Le Mauga o Athos—Pe o se “Mauga Paia”?

I LE vaaiga a le sili atu i le 220 miliona tagata o le Lotu Orthodox, o le mauga o Athos, se tolotolo gaoā i le itū i mātū o Eleni, o “le mauga aupito sili lea ona paia i le lalolagi o Kerisiano Orthodox.” Mo le toʻatele o i latou, o le malaga atu i le “mauga paia” o Athos o se faanaunauga lea e moomoo i ai. O le ā lenei “mauga paia”? Na faapefea ona avea lenei mauga ma mea tāua tele? Ma pe o le “mauga” ea lenei lea e taulaʻi atu i ai tagata matataʻu i le Atua mo le taʻitaʻiga faaleagaga ma le tapuaʻiga moni?

O loo maua i le Tusi Paia le faaupuga “mauga paia.” E fesootaʻi atu i le tapuaʻiga paia, mamā, ma le maualuga i le Atua moni, o Ieova. Sa avea le mauga o Siona i Ierusalema anamua ma “mauga paia” ina ua aumai i ai iinā e le tupu o Tavita le ʻato laau o le feagaiga. (Salamo 15:1; 43:3; 2 Samuelu 6:12, 17) Ina ua maeʻa ona fausia le malumalu o Solomona i luga i le Mauga o Moria, sa aofia ai loa ma “Siona” i le nofoaga sa iai le malumalu; o lea la, na tumau ai pea ona avea Siona ma “mauga paia” o le Atua. (Salamo 2:6; Ioelu 3:17) Ona o Ierusalema sa iai le malumalu o le Atua, o nisi taimi na taʻua ai foʻi lena aai o le “mauga paia” o le Atua.—Isaia 66:20; Tanielu 9:16, 20.

Ae faapefea aso nei? Pe o le Mauga ea o Athos—po o se isi lava nofoaga maualuga—o le “mauga paia” lena lea e ao ona gasolo i ai tagata ina ia tapuaʻi ai i le Atua i le auala e na te talia mai ai?

O se “Mauga Paia” o Monaseri

O loo tū le mauga o Athos i le pito i sasaʻe o le Penisula o Chalcidice i le faatausiʻusiʻuga lava o se laufanua lauiti e ʻosoʻoso agaʻi i le Sami o Aegean e latalata i le itū i sasaʻe o Thessaloníki i aso nei. O se mea mataʻina i le vaai e mānu aʻe mai le sami ma e oo atu i le 6,667 futu (2,032 mita) le maualuga.

Ua leva tele ona manatu i le mauga o Athos o se nofoaga paia. Sa avea ma nofoaga o atua a o leʻi avea le Mauga o Olympus ma o latou aiga e tusa ai o talafaafagogo a Eleni. O se vaitaimi ina ua mavae atu Konesetatino le Sili (senituri lona fa T.A.), na avea ai Athos ma nofoaga paia i lotu Kerisiano. E tusa ai o se tasi talatuu e faapea, o le “taupou” o Maria, faatasi ai ma le Faievagelia o Ioane sa ō atu i Kuperu e asiasi ia Lasalo, ae ona o se matagi malosi sa āgi faafuaseʻi mai na iʻu ai ina oo i Athos. Ona o le māofa i le matagofie o le mauga, na ia ōle atu ai ia Iesu e manaʻo i ai. O le pogai lena, sa lauiloa ai foʻi Athos o “le Togālaau a le Taupou Paia.” E oo mai i le ogatotonu o le vaitaimi o le pulega a le malo o Byzantium, ua lauiloa lenei maupuʻepuʻe gaoā o le Mauga Paia. O lenei taʻu na faamaonia aloaʻia ma faamautinoaina i le taulotoaʻiga o le lona 11 senituri i le faasilasilaga a Emeperoa Konesetatino IX Monomachus.

Ona o le gaoā tele ma le tū mamao ese, ua fetaui ai le avea o Athos o se ituaiga nofoaga e lelei e toleni ai mo se olaga faataulagaina totino mo māfuaaga faaleagaga. I le faagasolo mai o senituri, sa tosina atu i ai le itupa o alii mai le lalolagi aoao o le lotu Orthodox—mai Eleni, Serbia, Romania, Palakeria, Rusia, ma isi—o ē sa fausia o latou monaseri tetele, faatasi ai ma o latou falesā ma tagata e nonofo faatasi ai. Pe tusa o le 20 o nei ituaiga o loo iai pea e oo mai lava i aso nei.

Le Mauga o Athos i Aso Nei

I aso nei, o Athos o se nofoaga tumaʻoti, e iai lana ia lava āiāiga faavae sa aloaʻia i le 1926. Ina ua mavae ni tausaga se tele o faasolosolo ina mou atu, ae ua oso aʻe le faitau aofaʻi o monike e nonofo ai iinā i le sili atu i le 2,000.

