E Taliina e le Tusi Paia Fesili Tāua o o Tatou Aso

PO O aogā ea le Tusi Paia i aso nei? Ina ia tali atu ioe, e mautinoa lava e ao i lenei tusi ua āutausagā ona avatu i lana aufaitau ni taʻiala i mataupu ia o loo naunau i ai ma e aogā i le taimi nei. Pe o saunia e le Tusi Paia ni fautuaga aogā i mataupu ia o loo sili ona tāua i le lalolagi i aso nei?

Seʻi tatou uaʻi atu i mataupu e lua o loo iai nei. I lo tatou faia faapea, o le a tatou iloiloina ai le mea o fai mai ai le Tusi Paia e faatatau i nei mataupu.

Aiseā ua Faataga ai e le Atua Puapuaga?

I le vaai atu i le tulaga o le lalolagi i aso nei, o le tasi o fesili o loo sili ona fesiligia i le tele o taimi o le: Aiseā ua faataga ai e le Atua tagata lē sala e mafatia? E matuā talafeagai lava lenei fesili, ona o loo faatoʻateleina pea tagata o loo aafia i solitulafono sauā, faiga faapiopio, fasiotia o se ituaiga o tagata, o mafatiaga o le tagata lava ia, ma isi mea faapena.

O se faaaʻoaʻoga, ia Iuni 1998 na soʻa ai e se nofoaafi laʻu pasese se alalaupapa i Siamani i mātū, ma maliliu ai le silia i le selau o le pasese. E oo lava i le ʻau fuimū ma tagata tomai i galuega faafomaʻi o ē sa fesoasoani atu i le ʻau manunuʻa ma ē na maliliu sa faafāufau i le vaaiga sa iai i tagata oti ma ē na manunuʻa. O se epikopo o le Lotu Evagelia sa iai na fesili faapea: “Le Atua e, Aiseā na tatau ai ona tupu lenei mea?” E oo i le epikopo lava ia na lē mautali.

Ua faaalia e mea tutupu e faapea pe a mafatia tagata lē sala i mea leaga e aunoa ma se faamalamalamaga e uiga i le māfuaaga, o nisi taimi e oo ai ina latou feita. E mafai e le Tusi Paia ona fesoasoani mai iinei, auā o loo faamatala mai ai le māfuaaga ua aafia ai tagata lē sala i le amioleaga ma mafatiaga.

Ina ua foafoaina e Ieova le Atua le lalolagi ma mea uma o iai, sa leʻi finagalo o ia e aafia tagata i  le amioleaga ma puapuaga. E mafai faapefea ona tatou mautinoa i lenei mea? Auā ina ua faaiʻuina lona foafoaina o mea, “ua silasila atu le Atua i mea uma ua na faia, faauta foi, ua matuā lelei lava.” (Kenese 1:31) Fesili ifo ia te oe lava ia, ‘Pe ana fai sa ou iloaina ai se mea leaga, pe ou te faalauiloaina atu ea lenei mea ua “matuā lelei lava”?’ E mautinoa lava e leai! I le auala lava e tasi, ina ua faalauiloa mai e le Atua faapea o mea uma ua “matuā lelei lava,” sa aunoa ma se tulaga o le amioleaga sa iai i le lalolagi. O lea la o anafea ma na faapefea ona amata mai le amioleaga?

E leʻi leva lava talu ona uma le foafoaina o o tatou uluaʻi mātua, o Atamu ma Eva, na faalatalata atu ai se foafoaga agaga malosi tele i le fafine ma luʻia le moni atoa ma le aiā tatau a Ieova i lana pule silisili ese. (Kenese 3:1-5) O lenei foafoaga, o Satani le Tiapolo, na mulimuli ane finau mai e faapea e lē mafai e tagata ona tumau i le faamaoni i le Atua i lalo o mafatiaga. (Iopu 2:1-5) Na faapefea ona gaoioi Ieova i lenei tulaga? Sa ia tuu seʻi iai se taimi ina ia manino mai ai e lē mafai e tagata ona faatonuina ma le manuia o latou ala e aunoa ma ia. (Ieremia 10:23) Pe a gaoioi foafoaga e feteenaʻi ma tulafono ma mataupu silisili a le Atua, o le iʻuga o le agasala, lea e faapogaia ai tulaga e faamanuʻalia ai. (Failauga 8:9; 1 Ioane 3:4) Peitaʻi, e ui ua iai nei tulaga leaga, ae sa silafia e Ieova o le a iai nisi o tagata o le a tumau i le faamaoni ia te ia.

