Kirisimasi—Aiseā ua Faamanatu ai Foʻi i Atunuu i Sasaʻe?

O SE talitonuga ua loa i atunuu i Sasaʻe ua faamanatu mai ai le Santa Claus o le Kirisimasi. O le talitonuga faa-Korea lena i se tasi e igoa ia Chowangshin, ma e iai foʻi se talitonuga tai faapena i nisi tagata Saina ma tagata Iapani.

O Chowangshin sa manatu i ai o se atua na te vaavaaia le umukuka, o se atua o le afi o lē sa fesootaʻi atu i le tapuaʻiga anamua a Korea lea e tapuaʻia ai le afi. (I aso la ua leva, sa feaveaʻi ai ma le faaeteete lava e tagata Korea malala ola ina ia mautinoa e lē pepē nei malala.) Sa iai le talitonuga faapea o loo mataʻi mai pea e lenei atua amioga a tagata o le aiga mo le tausaga atoa, ma pe a uma le tausaga ona alu lea o ia i le lagi e ala atu i le ogaumu ma le alāasu i le umukuka.

E faapea se manatu, sa faailoa atu Chowangshin ma lana lipoti i le tupu o le lagi i le aso 23 o le masina o Tesema. Sa faatalitalia e toe foʻi ane i le iʻuga o le tausaga e ala ane i le alāasu ma le ogaumu, ina ia aumai ni taui ma ni faasalaga e tusa ai o amioga a tagata taʻitoʻatasi. O le aso lea e toe taliu ane ai o ia, sa tatau ai i tagata o le aiga ona tutu ni molīgaʻo i le umukuka ma so o se vaipanoa lava i totonu o le fale. O āta o lena atua o le umukuka e tali tutusa foʻi ma āta o Santa Claus—sa faaalia o ia i ofu mūmū! Sa masani ona avea ma tū masani mo le fafine e nofotane atu i se aiga, lona faia o se pea totini faa-Korea, ma pe a oo i le aso e sili ona puupuu o le tau mālūlū ona ia avatu lea o lena pea totini i le tinā o lana tane. O lena mea sa fuafua e faaatagia ai ona moomooga ina ia faafualoaina le soifua o le tinā o lana tane, auā o le a faasolo ina uumi aso pe a mavae lena aso.

Pe te lē o vaaia ea ni mea tali tutusa faapena i manatu na muaʻi taʻua, ma le Kirisimasi? E tali tutusa lava a latou tala faamatala ma tū masani: le alāasu, o molīgaʻo, le foaʻiina o meaalofa, o totini, se toeaina e ofu i ofu mūmū, ma le aso e fai ai le faamanatuga. Peitaʻi, e lē lava na o na mea tali tutusa e taliagofie ai le Kirisimasi i Korea. Sa toetoe lava mou atu le talitonuga ia Chowangshin i le taimi na muaʻi faalauiloa mai ai le Kirisimasi i Korea. O le mea moni, o le toʻatele o tagata Korea i aso nei latou te lē iloa sa iai muamua se talitonuga faapena.

E ui i lea, o lenei mea ua faataʻitaʻia ai po ua faapefea i tū masani e fesootaʻi atu i le aso e sili ona puupuu o le tau mālūlū ma le iʻuga o le tausaga,  ona salalau atu i le lalolagi atoa e ala i ni faauigaga eseese. I le senituri lona fā T.A., na suia ai e le lotu sa sili ona iloga i le Emepaea a Roma le igoa o le Saturnalia, o se tausamiga faapaupau a Roma e faamanatu ai le fanau mai o le atua o le lā, ma avea ai lenei tausamiga o se vaega o le Kirisimasi. O le faamanatuga o le Kirisimasi sa faailogaina ai le toe faaolaolaina o tū masani a le atunuu, ae ua faaigoa i se igoa e ese mai. Na mafai faapefea lena mea?

Le Matāfaioi e Faatino i le Foaʻi Atu o Meaalofa

O le foaʻi atu o meaalofa o se tū masani e lē o taitai ona mou atu. Ua āutausagā o fiafia tele tagata Korea i le foaʻi atu ma le mauaina mai o meaalofa. O se tasi lenei o māfuaaga mo le lauiloa o le faamanatuina o le Kirisimasi i Korea.

Ina ua mavae le Taua Lona Lua a le Lalolagi, sa mananaʻo fitafita a le Iunaite Setete ia sa faamautū i Korea, ina ia faamalosia atili a latou faiā ma tagata o le nuu, ma na avea ai falesā o nofoaga latou te feiloaʻi ai ma tufatufa ai meaalofa ma fesoasoani laveaʻi. O le Aso Kirisimasi sa patino ai lava le faatinoina o lenei gaoioiga. E toʻatele tamaiti sa ō atu i falesā e fia iloa po o ā mea o fai ai, ma o iinā sa muamua latou vaaia ai meaalofa o sukalati. E pei la ona e mātau mai, o le toʻatele o i latou sa fiafia tele e faatali le isi Kirisimasi e sosoo ai.

