʻu tausaga.” Ua avea nei Ken o se ovasia femalagaaʻi.

Ua ioeina e Gabriella le afafine o Iese e faapea: “Ua avea moni lava Ekutoa ma o matou aiga i le taimi nei. Ua ou fiafia ona sa filifili oʻu mātua e ō mai iinei.”

I le isi itu, e iai lava tamaiti sa lē mafai ona latou faia ni fetuunaʻiga ona o ni māfuaaga eseese, ma iʻu ai ina toe foʻi atu o latou aiga i o latou atunuu moni. O le pogai lena e fautuaina ai le tatau ona asiasi muamua i se atunuu e tau ina vaavaai i ai a o leʻi siitia atu e nonofo ai iinā. I lenei auala e mafai ai ona faia ni faaiʻuga e faavae aʻe i mea ua molimau vaaitino i ai.

 Faamanuiaga Ona o le Siitia Atu

O le mea moni, o le siitia atu i se isi atunuu e aofia ai le tele o luʻi ma faataulagaina. Po ua faamaonia ea le iai o ni aogā ia i latou ua siitia atu? Seʻi o latou faamatala mai ia i tatou.

Iese: “I le sefulu tausaga talu ona matou iai i le aai o Ambato, ua matou vaaia ai le tuputupu aʻe o faapotopotoga mai le 2 i le 11. Sa ia i matou le faaeaga o le fesoasoani atu i le amataina o faapotopotoga e lima o na faapotopotoga, ma sa matou galulue foʻi i le fausiaina o Maota e lua o le Malo. Sa matou olioli foʻi i le fesoasoani atu i ni tagata suʻesuʻe o le Tusi Paia o se faatatauga pe ā ma le toʻalua tagata i le tausaga, ina ia agavaa mo le papatisoga. E na o le tasi lava loʻu faanoanoaga—o le leʻi ō mai iinei i le sefulu tausaga muamua atu.”

Lina: “E matuā faalaeiʻauina lava i matou ona o le talisapaia e tagata o le tala lelei faapea ma a matou taumafaiga. Mo se faaaʻoaʻoga, i se aai laitiiti i se togāvao, na iloa ai e se tagata suʻesuʻe o le Tusi Paia e igoa ia Alfonso le aogā pe a fai lauga lautele i lona vaipanoa. Sa faatoʻā siitia atu lava o ia i lona fale fou faatoʻā uma ona fausia i laupapa, o se tasi lea o fale e faapea o latou fausaga e lē telē naʻuā i le nuu. I le manatu e faapea, sa na o lona fale lava i le aai e talafeagai mo Ieova, na toe siitia atu ai o ia i lona fale lauvao, ae faaavanoa lona fale fou mo le auuso e faaaogā e fai ma Maota o le Malo.”

Simi: “O le taimi matou te faaaluina i le faiva e talanoa atu ai i tagata, e faasefulu taimi e sili atu ai i lo taimi matou te faia ai faapea i le Iunaite Setete. E faaopoopo atu i ai, o le tulaga o le olaga iinei e sili atu ona toʻafilemu. E mautinoa e sili atu ona tele le taimi e faaalu mo suʻesuʻega ma le auaunaga i le fanua.”

Sandra: “I le vaai atu i le auala e mafai ona suia ai e le upu moni o le Tusi Paia tagata i ni olaga lelei, ou te matuā lagona ai le loto malie. Na iai se taimi, na ma suʻesuʻeina ai le Tusi Paia ma Amada, o se fafine e 69 tausaga le matua, e iai sona tamaʻi faleoloa. Sa fai ma masani a lenei fafine lona suiina o le susu i se fua e taʻi lua lita o le vai e ligi i totonu o le sefulu lita o le susu. Sa ia faia atili foʻi se isi faiga faimamago i ana tagata faatau e ala i le faatau atu ia i latou o lenei susu ua suivai ae ua lē faatumuina lelei. Ae ina ua uma ona ia suʻesuʻeina le mataupu i lalo o le ulutala ‘O le Faamaoni e Iu i le Fiafiaga’ i le mataupu e 13 o le tusi, Le Poto e Taʻitaʻia ai i le Ola e Faavavau, sa taofia loa e Amada nei faiga sesē. Maʻeu le olioli na iai i le vaai atu ua papatisoina o ia i se taimi mulimuli ane!”

Karen: “Sa leʻi faapea muamua ona ou faalagolago tele atu ia Ieova pe faaaogāina foʻi aʻu e ia i se auala e sili atu, na i lo le tulaga lea ua ou iai iinei. Ua oo ina matuā loloto ma māfana la ma faauōga ma Ieova.”

Ae Faapefea Oe?

I le faagasologa o tausaga, e faitauafe Molimau ua siitia atu ina ia auauna i isi atunuu. O nisi e nonofo ai mo le tausaga e tasi pe lua foʻi, a o isi e faaauau ai pea. E latou te ō atu ma lo latou poto masani, taʻumatuaina faaleagaga, ma ālamanuia tautupe, faatasi ma le sini ina ia faaauiluma manaʻoga o le Malo i se isi atunuu. Ua mafai ona latou auauna i vaipanoa e lē o mafai ona auauna ai tagata talaʻi o le Malo o lena nuu ona e seāseā maua ni galuega totogi. E toʻatele ua faatauina ni a latou taavale malolosi e mafai ona aʻe i auala lauleaga mo le galueaʻiina o oganuu sa ono lē mafai ona ō atu i ai pe ana lē seanoa taavale. O isi, e sili atu ia i latou le olaga i le taulaga, ma ua avea o ni ē faamautūina faapotopotoga tetele ia e toʻalaiti toeaina o loo iai. Peitaʻi, e tutusa uma lava i latou, i lo latou faapea mai ma le maumauaʻi, e matuā sili atu mea ua latou maua i faamanuiaga faaleagaga na i lo mea ua latou foaiina atu.

Pe mafai ona faia sou sao i le faaeaga o le auauna i se isi atunuu? Afai e tusa ai ma ou tulaga, aisea e lē iloilo ai pe ono mafai ona e siitia atu? O le laasaga muamua ma le talafeagai, o le tusi atu lea i le ofisa o le lālā a le Sosaiete i lou atunuu e faatatau i se vaipanoa o e manatu e te auauna ai. O faamatalaga maʻoti e te mauaina mai o le a fesoasoani ia te oe e filifili ai i ou avanoa e faataulau manuia ai lena fuafuaga. E lē gata i lea, e tele fautuaga aogā e mafai ona maua i le mataupu “Go Out From Your Land and From Your Relatives,” (Ia Tuua Lou Nuu ma Ou Aiga) i le lomiga o le Watchtower o Aokuso 15, 1988. O le faia o fuafuaga lelei faatasi ai ma le faamanuiaga a Ieova, atonu e te mafai ai foʻi ona e tofo i le olioli o le auauna i se isi atunuu.

[Ata i le itulau 24]

O TOMA MA LINA I SE AUALA TUESE, O LOO AGAʻI ATU I SHUAR I AMERIKA I SAUTE

[Ata i le itulau 25]

E TOʻATELE O LOO AUAUNA I QUITO, LE LAUMUA O EKUTOA

[Ata i le itulau 25]

O MAKIKO O LOO TALAʻI I ATU MAUGA O LE ANDES

[Ata i le itulau 26]

LE AIGA O LE ʻAU HILBIG SA AUAUNA I EKUTOA MO LE LIMA TAUSAGA UA MAVAE