Pe a Matuā Tele le Limafoaʻi

PE AFAI e te mauaina le avanoa e ofoina atu ai se meaalofa i se tupu, o le ā e te ono tuuina atu ia te ia? Ae faapefea pe afai o ia o le taʻitaʻi e pito sili ona mauʻoa ma atamai i le lalolagi? Pe e te mafaufau i se meaalofa o le a faafiafiaina ai o ia? Pe ā ma le toluafe tausaga ua mavae, sa tatau ai ona manatunatu le tupu fafine o Seepa i na fesili a o sauniuni e asiasi atu i se taʻitaʻi faapena—le tupu o Isaraelu o Solomona.

Ua taʻu mai e le Tusi Paia ia te i tatou o lana meaalofa, sa aofia ai ni auro e 120 taleni “ma mea manogi e matuā tele lava, ma maa tāua.” E tusa ai ma le tau o mea i ona po nei, e pe ā ma le $40,000,000 Amerika le tau o le auro lava ia. O le suāuu pasama o se sūauu manogi ma o se suāuu e faaaogāina mo togafitiga faafomaʻi sa tutusa ma le auro o ni oloa tautele. E ui e lē o taʻuina mai e le Tusi Paia pe o le ā le tele o le suāuu na tuuina atu e le tupu fafine ia Solomona, ae ua faailoa mai ia te i tatou e faapea sa tumau pea ona lē mafaatusalia lana meaalofa.—1 Tupu 10:10.

Sa manino le avea o le tupu fafine o Seepa ma fafine sa mauʻoa ma limafoaʻi. Ae sili atu i lena ona sa toe tauia o ia ona o lona limafoaʻi. Ua faapea mai le Tusi Paia, na “foai atu lea e le tupu o Solomona i le tupu fafine o Seepa o mea uma na ia finagalo ma faatoga i ai, e faaopoopo i mea na aumaia e ia i le tupu.” (2 Nofoaiga a Tupu 9:12) E moni, atonu sa avea o se aganuu masani i tagata tautupu le faafesuiaʻi o meaalofa; peitaʻi, ua taʻua patino e le Tusi Paia le ‘lima mafola’ o Solomona. (1 Tupu 10:13) Na tusi Solomona lava ia e faapea: “E faatamaoaigaina le tagata matamau; o ia foi lē faasūsū i nisi, e faasūsūina lava o ia.”—Faataoto 11:25.

O le mea moni, na faia foʻi e le tupu fafine o Seepa se faataulagaina tele o lona taimi ma taumafaiga ina ia asiasi atu ai ia Solomona. E foliga mai sa tu Seepa i le vaipanoa lea ua iai i aso nei le Republic of Yemen; ma na faimalaga atu ai le tupu fafine ma ana solo o kamela mo le sili atu i le 1,000 maila (1,600 kilomita) i Ierusalema. E pei ona sa fetalai Iesu, “na sau o ia mai le tuluʻiga o le lalolagi.” Aisea na faia ai e le tupu fafine nei taumafaiga uma? O le autū na malaga atu ai o ia “e faalogo i le poto o Solomona.”—Luka 11:31.

Ua faapea mai le 1 Tupu 10:1, 2 o le tupu fafine o Seepa na “sau . . . o ia e tofotofo ia [Solomona] i upu faigata. . . . ona la tautalatala ai lea ma ia i mea uma na i ai i lona loto.” Na faapefea ona tali atu ai Solomona? “Ua faamatalaina atu foi e Solomona ia te ia o ana upu uma; ua leai se mea e lilo i le tupu ua ia le taʻu atu ia te ia.”—1 Tupu 10:3.

I le māofa i mea na ia faalogo ma vaai i ai, na tali atu ma le loto maulalo le tupu fafine e faapea: “Amuia foi au auauna nei, o e tutū i ou luma e le aunoa, ma faalogo i lou poto.” (1 Tupu 10:4-8) Na te leʻi taʻutino maia le olioli o auauna a Solomona ona e faapea sa lotolotoi i latou i le tamaoaiga—e ui lava o le mea moni lena. Na i lo lena, sa taʻuamuiaina auauna a Solomona ona na mafai ona latou faalogologo e lē aunoa i le poto o Solomona na foaʻiina i ai e le Atua. Maʻeu se faaaʻoaʻoga lelei a le tupu fafine o Seepa mo tagata o Ieova i aso nei, o ē o loo olioli nei i le atamai o Lē na Foafoaina Mea faapea foʻi lona Alo, o Iesu Keriso!