I manatu o na tamaiti, o Santa Claus o ia o se fitafita Amerika e fai sona pulou mūmū pei se totini. Ua faapea mai le Faataoto 19:6: “E uo tagata uma lava ma le tagata foai mea.” Ioe, ua faamaonia le matuā aogā o le foaʻi atu o meaalofa. Ae pei ona e iloa mai lena fuaiupu, o na meaalofa e lē faamautinoaina ai se faigauō e tumau. E oo lava i Korea, e toʻatele i latou e na o le pau lava le mea o loo latou manatuaina e uiga i le lotu a o laiti, o le ʻaina o sukalati. Peitaʻi, sa leʻi mou atu ai le Kirisimasi. A o televave le faateleina o le tamaoaiga o Korea, sa faateleina foʻi faiga faapisinisi, ma o le foaʻi atu o meaalofa o le Kirisimasi o se auala faigofie lena mo le uunaʻia malosi o le tagata faatau e faaalu ana tupe. Sa faaaogā e pisinisi le Kirisimasi e faateleina ai a latou polofiti.

O iinā e te malamalama ai i le ituaiga o Kirisimasi o loo faamanatu i atunuu i Sasaʻe i aso nei. E iai ni oloa fou ua faia ona o le fuafuaga ina ia  matuā tele ni faatauga o le Kirisimasi. O fuafuaga mo faasalalauga faatosina faapisinisi e amata atu lava i le ʻafa mulimuli o le tau māfanafana. E maoaʻe le oso maualuga o faatauga pe a oo i le iʻuga o le tausaga, ona o faatauga uma o meaalofa o le Kirisimasi, o tusi o faamanuiaga, ma lipine o pese Kirisimasi. Ioe, o faasalalauga faatosina faapisinisi o le a lagona ai e se talavou masani ni faalogona lē lelei pe afai e nofo o ia i le fale ma leai ni ana meaalofa e maua i le aso e sosoo ma le Kirisimasi!

A o latalata le Aso Kirisimasi, e matuā tumutumu faleoloa ma nofoaga tetele o faatauga i Seoul, i tagata o loo ō atu e faatau meaalofa, ma o le vaaiga lava lena e tasi i isi aai o atunuu i Sasaʻe. E matuā poloka taavale. O faletalimalo, o nofoaga o pisinisi, o faleʻaiga, ma falekalapu e matuā pāpātutuʻi i tagata e solo atu i ai. E mafai ona lagona atu leo o le pisapisaō—o pesega leoleoā. I le aso e sosoo ma le Kirisimasi, e vaaia ai tane ma fafine onanā o loo feofeoaʻi solo i magāala ua otaotā solo i lapisi.

O le vaaiga moni lava lena o loo iai. O le Kirisimasi i atunuu i Sasaʻe e lē o toe avea o se aso mālōlō o taulamua ai i latou o faapea mai o ni Kerisiano. E manino mai, i Korea ma isi vaipanoa, ua taulamua faiga faapisinisi i le taumafai ia matuā tele sa latou polofiti e maua mai lenei aso mālōlō a Kerisinetoma. Ae po ua na o faiga faapisinisi ea e tuuaʻia mo se Kirisimasi lea ua matuā see ese lava ma le agaga o Keriso? E manaʻomia e Kerisiano moni ona silasila totoʻa atu i le mataupu tāua o loo aofia ai.

Le Amataga Mai o le Kirisimasi

O se manu feʻai ua tuu i se pā lea e i totonu o le nofoaga tausi manu, o loo avea pea o se manu feʻai. Ma o se measesē e sili ona lamatia ai le talitonu faapea ua lata lena manu, ona o lea ua fai sina umi o i totonu o le pā, ma foliga mai o loo fiafia o ia i ana tama. Atonu ua e faalogo i lipoti e uiga i ni tagata faigaluega i nofoaga tausi manu sa osofaʻia e manu feʻai.

