O Afea e Amata ai le Meleniuma Lona Tolu?

PO UA e faalogo i le manatu lenei faapea o le a lē amataina le meleniuma lona tolu i le tausaga e 2000 ae o le 2001? E saʻo le manatu lena—e iai se vala e saʻo ai. Afai tatou te fai atu na soifua mai Iesu Keriso i le tausaga ua taʻua i le taimi nei o le 1 T.L.M., e pei foʻi ona sa manatu i ai nisi, lona uiga la o Tesema 31, 2000 (ae lē o le 1999), o le a faaiʻuina moni ai lava le meleniuma lona lua, ma o Ianuari 1, 2001, le amataga o le meleniuma lona tolu. * Peitaʻi, e toeitiiti lava o tagata atamamai uma i aso nei latou te ioe faapea e leʻi soifua mai Iesu Keriso i le 1 T.L.M. O lea la, o anafea na soifua mai ai o ia?

O Anafea na Soifua Mai ai Iesu?

E lē o faailoa mai e le Tusi Paia le aso tonu na soifua mai ai Iesu. Peitaʻi o loo taʻua ai, na soifua mai o ia “i ona po o Herota le tupu.” (Mataio 2:1) E toʻatele tagata atamamai faapitoa i mataupu faale-Tusi Paia latou te talitonu na maliu Herota i le tausaga e 4 T.L.M. ma na soifua mai la Iesu a o leʻi oo i lena taimi—atonu pe o luma atu i le 5 po o le 6 T.L.M. E faavae a latou talitonuga i le maliu o Herota i faamatalaga a le tusitala o talafaasolopito Iutaia o le uluaʻi senituri o Flavius Josephus. *

E tusa ai ma le manatu o Josephus, a o toeitiiti lava maliu le tupu o Herota, na iai se gasetoto o le masina. Na faasino atu e tagata atamamai faapitoa i mataupu faale-Tusi Paia i se gasetoto faalēatoa o le masina ia Mati 11, i le 4 T.L.M., lea e faamaonia ai na maliu Herota i lena tausaga. Peitaʻi,  i le tausaga e 1 T.L.M., na iai se gasetoto atoatoa o le masina ia Ianuari 8 ma se gasetoto faalēatoa ia Tesema 27. E leai se tasi e mafai ona faapea mai na faasino atu upu a Josephus i se tasi o gasetoto i le 1 T.L.M. po o le isi i le 4 T.L.M. O lea, e lē mafai ona tatou faaaogāina upu a Josephus e faamaʻoti ai le tausaga tonu na maliu ai Herota. E tusa lava foʻi pe tatou te mafaia, ae a aunoa ma nisi faamatalaga e lē mafai lava ona tatou fuafuaina le taimi na soifua mai ai Iesu.

O le faamaoniga malosi ua ia i tatou e uiga i le aso na soifua mai ai Iesu e mai le Tusi Paia. Ua taʻua i le faamaumauga faagaeeina faapea na amata le galuega a le tauusoga o Iesu, o Ioane le Papatiso o se perofeta i le 15 o tausaga o le pulega a le emeperoa Roma o Tiperio Kaisara. (Luka 3:1, 2) Ua faamautinoa mai e talafaasolopito o le lalolagi na tofia Tiperio e avea ma emeperoa ia Setema 15, 14 T.A., o le 15 la o tausaga o lana pulega e amata mai le taufaaiʻuiʻuga o le 28 T.A. seʻia oo i le taufaaiʻuiʻuga o le 29 T.A. Na amata e Ioane lana faiva i lena taimi, ma e mautinoa na amataina le faiva a Iesu i le isi ono masina mulimuli ane ai. (Luka 1:24-31) O le tuufaatasia o lenei faamaoniga ma isi faamaoniga, o le a faatulaga ai le amataga o le faiva a Iesu i le taimi o le tau e afu ai mea i le 29 T.A. * O loo taʻua e le Tusi Paia faapea e ‘pe ā o le tolugafulu tausaga’ o Iesu ina ua ia amataina lana faiva. (Luka 3:23) Afai na atoa le 30 tausaga o lona soifua i le taimi o le tau e afu ai mea i le 29 T.A., sa tatau la ona soifua mai o ia i le taimi o le tau e afu ai mea i le 2 T.L.M. O lea la, afai tatou te faitauina mai le luaafe tausaga e amata mai le taimi o le tau e afu ai mea o le 2 T.L.M. (i le manatuaina faapea e leai se tausaga e amata i le 0; o lea la, mai le 2 T.L.M. i le 1 T.A. ua lua tausaga), tatou te iloa ai e faaiʻuina le meleniuma lona lua ae amata le meleniuma lona tolu i le taimi o le tau e afu ai mea i le 1999!