Talu mai lava lena fouvalega mataʻutia i Etena, ua silia nei ma le pe tusa o le 6,000 tausaga ua mavae atu. Po ua umi ea lena taimi? Sa mafai lava e Ieova ona faaumatia Satani ma ē e lagolago ia te ia i senituri ua mavae. Peitaʻi pe sa leʻi sili ai ea ona lelei le faatali seʻi matuā tafiesea masalosaloga uma lava e uiga i le tonu o le pule silisili ese a Ieova atoa ma le faamaoni o tagata ia te ia? Pe e lē moni ea i faiga faafaamasinoga i aso nei ina ia faamaonia po o ai e saʻo a o ai e sesē i se faamasinoga e ono alu ai le tele o tausaga?

I le manatu atu i le tāua o luʻi o loo fesagaʻia e Ieova ma tagata—le pule silisili ese aoao atoa ma le faamaoni o tagata—maʻeu le atamai na iai o le Atua i le tuu lea seʻi mavae atu se taimi! O lea ua manino nei i la tatou vaai le mea e tupu pe a lē amanaʻia e tagata tulafono a le Atua ae pulea e i latou a latou lava meafai. O le iʻuga ua faateteleina le amioleaga. Ma o le māfuaaga lena ua toʻatele ai tagata lē sala o loo mafatia i aso nei.

Ae ui i lea, o le mea tatou te fiafia ai, ua faaalia e le Afioga a le Atua o le a lē tumau e faavavau le amioleaga. O le mea moni, ua toe o se āga ona faamuta loa lea e Ieova mea leaga atoa ma i latou o faapogaia. Fai mai le Faataoto 2:22: “A e vavaeeseina o e amio leaga ai le laueleele, e liaiina ai foi o e amio pepelo.” I le isi itu, o i latou e faamaoni i le Atua e mafai ona tepa taulaʻi atu i le lumanaʻi i le taimi, lea ua lē o toe mamao nei, o le a “leai foi se toe oti, po o se faanoanoa, po o se aue, e leai foi se toe puapuaga.”—Faaaliga 21:4.

O lea la, ua faamatala manino mai e le Tusi Paia le māfuaaga ua puapuagatia ai tagata lē sala. Ua faamautinoa mai foʻi ia i tatou ua toe nei o se āga ona faamutaina lea o faiga leaga atoa ma mafatiaga. Peitaʻi, a o tatou feagai ai ma faigatā o le olaga e pei ona iai nei, tatou te manaʻomia le tali i se isi fesili tāua.

O le ā le Fuafuaga o le Olaga?

E lē taumatea e leai lava se isi taimi i le tala faasolopito o le tagata na i lo le taimi nei, ua taumafai ai tagata e sailia po o le ā tonu lava le uiga o le olaga. E toʻatele ua fesili ifo ia i latou lava, ‘Aiseā ou te ola ai? E mafai faapefea ona ou maua le uiga o loʻu olaga? E eseese mea tutupu ua faapogaia ai ona latou fesiligia nei fesili.

