2000—Se Tausaga Faailogaina?
2000—Se Tausaga Faailogaina?
PE E iai ea se mea e faapitoa ai le tausaga e 2000? Ua vaai i ai tagata o loo nonofo i atunuu i Sisifo o le tausaga muamua lea o le meleniuma lona tolu. E tetele sauniuniga mo le faamanatuina o lenei tausaga o loo faagasolo nei. Ua faatutūina uati eletise tetele ina ia faitau atu ai le taimi seʻia oo i le tafa o ata o le meleniuma fou. Ua fuafuaina foʻi ni faatasitasiga tetele o patī mo le po o le Tausaga Fou. O mitiafu o loo tusia ai faaupuga e uiga i le iʻuga o le meleniuma ua faapea ona faatau atu i faleoloa i taulaga lāiti faapena foʻi i nofoaga o faatauga i aai tetele.
O lotu tetele ma lotu lāiti, o le a auai i faafiafiaga faamanatu e faia mo le tausaga atoa. I le amataga o le tausaga fou, ua faatalitalia e malaga atu ai Pope Ioane Paulo II i Isaraelu ina ia taʻitaʻia tagata Katoliko Roma i le mea ua taʻua “o le iupelī a le Lotu Katoliko Roma mo le faamanatuina o le meleniuma.” Ua taumatea faapea pe ā i le va o le lua ma le ʻafa miliona i le ono miliona turisi, o ē tuutoina atu i lotu ma ē naunau fia iloa, o loo fuafua e asiasi atu i Isaraelu i le tausaga fou.
Aisea ua toʻatele naʻuā ai tagata o loo fuafua e asiasi atu i Isaraelu? Na taʻua e Roger Cardinal Etchegaray, o se sui sinia mai le Vatikana e faapea: “O le tausaga e 2000 o se faamanatuga o Keriso ma lona soifuaga i lenei laueleele. O lea ua talafeagai lava la le sau o le Pope iinei.” E faapefea ona fesootaʻi atu le tausaga e 2000 ia Keriso? O le tausaga e 2000 e tele ina manatu i ai e faailogaina tonu ai lava le 2,000 tausaga talu le soifua mai o Keriso. Ae pe o le uiga ea lena? O le a tatou vaai i ai.
E sili atu foʻi ona tāua le tausaga e 2000 i tagata lotu o nisi lotu. Ua latou talitonu maumauaʻi faapea i le isi tausaga o sosoo mai, o le a toe afio ane ai Iesu i le Mauga o Olive ma o le taua ia Amaketo, lea o loo taʻua i le tusi o Faaaliga, o le a tauina ai i le vanu o Mekito. (Faaaliga 16:14-16) Ona o le faatalitalia o nei mea tutupu, e faitau selau tagatānuu o le Iunaite Setete ua faatau ese atu o latou fale ma le tele o a latou mea totino ma siitia atu i Isaraelu. Ina ia maua aogā e i latou o le a lē mafai ona tuua o latou fale, ua lipotia mai ai le folafola atu e se tasi faievagelia lauiloa i le Iunaite Setete faapea o le a faasalalau atu le toe afio mai o Iesu i le televise—i ata lanu!
I atunuu i Sisifo, ua matuā faatuputeleina fuafuaga mo le ulufale atu i le meleniuma lona tolu. Peitaʻi, o tagata i isi atunuu, o loo faaauau pea i a latou galuega masani. O nei tagata—le vaega pito i sili ona toʻatele o le lalolagi—latou te lē talitonu faapea sa avea Iesu le Nasareta ma Mesia. Atonu latou te lē taliaina foʻi le ituaiga o faitauga o aso mai le T.L.M. e oo i le T.A. * Mo se faataʻitaʻiga o le toʻatele o Musalimi, latou te faaaogā la latou lava kalena, e tusa ai o lena kalena o le tausaga fou o le 1420—ae lē o le 2000. E faafuainumera e tagata Musalimi tausaga e amata mai i le aso na sola ane ai le perofeta o Muḥammad mai Mecca agaʻi atu i Medina. I se aotelega, ua faaaogā ai e tagata i le lalolagi aoao ituaiga o kalena eseese e tusa ma le 40.
Pe e tatau ona iai se uiga o le tausaga e 2000 i Kerisiano? Pe o Ianuari 1, 2000, o se aso e faapitoa moni? O nei fesili o le a taliina i le mataupu o sosoo mai.
[Faaopoopoga i lalo]
^ pala. 6 I le faitauina o aso mai le T.L.M. e oo i le T.A. (B.C. e oo i le A.D. i le faa-Peretania), o mea na tutupu a o leʻi oo i le taimi ua masani ona manatu na soifua mai ai Iesu, ua taʻua o tausaga “B.C.” (before Christ—“a o lumanaʻi le Keriso”); o mea na tutupu ina ua mavae le soifua mai o Iesu ua taʻua o tausaga “A.D.” (Anno Domini—“i le tausaga o lo tatou Alii”). Peitaʻi, o nisi tagata atamamai faapitoa o ē iai so latou malamalamaga i ai, e sili ia i latou le faaaogā o taʻu lē faalelotu “B.C.E.” (before our Common Era—“a o lumanaʻi o tatou Aso Taatele”) ma le “C.E.” (of our Common Era—“o tatou Aso Taatele”).