I nisi itu, e toetoe lava tutusa foʻi ma o tatou manatu e uiga i le faamanatuga o le Kirisimasi. Muamua, sa pei o se “manu feai” e lē o i totonu o le Faa-Kerisiano. I lalo o le ulutala “Relation to the Roman Saturnalia” (Le Sootaga ma le Saturnalia a Roma), o loo faia ai e le Christian Encyclopedia (i le faa-Korea) * se faamatalaga e faatatau i le Kirisimasi e faapea:

“O faamanatuga faapaupau o le Saturnalia ma le Brumalia (o le Aso Fanau o le Lā Lē Mafaatoʻilaloina ia Tesema 25) sa matuā mauaa i tū masani taʻutaʻua, ua lē mafai ai ona toe aveesea e aafiaga faa-Kerisiano. O le taliaina o le Aso Sa (le aso o Phœbus po o le aso o le lā ma Mithras faapea foʻi le Aso o le Alii) e le emeperoa o Konesetatino . . . atonu ua faapogai ai ona manatu Kerisiano o le senituri lona fā e talafeagai ona tuufaatasi le aso fanau o le Alo o le Atua, ma le aso fanau o le lā faaletino. O le tausamiga faapaupau ma ona faamanatuga lē pulea ma fiafiaga sa matuā lauiloa lava, ma fiafia ai loa Kerisiano talu ai sa fai ma faamolemolega e faaauau ai pea ona faamanatu e ui e itiiti lava sina suiga i lona agaga moni po o le auala e faia ai.”

Pe e te manatu ea sa mafai ona oo mai lena faiga e aunoa ma ni teteega i ai? Ua taʻu mai e le lomifefiloi lava lea e faapea: “Sa tetee faifeʻau Kerisiano o atunuu i Sisifo ma atunuu lalata ane o le itu i Sasaʻe, i le auala lē talafeagai na faamanatu ai le aso fanau o Keriso, ae sa tuuaʻia e Kerisiano mai Mesopotamia o latou uso mai Sisifo o ē sa ifo i tupua ma tapuaʻi i le lā, ona o le taliaina o lenei tausamiga faapaupau e avea ma tausamiga faa-Kerisiano.” E mautinoa lava, e iai se mea na sesē mai lava i le amataga. “Peitaʻi, na vave lava ona talia le tausamiga ma iʻu ai ina matuā faamausalīina, e oo lava i le fouvalega na faia e le lotu Porotesano i le lona sefuluono senituri sa lē mafai ona latou toe aveesea,” o le faamatalaga lea a le lomifefiloi.

Ioe, o le tausamiga mo le atua o le lā, e lē o se vaega o le Faa-Kerisiano moni, sa talia e le lotu na sili ona iloga i lena vaitaimi. Sa ese le igoa na faaigoa ai—peitaʻi na tumau pea ana faiga faapaupau. Ma o iinā na mafai ai ona faaofi mai faiga faapaupau i lotu o loo faapea mai o lotu Kerisiano, ma faaleagaina ai le tulaga faaleagaga o tagata taʻitoʻatasi. Ua faamautinoa mai e talafaasolopito faapea,  a o tuputupu aʻe Kerisinetoma, o le uiga sa amata mai ai o le “alolofa atu i e ua ita mai” na suia i le matuā faaleagaina o amioga tatau ma taua mataʻutia.

Na oo ane le taimi, na manino mai e ui lava i lona igoa taufaasesē, le Kirisimasi ae sa ia faaatagia maia lona amataga faapaupau i faamanatuga lē taupulea, o inuga lē faatuaoia i le ava malosi, o faafiafiaga, o siva, o le foaʻiina o meaalofa, ma le teuteuina o fale i laau. Ina ia ausia le sini autū o faiga faapisinisi—ia tele ni faatau—ua faaaogāina ai le Kirisimasi i so o se auala e mafai ai. Ua viiviia e le ʻau faasalalau o tala fou; ua faafiafiaina ai tagata lautele. I le taulaga o Seoul, e iai se faleoloa e faapitoa i le faatauina atu o ofuvae laiti (underwear) sa faasalalau faapitoa mai e le televise e ala i le faaali mai luma o lona faamalama o se laau Kirisimasi o loo teuteuina i na o ofuvae laiti lava. Sa mafai ona iloa atu le agaga o le Kirisimasi, peitaʻi o se upu i le faailoga o le faafeiloaʻia o le Keriso na matuā misi atoa.

Se Malamalamaga Faale-Tusi Paia e Faatatau i le Kirisimasi

O le ā se lesona tatou te aʻoaʻoina mai na talaaga faasolopito ma mea na tupu mai ai? Afai na sesē ona faamau le ofutino mai lava i le faamau muamua, e na o le pau la le auala e faasaʻo lelei ai le faafitauli, o le toe amata faamau mai. Po ua lē  moni ea lena? E ui lava i lena mea moni, ae o loo finau mai nisi faapea, e ui lava i ona amataga faapaupau i le tapuaʻiga i le lā, ae o lea ua talia e Kerisinetoma le Kirisimasi. Ua latou manatu ai la, ua faapaiaina le aso mālōlō e avea ma aso fanau o Keriso ma ua faaofi i ai se faauigaga fou.

