Pe Mafai Ona Fesoasoani le Tusi Paia ia i Tatou i Aso Nei?

“I LE Tusi Paia atoa lava ia, pe tusa na o le 1 le pasene e talafeagai ona faitauina, ae o le isi vaega uma e lē fetaui ma ua uma lona aogā.” O le faamatalaga lena a se tasi taulealea talavou. E toʻatele e ioe faatasi ma ia. E ui lava o loo faaauau ona avea le Tusi Paia ma tusi aupito sili ona alumia lona faatauina atu i le lalolagi atoa, ae faitau miliona e manatu māmā i ai ma e lē masani foʻi i ona aʻoaʻoga.

I lona lomiga i le Kirisimasi o le 1996, na faapea mai ai le nusipepa Siamani o le Süddeutsche Zeitung e faatatau i le Tusi Paia “ua matuā faaitiitia lava ē e faitau i ai. I lenei vaitaimi o suʻesuʻega faasaienisi eseese atoa ai ma le faateleina o faiga masani a le lalolagi, ua foliga mai faamatalaga faale-Tusi Paia o se mea e lē masani ai le toʻatele ma e faigatā ona malamalama i ai.” E faamaonia lenei lipoti i ni suʻesuʻega sa faia. Ua faaalia i nisi suʻesuʻega sa faia e faapea o se aofaʻiga tele o tamaiti latou te lē iloa po o ai moni lava Iesu. I se tasi suʻesuʻega, e itiiti ifo i le ʻafa o tagata sa faatalanoaina sa mafai ona faamatalaina tala o le Tusi Paia i le atalii faamaumauʻoa ma le Samaria agalelei lea na avea ma tuaoi.

Sa taʻua i le lomiga a le Lotu Evagelia a Suisilani o le Reformiertes Forum e faapea o le manaʻoga mo le Tusi Paia i Suisilani ua lē tutusa ma le mea sa iai. E oo lava ia i latou o loo iai a latou kopi o le Tusi Paia, e tele lava ina pefupefua i luga o le fata. O le tulaga lava foʻi lena i Peretania. E tusa ai o se tasi suʻesuʻega, e ui lava o le toʻatele o tagata o loo iai se Tusi Paia, o le toʻatele lava e seāseā ona faitau i ai.

I le isi itu, e faitau miliona o loo i le lalolagi aoao e ese lo latou lagona e faatatau i le Tusi Paia. Latou te vaai i ai o le Afioga a le Atua ma e manatu i ai e tāua ma aogā. O lea, latou te faitauina ai e lē aunoa. Na tusi mai se tasi tamaʻitaʻi talavou e faapea: “Ou te taumafai e faitau se mataupu se tasi pe lua o le Tusi Paia i aso taʻitasi. Ou te matuā fiafia lava i ai.” O nei tagata taʻitoʻatasi ua latou mātauina ma le faaeteete mea o loo aʻoaʻoina e le Tusi Paia, ma ua latou taumafai e faatatauina ana fautuaga i o latou olaga. Latou te talitonu e mafai e le Tusi Paia ona fesoasoani ia i latou i lenei lalolagi ua tumu i faafitauli i aso nei.

O le ā sou taofi? Po ua lē o toe aogā ea le Tusi Paia i ona po nei? Pe faamata e tāua ma aogā? Pe e mafai e le Tusi Paia ona fesoasoani ia i tatou i aso nei?