O le ā le Tele o Lou Naunau i le Afioga a le Atua?
O le ā le Tele o Lou Naunau i le Afioga a le Atua?
“Ua tele lava loʻu naunau i lau tulafono; ou te mafaufau i ai i le aso atoa.”—SALAMO 119:97.
1. O le ā se tasi auala e faaalia ai e i latou o ē matataʻu i le Atua lo latou naunau i le Afioga a le Atua?
E FAITAU selau miliona tane ma fafine ua latou umia se kopi o le Tusi Paia. Peitaʻi e iai le eseesega o le umia o le Tusi Paia ma le naunau i le Afioga a le Atua. Pe mafai ona saʻo se tagata i lona faapea mai e naunau i le Afioga a le Atua pe afai e seāseā lava ona faitauina? E mautinoa e lē saʻo! Ae i le isi itu, o nisi sa latou leʻi faatāuaina muamua le Tusi Paia, ae o lea ua latou faitauina nei i aso taʻitasi. Ua latou aʻoaʻoina le tatau ona naunau i le Afioga a le Atua, ma i le pei o le faisalamo, ua avea nei le Afioga a le Atua o se mea latou te mafaufau mamafa i ai “i le aso atoa.”—Salamo 119:97.
2. Na faapefea ona faatumauina le faatuatua o se tasi o Molimau a Ieova a o iai i tulaga faigatā?
2 O se tasi o lē na aʻoaʻoina ia naunau i le Afioga a le Atua, o Nasho Dori. O ia faatasi ai ma isi ona uso talitonu, sa ia onosaʻia le tele o tausaga sa auauna ai ia Ieova i lona atunuu moni o Alapania. A o faagasolo se vaega tele o lena taimi, sa faasāina ai le galuega a Molimau a Ieova, ma na itiiti lava ni lomiga faale-Tusi Paia na maua e nei Kerisiano faamaoni. Peitaʻi, sa malosi pea le faatuatua o le uso o Dori. Na faapefea? Fai mai a ia: “O loʻu sini sa iai, o le faitauina lea o le Tusi Paia a itiiti mai e tasi se itula i aso taʻitasi, lea sa ou faia mo le tusa ma le 60 tausaga a o leʻi po laʻu vaai.” E leʻi leva nei talu ona maua le faaliliuga o le Tusi Paia atoa i le gagana Alapania, peitaʻi a o leʻi maua lena faaliliuga, sa aʻoaʻoina e le uso o Dori le gagana Eleni a o laitiiti, ma na ia faitauina ai le Tusi Paia i lena gagana. O le faitauina e lē aunoa o le Tusi Paia na faatumauina ai le uso o Dori i lalo o puapuaga eseese, ma e mafai foʻi ona faatumauina ai i tatou.
‘Ia Faatupu se Naunau’ mo le Afioga a le Atua
3. O le ā le uiga e tatau ona faatupu e Kerisiano mo le Afioga a le Atua?
3 Na tusi mai le aposetolo o Peteru: “Faapei o tama meamea faatoa fanau mai ia naunau outou i le suāsusu e le suia o le upu.” (1 Peteru 2:2, LT) E pei lava ona matuā faananau atu se pepe i le suāsusu o lona tinā, e manaʻomia foʻi faapena i Kerisiano o ē mataala i o latou manaʻoga faaleagaga, ona matuā fiafia i le faitauina o le Afioga a le Atua. Po o lagona ea na o loo ia te oe? Afai e leai, aua e te loto vaivai. E mafai foʻi e oe ona faatupu aʻe se naunau mo le Afioga a le Atua.