E ono faaleagaina le olaga o se tasi i se mea leaga e oo ia te ia lava. Mo se faaaʻoaʻoga, i le amataga o le 1998 na ave faamalosia ai ma fasiotia se teineitiiti e 12 tausaga le matua sa nofo i Bavaria, i Siamani. E tasi le tausaga mulimuli ane ai, na taʻutino mai e lona tinā e faapea sa ia faaaluina aso taʻitasi i le sailia o se fuafuaga i le olaga— ae e leʻi taulau. Ua faagaeetia nisi tagata talavou e tomānatu e faatatau i le uiga o le olaga. Ua latou saili atu mo se saogalemu, faamalieina totino, ma le iai o se lagona e faapea o loo taliaina oe e isi, peitaʻi ua oo i le faanoanoa ona o le faateleina o le taufaaʻoleʻole ma faiga faapiopio. O nisi tagata ua faaautū o latou olaga i a latou galuega, peitaʻi ua iʻu ina latou iloa  mulimuli ane e faapea o le maua o le pule, o le taualoa, atoa ma mea ua maua e lē o taulau ona faamalieina ai lagona mai le loto o le sailia lea o le māfuaaga o lo latou iai iinei.

Po o le ā lava ua faapogaia ai se tagata e fia iloa le fuafuaga o le olaga, e manaʻomia lava se tali moni ma faamalie loto i le fesili lenei. I iinei foʻi, ua mafai ona aogā tele ai le Tusi Paia. O loo faailoa mai ai Ieova o se Atua o fuafuaga, o lē e iai māfuaaga tatau i so o se mea na te faia. Matou te fesili atu faapea, Pe o le a e fausia ea se fale e aunoa ma se māfuaaga? Ailoga, talu ai o le fausiaina o se fale e manaʻomia ai le iai o se teuga tupe tele ma e ono alu ai ni masina po o ni tausaga. E te fausia se fale ina ia e nofo ai po o se isi foʻi. E mafai foʻi ona faatatau le manatu talafeagai lena ia Ieova. E leʻi tautigā o ia i le foafoaina o le lalolagi ma meaola uma o loo iai e aunoa ma se māfuaaga, se fuafuaga. (Faatusatusa i le Eperu 3:4.) O le ā lana fuafuaga mo le lalolagi?

Ua faailoa mai e le valoaga a Isaia ia Ieova faapea o ia “o le na faia le lagi; o ia lava o le Atua; o le tufuga o le na faia le lalolagi.” E mautinoa lava, “o ia na faatumauina; na ia le faia fua, na ia faia ina ia āina.” (Isaia 45:18) Ioe, talu mai lava le foafoaina o le lalolagi, o le fuafuaga lava a Ieova ia ʻaināina. Ua faapea mai le Salamo 115:16: “O le lagi, o le lagi lava, e ia Ieova lea; a ua tuuina mai e ia le lalolagi mo le fanau a tagata.” Ua faapea ona faaalia mai ai e le Tusi Paia na foafoaina e Ieova le lalolagi ina ia ʻainā e tagata usiusitaʻi, o ē o le a latou tausia faalelei.—Kenese 1:27, 28.

Pe na avea ea le fouvalega a Atamu ma Eva ma pogai e toe suia ai le fuafuaga a Ieova? E leai. E mafai faapefea ona tatou mautinoa i lena mea? Ia, manatu mai i le mea lenei: Na tusia le Tusi Paia ina ua faitau afe tausaga talu ona mavae atu le fouvalega i Etena. Afai na tuulafoaʻia e le Atua lana fuafuaga mai le amataga, aiseā la ua lē taʻua ai lena mea i le Tusi Paia? O le faaiʻuga talafeagai ona o loo tumau pea e leʻi suia lana fuafuaga mo le lalolagi atoa ma tagata.

E lē gata i lena, e lē mafai ona lē taulau fuafuaga a Ieova. Na aumai e le Atua e ala mai ia Isaia le faamautinoaga lenei: “E pei ona totō ifo o le ua ma le kiona mai le lagi, a e le toe foi atu i ai, a e peitai e faasūsūina ai le laueleele, ma fua mai ai, ma totogo  mai ai, e tupu mai ai saito i lē lulu saito ma mea e ʻai i le ua ʻai; e faapea foi laʻu upu e alu atu ai loʻu gutu, e le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.”—Isaia 55:10, 11.

