Aogā o le Naunau i le Afioga a le Atua
Aogā o le Naunau i le Afioga a le Atua
“Ia e naunau [i le atamai], ona leoleoina lea o oe e ia. . . . O le a ia faamamaluina oe ona ua e talia o ia.”—FAATAOTO 4:6, 8, NW.
1. O le ā e aofia i le naunau moni i le Afioga a le Atua?
O LE faitauina o le Tusi Paia o se mea e manaʻomia tele mo se Kerisiano. Peitaʻi, o le tau ina faitau e lē lava lena e faaalia ai se naunau i le Afioga a le Atua. E faapefea pe a faitau e se tasi le Tusi Paia ae na te faia lava mea e taʻusalaina e le Tusi Paia? E manino mai ai, e lē o iai sona naunau i le Afioga a le Atua e pei o le naunau lea sa iai i le tusitala o le Salamo 119. O le naunau o le tusitala i le Afioga a le Atua na uunaʻia ai o ia e ola ia ōgatusa ma mea o manaʻomia mai ai.—Salamo 119:97, 101, 105.
2. O ā aogā e maua mai le atamai lea e faavae i le Afioga a le Atua?
2 O le ola e ōgatusa ma le Afioga a le Atua e manaʻomia ai ni fetuutuunaʻiga faifai pea o mafaufauga o se tasi ma le auala o loo ola ai. O se olaga faapena e atagia mai ai le poto faale-Atua, lea e faauiga atu i le faia o se faatatauga aogā o le poto ma le malamalama ua maua mai le suʻesuʻeina o le Tusi Paia. “Ia e naunau [i le atamai], ona leoleoina lea o oe e ia. Ia e matuā faatāua ia te ia, ona faaeaina lea o oe e ia. O le a ia faamamaluina oe ona ua e talia o ia. Na te avatu le pale o le matagofie i lou ulu; na te foaʻiina atu ia te oe le palealii o le lalelei.” (Faataoto 4:6, 8, 9, NW) Maʻeu se faalaeiʻauga matagofie ina ia faatupu aʻe ai se naunau mo le Afioga a le Atua ma ia taʻitaʻia ai! O ai se tasi e lē manaʻo e leoleoina, e faaeaina, ma faamamaluina o ia?
Ua Leoleoina ai Mai Aafiaga Tumau
3. Aisea ua sili atu ai ona manaʻomia nei i lo se isi lava taimi, ona leoleoina Kerisiano, ma e leoleoina mai ia te ai?
3 E faapefea ona leoleoina se tasi e le poto lea na te maua mai le suʻesuʻeina ma le faatatauina o le Afioga a le Atua? O se tasi o auala, ua leoleoina ai o ia mai ia Satani le Tiapolo. Na aʻoaʻoina e Iesu ona soo ina ia tatalo mo le laveaʻiina o i latou mai lē o leaga, o Satani. (Mataio 6:13) I aso nei, ua matuā talafeagai lava le manaʻoga ina ia faaaofia lenei talosaga i a tatou tatalo. Na tutuliesea Satani ma ana temoni mai le lagi i le 1914, ma o le iʻuga na oo ai ia Satani le “lotoa tele, auā ua na iloa ua saasaa ona po.” (Faaaliga 12:9, 10, 12) I nei aso faaiʻuiʻu, atonu ua matuā aasa lava lona lotoa talu ai e lē o taulau manuia o ia i lana taua o loo faasagatau atu ai ia i latou “o e ua tausi i poloaiga a le Atua, ma ua taofi le mau ia Iesu.”—Faaaliga 12:17.
