O le “Tala Lelei” Mai le Apokalipise

“Na aʻu iloa foi le tasi agelu ua lele i le taulotoaiga o le lagi, ua ia te ia le tala lelei e faavavau e folafola atu i e nonofo i le lalolagi.”—FAAALIGA 14:6, LT.

1. E ui e talitonu Molimau a Ieova i le faagaeeina o le tusi o le Apokalipise, ae aiseā ua lē o i latou ai o se “lotu mavae faaapokalipise”?

I LE tuufaafeagai atu i tuuaʻiga o loo faia ia i latou, o Molimau a Ieova e lē o i latou o se “lotu mavae faaapokalipise” po o se “lotu mavae e talaʻia le aso o le faaumatiaga.” Peitaʻi, latou te taliaina le Apokalipise, po o le tusi o Faaaliga, o se vaega o le Afioga faagaeeina a le Atua. O le mea moni, o loo iai i le Faaaliga ni feʻau faafaamasinoga mo ē amioleaga. Peitaʻi, i la latou molimau atu i le lautele, ua taulaʻi patino atu ai auauna a le Atua i le faamoemoe ofoofogia ua faataatia mai i le Tusi Paia, e aofia ai le faamoemoe lea o loo iai i le Apokalipise, po o le Faaaliga. O lea, latou te lē faaopoopo atu ai pe ave ese se mea mai afioga faavaloaga o loo iai iinā.—Faaaliga 22:18, 19.

O Ē Faalauiloa Atu le Tala Lelei

2. O ā nisi o mau e masani ona faaaogā e Molimau a Ieova i la latou galuega talaʻi?

² O se faavae faale-Tusi Paia e masani ona taʻua mo le faiva i le lautele a Molimau a Ieova, o le faamatalaga a Iesu e faapea: “E faalauiloaina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14, faaopoopoga i lalo, NW) Ae o le ā “lenei tala lelei o le malo”? E toʻatele Molimau o le a latou taliina e ala i le toe sii mai o fuaiupu o le Faaaliga mataupu e 20 ma le 21, lea e faasino atu i le Pulega o le Afe Tausaga a Keriso ma le pulega o lona Malo ma le sosaiete o le fanau a tagata, o iinā o le a ‘lē toe iai’ se oti, se faanoanoa, ma ni puapuaga.—Faaaliga 20:6; 21:1, 4.

3. O le ā le tofiga e tutusa ma le faiva i le lautele a Molimau a Ieova?

³ Ona o ni ē o loo faalauiloa atu nei tala lelei, ua avea moni ai Molimau a Ieova o se fofoga taumomoli o le avefeʻau faafaatusa mai le lagi, o ia e ana le feʻau lea foʻi e faamatalaina i le Faaaliga. “Na aʻu iloa foi le tasi agelu ua lele i le taulotoaiga o le lagi, ua ia te ia le tala lelei e faavavau e folafola atu i e nonofo i le lalolagi, i atunuu uma, ma ituaiga, ma gagana eseese, ma nuu.” (Faaaliga 14:6, LT) O le “tala lelei e faavavau” e aofia ai le faasilasilaga faapea, o “le malo [po o le, pulega] o le lalolagi” ua “avea mo lo tatou Alii ma lona Keriso” ma ua oo mai “ona po” a Ieova ina ia ‘fano ai i latou o ē o loo faafanoina le lalolagi.’ (Faaaliga 11:15, 17, 18) Pe lē o se tala lelei moni ea lena?

 Mea o Teuina e le Faaaliga mo i Tatou

4. (a) O ā upu moni autū ua otooto mai i le mataupu 1 o le tusi o Faaaliga? (e) O le ā e manaʻomia mai ia i latou o ē fia maua ni aogā mai le tala lelei?

