“O Ieova na te Foai Mai le Poto”

O Ā SINI autū o e tuliloaina o loo alu uma ai lou taimi ma lou malosi? Po o avea le faia o se igoa lelei mo oe lava ma mataupu o e manatu mamafa i ai? Po o e tuutōina atu i le faaputuina o ʻoa? Ae faapefea le sailia o se galuega faapitoa po o le atiina aʻe o se poto masani i se tasi po o le sili atu foʻi o ni matātā eseese i mataupu o aʻoaʻoina? Po o tāua ia te oe le atiina aʻe o se faiā lelei ma isi? Po o avea ma ou popolega autū le tausia o se soifua mālōlōina lelei?

E foliga mai o mea uma o loo taʻua i luga e ono iai ni aogā. Ae o le ā le mea e sili ona tāua? Ua tali mai le Tusi Paia: “O le poto o le mea sili lea, ia maua le poto.” (Faataoto 4:7) Ae mafai faapefea ona tatou mauaina le poto, ae o ā ona aogā? Ua saunia ni tali e le mataupu lona lua o le Faataoto, le tusi o le Tusi Paia.

‘Uaʻi Atu i le Poto’

I ni upu alofa a se tamā, ua faapea mai ai le tupu atamai o Solomona o Isaraelu anamuā: “Lou atalii e, afai e te talia aʻu upu, ma e teu i lou loto aʻu poloaiga, e uai atu ai ou taliga i le poto, e faasaga atu ai lou loto i le faautauta; afai lava e te valaau atu i le atamai, ma e leo tele atu i le faautauta; afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e lagona ai lea o le mataʻu ia Ieova, ma e maua ai le poto i le Atua.”—Faataoto 2:1-5.

Pe e te iloa o fea e paʻū tonu i ai le avega tauave mo le mauaina o le poto? I nei fuaiupu, ua aliali mai ai faatolu le faaupuga “afai e te.” E manino mai la, o le sailia o le poto ma isi ona uiga e fesootaʻi atu i ai—le faautauta ma le malamalama, e paʻū lava ia i tatou taʻitoʻatasi. Peitaʻi, e muamua ona tatou manaʻomia ona “talia” ma “teu” i mafaufau upu o le poto o loo faamauina i le Tusi Paia. Ma tatou te manaʻomia ai i lenei mea le suʻesuʻeina o le Tusi Paia.

O le poto o le tomai lea e faaaogā ai ma le talafeagai le iloa lea na foaʻi mai e le Atua. Ma e maʻeu le ofoofogia o le auala ua faaalia mai ai lenei poto e le Tusi Paia! Ioe, ua iai upu o le poto, e pei ona faamauina i tusi o Faataoto ma Failauga, ma e manaʻomia ai ona tatou uaʻi atu i na upu. Ua tatou maua ai foʻi i itulau o le Tusi Paia le tele o faaaʻoaʻoga ua faaalia mai ai aogā o le faatatauina o mataupu silisili tauatua ma lamatiaga e oo i ai i le lē amanaʻiaina. (Roma 15:4; 1 Korinito 10:11) Mo se faataʻitaʻiga, iloilo le tala ia Kiasi matapeʻapeʻa, le auauna a le perofeta o Elisaia. (2 Tupu 5:20-27) Pe tatou te lē aʻoaʻoina mai ai ea le poto o le ʻalofia o le matapeʻapeʻa? Ae faapefea le iʻuga mataʻutia o le asiasi atu o le afafine o Iakopo o Tina, i “fafine o le nuu” o Kanana lea na foliga atu ia te ia e lē leaga. (Kenese 34:1-31) Pe tatou te lē iloagofie atu ea le valea o le faauō i aumea leaga?—Faataoto 13:20; 1 Korinito 15:33.

O le uaʻi atu i le poto e aofia ai le mauaina o le faautauta ma le malamalama. E tusa ai ma le Webster’s Revised  Unabridged Dictionary, o le faautauta o le “malosi po o le tomai faalemafaufau lea na te faaeseesea le tasi mea mai le isi.” O le faautauta faale-Atua o le tomai lea e faaeseeseina ai le saʻo mai le sesē ona filifilia ai lea o le ala saʻo. Seʻi vaganā ai ua ‘uaʻi atu o tatou loto’ i le faautauta po o le iai o se naunautaʻiga ina ia mauaina, e mafai la faapefea ona tatou tumau i “le ala e tau atu i le ola.”? (Mataio 7:14; faatusatusa i le Teuteronome 30:19, 20.) O le suʻesuʻe ma faatatauina le Afioga a le Atua e maua ai le faautauta.

