Na Latou Faia le Finagalo o Ieova

O se Foaʻi Tauofo e Faaauilumaina ai le Tapuaʻiga Mamā

NA VĀAITINO tagata Isaraelu i le malosi o Ieova e faaolaina ai. Na latou vāai a o vaeluaina faavavega vai o le Sami Ulaula, ma faatagaina ai i latou e savalia le eleele mātūtū ma sosola ese mai ai i autau a Aikupito. I le isi itu, sa latou vaavaai mamao mai ai i se nofoaga saogalemū a o toe tatafe malosi ane na vai i luga o ē na tuliloaina i latou. Na faasaoina e Ieova o latou ola!—Esoto 14:21-31.

E ui i lea, o se tulaga faanoanoa ona sa manatu māmā nisi tagata Isaraelu i mea na faia e lo latou Atua. A o iai Mose i luga o le Mauga o Sinai, sa latou ofoina atu a latou auro ia Arona ma faatonuina e faia se tupua mo i latou ina ia tapuaʻi i ai. Ina ua toe foʻi ane, na maua atu ai e Mose lenei vao o tagata fouvale o loo aai, feinu, sisiva, ma ifo atu i se tamaʻi povi auro! I le taʻitaʻiga a Ieova na fasiotia ai le pe ā ma le 3,000—e foliga mai o i latou ia na uunaʻia le fouvalega. I lena aso, na aʻoaʻoina ai e tagata o le Atua se lesona tāua e faatatau i le manaʻoga o le tuuina atu ia Ieova o le tuutōina atoatoa.—Esoto 32:1-6, 19-29.

E leʻi umi lava talu ona mavae lena mea na tupu, ae sauni loa Mose e faaoo atu le faatonuga a le Atua ina ia fausia se falefetafaʻi, o se faleie e feaveaʻi mo le tapuaʻiga. Na manaʻomia i lenei faugafale ni meafaufale taugatā ma ni tagata faigaluega tomai. O fea o le a aumaia ai nei meafaufale ma tagata? Ae o le ā e tatou te aʻoaʻoina mai ai i lenei tala o le Tusi Paia?

Meaalofa Tauofo o Meafaufale ma Tomai

E ala atu ia Mose na faatonuina ai e Ieova tagata Isaraelu e faapea: ‘Ina fai ia se meaalofa tauofo ia Ieova, e taʻitoʻatasi o lē manatu i ai i lona loto, ia aumai e ia le meaalofa tauofo ia Ieova.’ O le ā le ituaiga o meaalofa tauofo? E aofia i mea na lisiina atu e Mose o auro, ario, apa memea, taaʻiga vulu, ie, o paʻu o manu, o laau, ma maatāua.—Esoto 35:5-9.

Na tele atu mea na maua e tagata Isaraelu na i lo mea sa manaʻomia e faia ai se meaalofa tauofo telē faapena. Manatua, ina ua latou tuua Aikupito, na latou ō ma ave mea sa faia i auro ma ario, faatasi ai ma le tele o ie. O le mea moni, “ua latou faamatitivaina ai Aikupito.” * (Esoto 12:35, 36) Muamua atu, na loto malilie ai tagata Isaraelu e tuuina atu a latou maatāua e faia ai se tupua mo tapuaʻiga sesē. Pe o le a latou faailoa atu ea la i lea taimi se naunau e faia se foaʻi ina ia faaauilumaina ai le tapuaʻiga moni?

Ia mātau sa leʻi taʻu atua e Mose se aofaʻiga patino e tatau i le tagata ona foaʻi atu, pe na ia faaaogā lagona nofosala po o le maasiasi e uunaʻia ai e faia se foaʻi. Na i lo lea, sa na ona ia augani atu ia i ‘latou uma e naunau i ai o latou loto.’ E mautinoa sa lagona e Mose e lē manaʻomia ona tauanauina faamalosi tagata o le Atua. Sa ia mautinoa e faapea o le a foaʻi mai e tagata taʻitoʻatasi mea uma o le a latou mafaia.—Faatusatusa i le 2 Korinito 8:10-12.

