Po o E Faataunuu ea Mea Uma e Tatau Ona E Faia mo le Atua?

“E faamasinoina e le Atua galuega uma, atoa ma mea lilo uma lava, o mea lelei atoa ma mea leaga.”—FAILAUGA 12:14.

1. O ā sauniuniga ua faia e Ieova mo ona tagata?

E LAGOLAGOINA e Ieova i latou o ē manatuaina pea o ia o Lē na Faia i latou. Ua aumai e lana Afioga faagaeeina ia i latou le poto manaʻomia ina ia atoatoa ai lona fiafia mai ia i latou. O le agaga paia o le Atua e taʻitaʻia ai i latou i le faia o le finagalo tauatua ma le ‘fuaina mai o galuega lelei uma lava.’ (Kolose 1:9, 10) E lē gata i lea, ua sauniunia e Ieova meaʻai faaleagaga ma taʻitaʻiga faatiokarate e ala mai “le auauna faamaoni ma le mafaufau.” (Mataio 24:45-47) I le tele la o vala, ua maua ai e tagata o le Atua faamanuiaga faalelagi a o latou auauna ia Ieova ma tauave atu le galuega matuā tāua o le talaʻia o le tala lelei o le Malo.—Mareko 13:10.

2. E tusa ai ma le auaunaga ia Ieova, o ā fesili e ono oso aʻe?

² E fiafia Kerisiano moni e faaalu o latou taimi i le auaunaga paia ia Ieova. Peitaʻi, o nisi e ono loto vaivai ma manatu faapea e lē aogā a latou taumafaiga. Mo se faataʻitaʻiga, i nisi taimi, e ono tau mānatu ai ni Kerisiano tuuina atu pe faamata e iai moni se aogā o a latou taumafaiga faamaoni. A o tomānatu i le suʻesuʻega a le aiga ma isi gaoioiga, o fesili faapenei e ono oso aʻe i le mafaufau o le ulu o se aiga: ‘Po o faamalieina moni le finagalo o Ieova i mea o loo matou faia? Po o matou faataunuuina ea mea uma e tatau ona matou faia mo le Atua?’ O upu poto a le failauga e mafai ona fesoasoani i le taliina o na fesili.

 Po ua Faatauvaa Mea Uma?

3. E tusa ai ma le Failauga 12:8, o le ā se mea e matuā faatauvaa lava?

³ E ono manatu nisi faapea o upu a le tagata poto e lē o faalaeiʻauina ai se tasi—se talavou po o se tagata matua. “Ua faapea mai le Failauga, E matuā faatauvaa, e faatauvaa mea uma lava.” (Failauga 12:8) O le mea moni, o se mea matuā faatauvaa lava le faagaloina o Lē na Faia mea i le taimi o le talavou, le oo ina tagata matua ae lē auauna ia te ia, ma le avea o le olaga matua ua na o le pau lea o se mea e ausia i le olaga. Ua faatauvaa, pe lē aogā mea uma mo lena tagata, e tusa lava pe oti o ia o se tagata mauʻoa ma lauiloa i lenei lalolagi o loo nofo toʻilalo i le mana o lē o leaga, o Satani le Tiapolo.—1 Ioane 5:19.

4. Aiseā e mafai ai ona faapea atu, e lē o mea uma e faatauvaa?

⁴ E lē o mea uma e faatauvaa mo i latou o loo faaputuina ʻoa i le lagi i le avea ma auauna faamaoni a Ieova. (Mataio 6:19, 20) E tele mea latou te faia i le galuega tauia a le Alii, ma o na tautigā e mautinoa lava e lē o faatauvaa. (1 Korinito 15:58) Peitaʻi afai o tatou o ni Kerisiano tuuina atu, po o tatou pisi ea i le galuega ua tofia mai e le Atua mo i tatou i nei aso e gata ai? (2 Timoteo 3:1) Po ua tatou ola ea i se ituaiga o olaga e itiiti lava sona eseesega ma le olaga taatele o loo ola ai o tatou tuaoi? Atonu latou te auai atu i ni lotu eseese ma atonu latou te faamaoni atu i ai, e lē aunoa ona ō atu i fale o fai ai a latou tapuaʻiga ma taumafai e faatino mea o tāpā e la latou tapuaʻiga mai ia i latou. Ae o le mea mautinoa lava, e lē o latou o ē folafolaina le feʻau o le Malo. E lē o ia i latou le poto saʻo faapea o “ona po [nei] o le iuga” ma e lē o ia i latou se uiga faanatinati e faatatau i aso o loo tatou ola ai.—Tanielu 12:4.

