Ua Aauina Atu e Kiliata Misionare “e Oo Lava i le Tuluʻiga o le Lalolagi”

UA SILIA nei ma le ʻafa senituri talu ona aauina atu e le Aʻoga Faale-Tusi Paia a le Olomatamata o Kiliata misionare i isi atunuu. Ia Setema 11, 1999, na faauu ai le vasega lona 107 a Kiliata. E toʻa 48 le ʻau aʻoʻoga sa iai mai atunuu e 11, ma ua tofia atu nei i latou i atunuu eseese e 24. O le a latou faatasi atu i le faitau afe o isi misionare, o ē ua faatinoina se matāfaioi mataʻina i le faataunuuina o fetalaiga mulimuli a Iesu a o leʻi toe afio aʻe i le lagi. Sa ia valoia e faapea o le a avea ona soo “ma molimau ia te [ia] . . . e oo lava i le tuluʻiga o le lalolagi.”—Galuega 1:8.

O le polokalame o le faauuga, e pei ona amataina mai le Nofoaga Tau Aʻoaʻoga a le Olomatamata i Patterson, i Niu Ioka, ua faamaonia le avea ma se faatasiga sili faatasi ai ma ni siʻomaga matagofie e faia ai. Sa matuā fiafia lava le ʻau faauu ona o le auai mai i le faatasiga o o latou tauaiga, o uō māfana, ma mālō valaaulia. Pe a tuufaatasi uma ma i latou na faalogologo ma maimoaina le polokalame e ala i leitiō ma vitiō sa fesootaʻi atu i fale i  Brooklyn ma Wallkill, ona maua lea o le aofia atoa e 4,992.

Ia Auauna Faamaoni ia Ieova ma Tuaoi

“O Ai o Loo i le Itu a Ieova?” O le matua lena o saunoaga amata a Carey Barber, o ia o se sui o le Vaega Pule ma o le taʻitaʻifono foʻi o le polokalame o le faauuga. Sa ia faamatala mai faapea, o le luʻi lenei sa fesagaʻi foʻi ma le fanauga a Isaraelu i aso o Mose. Sa faamanatu atu i le ʻau faauu ma le aofia uma e faapea, e toʻatele le fanauga a Isaraelu na maliliu ma maʻimau o latou ola i le vaomatua talu ai lo latou lē tumau ma le faamaoni i le itu a Ieova. Ina ua latou lolo atu i le ifo i tupua, sa latou ‘nonofo i lalo e aai ma inu, ona tutū lea i luga e sisiva.’ (Esoto 32:1-29) Sa lapataʻi mai Iesu i Kerisiano e faatatau i lea lava lamatiaga: “Ia outou, neʻi mafatia o outou loto i le soona ulavale, ma le onā, ma le popole i mea a le olaga nei, neʻi faafuasei mai lea aso ia te outou.”—Luka 21:34-36, LF.

O le failauga na sosoo ai, o Gene Smalley, mai le Matāgaluega o Tusitusiga, sa ia faatulaʻi le fesili i le ʻau faauu e faapea: “Po o le a Faamaonia le Avea o Oe o se Mapusaga?” Sa ia taʻua e faapea sa faaaogā i le faa-Peretania le upu Eleni pa·re·go·riʹa e faaigoa ai se paluga o se vailaau faafomaʻi mo le faateʻaina o lagona mafatia ma tigā. Peitaʻi, sa faaaogā e le aposetolo o Paulo lenei upu faa-Eleni e iai sona uiga loloto, i le Kolose 4:11 e faamatala ai i latou na galulue faatasi ma ia. I le New World Translation, o loo faaliliuina ai lenei upu “o se fesoasoani e faamalosia ai.”

I o latou tofiga, e mafai ai e misionare faauu ona avea o ni mapusaga faaonaponei i se tulaga e sili ona faatauvaa e ala i lo latou loto maulalo e avea o se fesoasoani e faamalosia ai uso ma tuafāfine, ma e ala foʻi i lo latou faaātagia atu o se agaga felagolagomaʻi ma le alofa a o latou auaufaatasi ma isi uso misionare.

Ona sosoo lea ma le lauga a Daniel Sydlik, o ia o se sui o le Vaega Pule, i le mataupu “Le Tulafono Faaauro e Ola Ai.” Sa ia faamatala mai faapea, o le mataupu silisili tāua na faataatia mai e Iesu i le Mataio 7:12 faapea, “o mea uma foi tou te loto i ai ia faia e tagata ia te outou, ia faapea lava ona outou faia ia te i latou,” e aofia ai le faia o mea lelei mo isi, ae lē na o le ʻalo ese mai le faia o se mea leaga.