E mafai faapefea ona tatou “valaau atu i le atamai”—o le tomai lea e iloa ai le auala e fesootaʻi ai vaega taʻitasi, faapena foʻi i le mataupu atoa? E moni o le matua i tausaga ma le poto masani, o itu na e mafai ona fesoasoani ia i tatou e atiina aʻe ai le malamalama e sili atu—peitaʻi e lē o le tulaga lena e iai i taimi uma. (Iopu 12:12; 32:6-12) Ua faapea mai le faisalamo: “O loʻu lotomatala ua sili i e toeaina, auā ua ou anaana i au feau [feau a Ieova].” Na pese foʻi o ia: “O le faaalia mai o au afioga e faamalamalamaina ai; e faalotomatalaina ai e ua faigofie.” (Salamo 119:100, 130) O Ieova o “Lē ua mai anamua ona aso,” ma o lona malamalama e sili atu lona maualuga na i lo le malamalama o tagata uma. (Tanielu 7:13) E mafai e le Atua ona foaʻi atu le malamalama i sē ua leai se poto masani ina ia mafai ai ona sili atu lona malamalama i lo i latou e matutua atu ia te ia. O lea la, e tatau ai ona tatou filigā i le suʻesuʻeina ma faatatauina le Afioga a le Atua, le Tusi Paia.

O le faaupuga o loo taʻua soo “afai e te,” i faaupuga amata lava o le mataupu lona lua o le Faataoto, ua sosoo mai ai ma isi fuaitau e pei o le “talia,” “teu,” “valaau atu,” “sailiili,” “suʻesuʻe.” Aiseā ua tele ina faaaogā ai e le tusitala nei faaupuga? Ua faamatalaina mai e se isi tusi e faapea: “Ua faamamafaina [iinei] e le tagata poto le manaʻoga ina ia filigā i le sailiga o le poto.” Ioe, e tatau ona tatou sailia ma le filigā le poto ma ona uiga e fesootaʻi atu i ai—le faautauta ma le malamalama.

Pe o le a E Faia ea se Taumafaiga?

O le vaega autū i le sailia o le poto o le filigā lea i le suʻesuʻeina o le Tusi Paia. Ae o lenei suʻesuʻega, e tatau ona sili atu na i lo le tau ina faitau ina ia maua mai ai ni faamatalaga. O le mafaufau loloto ma le uigā i mea ua tatou faitauina o se vala autū lea o le suʻesuʻeina o le Tusi Paia. O le mauaina o le poto ma le faautauta e aofia ai le fefulisaʻi i le mafaufau pe faapefea ona tatou faaaogā mea ua tatou aʻoaʻoina i le foʻiaina o faafitauli ma faia ai faaiʻuga. O le mauaina o le malamalama e manaʻomia ai le manatunatu pe faapefea i mataupu fou ona fesootaʻi ma mea ua uma ona tatou iloaina. Po o ai o le a faafitia le manatu faapea e manaʻomia se taimi ma taumafaiga malolosi mo le faia o se suʻesuʻega faale-Tusi Paia e mafaufauina lelei faapena. O le taimi ma le malosi lea ua faaaogāina, e tai tutusa lava ma le taimi ma le malosi lea e faaaluina pe a ‘sailiili i le ario ma le oloa lilo.’ Pe o le a e faia ea ni taumafaiga manaʻomia? Pe o le a e ‘faaaogā tatau le taimi avanoa’ e faia ai faapea?—Efeso 5:15, 16.

Ia mafaufau i ʻoa sili o loo faatalia mai i tatou pe afai tatou te suʻesuʻe loloto i le Tusi Paia ma le loto faamaoni. Ioe, o le a tatou “maua ai le poto i le Atua”—le poto e aumaia ai le ola e uiga i Lē na Foafoaina i tatou e aogā ma mausalī! (Ioane 17:3) O “le mataʻu ia Ieova,” o se ʻoa foʻi e tatau ona mauaina. Maʻeu le tāua o lenei mataʻu ma le migao ia te ia! O le mataʻu lelei ina ia lē faia se mea e faatigā ai ia te ia e tatau ona pulea ai vala uma o lo tatou olaga, e faaopoopo atu ai se uiga tāua faaleagaga i mea uma tatou te faia.—Failauga 12:13.

O se faanaunauga aasa ina ia saili ma ʻeli mo ʻoa faaleagaga e tatau ona mumū i totonu ia te i tatou. Ina ia faafaigofie a tatou sailiiliga, ua saunia ai e Ieova mo i tatou meafaigaluega aupito sili ona lelei—o mekasini o le upu moni ua talafeagai ma le taimi tonu Le Olomatamata ma le Ala Mai!, faapena ai ma isi lomiga e faavae mai le Tusi Paia. (Mataio 24:45-47) Mo le aʻoaʻoina o i tatou  i lana Afioga ma ona ala, ua saunia ai foʻi e Ieova sauniga faa-Kerisiano. E manaʻomia ona tatou auai e lē aunoa, faalogologo lelei i mea o loo talanoaina ai, faia ni taumafaiga filigā ina ia uaʻi atu ma teumau manatu autū, ma mafaufau loloto e faatatau i la tatou faiā ma Ieova.—Eperu 10:24,25.