5. Pe afai ua avea le sailia o mea masani o le olaga ma o tatou faanaunauga sili, o le ā e tatau ona tatou fai?

⁵ Na fetalai Iesu Keriso e faatatau i o tatou aso faigatā e faapea: “E pei o ona po o Noa, e faapea foi pe a sau le Atalii o le tagata. Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, na le iloa foi e i latou ina seia oo le lolo, ma aveesea i latou uma; e faapea foi pe a sau le Atalii o le tagata.” (Mataio 24:37-39) E lē sesē le ʻai ma inu pe a faia i se tulaga fuafua tatau, ma o le faaipoipoga foʻi o se faatulagaga na amataina mai e le Atua lava ia. (Kenese 2:20-24) Peitaʻi, pe afai ua tatou iloa ua avea le sailia o mea masani o le olaga ma o tatou faanaunauga sili, aiseā la e lē avea ai ma mataupu o a tatou tatalo? E mafai ona fesoasoani mai Ieova ina ia tatou faamuamua manaʻoga o le Malo, ia faia le mea ua tonu, ma faia mea e tatau mo ia.—Mataio 6:33; Roma 12:12; 2 Korinito 13:7.

Le Tuuina Atu ma lo Tatou Faia o Mea ua Tatau mo le Atua

6. O le ā se auala tāua o loo lē taulau ona faataunuuina ai e nisi tagata papatiso mea e tatau ona latou fai mo le Atua?

⁶ O nisi Kerisiano papatiso e manaʻomia ona tatalo faatauanau talu ai latou te lē o tausia avega tauave o le faiva lea sa latou talia ina ua faia la latou tuuina atu i le Atua. I tausaga taʻitasi, e silia ma le 300,000 i latou e papatisoina, ma sa faapena mo nisi o tausaga talu ai nei, peitaʻi e lē o faapena le tulaga tutusa o le faatelega o i latou o avea ma Molimau a Ieova o loo talaʻi pea lava pea. O nisi o ē na avea ma tagata talaʻi o le Malo ua latou lē toe talaʻia le tala lelei. Peitaʻi, e tatau i tagata taʻitoʻatasi ona faia so latou sao uigā i le faiva faa-Kerisiano a o leʻi papatiso. O loo latou iloa la le tofiga na tuuina mai e Iesu i ona soo uma: “Ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) Seʻi vaganā o loo fesagaʻi ma ni toʻatugā sili ona matuiā o le soifua mālōlōina po o isi vala latou te lē maʻalofia, ae o tagata taʻitoʻatasi ua papatisoina ae ua latou lē toe faia le galuega  talaʻi o ni Molimau a le Atua ma Keriso, o lona uiga latou te lē o ola e tusa ai o mea ua tatau ona latou fai mo Lē na Faia i tatou.—Isaia 43:10-12.

7. Aiseā e tatau ai ona tatou faapotopoto e lē aunoa mo le tapuaʻiga?

⁷ O Isaraelu anamua o se nuu na tuuina atu i le Atua, ma e tusa ai ma le feagaiga o le Tulafono, sa iai ni mea e tatau i ona tagata ona fai mo Ieova. Mo se faataʻitaʻiga, sa tatau i tane uma ona faapotopoto mo a latou tausamiga e tolu faaletausaga, ma o se tane na te lē faamanatuina ma le loto i ai le Paseka sa tatau ona “vavaeeseina” i le oti. (Numera 9:13; Levitiko 23:1-43; Teuteronome 16:16) Ina ia faia mea sa tatau ona latou fai mo le Atua i lo latou avea o ni ona tagata tuuina atu, sa tatau ai i le fanauga a Isaraelu ona faapotopoto mo le tapuaʻiga. (Teuteronome 31:10-13) E leai se vaega i le Tulafono o faapea mai, ‘Fai le mea lea pe afai e fetaui i lou olaga.’ Mo i latou ua tuuina atu nei ia Ieova, o le mea moni lava o le poloaʻiga lenei ua atili faatāuaina ai upu a Paulo e faapea: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le Aso o loo tāulata mai.” (Eperu 10:24, 25) Ioe, o le faapotopoto e lē aunoa ma uso talitonu o se vaega lea o mea e tatau ona fai e se Kerisiano tuuina atu mo le Atua.

