Se Matātiʻa Tāua mo ē Naunau i le Afioga a le Atua

I le 1998 na ausia ai se matātiʻa mataʻina mo ē uma e naunau i le Afioga a le Atua. I lena tausaga, na lomia ai le kopi lona 100 miliona o le “New World Translation of the Holy Scriptures.” Ona avea ai lea o se tasi o Tusi Paia ua sili ona lautele lona tufatufaina atu i lenei senituri!

O LENEI gaoioiga iloga ua sili ona mataʻina pe a fua i le tulaga ina ua faatoʻā tatalaina mai, sa fesagaʻi ai lenei faaliliuga ma ni faitioga ogaoga. Peitaʻi, ua lē gata ina sao mai na faitioga, ae ua taulau manuia foʻi, ma oo atu ai i le faitau miliona o aiga—ma loto o tagata—i le lalolagi atoa! O le ā le amataga mai o lenei faaliliuga tutasi? O ai na lagolagoina? Ma e te ono maua ai faapefea ni aogā pe a e faaaogāina?

Aisea na Manaʻomia ai se Faaliliuga Fou?

Ua silia i le selau tausaga o tufatufa atu Tusi Paia e le Watch Tower Bible and Tract Society, o le faalapotopotoga faaletulafono o loo fai ma sui o Molimau a Ieova. Ae aisea, na manatu ai Molimau a Ieova e manaʻomia ona fai se isi lomiga o le Afioga a le Atua? Ua taʻua e le tusi So Many Versions?, na tusia e Sakae Kubo ma Walter Specht e faapea: “E lē tāitai ona iai se faaliliuga o le Tusi Paia e mafai ona manatu i ai faapea o le faaliliuga mulimuli lena. E tatau ona faaauau pea ona fetuutuunaʻi faaliliuga ina ia ōgatusa ma le faatuputupulaʻia o aʻoaʻoga loloto i mataupu faale-Tusi Paia faapea foʻi i suiga o gagana.”

Ua vaaia i lenei senituri ni suiga se tele i le faamalamalamaina o le gagana Eperu, Eleni, ma le gagana Arama—o gagana sa muaʻi tusia ai le Tusi Paia. E lē gata i lea, e iai ni manusikulipi o le Tusi Paia ua maua ma iloa, e sili atu ona leva ma sili atu ona saʻo aʻiaʻi na i lo manusikulipi na faaaogā e augātupulaga ua mavae o ē na faaliliuina le Tusi Paia. E mafai ai la ona faaliliuina le Afioga a le Atua i se tulaga e sili atu ona saʻo lelei i aso nei na i lo se isi lava taimi muamua atu! O se māfuaaga lelei la, na māfua ai ona faatulaga se komiti tau faaliliu (New World Bible Translation Committee), latou te gafa ma le faaliliuina o le Tusi Paia i gagana o loo faaaogā i ona po nei.

I le 1950 na lomia ai le lomiga i le gagana Peretania o le New World Translation of the Christian Greek Scriptures. O le ulutala lava o le tusi na faaalialia ai se matuā vavae ese mai uputuu, ma teena ai le vaevaega lea e vaelua ai le Tusi Paia ua taʻua o le feagaiga “Tuai” ma le feagaiga “Fou.” I le isi sefulu tausaga na sosoo ai, sa lomia ai ni vaega o Tusitusiga Eperu i ni vaega taʻitasitasi se tele. I le 1961, sa tatala mai ai loa le Tusi Paia atoa faa-Peretania i se tusi atoa e tasi.