4. Ua faapefea ona leoleoina Kerisiano mai omiga ma mailei a Satani?
4 I le lotoa tele o Satani, o loo faaauau ai pea ona ia faamaʻite aʻe faalavelave mo nei faifeʻau Kerisiano ma uunaʻia sauāga matuitui pe faapogaia isi toʻatugā i a latou gaoioiga. O lona manaʻoga foʻi ia maileia i latou o folafolaina le Malo ina ia taulaʻi atu o latou mafaufau i mea e pei o le fia lauiloa i le lalolagi, le naunau e fia ola fifilemu e lē fia galue, le manaʻo tele i meafaitino, ma le ausulusulu e saili mea faafiafia, na i lo le uaʻi atu i le galuega talaʻi o le Malo. O le ā e leoleoina ai auauna faamaoni a le Atua mai le lolo atu i omiga a Satani pe oo ina lavelavea i ana mailei? O le mea moni, o le tatalo, se faiā totino vavalalata ma Ieova, ma faatuatua i le mautinoa o ana folafolaga, e matuā tāua lava. Peitaʻi o nei mea uma e fesootaʻi atu i le malamalama ma le filifiliga e utagia faamanatuga o loo aumaia i le Afioga a le Atua. O nei faamanatuga o loo maua e ala mai le faitauina o le Tusi Paia ma lomiga e fesoasoani i le suʻesuʻeina o le Tusi Paia, o le auai i sauniga faa-Kerisiano, le utagiaina o fautuaga faale-Tusi Paia mai se uso talitonu, po o le tau lava ina mafaufau loloto faatasi ma le tatalo i mataupu silisili o le Tusi Paia na o loo faamanatu atu e le agaga o le Atua i le mafaufau.—Isaia 30:21; Ioane 14:26; 1 Ioane 2:15-17.
5. O ā auala ua leoleoina ai i tatou e le poto e faavae i le Afioga a le Atua?
5 O i latou o ē naunau i le Afioga a le Atua, e iai foʻi isi auala ua leoleoina ai i latou. Mo se faaaʻoaʻoga, ua latou ʻalofia mafatiaga tau faalogona ma faamaʻi o le tino na e pogai mai mea e pei o le faaaogāsesēina o fuālaau faasāina, le ulaula tapaa, ma amioga lē mamā faaleituaiga. (1 Korinito 5:11; 2 Korinito 7:1) E lē faia sa latou vaega e faaleagaina atili ai ni faiā feʻainaʻi e ala i le faitala po o le faia i ai o ni faamatalaga faalēalofa. (Efeso 4:31) E lē oo foʻi ina avea i latou o ni ē ua masalosalo ona o le soona saili fua i filosofia taufaasesē o le poto o le lalolagi. (1 Korinito 3:19) E ala i lo latou naunau i le Afioga a le Atua, ua leoleoina ai i latou mai mea e mafai ona aveesea ai la latou faiā ma le Atua ma le faamoemoe o le ola e faavavau. Latou te galulue pea lava pea e fesoasoani atu i o latou tuaoi ina ia faatuatua i folafolaga ofoofogia o loo faamauina i le Tusi Paia, i le iloaina faapea, o le auala lena o le a latou ‘faaolaina ai i latou lava atoa ma ē ua faalogologo ia i latou.’—1 Timoteo 4:16.
6. E mafai faapefea e le poto e faavae i le Afioga a le Atua ona leoleoina ai i tatou e oo lava i tulaga faigatā?
6 E moni, o tagata taʻitoʻatasi—e oo lava i ē naunau i le Afioga a le Atua—e aafia i “tausaga ma le mea e tupu ai.” (Failauga 9:11) E lē maʻalofia le ono aafia o nisi o i tatou i mala faalenatura, ni maʻi tigaina, o faalavelave faafuaseʻi, po o se maliu e leʻi faatalitalia. E ui i lea, o loo leoleoina i tatou. E leai se mala e mafai ona aumaia ni aafiaga tumau i se tagata e naunau moni i le Afioga a le Atua. O lea la, e lē tatau ai ona tatou soona popole i se mea e ono tupu i le lumanaʻi. Afai ua uma ona tatou uia puipuiga uma talafeagai, ua sili loa ona lelei pe a lafo atu mea i aao o Ieova, ma ia lē faatagaina tulaga lē saogalemu o le olaga i aso nei e aveesea atu ai lo tatou filemu. (Mataio 6:33, 34; Filipi 4:6, 7) Ia teu i le mafaufau le mautinoa o le faamoemoe o le toetū, ma se olaga e sili atu ona lelei pe a oo ina ‘faia ia fou mea uma lava’ e le Atua.—Faaaliga 21:5; Ioane 11:25.
