Aua le Avea se Uiga o E Malosi ai e Fai ma Ou Vaivaiga

O le iai o vaega e 16 i le pito i lalo o le vaa ina ia taofia ai le vai mai le sao atu i isi vaega, na manatu ai i le vaa taugatā o le Titanic faapea e lē mafai ona goto. I lana uluaʻi malaga i le 1912, na ia tauaveina ai na o le ʻafa o le aofaʻi o vaa faaola na manaʻomia. Na taia e le vaa se ogā aisa telē ma goto ai, ma maliliu ai le silia ma le 1,500.

SA AVEA le tupu o Ierusalema anamua o Usia o lē sa mataʻu i le Atua ma taʻitaʻiʻau uigaese. Faatasi ai ma le fesoasoani a Ieova, na ia faatoʻilaloina ai faasolosolo ona fili. “Ua oo atu lona [Usia] logo i mea mamao; auā e maʻeu le fesoasoani ia te ia, ua oo ina malosi lava o ia.” Ae peitaʻi na “faamaualugaina lea o lona loto . . . ua ia agasala atu ia Ieova, lona Atua.” Ona o le faamaualuga o Usia, na taia ai o ia i le lepela.—2 Nofoaiga a Tupu 26:15-21; Faataoto 16:18.

Ua aʻoaʻo mai e nei tala e lua ia i tatou faapea o le malosi, e faigofie lava ona avea ma vaivaiga po o ni itu leaga pe afai e lē faapaleniina i le atamai, agamalū ma le loto maulalo. E matuiā lenei mea, auā i so o se tulaga lava, e ia i tatou uma lava ni uiga e malolosi ai po o ni meaalofa patino, ma tatou te mananaʻo ia avea nei meaalofa o ni mea e aogā ma o se puna o le olioli ia i tatou ma isi, ae maise lava i Lē na Faia i tatou. O le mea moni, e tatau ona tatou faaaogāina atoatoa so o se meaalofa mai le Atua o loo ia i tatou ae i le taimi lava e tasi ia pulea foʻi ina ia tumau ai pea ona avea o se mea aogā.

Mo se faataʻitaʻiga, e faigofie lava mo se tagata e naunau tele i lana galuega ona avea lenei meaalofa ma ona vaivaiga i le avea ma sē ua matuā pulea e lana galuega. Atonu e lē faigofie ona faavaleaina, pe faasesēina se tagata faautauta, ae atonu e soona faautauta naʻuā ma oo ai i le tulaga e lē mafai lava ona ia faia ni faaiʻuga. O le fai mea lelei o se uiga lelei foʻi, ae afai e matuā soona sasalu tele e oo ai ina lē amanaʻia le tulaga masani faaletagata, e ono iʻu ai i se siʻomaga lē lelei, ma lē alofa, lea e tupuga mai ai le lē fiafia. O lea ia faaalu sina taimi e tomānatu ai i ou lava uiga malolosi. Po o lelei ona e pulea na uiga? Po o avea o ni faamanuiaga i isi? E sili atu i lena, pe e te faaaogāina e āva ai ia Ieova, le Puna o “mea lelei uma”? (Iakopo 1:17) Ona o lea, seʻi o tatou iloiloina totoʻa nisi o faaaʻoaʻoga o uiga malolosi e mafai ona avea ma ni vaivaiga, po o ni mea e lē lelei, pe afai e lē vaavaaia lelei.

Faaaogā ma le Atamai Tomai Faalemafaufau

O se mafaufau e lelei o le mea moni o se mea aogā lelei. Peitaʻi, e mafai ona avea ma vaivaiga  pe afai e taʻitaʻia atu ai i le mautinoa naʻuā po o le oo ai ina tatou ati aʻe ni manatu faamaualuga ia i tatou lava, ae maise lava pe afai e matuā viiviia ma faamimita i tatou e isi. E ono tatou ati aʻe foʻi se atamai faalemafaufau i le Afioga a le Atua ma lomiga o suʻesuʻega faale-Tusi Paia.