4. O le ā e aofia ai i le avea o le faitauina o le Tusi Paia, ma masaniga o aso taʻitasi?
4 Ina ia faia lea mea, e muamua lava, ia e faatulagaina oe lava ina ia avea ma au masaniga le faitau e lē aunoa o le Tusi Paia, ia avea o se masaniga o aso taʻitasi pe a mafai. (Galuega 17:11) Atonu e lē mafai ona e faaaluina se itula i aso taʻitasi i le faitauina o le Tusi Paia e pei ona sa faia e Nasho Dori, peitaʻi e foliga mai e mafai ona e faataatia ese sina taimi i aso taʻitasi e tilofaʻia ai le Afioga a le Atua. E toʻatele Kerisiano e vave alafaʻi mai i le taeao ina ia mafai ona latou mafaufau loloto i se fuaitau o le Tusi Paia. Pe iai ea se isi auala e sili atu ona lelei na i lo lena, e amataina ai le aso? O isi e sili ia i latou le faaiʻu o le aso i le faitauina o le Tusi Paia a o leʻi agaʻi atu i tofāga. Ae o isi foʻi latou te faitauina le Tusi Paia i so o se taimi lava e avanoa ai. O le mea tāua, ia faitau e lē aunoa le Tusi Paia. Ona faaalu lea o ni nai minute e mafaufau loloto ai i mea sa e faitauina. Seʻi o tatou iloiloina ni faaaʻoaʻoga o nisi na aogā ia i latou le faitauina o le Afioga a le Atua ma mafaufau loloto i ai.
Se Faisalamo o Lē na Naunau i Tulafono a le Atua
5, 6. E ui atonu tatou te lē iloa lona suafa, ae o le ā e mafai ona tatou iloa e faatatau i le tusitala o le Salamo 119 e ala i le faitau ma manatunatu loloto i mea na ia tusia?
5 E mautinoa lava sa matuā talisapaia e le tusitala o le Salamo 119, le Afioga a le Atua. O ai na tusiaina lena salamo? E lē o faailoa maia i le Tusi Paia le tusitala. Peitaʻi, i le faitauina o le mataupu atoa, tatou te iloa ai ni auiliiliga e uiga ia te ia, ma ua tatou iloa o lona soifuaga sa leʻi ʻasa foʻi ma ni faafitauli. O nisi o ana aumea o ē na tatau ona avea o ni tagata tapuaʻi a Ieova, sa leʻi faapena lo latou naunau i mataupu silisili o le Tusi Paia. E ui lava i lea, sa leʻi faatagaina e le faisalamo na uiga o ana aumea e taofia ai o ia mai le faia o le mea saʻo. (Salamo 119:23) Pe afai o loo lua nonofo faatasi pe galulue faatasi ma se tasi na te lē faaaloalogia tapulaa a le Tusi Paia, e te ono iloa ai la ni mea e talitutusa ai lou tulaga ma le tulaga sa iai le faisalamo.
6 E ui o le faisalamo o se tagata e mataʻu i le Atua, ae sa leʻi ia te ia se uiga faafiaamiotonu. Sa ia taʻusaʻo mai ona lava vaivaiga. (Salamo 119:5, 6, 67) Peitaʻi, na te leʻi faataga le agasala e puleaina o ia. O lana fesili lenei: “E faapefea ea ona faamamāina e le taulealea o lona ala?” O lana tali i ai: “Ona ua tausi i ai e tusa ma lau afioga.” (Salamo 119:9) Ma, i lona faamamafaina o le malosi o loo iai i le Afioga a le Atua mo le faia o le mea lelei, na toe faapea mai atili le faisalamo: “Ua ou teu i loʻu loto lau afioga, ina neʻi ou agasala ia te oe.” (Salamo 119:11) O le malosi lea e mafai ona fesoasoani ia i tatou e ʻalofia ai le faia o se agasala i le Atua e matuā malosi lava!
7. Aisea e tatau faapitoa ai i talavou ona latou mataalia i le manaʻoga ina ia faitau le Tusi Paia i aso taʻitasi?
7 E lelei mo talavou Kerisiano ona latou manatunatu i upu a le faisalamo. O loo osofaʻia Kerisiano talavou i aso nei. O le a matuā manaʻo le Tiapolo e faaleaga tagata tapuaʻi talavou a Ieova. O le sini o Satani ina ia maileia Kerisiano talavou i le lolo atu i tuʻinanauga faaletino ma solia ai tulafono a le Atua. O tifaga ma polokalame o televise ua masani ona atagia mai ai mafaufauga o le Tiapolo. O tagata o loo autū i ai na polokalame e foliga mai o nisi tatou te ono tosina ma fiafia atu i ai; o faiga lē mamā tau amio o loo latou faia ua faafoliga mai o ni mea masani. O le ā le feʻau o loo momoli mai ai? ‘E lē afaina mo tagata e leʻi faaipoipo ona faia ni a latou feusuaʻiga, o le mea e taulia pe afai o loo alofa moni le tasi i le isi.’ E faanoanoa ai, ona o tausaga taʻitasi ua paʻū atu ai se aofaʻiga tele o Kerisiano talavou i lena ituaiga o mafaufauga. O nisi ua faavaatuʻia lo latou faatuatua. Ua matuā malosi lava omiga ua iai! Ae po ua mamafa naʻuā ea omiga ua lē mafai ai e outou talavou ona foʻia? E matuā leai lava! Ua saunia e Ieova se auala mo Kerisiano talavou ina ia foʻia ai faanaunauga lē mamā. E mafai ona latou teena so o se auupega o faaaogā e le Tiapolo, e ala i le ‘tausi pea e tusa ai ma le Afioga a le Atua, ma teu i o latou loto afioga a le Atua.’ O le ā se tele o le taimi o loo e faaalu e te faitauina totino ai le Tusi Paia ma mafaufau loloto i ai?