Ina ia taulau manuia i le faatinoina o lenei gaoioiga, e manaʻomia ai ni mea se tolu: o se mata e vaavaai mataalia, o se loto e iai lagona alofa, ma se lima e fesoasoani. I le aotelega o le manatu, na ia faapea mai: “Pe afai e ia i tatou se faanaunauga e fia fesoasoani atu, ia faia loa lava le fesoasoani. E tatau ona iai ni a tatou taumafaiga faaopoopo ina ia faia mo isi mea tatou te ono mananaʻo foʻi latou te faia mai mo i tatou.” E sili ona moni lenei mea mo misionare o loo ō atu i isi atunuu ina ia fesoasoani i tagata ia latou faatinoina le Faa-Kerisiano moni.

Ua Avatu e Faiaʻoga ni Upu Faamanatu Māfana

Sa faamalosiʻau atu se tasi o faiaʻoga o Kiliata, o Karl Adams i misionare faauu ina ia “Faaauau Pea Ona Tuputupu Aʻe.” I ā itu? Muamua, i le poto, ma le tomai e faaaogā lelei ai lena poto. I Kiliata, sa aʻoaʻoina ai e le ʻau aʻoʻoga le auala e faia ai sailiiliga ina ia malamalama i le pogai autū ma le faatulagaga o mea o loo tusia i le Tusi Paia. Sa faalaeiʻauina i latou ina ia manatunatu pe faapefea i tala taʻitasi ona aafia ai o latou olaga. Sa uunaʻia i latou e faaauau pea i le faia o lenei mea.

“Lona lua, ia tuputupu aʻe pea i le alofa. O le alofa o se mea, pe afai e tausia lelei, e mafai ona  ola. Pe afai e tuulafoaʻia, e mafai ona mou atu,” o le faamatalaga lea a le uso o Adams. (Filipi 1:9) I le taimi nei, i le avea o ni misionare, o le a manaʻomia ona latou tuputupu aʻe i le alofa a o fesagaʻi ma tulaga eseese. Ma lona tolu: ‘Ia tuputupu aʻe i le alofa tunoa ma le poto e uiga i lo tatou Alii ma lo tatou Faaola lea o Iesu Keriso.’ (2 Peteru 3:18) Na faapea mai le failauga: “O le agalelei ofoofogia lenei ua faaalia e Ieova e ala mai i lona Alo. A o tuputupu aʻe lo tatou talisapaia mo lena alofa tunoa, e tuputupu aʻe ai foʻi lo tatou fiafia e faia le finagalo o le Atua ma i le faataulauina o mea ua ia tofia mai ia i tatou e fai.”

O le isi faiaʻoga o Kiliata, o Mark Noumair, sa ia talanoaina le matua “Ia Taliaina Luʻi ma le Alofa, Ona Mafai Lea Ona E Onosaʻia.” Sa ia timaʻi mai e faapea: “Ia faamasani e talia tulaga o loo fai ma luʻi i le olaga faamisionare i le alofa, ona mafai lea ona e onosaʻia. E aʻoaʻia e Ieova na o i latou lava e alofa i ai. E tusa lava pe e te lagona faapea e iai se fautuaga e lē o saʻo, ua soona mateletele naʻuā, pe lē o faia ma le tonu, ae o lou alofa mo Ieova ma le lua faiā ma ia o le a fesoasoani ia te oe e te taliaina ai.”

Sa taʻua e le uso o Noumair faapea o le auaunaga faamisionare e aofia ai ni tiute se tele. “Peitaʻi o tiute e fai e aunoa ma se alofa o le a lē faamalieina ai oe. Pe afai e lē o iai le alofa, lona uiga o ou tiute i le aiga—e pei o le kuka, faia o faatau, le fufuluina o se fuālaau ʻaina, le faapunaina o le vai—e mafai ona avea ma mea mamafa. E tatau ona e faatali teisi ma fesili ifo ia te oe lava, ‘Aiseā ua ou faia ai nei tiute?’ Pe afai e te faapea ifo ia te oe lava, ‘O aʻu taumafaiga o loo fai ina ia ou lagolagosua ai i le ola mālōlōina ma le fiafia o isi oʻu uso misionare,’ lona uiga la o le a lē faigatā ona e onosaʻia.” I se aotelega, na ia timaʻi mai ai: “E tusa lava po o le taliaina o aʻoaʻiga, le faatinoina o ou tofiga faamisionare, po o le foʻiaina o ni feeseeseaʻiga, ae o le onosaʻia i le alofa o le a mafai ai ona e tumau i lou tofiga. ‘E le uma le alofa.’”—1 Korinito 13:8.