Ae o ai na faaliliuina lenei Tusi Paia mataʻina? Na taʻua e Le Olomatamata faa-Peretania o Setema 15, 1950 e faapea: “O tane o ē na faia aʻe ai le komiti faaliliu ua latou faaalia mai lo latou faanaunauga . . . ia lē faailoaina mai i latou, ae maise lava e lē mananao e faasalalau atu o latou igoa a o latou soifua mai pea pe maliliu atu foʻi. O le fuafuaga o le faaliliuga ina ia faasilisilia ai le suafa o le Atua moni o loo soifua.” Na manatu nisi tagata faitio faapea e tatau ona vave toe aveese atu lea tusi ona o se tusi na faia e ni tagata e lē o iai ni agavaa, peitaʻi e lē o tagata uma na ioe i lena manatu lē talafeagai. Ua tusi mai Alan S. Duthie e faapea: “Pe afai tatou te iloa po o ai tagata na faaliliuina pe lomiaina se faaliliuga patino o le Tusi Paia, pe aogā ea lena ia i tatou e iloa ai pe lelei pe leaga lena faaliliuga? Atonu e leai. E leai  se isi lava auala e mafai ona iloiloina ai tulaga eseese o faaliliuga taʻitasi.” *

Vala Mataʻina

E faitau miliona tagata faitau ua latou faia tonu lava lena mea ma iloa ai, o le New World Translation e lē gata ina faigofie ona faitauina ae matuā saʻo aʻiaʻi foʻi. O ē na faaliliuina sa latou faaaogāina uluaʻi tusitusiga i gagana Eperu, Arama, ma Eleni, e ala i le faaaogā o tusitusiga e sili ona saʻo sa latou maua. * Sa matuā faaeteete lava ina ia mautinoa ua faaliliuina i se tele e mafai ai tusitusiga anamua i le uiga moni sa iai i le uluaʻi gagana, ae i se gagana o le a faigofie ona malamalama i ai. O le mea lea, ua viiviia ai e nisi tagata atamamai faapitoa lenei faaliliuga ona o lona faamaoni ma lona saʻo aʻiaʻi. Mo se faaaʻoaʻoga, na faapea mai le lomiga o le Andover Newton Quarterly o Ianuari 1963: “O le faaliliuga o le Feagaiga Fou o se faamaoniga e iloa ai, sa faia ai se sao o ni tagata atamamai faapitoa ua agavaa latou te faatautaia ma le atamai le tele o faafitauli o loo fesagaʻi ma faaliliuga o le Tusi Paia.”

Sa aumaia e le aufaaliliu le tele o se isi malamalamaga fou i mataupu faale-Tusi Paia. O mau o le Tusi Paia sa itiiti sina malamalamaga i ai muamua, ae ua oo ina matuā manino mai. Mo se faaaʻoaʻoga, o le mau lavelave i le Mataio 5:3, “e manuia ē o loo matitiva i le agaga” (King James Version), sa faaliliuina i se auala ua manino lelei i ai: “E fiafia i latou o loo mataala i o latou manaʻoga faaleagaga.” E tausisi lava foʻi ma taotasi le New World Translation i lona faaliliuina o faaupuga autū. Mo se faaaʻoaʻoga, o le upu Eleni o le psy·kheʹ, ua faaliliuina i le “solu” i taimi uma e aliali mai ai. O le iʻuga, e mafai ai e tagata faitau ona latou vave malamalama o le solu e lē o se mea e lē mafai ona oti, ua ese lena mai talitonuga faalotu!—Mataio 2:20; Mareko 3:4; Luka 6:9; 17:33.

Le Toe Faafoʻisia o le Suafa o le Atua

O se vala mataʻina o le New World Translation e aofia ai le toe faafoʻisia o le suafa o le Atua, o Ieova. I kopi anamua o le Tusi Paia Eperu, ua tusia ai le suafa tauatua i ni konesane se fā e mafai ona sipelaina faapea YHWH po o JHVH. O lenei suafa iloga e toetoe lava 7,000 taimi e aliali mai ai i le na o le vaega ua taʻua o le Feagaiga Tuai. (Esoto 3:15; Salamo 83:18) E mautinoa lava, sa finagalo Lē na Foafoaina i tatou ina ia iloa ma faaaogā e ona tagata tapuaʻi lena suafa!