Ia E Faamaonia Atu o Oe o se “Eleele Lelei”
7. O le ā le tala faatusa na faamatala atu e Iesu i motu o tagata na ō ane e faalogologo ia te ia?
7 Sa faamatilatila mai i se tasi o faataoto a Iesu, le tāua o le iai o se vaaiga saʻo e faatatau i le Afioga a le Atua. A o folafola atu e Iesu le tala lelei i vaipanoa uma o Palesitina, sa tumutumu atu motu o tagata e fia faalogologo ia te ia. (Luka 8:1, 4) Peitaʻi, e lē o tagata uma sa naunau moni i le Afioga a le Atua. E lē taumatea, e toʻatele na ō atu e faalogologo ia te ia talu ai sa latou fia matamata i vavega pe ona sa latou fiafia i le auala ofoofogia sa ia aʻoaʻo atu ai. O lea, na taʻu atu ai e Iesu i motu o tagata se tala faatusa: “Ua alu atu le tagata lulu saito e lulu ai ana saito; ua ia lulu saito, ua paū ai isi i le auala; ona solia lea, ua ʻaina foi e manu felelei. Ua paū isi i le mea papa; ua tupu, ona magumagu ai lea, auā e le su. A ua paū isi i le vao tuitui; ua tutupu faatasi ia ma le vao tuitui, ona fetinaiina ai lea. Ua paū foi isi i le eleele lelei; ua tupu, ua fua mai taiselau i fua.”—Luka 8:5-8.
8. I le tala faatusa a Iesu, o le ā le fatu?
8 Na faaalia e le faataoto a Iesu faapea, o le a eseese auala e tali mai ai tagata i le talaʻiga o le tala lelei, e fuafua lava i le tulaga o le loto o le tagata faalogologo. O le fatu ua lūlūina o “le afioga lea a le Atua.” (Luka 8:11) Pe, e pei ona taʻua e le isi faamaumauga o le faataoto, o le fatu, o “le upu o le malo.” (Mataio 13:19) Sa mafai e Iesu ona faaaogā so o se tasi o na faaupuga, talu ai o le matua o le Afioga a le Atua o le Malo faalelagi i lalo o le pulega a le Tupu o Iesu Keriso, lea o le a faaauala mai ai e Ieova le faasilisilia o lana pule silisili ese ma le faapaiaina o lona suafa. (Mataio 6:9, 10) O lona uiga la, o le fatu o le feʻau lea o le tala lelei o loo i le Afioga a le Atua, le Tusi Paia. O loo faamatilatila mai e Molimau a Ieova lenei feʻau o le Malo a o latou lūlūina fatu i le faataʻitaʻi atu i Lē na muaʻi Lūlūina le fatu, o Iesu Keriso. O le ā le tali mai na latou mauaina?
9. O le ā ua faaātaina mai e le fatu na paʻū (a) i le auala? (e) i le mea papa? (i) i le fanua o vao tuitui?
9 Na fetalai Iesu, o nisi fatu e paʻūū i le auala ona solia ai lea. E faasino lenei i tagata o ē ua alu uma lo latou taimi i a latou meafai, ma ua lē maua se avanoa ina ia tupu mauaa ai le fatu o le Malo i o latou loto. A o leʻi oo ina mafai ona latou faatupu se naunau i le Afioga a le Atua, e ‘alu ane le Tiapolo ma aveeseina le upu nai o latou loto, ina ia lē faatuatua ma lē faaolaina ai.’ (Luka 8:12) O nisi fatu e paʻūū atu i le mea papa. E faasino lenei i tagata e fiafia i le feʻau a le Tusi Paia, ae latou te lē mananaʻo e faaaafiaina ai o latou loto. Pe a oo mai la teteega, po ua faafaigatā ona latou faatatauina fautuaga a le Tusi Paia, ona latou “o ese ai lea” auā e leʻi iai ni o latou aa. (Luka 8:13) Ona iai foʻi lea o i latou e faalogo i le upu ae ua lofitūina i “mea e popole ai, ma oloa, ma mea faafiafia o le olaga nei.” Mulimuli ane, i le pei o ni laau ua filia i vao tuitui, ua latou matuā “fetinaiina ai.”—Luka 8:14.
10, 11. (a) O ai o loo faaāta mai e le eleele lelei? (e) O le ā e tatau ona tatou fai ina ia ‘tausia’ ai le Afioga a le Atua i o tatou loto?
