Na Latou Maua le Loto Tetele

E LĒ faigofie i taimi uma ona maua le loto tele e talaʻi ai. O le mea moni, na faapea mai le aposetolo o Paulo i se tasi taimi, na ia faia faapea “ma le finafinau tele lava.” (1 Tesalonia 2:2) Po o le ‘finafinau’ e talaʻi atu e maua ai ni aogā i taumafaiga o faaalu ai? E lē mafai ona matuā faamautinoa atu e iai ni mea mataʻina e tutupu e oo i ai, ae e masani ona fiafia tagata o le Atua ua latou mauaina le loto tele. Manatu i nisi o faataʻitaʻiga nei.

Na faalogologo ma le totoʻa se teineitiiti e iva tausaga le matua e igoa ia Tara a o taʻu atu e le faiaʻoga i le vasega faapea i le Taua Lona Lua a le Lalolagi, sa tatau ai i pagota Siū o i nofoaga o faasalaga ona faapipii le Fetu samasama o Tavita i o latou ofu o ofuina ina ia iloagofie ai i latou. Sa tau mānatu Tara po ua tatau ona fai atu sana faamatalaga. Ua manatua e Tara faapea: “Na ou tatalo ma oʻu mata o pupula.” Ona sii lea o lona lima ma fai atu faapea sa iai foʻi Molimau a Ieova i na nofoaga o faasalaga, ma sa tatau ia i latou ona faapipii se tafatolu lanu violē i o latou ofu na ofuina. Na faaosofia ai le naunau o le faiaʻoga ma faafetai atu i ai. O le faamatalaga a Tara na tatala ai le avanoa mo ni talanoaga atili ma le faiaʻoga, o lē na mulimuli ane ona ia faaalia foʻi le ata vitiō o le Jehovah’s Witnesses Stand Firm Against Nazi Assault i le vasega atoa.

I Guinea, i Aferika i Sisifo, na manaʻo ai se tagata talavou talaʻi e leʻi papatisoina e igoa ia Irène ina ia agaʻigaʻi i luma i lana faiva. Na faalaeiʻauina o ia e le misionare na suʻesuʻeina le Tusi Paia ma ia ina ia taumafai e tufaina ni mekasini o Le Olomatamata ma le Ala Mai! i tamaiti e masani ai i le aʻoga. Sa faatalatū Irène talu ai sa lē fiafia i ai ana aumea i le aʻoga. Peitaʻi, i le uunaʻia e le faalaeiʻauga a le misionare, na filifili ai Irène e talanoa muamua atu i le teineitiiti aʻoga lea e foliga mai e sili ona tetee. O le mea na faateʻia ai Irène, ona sa āno ifo i ai le teine ma talia ma le fiafia mekasini. Na sosoo ai ma le taliaina foʻi e isi tamaiti o le aʻoga. Na sili atu ona tele mekasini na tufaina e Irène i lena masina na i lo mekasini na ia tufaina atu i masina e lima e muamua atu pe a tuu faatasi le aofaʻiga.

I Trinidad, sa lagona ai e se toeaina o le faapotopotoga le faatalatū e talanoa atu i le tamaʻitaʻi pule aʻoga o se aʻoga ina ia faaali atu i ai le aogā faaleaʻoaʻoga o le mekasini o le Ala Mai! E ui i lea, sa ia mauaina le loto tele. Ua faapea mai o ia: “Sa ou tatalo a o oʻu ulu atu i le lotoā. Sa faigatā ona ou talitonuina le faaalia mai e le pule aʻoga o le matuā fiafia tele.” Na talia e ia le mekasini o le Ala Mai! i le mataupu “O le ā le Faamoemoe mo Talavou i Aso Nei?” ma na ioe foʻi e faaaogā le mekasini e aʻoaʻo ai le vasega. Talu mai lena taimi, ua ia taliaina mekasini e 40 o loo aofia ai ni mataupu eseese.

A o talavou, e masani ona faigatā ia Vaughn ona talaʻi. “E oo ia te aʻu le fefe, e āfu oʻu alofilima, ma e topetope laʻu tautala—sa lē mafai ona faagesegese aʻu faamatalaga.” Ae peitaʻi, na oo ina avea o ia ma faifeʻau faataimi atoa. Ae na lē faigofie pea ia te ia i taimi uma ona maua le loto tele e talanoa atu ai. I se tasi taimi, ina ua foʻi mai ma le faanoanoa mai le sailia o se galuega, na ia manaʻo ai e molimau atu i se tasi o i le nofoaafi, “ina ia iai se mea lelei e maua mai i lena aso faalēmanuia.” Ae sa ia lagona le fefe i foliga mamalu o tagata faipisinisi o i le nofoaafi. Mulimuli ane lava, na ia maua ai le loto tele e talanoa atu ai i se tamāloa matua na i ona tafatafa. Na iʻu ina faia ai se talanoaga umi lava. Na faapea atu le tamāloa faipisinisi: “E ese ma le lelei o au fesili ae o oe o se tagata talavou. Po o oe o se tagata o aʻoga faafaifeʻau?” Na tali atu i ai Vaughn, “E leai, o aʻu o se tasi o Molimau a Ieova.” Na ʻataʻata le tamāloa ma faapea ifo, “E lētioa lava la, o lea ua ou malamalama.”

O Molimau uma nei—ma le anoanoaʻi o isi—ua latou fiafia ua latou mauaina le loto tetele e talaʻi atu ai. Pe o le a e faia foʻi lena lava mea?

[Ata i le itulau 25]

Tara

[Ata i le itulau 25]

Vaughn