⁴ O le mataupu amata o le tusi o Faaaliga o loo taʻua mai ai Ieova o “le Alefa ma le Omeka, . . . [o Lē] o loo soifua, na soifua foi, o le a afio mai, e ona le malosi uma lava.” Ma o loo taʻua lona Alo, o Iesu Keriso o “le molimau faamaoni,” “o le ulumatua o e ua oti,” ma o “le pule i tupu o le lalolagi.” O loo tautala foʻi e faatatau ia Iesu faapea o ia “ua alofa mai ia te i tatou, na ia laveai mai foi ia te i tatou i a tatou agasala i lona lava toto.” (Faaaliga 1:5, 8) O lea la, i lona amataga mai, ua faamatala auiliili mai ai e le Faaaliga upu moni autū e faasaoina ai ola. O i latou o “e nonofo i le lalolagi” o le a lē aogā ia i latou le tala lelei ua faaooina atu ia i latou seʻi vaganā ua latou amanaʻia le pule silisili ese a Ieova, faatuatua atu i le toto masaa o Iesu, ma talitonu na faatūina mai o ia e Ieova ma ua avea nei Keriso ma Pule tofia a le Atua mo le lalolagi.—Salamo 2:6-8.

5. O le ā le matāfaioi lea o loo faaāta mai ai Keriso i le mataupu e 2 ma le 3 o le tusi o Faaaliga?

⁵ O mataupu e lua o sosoo mai o loo faaāta ai Keriso Iesu o ia o le Ovasia alofa mai le lagi, mo faapotopotoga a ona soo i le lalolagi. O le tusi taai lea e faatuatusi atu i ni faapotopotoga Kerisiano e fitu na filifilia sa iai i Asia Itiiti i le uluaʻi senituri T.A., sa iai ni faalaeiʻauga ma ni fautuaga maumauaʻi o loo aogā pea i aso nei. O feʻau na aauina atu i faapotopotoga e masani lava ona amata i upu e pei o le, “Ua ou iloa au galuega” po o “Ua ou iloa . . . lou puapuaga.” (Faaaliga 2:2, 9) Ioe, na silafia lelei lava e Keriso mea sa tutupu i faapotopotoga a ona soo. Na ia faamālō atu i nisi faapotopotoga mo lo latou alofa, le faatuatua, le tautigā i le faiva, le onosaʻi, ma le faamaoni i lona suafa ma le upu. O isi faapotopotoga sa ia aʻoaʻia ona ua latou lafoaʻia lo latou alofa mo Ieova ma lona Alo, po ua paʻūū atu i amioga lē mamā faaleituaiga, o ifogā tupua, po o faigā vaega faaaposetate.

6. O le vaaiga o loo faamauina i le Faaaliga mataupu e 4, ua fesoasoani i tagata ina ia latou malamalama i le ā?

⁶ O le Faaaliga mataupu e 4, o loo aumaia ai se vaaiga matuā mataʻina o le nofoalii faalelagi a Ieova le Atua. O loo faaemo mai ai se vaaiga i le mamalu o le afio ai o Ieova ma le faatulagaga o le pulega faalelagi o le a ia faaaogā. O tupu faapaleina, o loo siʻosiʻomia e o latou nofoalii le nofoalii tutotonu o le vateatea, o loo faapaʻūū ifo i luma o Ieova ma folafola atu faapea: “Le Alii e, ma lo matou Atua, e tatau lava oe ina ia tuu atu ia te oe le viiga, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.”—Faaaliga 4:11.

7. (a) O le ā ua faatonu e le agelu i latou o loo ʻaināina le lalolagi e fai? (e) O le ā le vaega tāua o la tatou galuega tau aʻoaʻoga?

⁷ Pe iai ea se uiga o lenei mea mo tagata i aso nei? E mautinoa lava e iai. Afai latou te mananaʻo e ola i le Malo faa-Meleniuma, e ao la ona  latou utagia le mea o loo folafola mai e le “agelu ua lele i le taulotoaiga o le lagi” e faapea: “Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga.” (Faaaliga 14:6, 7) O se tasi o fuafuaga autū o le galuega tau aʻoaʻoga a le Tusi Paia o loo tauaveina e Molimau a Ieova, ina ia fesoasoani ai “i e nonofo i le lalolagi” ia latou iloa Ieova ma tapuaʻi ia te ia, ia amanaʻia lona tulaga o Lē na Foafoaina Mea, ma loto malilie e gauaʻi atu i lana pule silisili ese amiotonu.