Peitaʻi ane, o le mataʻu i faiga faanuupo na māfua ai ona lē toe faaaogā e tagata Iutaia le suafa tauatua. Ina ua maliliu atu aposetolo o Iesu, na amata loa e tusiupu o Tusitusiga Eleni ona latou suia le suafa totino o le Atua i ni upu faa-Eleni o le Kyʹri·os (Alii) po o The·osʹ (Atua). O le mea e faanoanoa ai, ona o loo faaauau mai pea e tagata faaliliu i ona po nei lenei uputuu ua lē faamamaluina ai le Atua, ua aveesea le suafa o le Atua mai le tele o Tusi Paia ma ua oo lava ina latou nanāina ai le mea moni o le Atua e iai sona suafa. Mo se faaaʻoaʻoga, i le Ioane 17:6 o loo iai fetalaiga a Iesu e faapea: “Ua ou faaali atu lou suafa.” Ae i le Today’s English Version, o loo faitauina faapenei: “Ua ou faaali atu oe.”

E tau punipuni mai e nisi tagata atamamai faapitoa le aveesea o le suafa tauatua i le faapea mai, ona e lē o iloa lelei le faaleoga saʻo o le igoa. Peitaʻi, o isi igoa faale-Tusi Paia e tali faapena foʻi, e pei o Ieremia, Isaia, ma Iesu o loo faaleo i ni auala e itiiti ai lava so latou tutusa atu i le faaleoga sa faaleo ai i le uluaʻi gagana Eperu. Talu ai o le upu Ieova o se auala lea ua faamaonia aloaʻia e taʻua ai le suafa tauatua—ma ua masani ai  foʻi le toʻatele o tagata—e foliga mai ai la e lē o moni māfuaaga o teteega ia o loo faia i ai.

Sa laasia e le Komiti o le Faaliliuga o le Tusi Paia a le Lalolagi Fou (New World Bible Translation Committee) se laasaga maumauaʻi o le faaaogāina lea o le suafa o Ieova i vaega uma o le Tusi Paia i le faa-Eperu ma le faa-Eleni. Sa latou faia muamua foʻi lenei mea i uluaʻi faaliliuga a misionare mo tagata i Amerika Tutotonu, i le Vasa Pasefika, ma atunuu Asia. Peitaʻi, o se faaaogāina faapena o le suafa o le Atua ua lē na o se mea na fai ona e fiafia i ai i tulaga tau aʻoaʻoga. O le iloaina o le suafa o le Atua e tāua tele mo le iloaina o ia o se peresona. (Esoto 34:6, 7) Ua faalaeiʻauina e le New World Translation le faitau miliona o ana tagata faitau ina ia faaaogā lona suafa!

Ua Maua e Tagata Faitau e Lē Malamalama i le Faa-Peretania

I le va o le 1963 ma le 1989, na maua ai le New World Translation, a lē i le tusi atoa pe i sona vaega, i isi gagana e sefulu. Peitaʻi, sa matuā faigatā le galuega faaliliu, o nisi faaliliuga sa faaaluina ai le 20 tausaga pe sili atu foʻi. Ae i le 1989, sa faavaeina ai loa le Matagaluega o Galuega Faaliliu (Translation Services Department) i le ofisaulu i le lalolagi aoao o Molimau a Ieova. I le taʻitaʻiga a le Komiti o Tusitusiga a le Vaega Pule, ua faavaeina ai lenei matagaluega ina ia faavavevave le faaliliuina o le Tusi Paia. Sa fafauina aʻe se auala e faia ai faaliliuga lea e tuufaatasia ai se suʻesuʻega o upu faale-Tusi Paia ma faiga faakomepiuta. E faapefea ona faagaoioia lenei faiga?