O le mautinoa naʻuā e mafai ona aliali mai i ni auala eseese. Mo se faataʻitaʻiga, pe a maua e se tasi e lelei tele lona mafaufau se tofiga e lauga atu ai i le faapotopotoga Kerisiano, atonu o se lauga i le lautele po o se lauga i le Aʻoga o le Faiva Faatiokarate, e na te ono faatali seʻia latalata lava i le taimi e faatino ai ona faatoʻā sauniuni lea, atonu e oo lava foʻi ina lē tatalo atu mo le faamanuiaga a Ieova. Na i lo lea, na te faatuatuaina lona poto ua iai ma lona tomai masani e mafaufau ma gaoioi vave ai. Atonu e punitia e lona tomai masani lona faatalalē mo sina taimi, ae a lē seanoa ma le faamanuiaga atoatoa mai ia Ieova, o le a fai ifo lona agaʻigaʻi i luma faaleagaga, pe oo lava foʻi ina taofia. Pagā se māumau o lena meaalofa lelei!—Faataoto 3:5, 6; Iakopo 3:1.

Atonu e iai i se tagata e sogasogā lona mafaufau se tomai faalemafaufau i le Tusi Paia ma lomiga e fesoasoani i le suʻesuʻeina o le Tusi Paia. Peitaʻi, o lena ituaiga o poto e ono ‘faafefeteina’ ai, po o se mea e faateleina ai lou faamaualuga; ae e lē ‘atiina aʻe’ ai ni faiā alofa faa-Kerisiano. (1 Korinito 8:1; Kalatia 5:26) Ae i le isi itu, o le tagata faaleagaga, e tusa lava po o ā ona tomai faalemafaufau, ae e tatalo pea lava o ia ma faalagolago atu i le agaga o le Atua. O le a avea foʻi lona uiga o malosi ai ma mea aogā a o ia tuputupu aʻe i le alofa, loto maulalo, poto, ma le atamai—ma e faia i se auala paleni lelei.—Kolose 1:9, 10.

E mafai foʻi ona avea tomai ma vaivaiga pe afai o lena le pogai ua māfua ai ona iai ni manatu nenee ia i tatou lava, ua aliaʻe ai le leai o se agamalū. O se tagata agavaa—ma so o se tasi e matuā viiviiaina o ia—atonu o le a galo ia i latou faapea e “le silasila [Ieova] i se tasi o e o popoto o latou loto,” e tusa lava po o le ā le tele o lo latou agavaa. (Iopu 37:24) “O i ai le poto i e faamaulalo,” ua faapea mai ai le Afioga a le Atua. (Faataoto 11:2) Na faapea atu le aposetolo o Paulo i tagata Korinito, e ui ina e ese ma lona atamai ma sa lelei ana aʻoga: “O aʻu nei foi, le au uso e, ou te leʻi alu atu ma le sili o le upu ma le poto, . . . Na ou i ai foi ia te outou ma le vaivai, ma le mataʻu, ma le gatete tele; e leʻi sauni atu foi laʻu upu, ma laʻu talaʻiga i upu mālie o le poto o tagata, a e peitaʻi o le faasino mai e le Agaga ma le mana; ina ia le i ai lo outou faatuatua i le poto o tagata, a o le mana o le Atua.”—1 Korinito 2:1-5.

O le tagata atamai moni lava e lē faasesēina e le vaaiga a le lalolagi i le atamai, ma e lē faasesēina foʻi o ia i o latou manatu i le taulau manuia. O lea na i lo le faaaogā o taleni ua ia te ia  ina ia maua ai le viiga mai tagata po o le sailia o ʻoa faalelalolagi, e ofoina atu e le tagata atamai moni le mea silisili na te mafaia i Lē na aumai ai lona ola ma ona tomai. (1 Ioane 2:15-17) Ona o lena fuafuaga ua ia faamuamua ai manaʻoga o le Malo i lona olaga, i le avea ma “laau ua totō i tafatafa ane o vaitafe” e fuatele mai. Ona o faamanuiaga a Ieova, ae lē o ana taleni masani, ‘e manuia ai mea uma na te faia.’—Salamo 1:1-3; Mataio 6:33.

Ia Faataga le Faa-Kerisiano e Faaopoopo i Lou Uiga Malosi

Ona o le tulaga masani, e matuā fau ma soloi uiga malolosi i le Faa-Kerisiano e lē mafai e filosofia faalelalolagi ona faatusatusa i ai. O le ala o le olaga faa-Kerisiano, mo se faaaʻoaʻoga, e maua ai ni tane ma ni avā e sili ona lelei, ni tuaoi e sili ona lelei, ma ni tagata faigaluega e sili ona lelei—o ni tagata e faamaoni, faaaloalo, filēmū, ma filigā. (Kolose 3:18-23) E lē gata i lena, o toleniga faa-Kerisiano i le tautala ma le aʻoaʻo atu e ati aʻe ai ni tomai lelei i fesootaʻiga. (1 Timoteo 4:13-15) O lea, e lē o se mea e faateʻia ai, le masani i pule o galuega ona mananaʻo e tuu atu nisi tiute tauave faaopoopo i Kerisiano ma siitia foʻi o latou tulaga. Ae o na uiga malolosi e mafai foʻi ona faaaogā sesē pe afai e lē leoleoina ma le faaeteete. O le siitia o le tulaga po o se galuega faatosina ua ofoina mai e ono uiga atu i le toeitiiti lava tuutōina atu i le kamupani, e misia ai e lē aunoa sauniga, po o le faataulaga ai o le taimi tāua mo le aiga o se tasi.