Na sosoo ai ma le taʻitaʻia e le isi faiaʻoga o Kiliata, o Wallace Liverance le toe faaātaina mai o nisi o mea matagofie na tutupu, lea sa ʻoliʻoli ai le ʻau aʻoʻoga a o latou galulue faatasi ma faapotopotoga i lena vaipanoa. E lē gata i lo latou ō atu mai lea fale i lea fale, ae sa latou faaaogā foʻi la latou toleniga faamisionare e saili atu ai i tagata i nofoaga e paka ai loli, o faletāmea, o nofoaga faatali nofoaafi, ma isi lava nofoaga.

Ua Aumaia e Misionare ua Iai le Potomasani ni Faalaeiʻauga

Pe a ō atu misionare fou i se atunuu ese, pe iai ea se pogai e soona popolevale ai? Pe mafai ea ona latou faafetaiaʻia luʻi mai se tofiga i se atunuu ese? O le ā ua faia e ofisa o lālā ina ia fesoasoani ai i nei misionare fou e taunuu atu, ina ia latou taulau manuia ai? Ina ia taliina nei fesili ma isi foʻi fesili, sa faatalatalanoa ai e Steven Lett, o le Matāgaluega o le Auaunaga, ma David Splane, o le Matāgaluega o Tusitusiga, ni uso o ē sa auai atu i lena taimi i le aʻoga mo sui o komiti o lālā lea sa faia i le Nofoaga Tau Aʻoaʻoga a le Olomatamata. O uso sa faatalanoaina o loo auauna i komiti o lālā i Sepania, Hong Kong, Laiperia, Benin, Madagascar, Pasili, ma Iapani.

Sa aumaia e nei auauna a Ieova ua iai lo latou potomasani, o le toʻatele lava o i latou ua faitau fia sefulu tausaga o auauna o ni misionare, ni faalaeiʻauga mo le ʻau faauu faapea foʻi i o latou mātua ma tauaiga o ē na auai atu. E tusa ai o mea na tutupu totino ia i latou lava faapea foʻi i isi o latou uso misionare, sa latou faaalia ai, e mafai lava ona faafetaiaʻia ma le manuia ni faafitauli ma popolega e tulaʻi mai. Atonu e telē se faafitauli latou te ono fesagaʻi, “peitaʻi e mafai ona foʻia, ma e fesoasoani mai le Sosaiete ia i tatou,” o le faamatalaga lea a Raimo Kuokkanen, o se misionare i Madagascar. “Ma te leʻi filifilia le tofiga, sa ma mauaina,” o le faamatalaga lena a Östen Gustavsson, o loo auauna nei i Pasili. “O lea na ma filifili ai e ma te faia le mea e sili ona lelei ina ia ma tumau ai i lo ma tofiga.” O James Linton, o loo auauna i Iapani, sa ia faapea mai, o le mea na fesoasoani ia te ia o “le iai iinā o uso o ē ua leva ona auauna i se tofiga faamisionare.” O le auaunaga faamisionare o se ala fiafia ma le faamalieina lea e auauna ai ia Ieova ma tausia ana mamoe.

Le ʻAlofiaina o le Mala o Loo Lepetia ai le Tulaga Faaleagaga

O Theodore Jaracz, o se sui o le Vaega Pule, na faauu o ia mai le vasega lona fitu a Kiliata i le  1946, sa ia tauaaoina le lauga faaiʻu, i le matua e faapea “Le Luʻi o le Tumau Pea i le Olaola Faaleagaga.” I lona muaʻi faaalia mai o mea mataʻutia o loo tutupu i vaega eseese o le lalolagi, sa ia faasino mai ai faapea, ma le mautinoa o loo tutupu mala e sili atu ona matuiā i le fanau a tagata.

I le faasino atu i le Salamo 91, na taʻua ai e le uso o Jaracz “faamai” ma “mala” ia ua faamaʻia ma fasiotia ai faaleagaga le faitau miliona o tagata. Ua faaaogā e le Tiapolo ma lana faiga amioleaga o mea faufauga e pei ni faamaʻi, e faavae aʻe i le matuā tuutōina atu i le sailia o le poto maoaʻe ma le matapeʻapeʻa i mea faitino, ina ia faavaivaia ma fasiotia ai le tulaga faaleagaga, peitaʻi ua faamautinoa mai e Ieova i tatou e faapea, o le a lē latalata mai lenei mala i so o se tasi e “nofo i le mea lilo o i ai lē Silisili ese.”—Salamo 91:1-7.