Ia Fuafua Lelei Au Filifiliga!

8. Aiseā e tatau ai i se talavou ua tuuina atu ona manatunatu faatasi ma le tatalo i lana auaunaga paia?

⁸ Atonu o oe o se talavou ua tuuina atu ia Ieova. O le a faaʻoaina oe i faamanuiaga pe afai e te faamuamuaina pea manaʻoga o le Malo i lou olaga. (Faataoto 10:22) E ala i au tatalo ma au fuafuaga lelei, e ono mafai ai ona e faaaluina lou olaga talavou, i nisi o vala o le auaunaga faataimi atoa—o se auala lelei e faaalia ai o loo e manatuaina Lē na Faia oe. O le lē faia faapea, e ono amata ai ona e faaaluina le tele o lou taimi ma lou mafaufau i manaʻoga faaletino. Ona e pei ai lea o tagata lautele, e iʻu ina e vavevave e faaipoipo ma oo ai ina e nofo i ni aitalafu tetele i le tau sailia o mea faitino. O se galuega e totogi tele e ono alu uma ai lou taimi ma lou malosi. Pe afai e iai sau fanau, o le a tatau ona e amoina tiute tauave faaleaiga mo le tele o tausaga. (1 Timoteo 5:8) Atonu e te lē o faagaloina Lē na Faia oe, peitaʻi o se mea atamai lou iloa faapea, o le vave fai o ni au fuafuaga, po o le leai foʻi o ni fuafuaga, e ono mafai ona faataatia mai ai le ituaiga olaga o le a e ola ai o se tagata matua. I tausaga mulimuli ane, e te ono toe tepa i tua ma moomoo maʻimau pe ana faapea sa matuā faaaogā atoatoa lou olaga talavou i le auaunaga paia i Lē na Faia i tatou. Aiseā e te lē tatalo ai i le taimi lava lenei mo ou faamoemoega, ina ia e maua ai le faamalieina i lau auaunaga paia ia Ieova i ou tausaga talavou?

9. O le ā e ono mafai ona fai e se tasi ua matua lona soifua ae sa ia tauaveina muamua se tiute tauave mamafa i le faapotopotoga?

 ⁹ Seʻi manatu i se isi tulaga—le tulaga o se tagata o lē na avea muamua ma leoleo o le “lafu mamoe a le Atua.” (1 Peteru 5:2, 3) Ona o ni māfuaaga, na ia loto malie ai e faamatuu atu na faaeaga. E moni, ua avea nei o ia o se toeaina matua, ma atonu ua atili faigatā mo ia ona faaauau i le auaunaga i le Atua. Ae po ua lē tatau ea ona ia toe aapa atu mo faaeaga faatiokarate? Maʻeu ni faamanuiaga e ono mafai ona aumai e lena tane i isi pe a faapea e mafai ona ia toe tauaveina atili ni tiute tauave i le faapotopotoga! Ma talu ai e leai se tasi e mafai ona ola mo na o ia lava, e mautinoa o le a olioli ana uō ma ē pele ia te ia, pe afai e mafai ona ia toe faateleina lana auaunaga, mo se viiga o le Atua. (Roma 14:7, 8) Ae o le sili o na mea uma, o le a lē faagaloina e Ieova mea e faia e so o se tasi i lana auaunaga. (Eperu 6:10-12) O le ā la se mea e mafai ona fesoasoani mai ina ia tatou manatua ai Lē na Faia i tatou?

O Fesoasoani Ina ia Manatua ai Lē na Faia i Tatou

10. Aiseā na sili ai ona talafeagai le failauga mo le saunia maia o taʻiala i le mataupu o le manatuaina o Lē na Faia i tatou?