10 Ma le fatu mulimuli, lea e paʻū i le eleele lelei. E faasino atu lenei i tagata o ē ua latou talia le feʻau ma “le loto ua faamaoni ma le lelei.” O le tulaga masani, tatou te mananaʻo uma lava e talitonu faapea o le vaega lenei o lea tatou te iai. Peitaʻi, i le iloiloga faaiʻu, e iloa ai, o le silafaga a le Atua e sili atu ona faitaulia. (Faataoto 17:3; 1 Korinito 4:4, 5) Ua taʻua i lana Afioga faapea, o lo tatou mauaina o se “loto ua faamaoni ma le lelei” o se mea tatou te faamaonia atu e ala i a tatou gaoioiga e amata atu i le taimi nei seʻia oo ina tatou maliliu pe seʻia oo ina aumaia e le Atua le iʻuga i lenei faiga amioleaga o mea. Pe afai e lelei la tatou uluaʻi tali atu i le feʻau o le Malo, ua lelei lena mea. Peitaʻi ane, o i latou e faamaoni ma lelei o latou loto latou te talia le Afioga a le Atua ma ‘tausi i ai, ona fua mai lea ma le onosaʻi.’—Luka 8:15.
11 E na o le pau le auala mautinoa e tausia ai le Afioga a le Atua i o tatou loto o le faitau lea ma suʻesuʻe i ai le tagata lava ia, faapea ma le faia faatasi a o auaufaatasi ma isi uso talitonu. E aofia ai i lenei mea le matuā faaaogāina tatau o taumafa faaleagaga ua saunia e ala mai le puna ua tofia latou te tausia manaʻoga faaleagaga o soo moni o Iesu. (Mataio 24:45-47) E ala mai na puna, ua uunaʻia ai e le alofa i latou o ē tausia le Afioga a le Atua i o latou loto, ina ia ‘fua mai ma le onosaʻi.’
12. O le ā le fua e tatau ona tatou fuaina ma le onosaʻi?
12 O ā fua ua fuaina mai e le eleele lelei? I le tulaga masani lava ia o le palapala, o fatu e ola aʻe ai ni laau o le a fuaina mai fua o loo iai ituaiga o fatu lava na sa ola aʻe ai, lea e mafai ona lūlū solo ina ia toe fua atili mai. E faapea foʻi i latou o loo faamaoni ma lelei o latou loto, o le a oo ina tupu aʻe le fatu o le upu ia i latou, ma latou agaʻigaʻi ai i luma faaleagaga seʻia oo ina mafai foʻi e i latou ona lūlūina le fatu i loto o isi. (Mataio 28:19, 20) Ma ua mataulia la latou galuega o le lūlūina o fatu, i lo latou onosaʻi. Na faaalia e Iesu le tāua o le onosaʻi i le lūlūina o fatu ina ua ia fetalai: “O lē tumau seia oo i le gataaga, e faaolaina lea. E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:13, 14.
“Fua Mai Galuega Lelei Uma Lava”
13. O le ā le tatalo na fai e Paulo e faafesootaʻia ai le fuaina mai o fua ma le poto o le Afioga a le Atua?
13 Na taʻua foʻi e le aposetolo o Paulo le manaʻoga ina ia fuaina mai ni fua, ma sa ia faafesootaʻia le fuaina mai o fua ma le Afioga a le Atua. Sa ia tatalo mo ona uso talitonu “ina ia atoatoa ona outou iloa lelei o lona finagalo [finagalo o le Atua] i le poto uma atoa ma le mafaufau faaleagaga; ia outou savavali e tusa ma le Alii [Ieova], ina ia fiafia mai o ia ia te outou i mea uma, ma ia outou fua mai galuega lelei uma lava.”—Kolose 1:9, 10; Filipi 1:9-11.
14-16. I le ōgatasi ma le tatalo a Paulo, o ā fua ua fuaina mai e i latou o ē naunau i le Afioga a le Atua?
14 O lea ua faaalia ai e Paulo, o le mauaina o le poto faale-Tusi Paia e lē o le sini autū lena. Na i lo lea, o le naunau i le Afioga a le Atua e uunaʻia ai i tatou ina ia ‘savavali e tusa ma Ieova’ e ala i le faaauau ona ‘fuaina mai galuega lelei uma lava.’ O ā galuega lelei? O le talaʻiga o le tala lelei o le Malo o se tofiga mataʻina mo Kerisiano i nei aso e gata ai. (Mareko 13:10) E lē gata i lea, o i latou o ē naunau i le Afioga a le Atua latou te faia le mea e sili ona lelei ina ia faifai pea ona latou avatu se lagolagosua tautupe i lenei galuega. Latou te fiafia i lenei faaeaga, i le iloaina “e alofa le Atua i le ua foai ma le loto mālie.” (2 Korinito 9:7) O a latou meaalofa ua totogia ai tupe faaalu i le faagaoioia o le silia i le selau fale o aiga Peteli, lea o loo faatonutonu mai ai le galuega talaʻi o le Malo, ma o nisi o fale Peteli o loo lolomia ai Tusi Paia ma lomiga faale-Tusi Paia. O a latou meaalofa ua fesoasoani foʻi e totogi ai tupe faaalu i le faatinoina o tauaofiaga tetele faa-Kerisiano ma le aauina atu i isi nofoaga o ovasia femalagaaʻi, o misionare, ma isi faievagelia faataimi atoa.