8. E mafai faapefea e faaaʻoaʻoga ua otooto atu i lenei palakalafa ona fesoasoani ia te oe e faatuputeleina ai lou talisapaia o le Tulafono Faa-Mose?
8 Na alaga mai le tusitala o le Salamo 119 e faapea: “Ua tele lava loʻu naunau i lau tulafono.” (Salamo 119:97) O lē fea tulafono sa ia faasino atu i ai? I le afioga a Ieova ua faaalia mai, e aofia ai le Tulafono Faa-Mose. O nisi e tasi lava le tepa atu i ai, mumusu loa ma fai mai ua lē toe aogā le Tulafono, ma maofa pe mafai faapefea e se tasi ona naunau pea i ai. Peitaʻi ane, a o tatou mafaufau loloto i vala eseese o le Tulafono Faa-Mose, e pei ona sa faia e le faisalamo, e mafai ai ona tatou talisapaia le atamai na māfua ai ona saunia lena Tulafono. E lē gata i le tele o vala faavaloaga o le Tulafono, ae o loo iai ona faatonuga i tulaga tau tumamā ma le fuaina lelei o taumafa tatau, lea e faatāuaina ai le tumamā ma se soifua mālōlōina lelei. (Levitiko 7:23, 24, 26; 11:2-8) Sa faamalosia e le Tulafono le faamaoni i faiga faapisinisi ma timaʻia tagata Isaraelu ina ia faaalia uiga tigā alofa i isi o latou uso tapuaʻi sa lē tagolima. (Esoto 22:26, 27; 23:6; Levitiko 19:35, 36; Teuteronome 24:17-21) Sa tatau ona faia ma le lē faailogatagata ni faaiʻuga faafaamasinoga. (Teuteronome 16:19; 19:15) A o amata ona maua e le tusitala o le Salamo e 119 le poto masani i le olaga, e mautinoa sa ia iloa ai le lelei o le iʻuga e iʻu i ai i latou o ē usitaʻia Tulafono a le Atua, ma sa atili ai ona faamalosia lona naunau i le Tulafono. E faapena foʻi i aso nei, a o taulau manuia Kerisiano i le faatatauina o mataupu silisili o le Tusi Paia, ua faapena foʻi ona faateleina ai lo latou naunau ma le talisapaia o le Afioga a le Atua.
Se Aloalii na Loto Tele e Tū Ese Mai o Ia
9. O le ā le uiga na faaalia e Esekia mo le Afioga a le Atua?
9 E ōgatusa lelei manatu o loo tusia i le Salamo 119, ma mea ua tatou iloa e uiga ia Esekia a o avea pea o ia ma aloalii talavou. Ua manatu nisi tagata atamamai faapitoa i mataupu faale-Tusi Paia e faapea, o Esekia o le tusitala lea o lena salamo. E ui e lē matuā mautinoa lena manatu, ae ua tatou iloa, sa telē se faaaloalo na faaalia e Esekia mo le Afioga a le Atua. E ala i lona olaga, sa ia faaalia ai sa ioe ma le loto atoa o ia i upu o le Salamo 119:97. Ua taʻua e le Tusi Paia e faatatau ia Esekia e faapea: “Ua ia pipii lava ia Ieova, ua le tuua lava lona mulimuli atu ia te ia, a ua tausi lava ana poloaiga na poloai mai ai Ieova ia Mose.”—2 Tupu 18:6.