O le a E Taulau

E masani lava ona lē taulau manuia ni ʻeligā o maatāua, auro po o ni ario o loo tanumia. E lē tutusa la lenei mea ma le tulaga o le sailiga mo ʻoa faaleagaga. Aiseā e lē tutusa ai? Ua faamautinoa mai ia te i tatou e Solomona: “Aua o Ieova na te foai mai le poto; mai lona fofoga le poto ma le faautauta.”—Faataoto 2:6.

Sa lauiloa le tupu o Solomona i lona poto. (1 Tupu 4:30-32) Ua faaalia mai e le Tusi Paia e faapea sa ia te ia le atamai i mataupu eseese, e aofia ai laau, o manuvaefa, uiga faaletagata, ma le Afioga a le Atua. O le faautauta na ia faaalia o se tupu talavou i le foʻiaina o le finauga i le va o ni fafine se toʻalua, na taʻitasi ma finau ane o ia o le tinā o le pepe lava e tasi, na fesoasoani e tuuina atu ai o ia i se tulaga lauiloa faava-o-malo. (1 Tupu 3:16-28) O le ā le puna o le maoaʻe o lona poto? Na tatalo atu Solomona ia Ieova mo le “poto ma le atamai,” ma le tomai “ia masino ai i le lelei ma le leaga.” Na foaʻiina atu e Ieova nei tomai ia te ia.—2 Nofoaiga a Tupu 1:10-12; 1 Tupu 3:9.

E tatau foʻi ia te i tatou ona tatalo atu mo le fesoasoani a Ieova a o tatou suʻesuʻeina ma le filigā lana Afioga. Na tatalo le faisalamo: “Ieova e, ia e faasino mai ia te au lou ala, ou te savali i le mea moni mai ia te oe; ia e faia ina ia tasi loʻu loto e mataʻu i lou suafa.” (Salamo 86:11) Na faamaonia e Ieova lena tatalo, aua o lea na ia faamauina i le Tusi Paia. E mafai ona tatou mautinoa e faapea o a tatou tatalo faamaoni ma le faifai pea mo lana fesoasoani ina ia mauaina ʻoa faaleagaga o i le Tusi Paia o le a lē aunoa ona taliina mai.—Luka 18:1-8.

Na faasino atu e Solomona e faapea: “Na te teua le poto mo e amio saʻo; o le talita o ia i e ua tonu lo latou savali, ina ia leoleo i ala o lē amiotonu; e tausi foi e ia le ala o ona tagata amio Atua; ona e lagona ai lea o le amiotonu, ma le faamasinoga ma le amio saʻo; o ala lelei uma lava.” (Faataoto 2:7-9) Maʻeu lenei faamautinoaga! E lē gata e tuuina atu e Ieova le atamai moni ia i latou o ē saili ma le faamaoni i ai ae ua faamaonia ai foʻi le avea o se talita e malupuipuia mai ai ē amio saʻo ona e latou te faaalia le poto moni ma gauaʻi atu ma le faamaoni i ana tapulaa amiotonu. Talosia o tatou aofia ai ia i latou ia o loo fesoasoani Ieova e faamalamalamaina i ai “ala lelei uma lava.”

Pe a ‘Mālie le Atamai’

O le suʻesuʻeina totino o le Tusi Paia—o se manaʻoga talafeagai mo le sailia o le poto—ae e lē o se gaoioiga e fiafia i ai le toʻatele o tagata. Mo se faaaʻoaʻoga, ua faapea mai Lolenese e 58 tausaga lona matua: “Ou te galue i taimi uma i galuega e faaaogā tele ai le malosi faaletino ae lē o le mafaufau. E faigatā ia te aʻu le faia o se suʻesuʻega.” O Mikaele o lē e 24 ona tausaga le matua, o sē sa lē fiafia e suʻesuʻe i le aʻoga ua faapea mai: “Sa ou faamalosia aʻu lava e nofo i lalo ma suʻesuʻe.” Peitaʻi, o se faanaunauga ina ia suʻesuʻe e mafai ona atiina aʻe.

Seʻi mafaufau i le mea na faia e Mikaele. Ua  ia taʻua: “Sa ou aʻoaʻiina aʻu lava ina ia suʻesuʻe mo se ʻafa itula i aso taʻitasi. E leʻi pine ae ou vaaia le aafiaga i laʻu amio, o aʻu tali i sauniga faa-Kerisiano, ma le auala ou te talanoa ai i isi. I le taimi nei ua ou tulimataʻia taimi o aʻu suʻesuʻega, ma ou te lē fiafia i se mea ae faalavelave mai.” Ioe, o suʻesuʻega totino e mafai ona avea ma vaisū pe a tatou vaaia se agaʻigaʻi i luma ua tatou faia. Sa taumafai malosi foʻi Lolenese lava ia e faatino le suʻesuʻeina o le Tusi Paia ma mulimuli ane ai auauna o se toeaina i se faapotopotoga a Molimau a Ieova.