O le isi mea mataʻina o le faamatalaga na sosoo ai a le tupu fafine ia Solomona e faapea: “Ia faamanuina Ieova lou Atua.” (1 Tupu 10:9, NW ) E faavae i faamaoniga, na ia vaaia le foaʻiina atu e Ieova ia Solomona o le poto ma le tamaoaiga. Ua ōgatusa lenei ma le mea na muaʻi folafola atu e Ieova ia Isaraelu. ‘O le tausi i aʻu tulafono,’ na fetalai ai o ia “o le mea lea tou te popoto ai, ma atamamai ai i luma o nuu e faalogologo i nei tulafono uma; ona faapea ane lea, E moni lava o le nuu popoto ma le atamamai lenei nuu mamalu.”—Teuteronome 4:5-7.

Faalatalata Atu i Lē e Foaʻiina Mai le Poto

I aso nei, e faitau miliona ua taaʻina mai foʻi i le faalapotopotoga a Ieova ona ua latou lagona  e faapea o le “Isaraelu o le Atua” “o le nuu popoto ma le atamamai,” e leʻi faapea o se mea na tupuga mai ma i latou, ae ona e taʻitaʻiina i latou e tulafono ma mataupu silisili lelei atoatoa a le Atua. (Kalatia 6:16) Ua faaalia i le fuainumera o tagata papatiso i tausaga e leʻi leva talu ai nei, le faitau selau afe o soʻo fou o loo faapea atu i tausaga taʻitasi i le Isaraelu faaleagaga: “Tatou te o ma outou; auā ua matou faalogo, o loo ia te outou le Atua.” (Sakaria 8:23) Maʻeu se māofa ua iai i nei tagata fou ina ua latou vaaia le tausamiga o meaʻai faaleagaga ua laulauina atu e Ieova i luma o ana auauna! Sa lē tāitai ona latou vaaia se tulaga faapena i a latou lotu na iai muamua.—Isaia 25:6.

Tuuina Atu i Lē Foaʻi Silisili

I le mauaina o mea e tele, e masani ai ona manatunatu i latou e loto talisapaia i se mea e mafai ona latou tuuina atu e taui atu ai i le Tupu ma Lē Foaʻi silisili, o Ieova le Atua. Ua faaali mai e le Tusi Paia faapea o le meaalofa silisili e mafai ona tatou tuuina atu ia Ieova o “le taulaga o le viiga i le Atua.” (Eperu 13:15) Aisea? Talu ai o lenei taulaga e fesootaʻi tuusaʻo atu i le faasaoina ai o ola, o se faanaunauga autū o Ieova i lenei taimi o le iʻuga. (Esekielu 18:23) E lē gata i lena, o le tuuina atu o le malosi ma le taimi o se tasi e fesoasoani ai i ē mamaʻi, o ē loto mafatia, ma isi, o se taulaga e talileleia mai.—1 Tesalonia 5:14; Eperu 13:16; Iakopo 1:27.

E faatinoina e meaalofa tautupe se vaega tāua. Ua mafai ai ona mauaina Tusi Paia, lomiga faale-Tusi Paia, ma nofoaga e mafai ona faapotopoto i ai Kerisiano. (Eperu 10:24, 25) E mafai foʻi ona saunia e foaʻi tauofo tupe e fesoasoani atu ai i ē ua afaina ona o taua ma mala faalenatura.