10. O le ā se faalaeiʻauga o le faaaʻoaʻoga a Esekia mo Kerisiano o ē e leʻi tausia aʻe e ni mātua e matataʻu i le Atua?
10 E iloa mai i faamatalaga o mea moni uma na tusia, sa leʻi ola aʻe Esekia i se aiga e matataʻu i le Atua. O lona tamā, le tupu o Aasa, o se tagata ifo i tupua ma lē faatuatua, o lē foliga mai na ia susunuolaina se tasi o ona lava atalii—o se uso o Esekia—e fai ai le taulaga i se atua sesē! (2 Tupu 16:3) E ui lava i lenei faaaʻoaʻoga leaga, ae sa mafai pea e Esekia ona ‘faamamāina lona ala’ mai taaʻiga faapaupau, e ala i le faamasani atu i le Afioga a le Atua.—2 Nofoaiga a Tupu 29:2.
11. A o vaavaai atu Esekia, o le ā le iʻuga na iʻu i ai mea mo lona tamā lē faatuatua?
11 A o tuputupu aʻe Esekia, sa vaai tino lava o ia i le auala na taulima ai e lona tamā ifo i tupua, mataupu a le Faiga Malo. Sa siʻomia Iuta e ʻau a le fili. Sa aufaatasi Resina le tupu o Suria, ma Peka le tupu o Isaraelu i lo latou siʻomiaina o Ierusalema. (2 Tupu 16:5, 6) O sa Etomā ma Filisitia, na taulau manuia a latou osofaʻiga ane i totonu o Iuta, ma na oo foʻi ina latou nofoia faamalosi nisi aai o Iuta. (2 Nofoaiga a Tupu 28:16-19) Na faapefea ona tali atu Aasa i nei mala? Na i lo le augani atu ia Ieova mo se fesoasoani e teena ai Suria, sa liliu atu Aasa i le tupu o Asuria, ma faatogafalea o ia i auro ma ario, e aofia ai ma ʻoa mai le faaputugāʻoa o le malumalu. Peitaʻi sa leʻi aumaia e lenei mea le filemu tumau ia Iuta.—2 Tupu 16:6, 8.
12. E ala i le faia o le ā sa ono mafai ai e Esekia ona ʻalo ese mai lona faia foʻi o measesē ia na fai e lona tamā?
12 Mulimuli ane, ona maliu ai lea o Aasa ma avea ai loa Esekia ma tupu i le 25 o ona tausaga. (2 Nofoaiga a Tupu 29:1) Na fai lava sina ona laitiiti, ae sa leʻi taofia ai o ia mai le avea o se tupu sa taulau manuia. Na i lo le faataʻitaʻi o Esekia i le amio a lona tamā lē faatuatua, sa pipii mau atu o ia i le Tulafono a Ieova. Sa aofia ai i lena mea se poloaʻiga faapitoa mo tupu: “A oo foi ina nofo o [le tupu] i le nofoalii o lona malo, na te tusia māna se tusi o lenei tulafono i se tusi ai lena tusi o i luma o le au faitaulaga o sa Levī; ia i ai foi lea ia te ia, na te faitau ai foi i aso uma lava o lona olaga; ina ia aʻoaʻoina ai o ia ia mataʻu ia Ieova lona Atua, ma ia tausi i upu uma lava a lenei tulafono.” (Teuteronome 17:18, 19) E ala i le faitauina o le Afioga a le Atua i aso taʻitasi, sa aʻoaʻoina ai Esekia ina ia mataʻu ia Ieova ma ʻalo ese mai lona faia foʻi o measesē na fai e lona tamā sa lē mataʻu i le Atua.
13. E mafai faapefea e se Kerisiano ona ia mautinoa faapea, i se uiga faaleagaga, o le a taulau manuia mea uma na te faia?
13 E lē gata sa faalaeiʻauina tupu o Isaraelu ina ia manatunatu e lē aunoa i le Afioga a le Atua, ae sa tatau foʻi i tagata Isaraelu uma o ē matataʻu i le Atua ona latou faia faapea. I le Salamo muamua o loo faamatalaina ai le tagata e fiafia moni, o lē e “naunau o ia i le tulafono a Ieova; e mafaufau [“faitau lēmū,” NW ] foi o ia i lana tulafono i le ao atoa ma le po.” (Salamo 1:1, 2) O le ituaiga tagata lena, na faapea mai ai le faisalamo: “E manuia foi mea uma na te faia.” (Salamo 1:3) Ae i le isi itu, o le tagata e leai sona faatuatua ia Ieova le Atua, ua faapea mai le Tusi Paia: “O le tagata faalotolotolua e faaletumau ia i ona ala uma.” (Iakopo 1:8) Tatou te mananaʻo uma lava ia fiafia ma taulau manuia. O se faitauga uigā e lē aunoa o le Tusi Paia e mafai ona saosaolaumea i lo tatou fiafiaga.