¹⁰ Na sili ona talafeagai le failauga mo le sauniunia mai o taʻiala mo lo tatou manatuaina o Lē na Faia i tatou. Na taliina e Ieova ana tatalo ma le loto atoa e ala i le foaʻi atu ia te ia o le poto maoaʻe. (1 Tupu 3:6-12) Sa faia e Solomona se sailiiliga maeʻaeʻa o le faagasologa atoa o mataupufai a tagata. E lē gata i lea, sa faagaeeina o ia e le Atua e tusitusi uma i lalo mea sa ia mauaina ina ia aogā mo isi. Na ia tusi mai: “Na sili le poto o le Failauga, o le mea lea na sili ai lona aʻoaʻo atu i tagata ia popoto; na ia mafaufau foi, ma suesue, ma saunia faataoto e tele. Na sailia e le Failauga ia maua upu e faafiafia aʻi; o mea ua tusia foi e tonu ia, o upu moni lava.”—Failauga 12:9, 10.

11. Aiseā e tatau ai ona tatou talia fautuaga poto a Solomona?

¹¹ E faitauina faapenei le faaliliuga a le Septuagint faa-Eleni i nei upu: “Ma e lē gata i lea, talu ai sa poto le failauga, talu ai sa ia aʻoaʻoina le poto i tagata; ina ia lagona e le taliga mea lelei mai faataoto, na faia ai e le failauga se sailiiliga maelegā ia maua upu mālie ma se tusitusiga e saʻo—o upu o le upu moni.” (The Septuagint Bible, na faaliliuina e Charles Thomson) Sa taumafai Solomona e pāʻia loto o lana ʻau faitau i upu mālie ma mataupu e faafiafiaina moni ai ma aogā. Talu ai o ana upu o loo tusia i le Tusi Paia o se iʻuga lea o le faagaeeina e le agaga paia, e mafai ai ona tatou lē faatalatū e talia ona manatu ma fautuaga poto.—2 Timoteo 3:16, 17.

12. I au lava upu, o le a faapefea ona e faamatalaina le uiga o le manatu sa taʻua e Solomona e pei ona tusia i le Failauga 12:11, 12?

¹² E ui sa leʻi iai ni auala faaonaponei e lolomi ai lomiga, ae sa tele lava tusi na maua i tuā i aso o Solomona. Sa faapeī manatu i na tusitusiga? Na ia faapea mai: “O upu a e popoto e pei o tui ia, po o fao ua faamauina, o matai o faapotopotoga [“i latou ua fiafia i tusitusiga,” NW ] ua tofia ia e le leoleo e toatasi. O lenei foi, loʻu atalii e, ia aʻoaʻoina oe e i latou; e leai se iuga i tusi o tusi e tele; o le suesue tele foi i upu e vaivai ai le tino.”—Failauga 12:11, 12.

13. E mafai faapefea i upu a i latou o loo iai le poto faale-Atua ona peiseaī o ni tui, ma o ai i latou ua faatusa i ni “fao ua faamauina”?

¹³ O upu a i latou o loo iai le poto faale-Atua ua peiseaī o ni tui. I le ā le itu? E uunaʻia ai mafaufau o ē faitau po o ē faalogologo ina ia faia se agaʻigaʻi i luma e ōgatusa ma upu poto ua faitau pe faalogologo i ai. E lē gata i lea, o i latou ua fiafia i “tusitusiga,” po o faaupuga e matuā atamai ma aogā, ua faatusa i ni “fao ua faamauina,” po ua matuā mausalī ona faamau. O le tulaga lena talu ai o upu lelei a na tagata e atagia mai ai le atamai o Ieova ma e mafai ai ona faaaogā e faamausalī ma faamalosia tagata o loo faitau pe faalogologo i ai. Afai o oe o se matua e mataʻu i le Atua, pe lē tatau ea ona e faia taumafaiga uma e totō ai lena poto i le mafaufau ma le loto o lau tama?—Teuteronome 6:4-9.

14. (a) O ā ituaiga o tusi e lē aogā ona “suesue tele” i ai? (e) O ā tusi e tatau ona tatou matuā uaʻi atu i ai, ma aiseā?

