Sauniuni i le Meleniuma e Sili Ona Tāua!

O LE a aumaia e le Pulega o le Afe Tausaga a Keriso le lē mafaitaulia o faamanuiaga mo le aiga faaletagata. I lalo o le taʻitaʻiga alofa a Iesu, o le a siitia atu ai le fanau a tagata mai lona tulaga leaga o loo iai i le taimi nei i le lelei atoatoa faamamaluina. Seʻi manatu i le mea e mafai ona uiga i ai lena mea mo oe. Le soifua mālōlōina lelei atoatoa! Seʻi manatu i le maleifua aʻe i taeao taʻitasi ma faalogoina le faafouina e sili atu i le aso ua tuanaʻi. E faitau miliona tane, o fafine, ma tamaiti o loo taulaʻi atu la latou vaai i le ola ai i lena taimi fiafia. Latou te taulaʻi atu i ai ma le mautinoa, ma tatalo atu i ai. O lo latou suʻesuʻeina o le Tusi Paia ua faatalitonuina ai i latou o nei faamanuiaga e mafai ona fai mo i latou ina ia olioli ai.

Peitaʻi, a o leʻi amataina le Pulega o le Afe Tausaga a Iesu Keriso, e tatau ona ia tafiesea mai le lalolagi i latou uma o ē tetee i lana pulega. O le a ia faia faapea i le taua o loo taʻua i le Tusi Paia o Amaketo. (Faaaliga 16:16) O Kerisiano moni o iai i le lalolagi o le a lē tau ai i lena taua. O le taua a le Atua. Ma o le a lē tauina lena taua i se laufanua patino se tasi. Ua faapea mai le Tusi Paia o le a oo atu i tuluʻiga e sili ona mamao o le lalolagi. O fili o le pulega a Keriso o le a fasiotia. E leai ma se tasi o i latou o le a mafai ona sola ese!—Ieremia 25:33.

O le a sosoo ai ma le uaʻi atu o Iesu ia Satani le Tiapolo ma ana temoni. Seʻi faaāta i lou mafaufau le vaaiga, e pei ona sa iloa ai e le tusitala o le tusi o Faaaliga: “Na aʻu iloa foi le agelu [Iesu Keriso] ua alu ifo i le lagi, ua ia te ia le ki o le to e le gata, ua i lona lima foi le maea uamea tele. Ua pue foi e ia le tarako, o le gata tuai, o le tiapolo lea ma Satani, ua ia fusifusi foi ia te ia i tausaga e afe.” (Faaaliga 20:1, 2) Mulimuli ane, ona faaumatia ai lea e faavavau Satani ma ana temoni.—Mataio 25:41.

O le a faasaoina ia Amaketo “le motu o tagata e toatele . . . e le ma faitaulia e se tasi.” (Faaaliga 7:9) O le a taʻitaʻiina atu i latou nei e Iesu ina ia maua aogā atoatoa mai “i puna o vai ola” e pei lava ona taʻitaʻi atu e le leoleo mamoe ana mamoe i le vai e maua ai le ola. (Faaaliga 7:17) O lo latou agaʻi i luma faaleagaga ua lē toe faalavelavea e Satani ma ana temoni, o le a faasolosolo ai ona maua e i latou nei ua faasaoina mai ia Amaketo le fesoasoani ina ia manumalo  ai mai o latou faanaunauga agasala seʻia oo ina latou oo atu i le lelei atoatoa!

I lalo o le pulega alofa a Keriso, o le a faasolosolo mālie ai ona faaleleia le tulaga o le a iai le olaga. O le a aveesea e Ieova le Atua, e ala mai ia Iesu Keriso māfuaaga uma o le tigā ma le faanoanoa. O le a ia “sōloiesea foi . . . loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga.” (Faaaliga 21:4) Ua taaofaʻi e le perofeta o Isaia le ata, i le faapea mai: “Ona faapupulaina ai lea mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū.” (Isaia 35:5, 6) Ma o ē na oti, “o tagatānuu atoa ma alii,” o le a toe faafoisia mai i le ola faatasi ma le faamoemoega o le lē toe oo i le oti!—Faaaliga 20:12.

I le taimi lava lenei, ua aoaoina ai le “motu o tagata e toatele” lea o le a faasaoina atu ia Amaketo. Ua latou nofo sauni mo le Pulega Faa-Meleniuma a Keriso. E ui ina latou lē iloa le taimi o le a amata ai lena pulega, ae ua latou mautinoa i le taimi atofaina a le Atua, o le a faaooina mai ai. E mafai ona e iai i le lotolotoi o i latou na, ae e tatau ona e sauniuni—e lē i le faatauina atu o au mea totino ma faimalaga atu i se laufanua faapitoa, ae e ala i le aveina i fale o le poto saʻo e uiga ia Ieova le Atua ma ana fuafuaga e ala i le suʻesuʻeina o le Tusi Paia. E aunoa ma se totogi pe avea foʻi o se avega tauave, o le a fiafia Molimau a Ieova e faailoa atu ia te oe le auala e aogā ai le suʻesuʻeina o le Tusi Paia ia te oe ma lou aiga. O le a fiafia i latou na lomia lenei mekasini e saunia nisi faamatalaga faaopoopo.

[Pusa i le itulau 7]

Le Afe Tausaga—Pe o ni Tausaga Moni pe o ni Tausaga Faafaatusa?

Talu ai o le tele lava o le tusi o Faaaliga i le Tusi Paia na tusia i se gagana faafaatusa, ua mapuna aʻe ai se fesili. E faapefea la le Pulega o le Afe Tausaga a Keriso lea o loo taʻua i le Faaaliga? Pe o se vaitaimi moni pe faafaatusa?

E iai māfuaaga uma e iloa ai o loo uiga atu i se vaitaimi moni e afe tausaga. Seʻi manatu: Ua faasino atu e le aposetolo o Paulo i le Pulega o le Afe Tausaga a Keriso, lea o le a faamasinoina ai le fanau a tagata, o se aso. (Galuega 17:31; Faaaliga 20:4) Na tusi le aposetolo o Peteru faapea o le aso e tasi (24 itula) ia Ieova, e tusa lena ma le afe tausaga. (2 Peteru 3:8) O le manatu lena o le a faamaonia ai o lenei “aso” faamasino e afe moni lava lona umi i tausaga. E faaopoopo atu i ai, i le Faaaliga 20:3, 5-7, tatou te faitau ai i taimi eseese e tolu, i le faaupuga o “ia tausaga e afe,” ae lē o “tausaga e afe.” E atagia mai i lenei mea se vaitaimi e patino lona umi.