Pe E te Manatua?

Po o e mafaufau lelei ea i lomiga talu ai nei o Le Olomatamata? Afai o lea, o le a avea la o se mea e faafiafiaina ai oe le manatuaina o mea nei:

□ O ā nisi o fesili e tatau i ni Kerisiano se toʻalua ona la fesiligia ai i laʻua lava a o leʻi amata ona la mafaufau e faamau?

‘Po ua ou matuā mautinoa ea le tulaga faaleagaga o le isi ma lona tuutōina atu i le Atua? Pe o mafai ona ou faaātaina faalemafaufau lo ma auauna ai ma ia i le Atua mo le olaga atoa? Po ua lava se taimi o mātaulia ai e le tasi uiga o le isi? Po ua ou mautinoa ea o le a tumau ona talafeagai i maʻua uma? Po ua iloa lelei e le tasi amioga a le isi i le taimi ua tuanaʻi ma tulaga o loo iai i le taimi nei?’—8/15, itulau 31.

□ O le ā na uiga i ai le fetalaiga a Iesu i ona soo e faapea: “O outou, o le masima o le lalolagi”? (Mataio 5:13)

Na faailoa ai e Iesu faapea o le talaʻi atu o ona soo i isi e uiga i le Malo o le Atua o le a avea ma taaʻiga e laveaʻiina ai pe faasaoina ai ola o ē o faalogologo. O le mea moni, o i latou o ē na faatatauina fetalaiga a Iesu o le a puipuia mai le faaleagaina tau amio ma le faaleagaga i le lalolagi.—8/15, itulau 32.

□ E mafai faapefea e alii ma tamaʻitaʻi o loo faia se tuugātala ona ʻalofia le maileia i amioga lē mamā faaleituaiga?

Afai o loo e tuutala, e atamai mo oe ona ʻalofia le tuua na o oulua ma lē ua fuafua lua te faaipoipo i ni tulaga lē talafeagai. E sili ona lelei le lua auaumea faatasi a o iai ma nisi tagata pe i nofoaga faitele. Ia tuu ni tapulaa i fefaaaliaʻiga o le alofa, ia faaaloalo le tasi i faalogona ma le loto fuatiaifo o le isi.—9/1, itulau 17, 18.

□ O le ā le atamai?

O le tomai lea e vaai ai i se mataupu ma mātaulia lona faatulagaga e ala i le malamalama i sootaga o ona vaega ma le mea atoa, ma mauaina ai le uiga moni o lena mataupu. (Faataoto 4:1)—9/15, itulau 13.

□ O le ā o loo faafinagaloina e Ieova mai ia i tatou i aso nei?

E mautinoa lava, o le mea lea o loo faafinagaloina e Ieova mai ia i tatou o le faalogo atu i Lona Alo ma mulimuli i lana faaaʻoaʻoga ma ana aʻoaʻoga. (Mataio 16:24; 1 Peteru 2:21)—9/15, itulau 22.

□ E na o ai e mafai ona latou maua le filēmū?

Talu ai o Ieova o “le Atua e ona le manuia [“filēmū,” NW ],” e na o tagata foʻi la o ē alolofa i le Atua ma faaaloalo loloto i ana mataupu silisili amiotonu, e mafai ona latou maua le filēmū. (Roma 15:33)—10/1, itulau 11.

□ Na faapefea ona maua e Iosefa le malosi tau i amioga tatau e fai atu ai e leai i le avā a Potifara i lea aso ma lea aso?

Sa faatāua e Iosefa le la faiā ma Ieova e sili mamao atu na i lo lona faatāua o fiafiaga e vave mavae. E lē gata i lea, e ui sa lē iai o ia i lalo o le tulafono tauatua, ae sa manino lelei i le mafaufau o Iosefa mataupu silisili tau amio. (Kenese 39:9)—10/1, itulau 29.

□ O le ā le tāua o lo tatou naunau e faamagalo i o tatou uso?

O o tatou faamoemoega ina ia mauaina pea le faamagaloga a le Atua e faalagolago tele i lo tatou naunau e faamagalo atu i isi. (Mataio 6:12, 14; Luka 11:4)—10/15, itulau 17.

□ O ā ituaiga o agasala sa faatatau atu i ai le Mataio 18:15-17, ma o le ā e faaalia mai ai?

O agasala na uiga i ai Iesu e tatau ona matuā lava le matuiā e ono mafai ai ona manatu i le tagata fai measesē e “pei o le faapaupau, po o le tagata ao lafoga.” Sa lē tatau i tagata Iutaia ona faifaimea ma tagata o Nuu Ese, ma sa latou ʻalofia le ʻau ao lafoga. E faatatau atu la le Mataio 18:15-17 i agasala matuiā, ae lē i na o ni nai mea leaga po o ni faatigā mai o isi lea e mafai lava ona e faamagaloina ma faagalo. (Mataio 18:21, 22)—10/15, itulau 19.

□ O le ā e aofia i le naunau moni i le Afioga a le Atua?

O le naunau i le Afioga a le Atua e uunaʻia ai se tasi e ola ia ōgatusa ma mea o manaʻomia mai ai. (Salamo 119:97, 101, 105) E manaʻomia ai ni fetuutuunaʻiga faifai pea o mafaufauga o se tasi ma le auala o loo ola ai.—11/1, itulau 14.

□ Ona ua mauaina mea e tele mai le aao o Ieova, o le ā e mafai ona tatou tuuina atu e taui atu ai i le Tupu silisili o ia foʻi Lē Foaʻi silisili?

Ua faaali mai e le Tusi Paia faapea o le meaalofa silisili e mafai ona tatou tuuina atu ia Ieova o “le taulaga o le viiga.” (Eperu 13:15) Aiseā? Auā o lenei taulaga e fesootaʻi tuusaʻo atu i le faasaoina o ola, o se faanaunauga autū o Ieova i lenei taimi o le iʻuga. (Esekielu 18:23)—11/1, itulau 21.

□ O le ā na uiga i ai manatu o Solomona ina ua ia tusi: “O upu a e popoto e pei o tui ia”? (Failauga 12:11)

O upu a i latou o loo iai le poto faale-Atua e uunaʻia ai mafaufau o ē faitau po o ē faalogologo ina ia faia se agaʻigaʻi i luma e ōgatusa ma upu poto ua faitau pe faalogologo i ai.—11/15, itulau 21.

□ O le ā le faautauta faale-Atua?

O le tomai lea e faaeseeseina ai le saʻo mai le sesē ona filifili lea i le ala saʻo. O le suʻesuʻeina ma le faatatauina o le Afioga a le Atua e maua ai le faautauta.—11/15, itulau 25.

□ O le ā e tatau ona faapaleniina le naunautaʻi e talia tiute tauave? (1 Timoteo 3:1)

E tatau ona faapaleniina e filifiliga lelei. E leai se tasi e tatau ona ia soona tauaveina ni tofiga se tele ma iʻu ai ina mou atu lona olioli i le auaunaga a Ieova. E lelei le iai o se agaga naunautaʻi, peitaʻi o le naunautaʻi e tatau foʻi ona atagia atu ai le loto maulalo ma le “faautauta.” (Tito 2:12; Faaaliga 3:15, 16)—12/1, itulau 28.

□ E mafai faapefea ona faafetaiaʻia le luʻi o le avea ma mātua?

Ua fautuaina e le Atua mātua ina ia avea o ni faaaʻoaʻo, o ni uō, o ni ē fetalanoaaʻi, ma o ni faiaʻoga. (Teuteronome 6:6, 7)—12/1, itulau 32.