 ¹⁴ Ae aiseā, na taʻua ai e Solomona mea na ia faia e uiga i tusi? Pe a faatusatusa atu i le Afioga a Ieova, o le anoanoaʻi o tusi a lenei lalolagi ua na o mafaufauga lava faaletagata o loo tusitusia ai. O le tele o nei mafaufauga e atagia mai ai le mafaufau o Satani le Tiapolo. (2 Korinito 4:4) O lea la, “o le suesue tele” i na tusi faalelalolagi e itiiti lava se aogā e maua mai ai. O le mea moni, o se vaega tele o na mafaufauga e mafai ona faaleagaina ai faaleagaga i tatou. I le pei o Solomona, seʻi tatou mafaufau loloto i mea ua fai mai ai le Afioga a le Atua e faatatau i le olaga. O lenei mea o le a faamalosia ai lo tatou faatuatua ma tatou tosina vāvālalata atu ai ia Ieova. O le soona uaʻi atu i isi tusi po o isi puna o faatonuga e mafai ona faavaivaia ai i tatou. Ae maise lava pe afai o na tusitusiga e puna mai mafaufauga faalelalolagi e feteenaʻi ma le poto faale-Atua, lona uiga e lē lelei ma e faaleagaina ai le faatuatua atu i le Atua ma ana fuafuaga. O lea la, seʻi o tatou manatua, o tusitusiga e sili ona aogā i aso o Solomona ma o tatou foʻi aso, o tusitusiga ia e atagia mai ai le poto o “le leoleo e toatasi,” o Ieova le Atua. Ua ia saunia tusi e 66 o le Tusi Paia, ma o tusi nei e tatau ona tatou matuā uaʻi atu i ai. O le Tusi Paia ma lomiga aogā a le “auauna faamaoni” e mafai ai ona tatou maua “le poto i le Atua.”—Faataoto 2:1-6.

Mea Uma e Tatau Ona Tatou Fai mo le Atua

15. (a) E faapefea ona e faamatalaina upu a Solomona e faatatau i “mea uma ia e tatau ona faia e le tagata”? (e) O le ā e ao ona tatou fai pe afai tatou te fia faataunuuina mea e tatau ona tatou faia mo le Atua?

¹⁵ I se aotelega o lana sailiiliga atoa, ua faapea mai ai le failauga o Solomona: “Seʻi tatou faalogo ia i le iuga o ia mea uma, Ia e mataʻu i le Atua, ma e anaana i ana poloaiga; auā o [“mea uma ia e tatau ona faia e le tagata,” NW ]. Auā e faamasinoina e le Atua galuega uma, atoa ma mea lilo uma lava, o mea lelei atoa ma mea leaga.” (Failauga 12:13, 14) O se mataʻu talafeagai, po o le faaaloalo i Lē na Faia i tatou o le a puipuia ai i tatou, ma talosia foʻi o le a puipuia ai o tatou aiga, mai le saili atu e ola i se olaga valea o le olaga, lea e mafai ona aumaia ai ma le leʻi faatalitalia faalavelave ma faanoanoaga ia i tatou ma ē pele ia i tatou. O le mataʻu talafeagai i le Atua e mamā ma o le amataga lea o le poto ma le malamalama. (Salamo 19:9; Faataoto 1:7) Pe afai tatou te maua le atamai e faavae mai i le Afioga faagaeeina a le Atua ma faatatauina ana fautuaga i mea uma, ona tatou faataunuuina ai lea o “mea uma ia e tatau” ona tatou faia mo le Atua. E leai, e lē o se mataupu e tau fai ai se lisi o mea e tatau ona fai. Na i lo lea, o le mea e manaʻomia o lo tatou saili atu i le Tusi Paia mo taʻiala pe a foʻia faafitauli o le olaga, ma ia faia pea mea i le auala a le Atua.