Ina ia maua e i tatou ni taʻiala e faatatau i le mataupu tau foaʻi, ua faataatia mai ai e le Afioga a le Atua ni mataupu silisili lelei. Mo se faaaʻoaʻoga, ua aʻoaʻoina Kerisiano e foaʻi atu, e lē i ni aofaʻiga ua faatulagaina, ae o mea e latou te mafai ona tuuina atu, e faia ma le loto malie, ma mai se loto fiafia. (2 Korinito 9:7) O nisi e mafai ona foaʻi atu ni mea se tele; o isi, e pei o le fafine mativa lea ua oti lana tane i taimi o Iesu, atonu e mafai ona foaʻi atu na o sina mea itiiti. (Luka 21:2-4) Pe e lē mataʻina ea le faatāuaina e Ieova—o Lē e Ana le vateatea aoao—o meaalofa ma taulaga uma mai se uunaʻiga lelei na faia i lona suafa?—Eperu 6:10.

Ina ia latou foaʻi atu ma le fiafia, ua faailoa atu pea i tagata o Ieova manaʻoga eseese ma auala aogā e mafai ona faafetaiaʻia ai na manaʻoga. O le iʻuga, ua uunaʻia ai e le agaga o Ieova i latou e loto naunau ina ia tali atu. I Isaraelu anamua na mulimulitaʻia ai lenei faatulagaga i le fausiaina o le fale fetafaʻi ma mulimuli ane i le malumalu. (Esoto 25:2; 35:5, 21, 29; 36:5-7; 39:32; 1 Nofoaiga a Tupu 29:1-19) I le uluaʻi senituri T.A., o le faatulagaga faapena na mafai ai e Kerisiano ona mauaina ālamanuia sa latou manaʻomia ina ia faaoo atu ai le tala lelei o le Malo i nuu ese ma fesoasoani ai i uso i Isaraelu a o faagasolo se oge.—1 Korinito 16:2-4; 2 Korinito 8:4, 15; Kolose 1:23.

Ua faapena foʻi i aso nei, ua faamanuia e Ieova ona tagata, ma o le a ia faaauau pea ona faamanuiaina i latou, e ala i le tuuina atu ia te i latou o mea latou te manaʻomia e faamaeʻaina ai le tauiviga silisili o le talaʻiga ma le aʻoaʻoina e leʻi faapea ona vaaia muamua e le lalolagi.—Mataio 24:14; 28:19, 20.

O ā Manaʻoga o Loo Iai i le Taimi Nei?

I tausaga talu ai nei na lesitalaina ai Molimau a Ieova i le tele o atunuu ia na faasāina muamua ai le latou galuega. O le iʻuga, ua vaaia ai i le tele o nei atunuu se tuputupu aʻe mataʻina o le faitau aofaʻi o tagata talaʻi. Ma e manino mai la, ua matuā sili ona manaʻomia ni Tusi Paia ma ni lomiga faale-Tusi Paia.

E faapena foʻi i Maota o le Malo. Pe ā ma le 9,000 Maota fou o le Malo o loo manaʻomia i le lalolagi aoao i le taimi nei. Pe afai e tasi se Maota o le Malo e fausiaina i aso taʻitasi, e sili atu la ma le 24 tausaga o le a manaʻomia ina ia faafetaiaʻia ai le manaʻoga o iai i le taimi nei! Ma i le taimi lava e tasi, e pe ā ma le fitu faapotopotoga fou ua faia aʻe i aso taʻitasi, o le tele o nei faapotopotoga o loo i vaega o le lalolagi e ʻutiʻuti le tulaga tautupe. Ae i le isi itu, o le tele  o nei nofoaga e lē tau manaʻomia ai ni fale taugatā. I nisi o nofoaga, e mafai ona faia ai se Maota o le Malo e faafetaiaʻia ai le manaʻoga ma avea o se molimau lelei i lena vaipanoa i le na o le $6,000 Amerika.

I le uluaʻi senituri, sa iai nisi o Kerisiano e sili atu ona lelei lo latou tulaga tautupe na i lo isi, o lea na tusi atu ai le aposetolo o Paulo: “Fai faatatau, ina ia fesoasoani lo outou tamaoaiga i lo latou matitiva i nei ona po, ma ia fesoasoani lo latou tamaoaiga i lo outou matitiva i se aso, ina ia fai faatatau.” (2 Korinito 8:14) I aso nei, o se “fai faatatau” faapena o le saunia lea o fesoasoani manaʻomia mo le sauniaina mai o Tusi Paia, lomiga faale-Tusi Paia, o Maota o le Malo, fesoasoani mo mala faalenatura, ma isi mea i le tele o vaega o le lalolagi. Maʻeu se faamanuiaina ona o se foaʻi faapena—e lē gata i lē o loo foaʻi atu ae faapea foʻi i lē e taliaina mai!—Galuega 20:35.