I Ausetalia e iai se Kerisiano ua avea ma toeaina ma o se tamā tausi aiga, o ia foʻi o se faipisinisi na matuā taulau manuia, ‘na ia te ia le tele o avanoa e mauoloa ma taʻutaʻua ai.’ Peitaʻi na ia teena le tofotofoga ina ia taulau manuia i lenei faiga o mea. Na ia faapea mai: “Sa ou manaʻo e faaalu le tele o le taimi ma loʻu aiga ma i le faiva faa-Kerisiano. O lea na ma malilie ai ma laʻu avā o le a ou taumafai ma le faaeteete e faaitiitia le taimi sa ou faaaluina i laʻu galuega faaletino.” Na ia faaopoopo mai: “Aiseā e ao ai ona ou faigaluega mo le lima aso i le vaiaso pe afai ou te lē manaʻomia?” E ala i le faia o nai fetuutuunaʻiga ma le magafagafa i lona olaga, na iloa ai e lenei toeaina e mafai lava ona ia tausia lona aiga e ala i le faigaluega mo le tolu po o le fā aso i le vaiaso. Mulimuli ane, na valaaulia ai o ia ina ia faia sona sao i isi faaeaga o le auaunaga, e pei o le auauna i le Komiti o le Maota Fono i lena vaipanoa ma i le pulega o tauaofiaga itumalo. O le faatonutonuina ma le atamai, na aumaia ai e ona tomai le olioli ma le faamalieina mo ia ma lona aiga.

Se Vaaiga Paleni i Faaeaga

Ua faalaeiʻauina tane Kerisiano ina ia aapa atu mo faaeaga i le auaunaga i le faapotopotoga. “Afai e aapa atu se tane i le faiva o le ovasia [po o le auauna o le faiva], e manaʻo o ia i le galuega lelei.” (1 Timoteo 3:1, NW ) E tusa ai o tomai e pei ona taʻua muamua, o se naunau e talia tiute tauave e manaʻomia ai foʻi le faapaleni ma faaiʻuga lelei. E lē tatau i se tasi ona tele naʻuā ni tofiga na te tauaveina e faapea ona leiloa ai lona olioli i le auaunaga ia Ieova. Ioe, o se mea lelei le iai o le loto naunau, o le mea moni e manaʻomia, auā e lē taliaina e Ieova le ituaiga agaga faalotolotolua pe taofiofi; ae o le loto naunau e ao ona atagia atu ai le agamalū ma le “faautauta.”—Tito 2:12; Faaaliga 3:15, 16.

O uiga faapelepele, malamalama, ma le manatu mamafa na ia Iesu, na lagona ai e tagata e oo lava foʻi i ē e sili ona faatauvaa le toʻafilēmū a o iai faatasi ma ia. E faapena foʻi i aso nei, e lagona e tagata le toʻafilēmū pe a faatasi ma i latou e iai uiga malolosi o le manatu mamafa, ma le agalelei i isi. I le faapotopotoga Kerisiano, o toeaina faaleuō, e faigofie ona fesootaʻi atu i ai, o ni “mea alofa i tagata” e matuā tautele moni lava. O i latou o “se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foi o le papa tele i le nuu ua le o i ai se vai.”—Efeso 4:8; Isaia 32:2.

Ae e tatau i toeaina ona paleni le taimi e faaalu e fesoasoani ai i isi ma o latou lava manaʻoga mo suʻesuʻega totino, manatunatu loloto, tatalo, ma le faiva i le lautele. O le tulaga masani, o toeaina ua faaipoipo e manaʻomia foʻi ona faaalu se  taimi ma o latou aiga, o ē e tatau ona sili atu ona saʻoloto e talanoa atu ia i latou.