E mafai ona tatou aʻoaʻoina se lesona tāua mai se mea na tupu i Iuta anamua. I le 612 T.L.M., na faaofi atu ai e tagata Iutaia le tapuaʻiga faapaupau i le lā i totonu o le malumalu i Ierusalema. Pe na faapaiaina ea lena tapuaʻiga faapaupau ona sa faia i totonu o le nofoaga ua uma ona tuuina atu mo le tapuaʻiga mamā ia Ieova le Atua? Sa tusi le tusitala o le Tusi Paia o Esekielu e faatatau i le tapuaʻiga i le lā sa faia i le malumalu i Ierusalema e faapea: “Faauta i le faitotoa o le malumalu o Ieova, i le va o le faapaologa ma le fata faitaulaga, o tagata pe toaluafulu ma le toalima, ua u atu . . . latou mata i sasae, o latou ifo atu i le la i sasae. Ona fetalai mai lea o ia ia te au, Le atalii e o le tagata, ua e iloa ea lena? se mea māmā ea i le aiga o Iuta ina ua faia o mea e inosia o loo latou o faia iina? auā ua latou faatumuina le nuu i le saua, ua latou toe liliu foi e faaonoono mai ia te au; faauta foi, ua latou avae le la laau i o latou isu [“i loʻu isu,” NW].”—Esekielu 8:16, 17.

Ioe, na i lo le faapaiaina, na avea lena tapuaʻiga faapaupau ma itu na lamatia ai le malumalu atoa. O na faiga na sosolo atu i Iuta ma avea ma pogai o faiga sauā ma le matuā faaleagaina o amioga tatau i lena nuu. Ua tali tutusa lava ma Kerisinetoma, pe a oo i le taimi o le Kirisimasi, ua aliali mai ai amioga ma faiga ia sa amata mai le tapuaʻiga i le lā o Saturnalia. O le mea e mataʻina ai, e leʻi tele ni tausaga talu ona maua e Esekielu lena vaaiga, ae oo loa le faamasinoga a le Atua ia Ierusalema—na faatamaʻia ai le aai e autau a Papelonia.—2 Nofoaiga a Tupu 36:15-20.

Atonu e te ʻata i le faamatalaga e uiga i le tamaitiiti o Iesu lea na fai e le tagata aʻoga atamai Korea, e pei ona faamatalaina i le mataupu na muamua atu. Ae o le mea moni lava talu ai o se faamatalaga e sau mai se tagata e leai sona poto saʻo e uiga ia Keriso, e ono saʻo ai lava ona manatu faapena. Atonu e uunaʻia ai tagata o loo latou faamanatuina le Kirisimasi ina ia mafaufau loloto. Aiseā? Auā ua lē taulau ona faaāta mai e le Kirisimasi i se tulaga saʻo Keriso. O le mea moni, ua faanenefuina ai lona tulaga moni o loo iai i le taimi nei. E lē o toe pepe Iesu i se fale o manu.

O loo faaauau pea ona faamatilatila mai e le Tusi Paia le avea nei o Iesu ma Mesia, o le Tupu malosi o le Malo faalelagi o le Atua. (Faaaliga 11:15) Ua nofo sauni o ia e faaoo mai le iʻuga i le mativa ma puapuaga ia e lē o mafai ona galo i isi tagata i le vaitaimi o le Kirisimasi a o latou faaalia lo latou agaga foaʻi.

Pe a tuusaʻo le manatu, e leai se mea aogā o maua mai le Kirisimasi mo atunuu o Kerisinetoma po o isi foʻi atunuu, e aofia ai atunuu i Sasaʻe. Na i lo lena, ua tataʻi ese ai manatu o tagata mai le feʻau moni faa-Kerisiano e uiga i le Malo o le Atua ma le iʻuga o lenei faiga amioleaga o mea. (Mataio 24:14) Matou te valaaulia oe ina ia e fesili atu i Molimau a Ieova e faatatau i le auala o le a faaoo mai ai lena iʻuga. Ma e mafai ona e aʻoaʻoina ai mai ia i latou mea e uiga i faamanuiaga e faavavau o le a sosoo mai i lena taimi i luga o le lalolagi, i le taʻitaʻiga a le Malo o le Atua ma le Tupu faapaleina, o Iesu Keriso.—Faaaliga 21:3, 4.

[Faaopoopoga i lalo]

[Faamatalaga faaopoopo i le itulau 5]

E toʻatele tamaiti sa ō atu i falesā e fia iloa po o ā mea o fai ai, ma maua ai ni a latou meaalofa o sukalati. Ona latou fiafia ai lea e faatali le isi Kirisimasi e sosoo ai

[Faamatalaga faaopoopo i le itulau 6]

Ua fesoasoani le Kirisimasi e faaofi mai faiga faapaupau i lotu o loo faapea mai o lotu Kerisiano

[Ata i le itulau 7]

Le aso e sosoo ma le Kirisimasi i le taulaga o Seoul, i Korea

[Ata i le itulau 8]

E lē o toe pepe Keriso ae ua avea nei o le Tupu malosi o le Malo o le Atua