E tofu lava monaseri taʻitasi ma lana ia faamaopoopoga i mea tau faatoʻaga, o nofoaga mo tapuaʻiga, ia ma mea e nonofo ai. O le nofoaga aupito sili ona lelei o nei tagata nofo ese e maua i le nofoaga e taʻua o Karoúlia, e i le pito i luga o ni papa maualuluga lava i le faatausiʻusiʻuga o le mauga o Athos. Iinā o loo iai se atufālega o ni fale mo  tagata taʻitoʻatasi ma na pau lava le auala e mafai ona oo atu i ai o se ala savali, e faasitepu maa, ma ni filifili. I Athos, o loo tumau pea monike i a latou faasologa masani faalelotu mai anamua o mea fai i aso taʻitasi, latou te faaaogā le uati Byzantine (lea e amata le aso i le goto o le la) ma le kalena Julian (13 aso e tuai ai na i lo le kalena masani).

E ui e faapea o lenei nofoaga faalotu na māfua ona taʻua e “paia” ona o le fafine, ae ua 1,000 nei tausaga o faalauiloa mai e ona monike ma tagata nofo ese o loo iai e faapea e matuā faasāina lava le penisula atoa ona tū vae i ai so o se ituaiga fafine—o tagata atoa ma meaola—faapena foʻi ma so o se eunuka po o se tamāloa e leai se soesā. E leʻi leva tele atu, na aveesea ai le tulafono e faatatau i tagata e leai ni soesā ma nisi meaola fafine, ae o loo matuā faasāina pea lava fafine e gata mai i le 550 iata (500 mita) i le talafatai o Athos.

Se “Mauga Paia” mo Tagata Uma

Pe o Athos ea o le “mauga paia” lea e ao ona ō atu i ai Kerisiano matataʻu i le Atua e tapuaʻi ai? Ina o talanoa atu i se fafine Samaria o lē sa talitonu faapea e ao ona tapuaʻia le Atua i le Mauga o Keresema, sa faamanino atu e Iesu e lē o toe iai se mauga moni e faapitoa mo le tapuaʻia o le Atua. Na fetalai Iesu. “E oo mai le itula, tou te tapuaʻi i le Tamā e lē i [Keresema], po o Ierusalema.” Aisea? “O le Atua o le Agaga, ma o ē tapuaʻi ia te ia, e ao ona tapuaʻi atu ai i le agaga ma le upu moni.”—Ioane 4:21, 24, NW.

I le faasino mai i o tatou taimi, sa valoia mai e le perofeta o Isaia i se tulaga e faafaatusa se “mauga o i ai le fale o Ieova” o le a “faatumauina ai . . . i tumutumu o atu mauga” ma o le a “faamaualugaina foi e sili i mauga,” ma i se tulaga faafaatusa o le a gasolo i ai tagata mai atunuu uma lava.—Isaia 2:2, 3.

O tamāloloa ma fafine o ē mananaʻo ia maua se faiā faamaonia ma le Atua ua valaaulia nei ina ia tapuaʻi ia Ieova i le “agaga ma le upu moni.” E faitau miliona i le lalolagi atoa ua maua lo latou auala i le ‘mauga o Ieova.’ O i latou, atoa ma isi, ua latou faaleo mai faalogona o se loia Eleni o lē na faapea mai e uiga i le mauga o Athos: “Ou te masalosalo pe e maua i ai se faaleagaga i totonu o ona pa, po o monaseri foʻi.”—Faatusatusa i le Galuega 17:24.

[Pusa i le itulau 31]

Se Oloa Tautele ua Leva Ona Nātia

Mo le faitau senituri, sa faaputuputu ai e monike i Athos ni mea tāua tautele ia e aofia ai pe tusa o le 15,000 manusikulipi, o nisi o nei manusikulipi e mai i tuā lava i le senituri lona fa, ua avea ai nei manusikulipi o se tasi o faaputuga manusikulipi aupito sili ona tāua i le lalolagi. O loo iai tusi taai, o tusi atoatoa ma itulau o tusi o Evagelia, o salamo ma pese, e ese mai i āta pito sili ona leva, o faatusa, o faatagata, ma mea sa vaneina i uʻamea. E fuafuaina e faapea o le tasi vae fa o manusikulipi Eleni i le lalolagi o loo i le mauga o Athos, e ui lava o le tele o loo manaʻomia ona faatulaga lelei. I le 1997, ma o le taimi muamua lava lea, na faataga ai e monike se vaega o la latou ʻoa e faaaliali atu e matamata ai tagata i Thessaloníki.

[Ē Ana le Ata i le itulau 31]

Telis/Greek National Tourist Organization