O le Afioga a le Atua na Faatumauina ai Iesu
14. Na faaalia faapefea e Iesu lona naunau i le Afioga a le Atua?
14 I se tasi taimi, na maua atu ai Iesu e ona mātua o loo nofo mai i le lotolotoi o aʻoaʻo i le malumalu i Ierusalema. Maʻeu le ‘matuā ofo’ o nei tagata o ē na popoto faapitoa i le Tulafono a le Atua, ona o ‘lona poto ma ana upu e tali ai’! (Luka 2:46, 47) O le taimi lena a o 12 tausaga o Iesu. Ioe, e oo lava i taimi a o laitiiti o ia, sa manino mai lona matuā naunau i le Afioga a le Atua. Mulimuli ane, sa faaaogā e Iesu le Tusi Paia e aʻoaʻia mamafa ai le Tiapolo, i lona fetalai atu: “E le na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:3-10) E leʻi leva talu ona mavae lena mea, ae talaʻi atu loa Iesu i ē sa nonofo i lona nuu o Nasareta, e ala i le faaaogāina o le Tusi Paia.—Luka 4:16-21.
15. Na faapefea ona faataatia e Iesu se faaaʻoaʻoga a o ia talaʻi atu i isi?
15 Sa masani ona sii mai e Iesu manatu mai le Afioga a le Atua e lagolago ai ana aʻoaʻoga. O lana ʻau faalogologo foʻi sa ‘matuā taufaiofo i lana aʻoaʻoga.’ (Mataio 7:28) Ae lētioa lava—o aʻoaʻoga a Iesu e puna mai ia Ieova le Atua lava ia! Na taʻutino e Iesu faapea: “O laʻu aʻoaʻoga e le o saʻu lava, a o lana na auina mai aʻu. O lē tautala fua ia te ia, ua saili e ia lona lava viiga; a o lē saili ia viia le na auina o ia, e faamaoni lea, e leai foi sana amioletonu.”—Ioane 7:16, 18, LF.
16. O le ā le telē na faaalia ai e Iesu lona naunau i le Afioga a le Atua?
16 I le lē pei o le tusitala o le Salamo 119, sa ‘leai se amioletonu’ ia Iesu. Sa leai ni ana agasala, le Alo o le Atua, o lē na “faamaulalo o ia e ia lava, ua na anaana ua oo ina maliu.” (Filipi 2:8, LF; Eperu 7:26) Peitaʻi, e ui i lona lelei atoatoa, ae sa suʻesuʻe ma usiusitaʻi Iesu i le Tulafono a le Atua. O le vala autū lenei i lona tomai e tausisia ai lona faamaoni. Ina ua faaaogā e Peteru se pelu e taumafai e puipuia ai lona Matai mai le puʻeina faapagotā, sa otegia e Iesu le aposetolo ma fesili atu i ai: “Fa te oe ea ou te le mafaia ona aioi atu nei i loʻu Tamā, ona aauina mai ai lea e ia ia te au o agelu e sili ona toatele i lekeona e sefulu ma le lua? Ona faapefea lea ona taunuu o Tusi, e tatau ona oo ia mea?” (Mataio 26:53, 54) Ioe, sa sili atu ona manatu mamafa Iesu i le faataunuuina o Tusitusiga Paia na i lo le sola ese mai se maliu matuiā ma le faalumaina. Maʻeu se naunau matilatila i le Afioga a le Atua!
O Isi o Ē na Faataʻitaʻi ia Keriso
17. Sa faapeī le tāua o le Afioga a le Atua i le aposetolo o Paulo?
17 Na tusi atu le aposetolo o Paulo i ona uso Kerisiano: “Ia outou faaaʻoaʻo mai ia te au, pei o aʻu ia Keriso.” (1 Korinito 11:1) I le pei o lona Matai, sa faatupu aʻe e Paulo se naunautaʻi mo le Tusi Paia. Na ia taʻutino mai: “E matuā naunau ma le faapelepele loʻu tagata i totonu i le Tulafono a le Atua.” (Roma 7:22, The Jerusalem Bible) Sa sii soo mai e Paulo upu o le Afioga a le Atua. (Galuega 13:32-41; 17:2, 3; 28:23) Ina ua ia tuuina atu ana faatonuga faaiʻu ia Timoteo, o lona uso ā auauna sa pele ia te ia, na faamamafa ai e Paulo le vaega tāua e tatau ona faatinoina e le Afioga a le Atua i le olaga i aso taʻitasi o “tagata [uma] o le Atua.”—2 Timoteo 3:15-17.