Pe e iai se tāua o lena mea? Mo se faataʻitaʻiga, pe o le a faailogaina ea e le amataga o le meleniuma lona tolu le amataga o le Pulega o le Afe Tausaga a Iesu Keriso, lea o loo taʻua i le tusi o Faaaliga? Leai. E lē o taʻua lava i se vaega o le Tusi Paia se sootaga o le meleniuma lona tolu ma le Pulega o le Afe Tausaga a Keriso.

Na lapataʻia e Iesu ona soo e faatatau i le taumatemate o aso. Na ia taʻu atu i ona soo e faapea: “E le tusa ona outou iloa o ona po ma ona tausaga, ua tuu e le Tamā i lana lava pule.” (Galuega 1:7) Muamua atu, na faailoa atu ai e Iesu faapea e oo lava foʻi ia te ia na te lē o iloa le taimi o le a faaoo mai ai e le Atua lana faamasinoga i lenei faiga o mea amioleaga, ma saunia ai le ala mo le Pulega Faa-Meleniuma a Keriso. Na ia fetalai: “A o lea aso ma lea itu aso e le iloa e se tasi, e le iloa lava e agelu i le lagi, e le iloa foi e le Atalii, ua na o le Tamā lava.”—Mataio 24:36, LF.

Pe e talafeagai le faatalitalia faapea o le a toe afio mai Keriso i le 2,000 tonu o tausaga talu mai le aso na soifua mai ai o se tagata? Leai, e lē talafeagai. E tatau ona silafia e Iesu le aso na ia soifua mai ai. Ma na te silafia lelei foʻi le auala e faitau mai ai le 2,000 tausaga mai lena aso. Peitaʻi,  na te leʻi silafia le aso ma le itula o lona toe afio mai. Ma le mautinoa, e lē faigofie ona faasino tonu le aso o lona toe afio mai! O ‘ona po ma tausaga’ ua tuuina atu i le pule a le Tamā—o le faasologa o le taimi ua na o ia e na te silafia.

E lē gata i lena, sa leʻi faatonuina e Iesu ona soo ina ia faatalitali mo ia i se laufanua faapitoa. Na ia fetalai atu ia i latou, ina ia aua neʻi faapotopoto faatasi ma faatalitali, ae ia taapeape solo atu i “tuluiga o le lalolagi” ma ia faia tagata o nuu uma ma soo. E na te leʻi faaleaogāina lava lena faatonuga.—Galuega 1:8; Mataio 28:19, 20.

Pe o le a Faalēaogāina o Latou Faamoemoega mo le Meleniuma?

Peitaʻi, ua matuā maoaʻe faamoemoega o nisi tagata mapolotu i le tausaga e 2000. Latou te talitonu faapea i isi masina o sosoo mai, o le a faataunuuina ai faaletino nisi o vaega o le tusi o Faaaliga. O le mea moni, o loo latou vaaia i latou lava o loo faia se vaega i le faataunuuga. Mo se faataʻitaʻiga, ua latou faasino atu i le valoaga o loo faamauina i le Faaaliga 11:3, 7, 8, lea o loo taʻua ai molimau e toʻalua o loo vavalo i totonu o se “aai tele, o lona igoa pei se faatusa, o Sotoma ma Aikupito, o le mea foi na faasatauroina ai lo latou Alii.” Pe a maeʻa le la molimau atu, ona fasiotia lea o molimau e toʻalua e se manu feʻai mataʻutia e sau mai se tō e lē gata.

E tusa ai ma se lipoti i le New York Times Magazine o Tesema 27, 1998, na iai se taʻitaʻi o se vaega faalotu “na ia taʻu atu i tagata o lana lotu faapea o ia o se tasi o molimau e toʻalua o lē ua fuafuaina e faasilasila atu le faaumatiaga o le lalolagi ma le afio mai o le Alii—ona fasiotia lea e Satani i magāala o Ierusalema.” Ua tatau ai la le faapopoleina o faipule o Isaraelu. Ua latou matataʻu neʻi teʻi ua taumafai nisi tagata maelegā valea e “faataunuu” e i latou lava le valoaga—pe oo ai foʻi i le faatupuina o se fevesiaʻiga e faaaogā ai auupega ina ia taulau ai! Peitaʻi, e lē manaʻomia e le Atua le “fesoasoani” a tagata ina ia faataunuuina ai lana fuafuaga. O valoaga uma a le Tusi Paia o le a faataunuuina i le taimi a le Atua lava ia ma i le auala lava foʻi a le Atua.