Peitaʻi, sa manaʻomia i le fauina o le fale mea e sili atu na i lo se meaalofa o meafaufale. Na fetalai atu ai foʻi Ieova i tagata Isaraelu: “O i latou uma foi o ia te outou ua popoto, ia latou o mai, ma latou faia mea uma lava ua poloai mai ai Ieova.” Ioe, na manaʻomia i lenei galuega faufale ni tagata faigaluega tomai. O le mea moni, o “galuega uma lava”—e aofia ai galuega e faaaogā ai laupapa, o uamea, ma maataua—sa manaʻomia ina ia faamaeʻaina ai lenei galuega. E mautinoa, sa taʻitaʻiina e Ieova matātā a le aufaigaluega, ma o le viiga mo le taulau manuia o le galuega o le a tuuina saʻo atu lea ia te ia.—Esoto 35:10, 30-35; 36:1, 2.

Na tali atu ma le fiafia tagata Isaraelu i le valaaulia ina ia ofoina atu a latou ālamanuia ma o latou  tomai. Ua faapea mai le faamatalaga a le Tusi Paia: “[Na] latou o mai lea, o i latou uma o e ua uai i ai o latou loto, ma i latou uma o e ua manatu i ai o latou loto, ua latou aumaia le taulaga ia Ieova mo le galuega o le fale fetafai o le faapotopotoga mo ona sauniga uma, atoa ma ofu sa. Ua latou o mai, o tane atoa ma fafine; o i latou uma lava o e na manatu i ai o latou loto.”—Esoto 35:21, 22.

Lesona mo i Tatou

I aso nei o le galuega e sili ona telē o le talaʻiga o le tala lelei o le Malo o le Atua ua faataunuuina e ala i foaʻi tauofo. E masani lava, o ni foaʻi tautupe. I isi tulaga, e faaaogāina ai e uso ma tuafāfine Kerisiano le tele o lo latou poto masani e fesoasoani ai i le fausiaina o Maota o le Malo, Maota Fono, ma fale o lālā. O loo iai foʻi ni galuega o loo faia i le sili atu ma le selau o aiga Peteli i le lalolagi aoao, o galuega ia e aofia ai tomai eseese se tele. O tagata loto malilie uma o ē faia na tauofo e mafai ona mautinoa o le a lē faagaloina e Ieova a latou galuega mamafa!—Eperu 6:10.

E mafai foʻi ona faatatau mai lena i le sao lea o loo faia e i tatou taʻitoʻatasi i le faiva faa-Kerisiano. Ua faalaeiʻauina i tatou uma e faaaogā tatau le taimi ina ia faia ai se sao maelegā i le galuega talaʻi. (Mataio 24:14; Efeso 5:15-17) O nisi ua latou faia faapea o ni faievagelia faataimi atoa, po o ni paeonia. Ona o o latou tulaga, ua lē mafaia ai e nisi ona faaalu lena taimi tele i le faiva o se paeonia. E ui i lea, o loo latou faafiafiaina foʻi Ieova. E pei lava o meaalofa mo le falefetafaʻi, e lē o taʻu maʻoti mai e Ieova se aofaʻiga patino e tatau ona tuuina atu e tagata taʻitoʻatasi. Peitaʻi, o le mea o loo ia manaʻomia mai, o le auauna atu lea o tagata taʻitoʻatasi ia te ia ma le loto atoa, solu atoa, mafaufau atoa, ma le malosi atoa. (Mareko 12:30) Afai o loo tatou faia faapea, e mafai ona tatou mautinoa o le a ia tauia i tatou mo foaʻi tauofo lea o loo tatou faia ina ia faaauilumaina ai le tapuaʻiga moni.—Eperu 11:6.

[Faaopoopoga i lalo]