Na saunoa le uso o Jaracz e faapea: “O le luʻi, o le tumau lea ona ola mālōlōina i le faatuatua, ia tumau i le nofoaga o le saogalemu. E lē mafai ona tatou faapei o tagata faatauemu ‘e lē o iai se tulaga faaleagaga.’ O le faafitauli lenei mo aso nei. O se faafitauli o loo fesagaʻi ma i tatou uma o loo iai i le faalapotopotoga. E mafai foʻi ona fesagaʻi ma oe i lou tofiga faamisionare.” (Iuta 18, 19) Peitaʻi na taʻu atu i misionare faauu e faapea, e mafai ona latou tausisia ma le manuia lo latou tulaga faaleagaga i o latou tofiga. Mo se faaaʻoaʻoga, sa faalaeiʻauina i latou ina ia manatunatu, i le auala o loo tūtūmau ai o tatou uso i Rusia, i Asia, ma i atunuu Aferika—e ui lava i faasāsāga, o teteega ogaoga, o tauemuga, o faufauga a tagata e lē talitonu o loo soifua le Atua, ma tuuaʻiga sesē. Ma i le tele o tulaga, ua faaopoopo mai faafitauli faaletino, ua māfua ona o feteenaʻiga i le va o ituaiga tau tupuaga, ma le utiuti o mea e sili ona manaʻomia.

Pe afai ua iai se tau faavaivai i le tulaga faaleagaga, “e manaʻomia tele ona taulaʻi atu i le pogai o le faafitauli ona taumafai loa lea e foʻia, e ala i le faaaogā o fautuaga o le Afioga a le Atua.” Sa aumai foʻi ni faaaʻoaʻoga faale-Tusi Paia. Sa faalaeiʻauina Iosua ina ia faitau lana kopi o le Tulafono i aso taʻitasi. (Iosua 1:8) Ina ua maua le tusi o le Tulafono i aso o Iosia, sa faamanuia mai Ieova i le faatatauina ma le faamaoni o ona faatonuga o loo iai. (2 Tupu 23:2, 3) Sa iloa e Timoteo tusitusiga paia mai lava i lona pepe meamea. (2 Timoteo 3:14, 15) O tagata Perea sa lē na o ni tagata e faalogologo lelei; sa taʻua i latou o ē “amio lelei” talu ai sa latou sailiili i le Tusi Paia i lea aso ma lea aso. (Galuega 17:10, 11) Ma o Iesu Keriso o le faaaʻoaʻo silisili lea o sē na ia silafia le Afioga a le Atua, ma faaaogāina foʻi.—Mataio 4:1-11.

I saunoaga faaiʻu, na timaʻi mai ai ma le māfana le uso o Jaracz i misionare fou e faapea: “O lenei ua outou sauniuni e tauaveina lo outou tofiga faamisionare. Ma o le a outou agaʻi atu i atunuu mamao, i le tele o vaega eseese o le lalolagi. Pe afai tatou te fetaiaʻi ma le luʻi o le tumau pea i le olaola faaleagaga, o le a tatou lē faatagaina so o se mea lava e faatosina ese i tatou mai le faatinoina pea o mea ua uma ona tatou filifili e fai. O le a outou talaʻi ma le maelegā, ma faalaeiʻauina isi e faataʻitaʻi i lo outou faatuatua, ma o le a matou tatalo faatasi ma outou, ina ia faaolaolaina e Ieova i latou o loo tou aʻoaʻoina, e pei foʻi ona ia faia ia i tatou. Ona mafai foʻi lea e nisi e toʻatele ona latou sosola ese mai le mala faaleagaga o loo faatamaʻiaina le lalolagi aoao i aso nei. O le a latou auai faatasi ma i tatou i le faateleina o le aofaʻiga o ē faia le finagalo o Ieova. Ma tau lava ina faamanuia mai Ieova ia te outou i lena itu.”

Ina ua maeʻa ona faitau e le taʻitaʻifono faamanuiaga mai atunuu eseese o le lalolagi, ona oo loa lea i le taimi e tufatufa atu ai i le ʻau aʻoʻoga o latou tusipasi. Na maeʻa lena sosoo ai ma le faitauina mai o se tusi māfana o le agaga talisapaia, sa tusia e le ʻau aʻoʻoga. Maʻeu lo latou agaga faafetai ia Ieova ma lana faalapotopotoga, ona o le toleniga faapitoa sa latou maua, ae maise i o latou tofiga faamisionare o le a agaʻi atu ai “i le tuluʻiga o le lalolagi”!—Galuega 1:8.

[Pusa i le itulau 29]

Faamaumauga o le Vasega

Aofaʻi o atunuu o loo iai o latou sui: 11

Aofaʻi o atunuu ua tofia i ai: 24

Aofaʻi o tagata aʻoga: 48

Aofaʻi o ulugalii: 24

Faatatauga o tausaga: 34

Faatatauga o tausaga i le upu moni: 17

Faatatauga o tausaga i le faiva faataimi atoa: 12

[Ata i le itulau 26]

Vasega Faauu Lona 107 o le Aʻoga Faale-Tusi Paia a le Olomatamata o Kiliata

I le lisi i lalo, o laina e amata mai luma agaʻi i tua, ma o igoa e lisi mai le itu agavale i le itu taumatau i laina taʻitasi.

1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.