15 O isi galuega lelei e aofia ai le fausia ma le tausia o nofoaga o loo faatino ai le tapuaʻiga moni. O le naunau i le Afioga a le Atua e uunaʻia ai ona tagata tapuaʻi ina ia faamautinoa latou te lē o faatalalē i o latou Maota Fono ma Maota o le Malo. (Faatusatusa i le Neemia 10:39.) Talu ai o loo aliali mai le suafa o le Atua i luma o na fale, e matuā tāua ai ona tausia mamā ma ia matagofie totonu ma fafo o na fale, ma e ao foʻi i amioga a i latou o loo tapuaʻi i totonu o na maota ona matuā mamao ese mai le taʻuleagaina. (2 Korinito 6:3) O nisi Kerisiano ua mafai ona latou faia nisi mea e tele atu. O le naunau i le Afioga a le Atua e uunaʻia ai i latou e faimalaga atu i ni nofoaga mamao ina ia auai i le fauina o fale fou mo le tapuaʻiga i vaega o le lalolagi na o loo iai se manaʻomia ona o le tulaga mativa ma le leai o nisi e iai ni tomai faapitoa.—2 Korinito 8:14.
16 O le ‘fuaina mai o galuega lelei uma’ e aofia ai foʻi le faatinoina o tiute tauave faaleaiga ma ia manatu mamafa i uso Kerisiano. O le naunau i le Afioga a le Atua e uunaʻia ai i tatou ia mataala i manaʻoga o ē o i lo tatou “aiga o le faatuatua” ma ia faaalia le “agalelei i lo [tatou] lava aiga.” (Kalatia 6:10; 1 Timoteo 5:4, 8) I lenei itu, o se galuega lelei ai le asiasi atu i ē mamaʻi ma faamafanafana i ē o loo mafatia. Ma e maʻeu se galuega lelei ua faataunuuina e toeaina o le faapotopotoga ma le Komiti o Mataupu Tau Falemaʻi (Hospital Liaison Committee) i le fesoasoani atu i tagata taʻitoʻatasi o ē ua fesagaʻi ma tulaga faafomaʻi o loo avea ma luʻi ia i latou! (Galuega 15:29) Ae o loo iai foʻi se aofaʻiga tele o mala—o nisi o ni mala faalenatura ae o isi mala e māfua ona o le faatamala o le tagata. Ona o le fesoasoani a le agaga o le Atua, ua maua ai e Molimau a Ieova se talaaga lelei i le tele o vaega o le lalolagi i lo latou sauniunia o fesoasoani vavave tau laveaʻi mo o latou uso talitonu ma isi tagata e aafia i mala ma faalavelave faafuaseʻi. O nei gaoioiga uma o fua lelei na ua faaalia mai e i latou o ē naunau i le Afioga a le Atua.
O Aogā Matagofie i le Lumanaʻi
17, 18. (a) O le ā ua faataulau e le lūlūina o fatu o le Malo? (e) O ā mea tutupu e gatete ai le lalolagi, ua lē o toe umi ona molimauina lea e i latou o ē naunau i le Afioga a le Atua?
17 O le lūlūina o le fatu o le Malo o loo aumaia ai pea aogā sili i tagata. I tausaga talu ai nei, e silia ma le 300,000 tagata i tausaga taʻitasi ua latou faataga le feʻau a le Tusi Paia ina ia tupu mauaa i o latou loto, i le tele ua oo ai ina latou tuuina atu o latou ola ia Ieova ma faailogaina e ala i le papatisoga i le vai. Maʻeu se lumanaʻi matagofie o loo faatalitalia maia i latou!