18. Taʻu mai se faaaʻoaʻoga o se tasi, i ona po nei, sa ia faaalia le faaaloalo mo le Afioga a le Atua.
18 E toʻatele auauna faamaoni a Ieova i ona po nei ua faapena ona latou faataʻitaʻi atu i le naunau o Iesu mo le Afioga a le Atua. I le amatamataga mai o lenei senituri, na maua ai e se alii talavou se Tusi Paia mai sana uō tamaʻitaʻi. Sa ia faamatala mai āuga na oo ia te ia ona o lenei meaalofa tautele: “Sa ou maumauaʻi ina ia avea o se mea e tatau lava ona faia i loʻu olaga, le faitauina o se vaega o le Tusi Paia i aso taʻitasi.” O lena alii talavou o Frederick Franz, ma o lona naunau i le Tusi Paia na oo atu i lona mauaina ai o se olaga umi ma taulau manuia i le auaunaga a Ieova. E manatua pea o ia i moomooga lelei ona o lona tomai e tauloto ai mataupu atoatoa o le Tusi Paia.
19. E faapefea ona faatulaga e nisi le faitau Tusi Paia faalevaiaso mo le Aʻoga o le Faiva Faatiokarate?
19 E matuā faatāua e Molimau a Ieova le faitauina e lē aunoa o le Tusi Paia. I vaiaso taʻitasi, i tapenapenaga mo se tasi o a latou sauniga faa-Kerisiano, le Aʻoga o le Faiva Faatiokarate, latou te faitauina ai ni mataupu o le Tusi Paia. O le sauniga lena latou te talanoaina ai manatu tāua mai le faitauga Tusi Paia ua faatulagaina. Ua iloa e nisi Molimau le lelei o le vaevae o le faitau Tusi Paia o le vaiaso i ni vaega laiti se fitu ona faitau lea o se vaega e tasi i aso taʻitasi. A o latou faitauina, latou te toe tōmānatu ai i le mataupu. Pe a mafai, latou te faia ni sailiiliga faaopoopo e ala i le faaaogāina o lomiga faale-Tusi Paia.
20. O le ā e manaʻomia ina ia maua ai se taimi mo le faitauina e lē aunoa o le Tusi Paia?
20 E te ono manaʻomia ona ‘faasao mai le taimi’ mai isi gaoioiga ina ia faitau ai e lē aunoa le Tusi Paia. (Efeso 5:16) Peitaʻi, o aogā e maua o le a sili atu ona tauia ai so o se faataulagaina na fai. A o e faatupuina aʻe se masaniga o le faitauina o le Tusi Paia i aso taʻitasi, o le a tuputupu aʻe ai foʻi lou naunau i le Afioga a le Atua. O le a lē pine ona uunaʻia oe e te faapea mai e pei ona taʻua e le faisalamo: “Ua tele lava loʻu naunau i lau tulafono; ou te mafaufau i ai i le aso atoa.” (Salamo 119:97) O se uiga faapena o le a aumaia ai aogā e tele i le taimi nei ma i le lumanaʻi, e pei ona o le a faaalia e le mataupu o sosoo mai.
E te Manatua?
□ Na faapefea ona faaalia e le tusitala o le Salamo e 119 lona matuā naunau i le Afioga a le Atua?
□ O ā lesona e mafai ona tatou aʻoaʻoina mai faaaʻoaʻoga a Iesu ma Paulo?
□ E mafai faapefea ona tatou faatupuina so tatou lava naunau i le Afioga a le Atua?
[Fesili mo le Suʻesuʻega]
[Ata i le itulau 10]
Sa tatau i tupu faamaoni ona faitau e lē aunoa le Afioga a le Atua. O faapena oe?
[Ata i le itulau 12]
E oo lava a o tamaitiiti Iesu, sa naunau o ia i le Afioga a le Atua