Ua Tatau Ona Avatu le Faaaloaloga i le Tamaʻi Mamoe

8. (a) Ua faapefea ona faailoa mai Keriso i le Faaaliga mataupu e 5 ma le 6? (e) O le ā e mafai e i latou uma o faalogo i le tala lelei ona aʻoaʻoina mai lenei vaaiga?

⁸ O mataupu e lua o loo sosoo mai, le Faaaliga mataupu 5 ma le 6, o loo faailoa mai ai Iesu Keriso faapea o le Tamaʻi Mamoe ua tatau ona ia tatalaina se tusi taai e fitu ona faamaufaailoga, lea o loo faailoa mai ai i se gagana faafaatusa mea o loo tutupu i o tatou aso. (Faatusatusa i le Ioane 1:29.) Ua faapea atu ni leo mai le lagi i lenei Tamaʻi Mamoe faafaatusa: “Ua tatau lava oe ina ia e tago i le tusi taai, ma tatala i ona faamaufaailoga; auā na fasia oe, ua e faatauina foi tagata i lou lava toto mo le Atua, mai ituaiga uma, ma gagana eseese, ma nuu, atoa ma atunuu; ua e faia foi i latou ma nuu faatupu, o ositaulaga foi i lo matou Atua; e fai foi i latou ma tupu i le lalolagi.” (Faaaliga 5:9, 10) Ua aʻoaʻo mai e lenei vaaiga faapea, e faavae aʻe i le toto masaa o Keriso, ua valaauina ai ni tagata mai atunuu uma ina ia auai faatasi ma ia i le lagi ma “fai foi i latou ma tupu i le lalolagi.” (Faatusatusa i le Faaaliga 1:5, 6.) O lo latou faitau aofaʻi faatapulaaina o loo faaalia mulimuli ane i le Faaaliga.

9. Ua faapefea ona faailoa mai Keriso i le Faaaliga mataupu e 6?

⁹ I se isi vaaiga, o loo faailoa mai ai Keriso o le tagata o loo tietie ma lona palealii i le solofanua sinasina, o loo agaʻi atu ma le “manumalo, o le a manumalo pea ia.” E fiafia lava, talu ai o le a ia manumalo mai aafiaga leaga na o loo faaāta mai e isi tagata tietie solofanua e toʻatolu o le Apokalipise, o loo aumaia e a latou tietiega mataʻutia, taua, o oge, ma le oti i le fanau a tagata talu mai le tausaga sili ona tāua o le 1914. (Faaaliga 6:1-8) O le matāfaioi tutasi a Keriso, le Tamaʻi Mamoe a le Atua, i le faaolataga o tagata ma le galueaʻiina o fuafuaga ofoofogia a Ieova, o le matua autū lea o le galuega tau aʻoaʻoga faale-Tusi Paia a Molimau a Ieova.

10. (a) O ā faamatalaga tāua o loo aumaia i le Faaaliga mataupu e 7? (e) Na faapefea ona fetalai Keriso e faatatau ia i latou o ē maua le Malo?

¹⁰ O le Faaaliga mataupu e 7 o loo iai moni lava ni tala lelei. E na o le tusi lava a Faaaliga tatou te maua i ai le aofaʻiga o i latou o ē na taʻua e Iesu o le “lafu mamoe itiiti” o ē ua foaʻi atu i ai le Malo e le Tamā o le Tamaʻi Mamoe. (Luka 12:32; 22:28-30) Ua faamaufaailogaina i latou nei e Ieova le Atua e ala i lona agaga. (2 Korinito 1:21, 22) Ua faamautinoa mai e le aposetolo o Ioane, o lē na mauaina le Faaaliga, e faapea: “Na ou faalogo foi i le faitau aofai o e na faamaufaailogaina; e selau afe ma afe e fagafulu ma afe e fa.” (Faaaliga 7:4) O lenei fuainumera saʻo ua faamautinoa mai i se mataupu mulimuli ane e faapea o le aofaʻi o i latou “ua faatauina nai tagata” ina ia pule faatasi ma le Tamaʻi Mamoe i le Mauga o Siona faalelagi. (Faaaliga 14:1-4) A o lē manino ma lē mautinoa faamalamalamaga e aumaia e lotu a Kerisinetoma e faatatau i lenei fuainumera, ae mālie se faamatalaga a le tagata atamai faapitoa i mataupu faale-Tusi Paia, o E. W. Bullinger na fai e faatatau i lea mataupu, e faapea: “O le mea moni lenei: o se fuainumera maʻoti e ese mai le fuainumera lē maʻoti lea o loo taʻua foʻi i lenei lava mataupu.”