O le taimi lava e faamaonia ai e le Komiti o Tusitusiga le faaliliuina o le Tusi Paia i se gagana fou, ona latou tofia lea o se vaega o ni Kerisiano tuuina atu e galulue o se aufaaliliu. E mafai e se vaega e galulue faatasi o se aufaaliliu ona latou faia ni faaliliuga e sili atu ona talafeagai na i lo ni faaliliuga e mafai ona faia e le tagata o loo galue toʻatasi na o ia lava. (Faatusatusa i le Faataoto 11:14.) O le tulaga masani lava, e tatau i sui taʻitoʻatasi o le aufaaliliu ona iai sona poto masani i le faaliliuina o lomiga a le Sosaiete. Ona faia lea o se aʻoaʻoga maeʻaeʻa mo le vaega atoa e tusa ai o aiaiga autū o le auala e faaliliu ai le Tusi Paia, faapea foʻi i le faaaogāina o polokalame faakomepiuta ua sauniunia faapitoa mo lea galuega. E lē o le komepiuta na te faia le galuega tonu tau faaliliu, peitaʻi o le komepiuta e mafai ai e le aufaaliliu ona latou maua gofie faamatalaga tāua ma fesoasoani ia i latou e faamaumau lelei ai a latou filifiliga e fai.

E lua sitepu o le galuega mo le faaliliuina o le Tusi Paia. A o faagasolo le sitepu muamua, e tuuina atu ai i tagata faaliliu se lisi o upu ma faaupuga o loo faaaogā i le Tusi Paia faa-Peretania o le New World Translation. O faaupuga faa-Peretania e tutusa uiga, e pei o le “faalelei,” “togisala,” ma le “faamalie,” e tuufaatasi i se vaega e tasi, ina ia nofouta ai tagata faaliliu i eseesega laiti o uiga o nei upu. Ona latou tuufaatasia lea o se lisi o upu ua faaliliu i ai i la latou gagana. Peitaʻi, i nisi taimi, atonu e faigatā ai i se tagata faaliliu ona faaliliu se fuaiupu o se mau. O le polokalame la a le komepiuta lea e suʻe ai faamatalaga e taʻua o le research, e aumai ai i le tagata faaliliu ni faamatalaga i upu Eleni ma upu Eperu, ma mafai foʻi ona saili atu ai i lomiga a le Olo Matamata.

A o faasolo atu le galuega i le sitepu lona lua, e otometi lava ona tuu atu upu ia ua uma ona filifilia mai le gagana, ma tuu i le mau o le Tusi Paia. O lenei faiga e mafai ai ona saʻo lelei ma tutusa uma upu po o faaupuga e faaaogā i le faaliliuga. Peitaʻi ane, o le mau e maua mai lenei faiga o le saili o upu ma sui (search and replace) e fai sina faigatā ona faitauina. E tele ni galuega e tatau ona fai ina ia toe fetuunaʻi ma toe faaupu ai fuaiupu o le Tusi Paia ina ia mafai ona sologa lelei le faitauina.

O lenei polokalame tau faaliliu ua faamaonia le matuā aogā. Na mafai ai e se vaega faaliliu ona latou faaliliuina uma Tusitusiga Eperu i le na o le lua tausaga. Seʻi faatusatusa la i se vaega sa latou faaliliuina se gagana tai faapena foʻi ae sa latou leʻi maua se fesoasoani tau komepiuta. E 16 tausaga na latou faaaluina. E oo mai i aso nei, ua mafai ona lomia Tusitusiga Kerisiano Eleni i isi gagana e 18 talu mai le 1989. Ua mauaina nei le  New World Translation a lē o le Tusi Paia atoa, pe i ni ona vaega foʻi, i gagana e 34. O lea, ua silia ai ma le 80 pasene Molimau a Ieova ua latou mauaina Tusitusiga Kerisiano Eleni i a latou lava gagana.

Ua lipotia mai e Sosaiete Tuufaatasi o loo faaliliuina le Tusi Paia (United Bible Societies) e faapea, e na o le 2,212 gagana ua mafai ona maua i ai ni vaega o le Tusi Paia, pe a fua atu i gagana e 6,500 o loo iai i le lalolagi. * O lea, o loo galulue ai se toʻa 100 o tagata faaliliu ina ia faia se New World Translation mo Tusitusiga Eperu i gagana e 11 ma Tusitusiga Eleni i gagana e 8. O le finagalo o le Atua, “ina ia faaolaina o tagata uma lava, ma ia oo ina iloa lelei le upu moni.” (1 Timoteo 2:4) E lē taumatea o le a faatinoina pea e le New World Translation se vaega tele i lenei itu.