Le Mea o Loo Faatalitalia e le Atua Mai ia i Tatou

E manino mai la, e mafai ona ia i tatou le mautinoa i le faataunuuina o le fuafuaga a le Atua o le ʻaināina lea e faavavau o le lalolagi e tagata usiusitaʻi. Afai e manaʻomia ona tatou iai faatasi ma i latou o le a faamanuiaina e ola ai pea i le lalolagi, e ao la ona tatou fai le mea na fai mai ai le Tupu poto o Solomona: “Ia e mataʻu i le Atua, ma e anaana i ana poloaiga; auā o mea ia e tatau i tagata uma.”—Failauga 12:13; Ioane 17:3.

O le ola e talafeagai ma le fuafuaga a Ieova mo tagata, o lona uiga ia iloa le Atua moni ma ia gauaʻi atu i mea o loo ia faafinagaloina e pei ona faatulaga mai i le Tusi Paia. Afai tatou te faia lenei mea i le taimi nei, e mafai ona tatou maua ai le faamoemoe i le ola e faavavau i le lalolagi parataiso, lea o le a lē gata mai lo tatou aʻoaʻoina ai o mea fou e uiga i le Atua ma lana foafoaga matagofie. (Luka 23:43) Maʻeu se lumanaʻi mataʻina!

O le toʻatele o ē o saili mo se fuafuaga i le olaga ua liliu atu i le Tusi Paia ma ua latou maua ai le fiafia tele i le taimi nei. Mo se faaaʻoaʻoga, o se taulealea talavou e suafa ia Afeleti na te leʻi mauaina le uiga o le olaga. O le aafia ai o lotu i taua sa ia matuā ʻinoʻino lava i ai, ma sa ia lē fiafia foʻi i amioga faapiopio ma faiga faapolotiki lē saʻosaʻo. Na asiasi atu Afeleti i tagata Initia i Amerika i Mātū ona o le faamoemoe ia maua ai se malamalamaga i le fuafuaga o le olaga, peitaʻi na toe foʻi ma le faanoanoa i Europa. I lona lē mautonu, na ia liliu atu ai i fuālaau faasāina atoa ma musika lē pulea. Peitaʻi, o se iloiloga faifai pea ma le faaeteete mulimuli ane ai o le Tusi Paia sa fesoasoani ia Afeleti ia iloa le fuafuaga o le olaga ma maua ai le loto malie.

O se Malamalama Maufaatuatuaina i o Tatou Ala

O le ā la, sa tatou faaiʻuga e ao ona iai e faatatau i le Tusi Paia? Po o aogā ea i aso nei? O le mea tonu lava lena, auā o loo maua ai taʻiala i mataupu o loo iai i le taimi nei. Ua faamatala mai e le Tusi Paia e faapea e lē o le Atua na māfua ai le amioleaga ma ua fesoasoani ia i tatou e maua se fuafuaga faamalieina i le olaga. E lē gata i lena, e anoanoaʻi mea o fai mai ai le Tusi Paia e uiga i isi mataupu ia o loo matuā manatu mamafa i ai i aso nei. O mataupu nei e pei o faaipoipoga, le tausia aʻe o fanau, le vafealoaʻi o tagata, ma le faamoemoe o ē ua maliliu o loo talanoaina uma i le Afioga a le Atua.

Afai e te leʻi faia muamua lava, faamolemole ia iloilo ma le totoʻa mea o loo i le Tusi Paia. E oo loa ina e iloaina le aogā moni o ona taʻiala mo le olaga, e ono oo ia oe lagona sa i le faisalamo o lē sa vaai atu ia Ieova mo le taʻitaʻiga ma na pese e faapea: “O lau afioga o le sulu lea i oʻu vae, ma le malamalama i loʻu ala.”—Salamo 119:105.

[Ata i le itulau 6]

Pe e te silafia le māfuaaga ua faataga ai e le Atua tagata lē sala e mafatia?

[Ata i le itulau 7]

E mafai ona e ʻoliʻoli i se olaga e iai sona fuafuaga