11. (a) O ā tala lelei o loo maua i le Faaaliga mataupu e 7? (e) O ā faamoemoega ua avanoa mai mo i latou o le “motu o tagata e toatele”?

¹¹ O le ā le fuainumera lē maʻoti lea sa mafaufau i ai Bullinger? I le fuaiupu e 9, na tusi mai ai le aposetolo o Ioane: “Ua mavae atu ia  mea, ona ou iloa lea, faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi.” (Faaaliga 7:9) O ai o loo faia aʻe ai lenei motu o tagata e toʻatele, o le ā lo latou tulaga o iai nei i luma o le Atua, ma o le ā o taatia mai i le lumanaʻi mo i latou? O le tali faaapokalipise i ai, o se tala lelei lea mo tagata o nonofo i le lalolagi. Ua tatou faitau i ai faapea: “O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe.” E ala i le faatuatua atu i le toto masaa o Keriso, o le a puipuia ai i latou i le taimi o “le puapuaga tele.” O Keriso o le a ia “taʻitaʻi ia te i latou i puna o vai ola; e sōloieseina foi e le Atua o loimata uma nai o latou mata.” (Faaaliga 7:14-17) Ioe, e faitau miliona tagata o loo ola i aso nei e mafai ona avea ma vaega o le motu o tagata e lē mafaitaulia, lea o le a faasaoolaina atu i le iʻuga o lenei faiga amioleaga o mea. I le avea ma tagatānuu i le Pulega faa-Meleniuma a le Tupu o Iesu Keriso, o le a ia taʻitaʻia ai i latou i le ola e faavavau i luga o le lalolagi. Pe lē o se tala lelei ea lena?

“E Faamaoni, e Tonu Foi Ana Faamasinoga”

12, 13. (a) O ā mea o loo talanoaina i le Faaaliga mataupu e 8 e oo i le 19? (e) Aiseā e lē tatau ai ona atuatuvale tagata loto faamaoni i na valoaga?

¹² O le Faaaliga mataupu e 8 e oo i le 19 o loo tele ina māfua ai le taʻua o le tusi o le Apokalipise, po o le Faaaliga, o se tusi o loo valoia maia mala mataʻutia. O loo faamatala ai feʻau tau faamasinoga malolosi (ua faatusaina i leo o pu, o mala, ma ipu o le toʻasā tauatua) o loo tuusaʻo mai lava i vaega eseese o le faiga o mea a Satani. O nei faamasinoga o le a faaoo mai, muamua lava i lotu sesē (“Papelonia le aai tele”), ona sosoo ai lea ma faiga o mea faapolotiki faalēmataʻu, o loo faatusaina i manu feʻai.—Faaaliga 13:1, 2; 17:5-7, 15, 16. *

¹³ O loo faaāta mai e nei mataupu le faamamāina o le lagi, ina ua lafo ese mai Satani ma ana temoni i le lalolagi. Ua saunia mai ai i nei mataupu le faamalamalamaga talafeagai e tasi mo puapuaga mataʻutia o le lalolagi talu mai le 1914. (Faaaliga 12:7-12) Ua faamatala mai ai foʻi, i se gagana faafaatusa, le faaumatiaga o le faiga o mea amioleaga a Satani o loo iai i le lalolagi. (Faaaliga 19:19-21) Pe tatau ea ona faateʻia tagata loto faamaoni i na mea mataʻutia o le a tutupu? E leai, auā i le taimi e faaoo mai ai faamasinoga a le Atua, e alalaga ai se ʻau faalelagi ma faapea mai: “Aleluia! Ua i le Alii lo tatou Atua le faaolataga, ma le viiga ma le faaneeneega, ma le mana; auā e faamaoni, e tonu foi ana faamasinoga.”—Faaaliga 19:1, 2.

14, 15. (a) O le a faapefea ona aumaia e ala i le amiotonu le iʻuga o lenei faiga amioleaga o mea? (e) Aiseā e tatau ai ona avea lenei vaega o le Apokalipise ma pogai o le olioli mo tagata loto faamaoni?