E pei ona faailoaina mai i tusi na mauaina e le Sosaiete mai tagata loto foaʻi, o le toʻatele o ē faitau i lenei mekasini e faanaunau e fesoasoani atu ae lē o mautinoa po o ā ni auala eseese e faia ai ni meaalofa tauofo. E mautinoa o le a fesoasoani le pusa o loo avatu faatasi ma lenei mataupu e taliina a latou fesili.

A o faagasolo le nofoaiga mamalu a Solomona, na faalogo ai “tupu uma o le lalolagi” e faatatau ia te ia ma ō mai ai e asiasi i a te ia. Peitaʻi, e na o le toʻatasi le taʻitaʻi na taʻua e le Tusi Paia lona igoa—o le tupu fafine lea o Seepa. (2 Nofoaiga a Tupu 9:23) Maʻeu se faataulagaina na ia faia! Ae na matuā tauia o ia—i se tele na tuua ai o ia i se tulaga na “lē magagana ai ma le ofo.”—2 Nofoaiga a Tupu 9:4, Today’s English Version.

I le lumanaʻi, o le a faia ai e Ieova, o le Tupu ma Lē Foai silisili, mea e sili atu na i lo mea na mafaia e Solomona, mo i latou e faia faataulagaina mo Ia. I le tali atu, o le a tutū ai i latou nei ma le ‘lē magagana ma taufaiofo,’ ona o le a lē gata ina faasaoina i latou e Ieova mai i lona aso mataʻutia o le faamasinoga ae pe a mavae lena, o le a ia ‘faamafola lona aao, ma faamaoona le manao o mea ola uma lava.’—Salamo 145:16.

 [Pusa i le itulau 22]

Auala ua Filifili ai Nisi e Foaʻi Atu

MEAALOFA MO LE GALUEGA I LE LALOLAGI AOAO

E TOʻATELE tagata latou te tuuesea se vaega tupe, po o se vaega faaagaga, se tino i tupe e lafo i pusa o loo faailogaina o “Meaalofa mo le Galuega a le Sosaiete i le Lalolagi Aoao—Mataio 24:14.” E avatu e faapotopotoga i masina taʻitasi ia tupe i le ofisa ulu i Brooklyn, i New York, po o le ofisa o le lālā o lea lava vaipanoa.

O foaʻi tauofo o tupe, e mafai ona auina saʻo atu lava i le Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, pe auina atu i le ofisa o le Sosaiete lena o loo vaavaaia lou atunuu. E mafai foʻi ona foaʻi atu maatāua po o isi mea tāua. O na foaʻi e tatau ona auina atu faatasi ma se tusi puupuu e faamanino atu ai o lena foaʻi o se foaʻi patino lava.

FUAFUAGA O FOAʻI E IAI MA NI TUUTUUGA

E mafai ona auina atu i le Watch Tower Society se tupe e teuina ai i lalo o se faatulagaga faapitoa lea, afai e iai se manaʻoga totino a lē e ana le tupe, o le a toe faafoʻi atu ia te ia lena foaʻi. Mo nisi faamatalaga atili, faamolemole faafesootaʻi le Treasurer’s Office i le tuatusi o loo taʻua i luga.

FUAFUAINA MO FOAʻI I FAALAPOTOPOTOGA E FESOASOANI I ISI TAGATA

E lē gata i foaʻi tuusaʻo tautupe ma fuafuaga o foaʻi tautupe e iai ma ni tuutuuga, ae iai foʻi isi auala e foaʻi atu ai e fesoasoani mo le auaunaga o le Malo i le lalolagi aoao. Ua aofia ai mea nei:

Inisiua: E mafai ona avea le Watch Tower Society ma faalapotopotoga e faaui i ai le taui o le inisiua o le ola o le tagata po o taui e maua mai ona o sana faatulagaga tau mālōlōga litaea pe penisione.