Na tusia le tusi o Faaaliga ‘i faailoga.’ E tusa ai o le Faaaliga 1:1, na manaʻo ai Iesu e faailoa atu i “ana auauna” (ae lē i le lalolagi lautele) le mea o le a lē umi ae tupu. Ina ia malamalama i le tusi o Faaaliga, e manaʻomia e auauna a Keriso, po o ona soo, le agaga paia o le Atua, lea e tuuina atu e Ieova ia i latou e faafiafiaina o ia. Ana fai e ao ona malamalama i le tusi o Faaaliga i se tulaga faaletino, semanū e oo lava i tagata lē faatuatua e mafai ona latou faitau ma malamalama i ai. Ona leai lea o se mea o le a manaʻomia ai mo Kerisiano ona tatalo mo le agaga paia ina ia malamalama i ai.—Mataio 13:10-15.

Ua tatou iloa e tusa ai o faamaoniga faale-Tusi Paia, o le meleniuma lona tolu talu mai le soifua mai o Iesu e amata i le taimi o le tau e afu ai mea i le 1999 ma e lē o lena aso po o Ianuari 1, 2000, po o Ianuari 1, 2001, e iai sona uiga tāua faapitoa. E ui i lea, o loo iai se meleniuma o loo naunau loloto i ai Kerisiano. Afai e lē o le meleniuma lona tolu, o lē fea la? O le mataupu mulimuli o lenei faasologa o mataupu o le a taliina lenei fesili.

[Footnotes]

[Pusa i le itulau 5]

2000 po o le 2001?

Ina ia malamalama i le māfuaaga ua manatu ai nisi faapea o le meleniuma lona tolu talu le soifua mai o Iesu o le a tatafa mai ia Ianuari 1, 2001, manatu i le talafaatusa lenei. Seʻi faapea o lea e te faitauina se tusi e 200 itulau lona umi. A oo atu lau faitau i le pito i luga o le itulau e 200, o lena ua maeʻa ona e faitauina itulau e 199, toe tasi la le itulau o loo totoe ina ia faitauina. O le a lē uma ona e faitauina le tusi atoa seʻi vaganā ua e oo i le iʻuga o le itulau e 200. I se tulaga talitutusa, e atoa le 999 tausaga o le meleniuma o loo iai nei e pei ona manatu i ai le toatele, ia Tesema 31, 1999, e tusa e toe tasi le tausaga o loo totoe ona taunuu lea i le iʻuga o le meleniuma. E tusa ai o lena faitauga, o le a amata le meleniuma lona tolu ia Ianuari 1, 2001. Peitaʻi, e lē o le uiga o lena mea faapea o le aso tonu lena e atoa i ai le 2,000 tausaga e va ai ma le aso na soifua mai ai Iesu, e pei ona faailoa mai e lenei mataupu.

[Pusa i le itulau 6]

Le Auala na Mapuna Aʻe ai le Ituaiga o Faitauga o Aso o le T.L.M.-T.A.

I le amataga lava o le senituri lona ono T.A., na faatonu ai e Pope Ioane I se monike e igoa ia Dionysius Exiguus ina ia fafau aʻe se ituaiga o faitauga o tausaga o le a faapea ona faatagaina ai lotu ina ia faatūina se aso aloaʻia mo le Eseta.

Ona gaoioi lea o Dionysius. Na ia fuafua atu i taimi ua tuanaʻi, a o leʻi maliu Iesu, seʻia oo i le tausaga na ia manatu na soifua mai ai Iesu; ona ia faafuainumera lea o tausaga faasolo mai ai i lena taimi. Na faaigoaina e Dionysius le vaitaimi talu le soifua mai o Iesu o le “A.D.” (Anno Domini—“i le tausaga o lo tatou Alii” [T.A.]). E ui sa manatu e tau lava ina mafaufau ai se auala maufaatuatuaina e fuafua i ai le aso mo le Eseta i tausaga taʻitasi, ae na faaofi mai ai ma le lē iloa e Dionysius le manatu o le faanumeraina o tausaga talu le soifua mai o le Keriso ma faasolo mai ai.

E ui ina ioe le toʻatele o tagata atamamai faapitoa faapea e leʻi soifua mai Iesu i le tausaga na faaaogā e Dionysius e fai ma faavae o ana faitauga, ae o lana ituaiga o faitauga o tausaga ua mafai ai ona tatou faatulagaina mea tutupu e tusa ma le faagasologa o taimi ma mātauina ai o latou sootaga o le tasi i le isi.