¹⁴ O le a lē aumaia e Ieova le faiga o mea amiotonu e aunoa ma le tafiesea mai le lalolagi o i latou o loo faafanoina. (Faaaliga 11:17, 18; 19:11-16; 20:1, 2) Peitaʻi, e lē o iai i se tagata po o se faigā malo faapolotiki le pule po o le mana e faataunuuina ai lenei mea. E na o Ieova lava ma lana Tupu tofia ma o le Faamasino, o Keriso Iesu, e mafai ona la faia lenei mea e ala i le amiotonu.—2 Tesalonia 1:6-9.

¹⁵ E pei ona manino ona faaalia mai e le Apokalipise faapea, ua fuafuaina e Ieova ina ia faaiʻuina lenei faiga amioleaga o mea. E tatau ona avea lenei mea moni ma pogai mo le olioli o tane ma fafine o ē o loo ‘mapuitiga, ma feōi ona o mea inosia uma ua faia i ai.’ (Esekielu 9:4) E tatau ona faatupuina ai e lenei mea ia i latou se manaʻoga naunautaʻi e utagia le valaau na faia e le agelu o lē sa ia te ia le tala lelei, o lē na faalauiloa mai: “Ia outou matatau i le Atua, . . . auā ua oo mai le itu aso o lana faamasinoga; ma ia outou ifo i le na faia le lagi, ma le fanua.” (Faaaliga 14:7)  Talosia ia tapuaʻi ma auauna atu ia Ieova na tagata faatasi ma ana Molimau, “o e ua tausi i poloaiga a le Atua, ma ua taofi le mau ia Iesu.”—Faaaliga 12:17.

Le Pulega Mamalu Faa-Meleniuma

16. (a) Aiseā ua tetee ai lotu a Kerisinetoma i le faamoemoe o le Meleniuma? (e) Aiseā e talitonu ai Molimau a Ieova o le a taliina lava le tatalo faaaʻoaʻo?

¹⁶ O le mataupu e 20 e oo i le 22 o le tusi o Faaaliga o loo iai le faavae faale-Tusi Paia mo le faamoemoe atu i le Meleniuma. E na o le pau lenei o le vaega o le Tusi Paia o loo taʻu saʻo mai ai le vaitaimi o le afe tausaga lea o le a avea ma tamua i le tulaga e faavavau o fiafiaga i le lagi ma le lalolagi. Ua tetee lotu a Kerisinetoma i le faamoemoe o le Meleniuma. Talu ai o le aʻoaʻoga a le lotu e faapea, o ē amiotonu e ō i le lagi a o ē amioleaga e ō i seoli, e leai la se mea e ono maua ai se lalolagi parataiso. O le tatalo faaaʻoaʻo, lea e talosagaina ai le ‘finagalo o le Atua ina ia faia i le lalolagi e pei ona faia i le lagi,’ ua mou atu lona uiga moni i le toʻatele o tagata i lotu a Kerisinetoma. (Mataio 6:10) Peitaʻi ua lē o faapena Molimau a Ieova. Latou te talitonu maumauaʻi sa leʻi fai e Ieova le Atua le lalolagi ina ia “faia fua,” ae na fai “ina ia āina.” (Isaia 45:12, 18) O lea, o valoaga anamua, o le tatalo faaaʻoaʻo, ma le faamoemoe faaapokalipise o le Meleniuma, e fesootaʻi uma lava. A o faagasolo le Pulega a Keriso o le Afe Tausaga, o le a ia faamautinoa ai ua faia le finagalo o Ieova i le lalolagi, e pei ona faia i le lagi.

17. O le ā e faamaonia ai o “tausaga e afe” e tatau ona manatu i ai o le umi moni lava lena o tausaga?

¹⁷ E faaono taimi o loo aliaʻi mai ai le faaupuga “tausaga e afe” i uluaʻi fuaiupu e fitu o le Faaaliga mataupu e 20. E tāua ona mātau le mea moni faapea i le Tusi Paia faa-Peretania, e faafā taimi o loo faaaogā ai faatasi ma le taʻu faamautinoa o le “the” (le), e faaalia ai o loo faasino atu i se meleniuma moni, ae lē i le na o se vaitaimi e lē patino sona umi, e pei ona taumafai le toʻatele o tagata faimanatu a Kerisinetoma e faatalitonu i ai tatou. O le ā le mea o le a tupu i le Meleniuma? Muamua, o le a taofiofia Satani i lena taimi atoa e lē toe gaoioi. (Faaaliga 20:1-3; faatusatusa i le Eperu 2:14.) Maʻeu se na tala lelei!