Teugā Tupe: O teugā tupe, o tusi o teugā tupe e tiposi, po o ni vaega tupe a le tagata pe a faamālōlō litaea, e mafai ona tuu faamavaega mo le Watch Tower Society pe totogi atu i ai pe a maliu le tagata e ana ia mea, e tusa ai ma faatulagaga manaʻomia a le faletupe a lea atunuu.

Tupe Faafaigaluega [Stocks] ma Pepa Faamaonia mo Tupe [Bonds]: O tupe faafaigaluega ma pepa faamaonia mo tupe e mafai ona foaʻi atu i le Watch Tower Society, a lē o se meaalofa e tuusaʻo po o se fuafuaga e faapea o le tupe maua e faaauau pea ona totogi atu i le tagata e ana le foaʻi.

Fanua ma Fale: O fanua ma fale e mafai ona faatauina atu, e mafai ona foaʻi atu i le Watch Tower Society e ala i le faia o se meaalofa e tuusaʻo po o le taofia lea ia faaauau ona nofo ai pea lē e ana, seʻia maliu. E ao i lena tagata ona faafesootaʻi le Sosaiete a o ia leʻi faapepaina faaletulafono so o se fanua totino o le a ia foaʻi atu mo le Sosaiete.

Uili ma Mavaega: E mafai ona faaui atu se mea totino po o se vaega tupe i le Watch Tower Society e ala i se uili ua faatulafonoina, pe avea foʻi le Sosaiete ma lē e mauaina le mavaega. O se mavaega e faia mo le manuia o se faalapotopotoga faalelotu e ono maua mai ai nisi aogā tau lafoga.

E pei ona faailoa mai e le faaupuga “fuafuaina mo foaʻi i faalapotopotoga e fesoasoani i isi tagata,” o nei ituaiga o foaʻi e manaʻomia ai la ni fuafuaga lelei a lē e ana le foaʻi. Ina ia fesoasoani i tagata taʻitoʻatasi o loo mananaʻo e mauaina e le Sosaiete aogā e ala i nisi o ituaiga o le fuafuaina mo foaʻi i faalapotopotoga e fesoasoani i isi tagata, ua saunia ai nei e le Sosaiete se polosiua i le gagana Peretania ua faaulutalaina faapea Planned Giving to Benefit Kingdom Service Worldwide. Na tusia le polosiua e tali atu ai i le tele o fesili sa mauaina e le Sosaiete e tusa ai ma meaalofa, uili, ma mavaega. O loo iai foʻi faamatalaga aogā faaopoopo e uiga i fuafuaga e faatatau i ana meatotino i le taimi o lona maliu, e faatatau foʻi i tupe ma lafoga. Ma ua faatulagaina e fesoasoani i tagata i le Iunaite Setete o ē o loo fuafua e faia se meaalofa faapitoa i le Sosaiete i le taimi nei, pe tuu se uili mo le taimi e maliu ai ina ia filifilia ai le mea e sili ona lelei ma auala aogā ina ia faia faapea i le manatunatu i lo latou tulaga totino ma tau le aiga. E ono maua lenei polosiua e ala i le faatalosaga tuusaʻo atu mo se kopi mai le Charitable Planning Office.

Ina ua maeʻa ona faitauina le polosiua ma talanoaina faatasi ma i latou o loo galulue i le Charitable Planning Office, ua toʻatele ai i latou ua mafai ona fesoasoani i le Sosaiete ma i le taimi e tasi ua faateleina ai faamanuiaga tau lafoga i le faia faapea. E tatau ona faafesootaʻi atu le Charitable Planning Office ma maua mai ai se kopi o so o se faamatalaga o loo maua e faatatau i so o se tasi o nei faatulagaga. Pe afai e te manaʻo i se tasi o nei faatulagaga o le fuafuaina mo foaʻi i faalapotopotoga e fesoasoani i isi tagata, e tatau ona e faafesootaʻia le Charitable Planning Office, i le tusi atu po o le telefoni atu, i le tuatusi o loo lisi mai lalo po o le ofisa o le Sosaiete o loo vaavaaia lou atunuu.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telefoni (914) 306-1000

[Ata i le itulau 23]

O galuega a Molimau a Ieova ua lagolagoina e ala i foaʻi tauofo