18 Ua lē pine, ona iloa lea e i latou o ē naunau i le Afioga a le Atua faapea, o le a tulaʻi mai Ieova le Atua e faasilisilia lona suafa. O le a faatamaʻia “Papelonia le aai tele,” le emepaea a le lalolagi o lotu sesē. (Faaaliga 18:2, 8) O i latou la o ē mumusu e ola e tusa ai ma le Afioga a le Atua, o le a faaoo atu ia i latou le oti e le Tupu, o Iesu Keriso. (Salamo 2:9-11; Tanielu 2:44) Pe a mavae lena, ona aumaia lea e le Malo o le Atua se mapusaga tumau mai solitulafono, o taua, ma isi mala. O le a lē toe manaʻomia ona faamafanafana atu i loto o tagata ona o tigā, o maʻi, ma le oti.—Faaaliga 21:3, 4.
19, 20. O le ā le lumanaʻi pupula o loo faatalia maia i latou o ē naunau moni i le Afioga a le Atua?
19 Maʻeu ni galuega lelei matagofie o le a faataunuuina e i latou o ē naunau i le Afioga a le Atua! O i latou e faasaoolaina atu ia Amaketo o le a latou amataina se galuega fiafia o le faaliliuina o lenei lalolagi e avea ma parataiso. O le a ia i latou le faaeaga fiafia o le sauniunia o mea mo manaʻoga o tagata ua maliliu, o ē o loo mālōlō nei i tuugamau ae o loo manatua pea e le Atua, ina ia latou maua le faamoemoe o le toetū mo ē ua maliliu. (Ioane 5:28, 29) A o faagasolo lena taimi, o le a aumaia taʻiala lelei atoatoa i tagata e ʻaināina le lalolagi, mai le Alii Pule Silisili Ese, o Ieova, e ala mai i lona Alo ua faaeaina, o Iesu Keriso. ‘O le a tatala tusi,’ e faailoa mai ai faatonuga a Ieova mo le olaga i le lalolagi fou.—Faaaliga 20:12.
20 I le taimi atofaina a Ieova, o le a faatutū aʻe ai le vaega o totoe o Kerisiano faamaoni faauuina mo lo latou taui faalelagi i le avea ma “suli faatasi ma Keriso.” (Roma 8:17) A o faagasolo le Pulega a Keriso mo le Afe Tausaga, o le a siitia ai i le lelei atoatoa o le mafaufau ma le tino, tagata uma o le a ola i le lalolagi o ē naunau i le Afioga a le Atua. Pe a uma ona faamaonia lo latou faamaoni i le fesagaʻia o le tofotofoga faaiʻu, ona tauia loa lea o i latou i le ola e faavavau ma latou olioli ai i “le saolotoga o le fanau a le Atua e manuia ai.” (Roma 8:21; Faaaliga 20:1-3, 7-10) Maʻeu se taimi ofoofogia o le a iai! O le mea moni, tusa lava po ua foaʻi mai e Ieova ia i tatou le faamoemoe i le lagi po o le faamoemoe i le lalolagi, ae o le tumau ona naunau i lana Afioga ma le filifili maumauaʻi ia ola e tusa ma le poto faale-Atua o le a leoleoina ai i tatou. Ma i le lumanaʻi, o le a ‘faamamaluina ai i tatou ona ua tatou taliaina.’—Faataoto 4:6, 8, NW.
Pe Mafai Ona E Faamatala?
□ O le a faapefea i le naunau i le Afioga a le Atua ona leoleoina ai i tatou?
□ O le ā le fatu o le tala faatusa a Iesu, ma ua faapefea ona lūlūina?
□ E mafai faapefea ona tatou faamaonia atu o i tatou o ni “eleele lelei”?
□ O ā aogā e mafai ona faatalitalia e i latou o ē naunau i le Afioga a le Atua?
[Fesili mo le Suʻesuʻega]
[Ata i le itulau 16]
O le fatu o le tala faatusa a Iesu ua faaāta mai ai le feʻau o le tala lelei lea o loo iai i le Afioga a le Atua
[Ē Ana le Ata]
Garo Nalbandian
[Ata i le itulau 17]
E faataʻitaʻi atu Molimau a Ieova i Lē Lūlū Sili
[Ata i le itulau 18]
O le a olioli i latou o ē faasaoolaina atu ia Amaketo i fua o le laueleele