O lea ua tatou olioli ai ona ua ausia e lenei faaliliuga le matātiʻa o le 100 miliona kopi, ma tatou te tatalo ina ia faateleina atili nisi miliona o kopi o le a faaliliuina i le lumanaʻi. Matou te faalaeiʻauina oe ina ia e iloiloina e oe lava lenei mea. O le a e olioli ai i le anoanoaʻi o isi vala faapitoa nei: manino le lolomiina, o ulutala o itulau taʻitasi, se faasinotusi e mafai ona fesoasoani ia te oe e suʻe i ai mo fuaiupu ua e masani ai, o faafanua ua maeʻa lelei ona faailogaina, ma mataupu faaoso naunau i le faaopoopoga. O le itu e sili atu ona tāua, e mafai ona e faitauina lenei Tusi Paia ma lou mautinoa, o lea ua faaoo tonu atu ai lava fetalaiga a le Atua i lau gagana.

[Faaopoopoga i lalo]

[Faamatalaga faaopoopo i le itulau 29]

“O le faaliliuga o le Feagaiga Fou o se faamaoniga e iloa ai, sa faia ai se sao o ni tagata atamamai faapitoa ua agavaa latou te faatautaia ma le atamai le tele o faafitauli o loo fesagaʻi ma faaliliuga o le Tusi Paia.”—ANDOVER NEWTON QUARTERLY, IANUARI 1963

[Faamatalaga faaopoopo i le itulau30]

“E tatau ona faaauau pea ona fetuutuunaʻi faaliliuga ina ia ōgatusa ma le faatuputupulaʻia o aʻoaʻoga loloto i mataupu faale-Tusi Paia faapea foʻi i suiga o gagana”

[Pusa/Ata i le itulau 31]

E VIIVIIA E TAGATA ATAMAMAI FAAPITOA LE NEW WORLD TRANSLATION

I SONA manatu e faatatau i le New World Translation of the Christian Greek Scriptures, na tusia ai e Edgar J. Goodspeed, o lē na faaliliuina le “Feagaiga Fou” o Tusitusiga Eleni i le lomiga o le American Translation, i lana tusi na tusia ia Tesema 8, 1950 e faapea: “Ou te fiafia lava i le galuega faalelotu a o outou tagata, ma lona tulaga lautele ua oo atu i ai i le lalolagi aoao, ae sili atu ona ou fiafia i le saʻo aʻiaʻi, le tuusaʻo mai ma le olaola o le auala o loo fai ai le faaliliuga. E mafai ona ou molimau atu, ua faaalialia mai ai le anoanoaʻi o ni aʻoaʻoga aogā.”

Na tusi mai le tagata atamai faapitoa i le gagana Eperu ma le Eleni, o Alexander Thomson e faapea: “O le faaliliuga ua manino mai, o se galuega na faia e ni tagata faapitoa ua iai le tomai ma le poto, o ē ua taumafai e faaali mai le uiga moni o mau o le gagana Eleni i se tele e mafai e le gagana Peretania ona faamatala mai.”—The Differentiator, Aperila 1952, itulau 52-57.

I le 1989, na taʻua ai e le polofesa o Benjamin Kedar, o se tagata atamai faapitoa i le gagana Eperu e nofo i Isaraelu e faapea: “I aʻu sailiiliga i mataupu tau gagana e fesootaʻi atu i le Tusi Paia i le gagana Eperu ma isi faaliliuga, e masani lava ona ou saili atu i le faaliliuga faa-Peretania lea e taʻua o le New World Translation. O loʻu faia faapea, e atili ai lava ona ou mautinoa, o lenei faaliliuga e atagia mai ai se taumafaiga faamaoni na fai ina ia ausia se malamalamaga o se mau i se tulaga e sili ona saʻo e mafai ai.”