18. (a) Aiseā e mafai ai ona taʻua le Meleniuma o se “aso” o le faamasinoga? (e) O le ā le mea o le a tupu i le iʻuga o le afe tausaga?

¹⁸ Talu ai ua tuuina atu le “faamasinoga” ia i latou o ē “fai ma tupu faatasi ma Keriso i tausaga e afe,” o lona uiga o lenei vaitaimi, o se “aso” o le faamasinoga e afe tausaga le umi. (Faaaliga 20:4, 6; faatusatusa i le Galuega 17:31; 2 Peteru 3:8.) O le a toe faatutūina aʻe ē ua maliliu, ona faamasinoina faatasi lea o i latou ma ē faasaoolaina mai “le puapuaga tele,” i se tulaga tutusa e fua i a latou galuega, po o gaoioiga a o faagasolo lena taimi. (Faaaliga 20:12, 13) I le iʻuga o le afe tausaga, o le a toe tatala mai ai Satani mo sina taimi puupuu ina ia tuuina ai tagata i se tofotofoga faaiʻu, ma pe a maeʻa lena, ona faaumatia ai lea e faavavau, o ia, o ana temoni, ma so o se tagata fouvale o iai i le lalolagi, o loo mulimuli atu pea ia te ia. (Faaaliga 20:7-10) O tagata o ē sao mai le tofotofoga o le a tusimau loa o latou igoa i “le tusi o le ola” ma o le a ulu atu i se olaga fiafia e faavavau, e auauna ma tapuaʻi atu ia Ieova i luga o  se lalolagi parataiso.—Faaaliga 20:14, 15; Salamo 37:9, 29; Isaia 66:22, 23.

19. (a) Aiseā e mafai ai ona tatou mautinoa o le a faataunuu lava e aunoa ma se faatuai folafolaga ofoofogia o loo faamatala mai i le tusi o le Apokalipise? (e) O le ā le mea o le a talanoaina i le mataupu o sosoo mai?

¹⁹ O le tala lelei lena o loo faamatala mai i le Apokalipise. E lē o ni folafolaga e leai se aogā e faia e tagata. Na tusi mai le aposetolo o Ioane e faapea: “Ua fetalai mai foi lē tietie i le nofoālii, ‘Faauta, ou te faia ia fou mea uma lava.’ Ua fetalai mai foi o ia ia te au, ‘Ia e tusi; auā o upu nei e moni ma le faamaoni ia.’” (Faaaliga 21:5) O le ā e tatau ona tatou fai ina ia iai so tatou sao i le faataunuuga o lenei tala lelei? O loo iai i le tusi o Faaaliga le tele o fautuaga mo i latou o ē mananaʻo e faafiafia le Atua. O le usitaʻia o na fautuaga o le a aumaia ai ia i tatou le fiafia e lē uma, i le taimi nei e oo i le faavavau, e pei ona o le a faaalia i le mataupu o sosoo mai.

[Faaopoopoga i lalo]

Manatu mo le Autaluga

□ O ā upu moni autū o loo taʻua i mataupu e 4 e oo i le 6 o le tusi o Faaaliga, ua avea o se vaega tāua o le tala lelei?

□ O ā tala lelei o loo maua i le Faaaliga mataupu e 7?

□ Aiseā e lē tatau ai ona atuatuvale tagata loto faamaoni i feʻau o le faamasinoga ia o loo maua i le Faaaliga?

□ O ā itu o le a avea ai le Meleniuma ma “aso” o le faamasinoga?

[Fesili mo le Suʻesuʻega]

[Ata i le itulau 10]

O le a tafiesea atoatoa e le Tupu o Iesu Keriso mai le lalolagi, o taua, o oge, ma le oti