16. O le ā le mea o le a faia e Ieova e tusa ai o le faamasinoga?

¹⁶ E tatau ona tatou iloa, e leai se mea e lilo i le silafaga a Lē na Faia i tatou. (Faataoto 15:3) O le a ia ‘faamasinoina galuega uma.’ Ioe, o le a faamasinoina e Lē Silisili Ona Maualuga mea uma lava, e aofia ai mea o loo lilo i le vaaiga a tagata. O le iloaina o na vala e mafai ona avea o se uunaʻiga ina ia tausia poloaʻiga a le Atua. Peitaʻi o le uunaʻiga sili lava, o lo tatou alofa mo lo tatou Tamā faalelagi, auā na tusi mai le aposetolo o Ioane: “O lenei lava le alofa i le Atua, ia tatou tausi i ana poloaiga; e le mamafa foi ana poloaiga.” (1 Ioane 5:3) Ma talu ai ua fuafuaina poloaʻiga a le Atua e atili maua ai so tatou lelei tumau, e mautinoa la, e lē gata o se mea ua talafeagai ae o se mea foʻi e matuā atamai  le usitaʻia o na poloaʻiga. E lē o se avega mamafa lenei mo ē alolofa i Lē na Faia i latou. Latou te mananaʻo e faataunuuina mea e tatau ona latou faia ia te ia.

Ia Faataunuu Mea Uma e Tatau Ona Tatou Faia

17. O le ā le mea o le a tatou faia pe afai tatou te mananaʻo moni lava e faataunuu mea uma e tatau ona tatou fai mo le Atua?

¹⁷ Pe afai tatou te popoto ma naunau moni e faataunuu mea uma e tatau ona tatou faia mo le Atua, lona uiga e lē gata ina tatou tausia ana poloaʻiga, ae o le a ia i tatou foʻi se mataʻu faaaloalo ia lē faia se mea e faatigā ia te ia. E mautinoa lava, “o le mataʻu ia Ieova, o le amataga lea o le poto,” ma o i latou o loo usitaʻia ana poloaʻiga ua ia i latou le “mafaufau lelei.” (Salamo 111:10; Faataoto 1:7) O lea, seʻi o tatou gaoioi ma le poto ma usiusitaʻi ia Ieova i mea uma lava. Ua sili ona matuā tāua lena mea i aso nei, auā o loo faatasi mai nei le Tupu o Iesu Keriso, ma ua latalata mai le aso o le faamasinoga o le a ia faatinoina i le avea ma Faamasino tofia a le Atua.—Mataio 24:3; 25:31, 32.

18. O le ā e mafai ona avea ma iʻuga mo i tatou pe a tatou faataunuuina mea uma e tatau ona tatou faia mo Ieova le Atua?

¹⁸ O i tatou uma taʻitoʻatasi ua iai nei i se matuā vailiiliga tauatua. Po o ia i tatou ea faanaunauga faaleagaga, po o le mea, ua tatou faatagaina taaʻiga faalelalolagi e faavaivaia ai la tatou faiā ma le Atua? (1 Korinito 2:10-16; 1 Ioane 2:15-17) Pe tatou te talavou pe matutua, seʻi o tatou faia mea uma tatou te mafai ina ia faafiafia Lē na Faia i tatou. Afai tatou te usiusitaʻi ia Ieova ma tausia ana poloaʻiga, o le a tatou teena ai mea leaga a le lalolagi tuai o loo mou atu. Ona mafai lea ona tatou pipii atu i le faamoemoe o le ola e faavavau i le faiga fou o mea ua folafola mai e le Atua. (2 Peteru 3:13) Maʻeu le matagofie o nei faamoemoega mo i latou uma o ē faataunuuina mea uma e tatau ona latou fai mo le Atua!

O le a Faapefea Ona E Tali?

□ Aiseā e te ono faapea mai ai e lē o mea uma e faatauvaa?

□ Aiseā e tatau ai i se talavou Kerisiano ona manatunatu faatasi ma le tatalo i lana auaunaga paia?

□ O ā ituaiga o tusi e lē aogā ona “suesue tele” i ai?

□ O ā “mea uma ia e tatau ona faia e le tagata”?

[Fesili mo le Suʻesuʻega]

[Ata i le itulau 20]

E lē faatauvaa mea uma mo i latou o ē auauna ia Ieova

[Ata i le itulau 23]

I le lē pei o le tele o tusi a lenei lalolagi, o le Afioga a le Atua e aogā ma faafouina ai