Ina ia avea suʻesuʻega totino ma mea e olioli ai e manaʻomia ai taumafaiga faifai pea. E ui lea, e sili atu faamanuiaga e maua ai. Ua faapea mai Solomona: “A oo le poto i lou loto, ma ua mālie ia te oe le atamai; e faafeao le mafaufau ia te oe; e leoleo ia te oe le faautauta.”—Faataoto 2:10, 11.

“Ina ia Laveai ia te Oe ai le Ala Leaga”

I ā auala o le a avea ai le poto, atamai, tomai e mafaufau ai, ma le faautauta ma puipuiga? Ua faapea mai Solomona: “[E latou te] laveai ia te oe ai le ala leaga; ai le tagata ua tautala i mea faapiopio; o e tuua ala tonu, a e e ui atu i ala pogisa; o e fiafia e fai le mea leaga; ua latou olioli i le faapiopio e leaga; o e faapiopio i o latou ala, ma vaogatata i a latou amio.”—Faataoto 2:12-15.

Ioe, o i latou e teuina le poto moni e ʻalofia le auaumea ma se tasi e “tautala i mea faapiopio;” o lona uiga, o mea e tuufaafeagai ma mea moni ma le saʻo. E saunia e le tomai faalemafaufau ma le faautauta le puipuiga mai ia i latou o ē tetee i le upu moni ona e savavali i ala pogisa, ma mai ia i latou o ē faapiopio ma saili o latou fiafiaga i gaoioiga leaga.—Faataoto 3:32.

Maʻeu se loto faafetai e mafai ona ia i tatou ona o lena poto moni ma ona uiga e fesootaʻi atu i ai e mafai ona puipuia i tatou mai ala leaga o tamāloloa ma fafine amio lē mamā! Ua faaopoopo mai foʻi Solomona e tusa ai ma nei uiga e faapea “e laveai ia te oe ai le fafine ese, o le fafine ese na te faaoleole i ana upu; o le na te tuua le na tausi ia te ia a o teine muli; ua galo foi ia te ia le feagaiga a lona Atua. Auā e taunuu atu lona fale i le oti, ma ona ala i agaga o e ua oti; o i latou uma o e o atu ia te ia, e le foi mai i latou; latou te le maua ala o le ola.”—Faataoto 2:16-19.

“O le fafine ese,” le fafine talitane, ua faamatalaina o sē ua na tuua “le na tausi ia te ia a o teine muli”—atonu o lana tane a o avea ma fafine talavou. * (Faatusatusa i le Malaki 2:14.) Ua galo ia te ia e lē faatagaina le mulilua i le feagaiga o le Tulafono. (Esoto 20:14) O ona ala ua taʻitaʻiina atu ai i le oti. E ono lē taitai ona “maua ala o le ola,” e i latou o ē aumea ma ia talu ai e lē umi lava ae latou oo i se tulaga o le lē toe foʻi mai, e taʻua o le oti. E iloa atu e le tagata e faautauta ma iai le tomai faalemafaufau mailei o amioga lē mamā ma ʻalofia ma le poto le maileia ai.

‘O Ē Amio Saʻo o le a Nonofo i le Lalolagi’

I le aoteleina o le fuafuaga autū o lana fautuaga e faatatau i le poto, ua faapea mai ai Solomona: “Ina ia e savali i le ala o e lelei, ma e tausiusi i ala o e amiotonu.” (Faataoto 2:20) Maʻeu se fuafuaga matagofie ua faataunuuina e le poto! Ua fesoasoani ia te i tatou ina ia ola i se olaga fiafia ma le faamalieina e ōgatusa ma le faamaoniga a le Atua.

Seʻi mafaufau foʻi i faamanuiaga sili lea ua teuina mo i latou o ē ‘savavali i le ala o tagata lelei.’ Ua faaauau mai Solomona e faapea: “O e amio saʻo, latou te mau i le nuu; ma e ua sao a latou amio, e faatotoeina ai i latou; a e vavaeeseina o e amio leaga ai le laueleele, e liaiina ai foi o e amio pepelo.” (Faataoto 2:21, 22) Talosia o e aofia ai ia i latou ua sao a latou amio ia o le a mau e faavavau i le lalolagi fou amiotonu a le Atua.—2 Peteru 3:13.

[Faaopoopoga i lalo]

[Ata i le itulau 26]

Na tatalo Solomona mo le poto. O lea e tatau ai foʻi ona tatou faia