Fafine Amio Lelei —O se Faamanuiaga Matagofie

E pei lava o toeaina amio lelei, o fafine e mafaufau faaleagaga o ni faamanuiaga foʻi ia i le faalapotopotoga a Ieova. I le tulaga lautele lava ia, ua iai i fafine le meaalofa o le naunau atu i isi tagata—o se uiga e faatāua ma faalaeiʻauina e Ieova. Na tusi le aposetolo o Paulo e faapea: “Aua neʻi taitasi ma vaavaai i ana lava mea, a ia taitasi ma vaavaai i mea a isi.” (Filipi 2:4) Peitaʻi, o lenei “vaavaai” e iai ona tapulaa, auā e lē mananaʻo Kerisiano e ‘aiā fua i mataupu a isi’; e lē tatau foʻi ona avea ma sē e faitala.—1 Peteru 4:15; 1 Timoteo 5:13.

E anoanoaʻi isi meaalofa o loo iai i fafine. Mo se faataʻitaʻiga, atonu ua iai i se avā Kerisiano le meaalofa o le sili atu lea o lona poto faalemafaufau na i lo lana tane. E ui i lea, ona o se “avā amio lelei” o lē e mataʻu ia Ieova, o le a ia faaaloalo ai i lana tane ma faaaogā ana meaalofa e lagolagosua ai ia te ia, ae lē o le faatavā atu ia te ia. Ma na i lo le matauʻa pe itagia o ia, o se tane atamai ma loto maulalo o le a ia faatāuaina tomai o lana avā ma ʻoliʻoli ai i na tomai. O le a ia faalaeiʻauina lana avā ina ia faaaogā atoatoa ona tomai e ati aʻe ai lona aiga ma fesoasoani ai i lana fanau e ‘matataʻu ia Ieova,’ e pei lava ona ia faia. (Faataoto 31:10, 28-30; Kenese 2:18) O tane ma avā e agamalū ma loto maulalo faapena o le a manuia i faaipoipoga e faamamaluina moni ai lava Ieova.

Puleaina o se Uiga Totino e Malosi

O se uiga totino e malosi e faavae aʻe i le amiotonu ma le faia o le finagalo o Ieova ma le tagata atoa e mafai ona avea ma mea e sili ona aogā pe afai e ō faatasi ma le agamalū ma le loto maulalo. Peitaʻi, e mafai ona avea ma vaivaiga pe afai e māfua ai i se tasi ona fia pule pe taufaafefe ai i isi. E matuā sili atu ona moni lenei mea i totonu o le faapotopotoga Kerisiano. E tatau ona lagona e Kerisiano le toʻafilēmū o le tasi i le tasi, e aofia ai pe a auai faatasi ma toeaina o le faapotopotoga.—Mataio 20:25-27.

O lea, e tatau i toeaina ona lagona le toʻafilēmū i le va o i latou lava. Ma pe a latou fono faatasi, e tatau ona taaʻina a latou faaiʻuga e le agaga paia, ae lē o le malosi o uunaʻiga o uiga totino. O le mea moni, e mafai e le agaga paia ona taaʻina so o se tasi o le au toeaina, e aofia ai ma lē aupito laitiiti po o le toeaina e sili atu ona tau lē tautala soo. O lea o i latou e malolosi o latou uiga totino, e tusa lava pe latou te lagona e saʻo i latou, e ao ona latou pulea o latou uiga e malolosi ai e ala i le aʻoaʻoina o le tomai e gauaʻi ai, e faapea ona faaalia ai le “āva” i uso ā toeaina. (Roma 12:10) Ua lapataʻi mai ma le agalelei le Failauga 7:16 e faapea: “Aua e te amiotonu naua, aua foi e te faatele naua lou poto; se a le mea e oti ai oe ia te oe?”

O Ieova, le Puna o “mea lelei uma,” na te pulea ma le lelei atoatoa ona uiga malolosi e sili atu ona ofoofogia. (Iakopo 1:17; Teuteronome 32:4) Ma o ia o lo tatou Aʻoaʻo! O lea seʻi o tatou faaaʻoaʻo ia te ia ma galulue mamafa, e lē gata i le atiina aʻe o meaalofa masani ua ia i tatou, po o uiga e malolosi ai, ma i le taulimaina o na uiga ma le atamai, agamalū, loto maulalo, ma le alofa. Maʻeu se faamanuiaga mo isi o le a iai i tatou!

[Ata i le itulau 27]

O le agaʻigaʻi i luma faaleagaga e faalagolago i le suʻesuʻe faatasi ma le tatalo, ma le faalagolago ia Ieova

[Ata i le itulau 29]

O le naunau totino e ō faatasi ma le agamalū o se faamanuiaga

[Ē Ana le Ata i le itulau 26]

Courtesy of The Mariners’ Museum, Newport News, VA