“O le Toaitiiti” ua Fai “ma Toaafe”
“O le Toaitiiti” ua Fai “ma Toaafe”
“O le toaitiiti e fai ma toaafe, ma le ua faatauvaa e fai ma nuu malosi.”—ISAIA 60:22.
1, 2. (a) Aiseā ua ufitia ai e le pogisa le lalolagi i aso nei? (e) Ua faapefea ona faasolosolo le faasusuluina mai o le malamalama o Ieova i ona tagata?
“E UFITIA le lalolagi i le pouliuli, e ufitia foi nuu i le pogisa; a e [“susulu,” NW] ae Ieova i ou luga, ma le pupula o Ieova e aliali mai lea i ou luga.” (Isaia 60:2) O upu nei ua matuā fetaui lelei ona faamatalaina ai le tulaga ua iai le lalolagi talu mai le 1919. Ua teena e Kerisinetoma le faailoga o le faatasi tautupu mai o Iesu Keriso, “le malamalama o le lalolagi.” (Ioane 8:12; Mataio 24:3) Ona o le “lotoa tele” o Satani, le taʻitaʻi o “alii o le pouliuli o lenei lalolagi,” na avea ai le senituri e 20 o se taimi sa aupito sili ona sauā o le talafaasolopito o tagata, ma tumu i mea e faatamaʻiaina ai. (Faaaliga 12:12; Efeso 6:12) O le toʻatele o tagata o loo ola i le pogisa faaleagaga.
2 Peitaʻi, o loo susulu pea le malamalama i aso nei. Ua ‘susulu atu’ le malamalama o Ieova i luga o ana auauna, le vaega totoe faauuina, o ē o loo avea ma sui faalelalolagi o lana “fafine” faalelagi. (Isaia 60:1) Ae maise lava talu mai lo latou faasaʻolotoina mai lo latou saisaitiaga faa-Papelonia i le 1919, ua latou faaatagia atu ai le mamalu o le Atua ma ua ‘pupula atu lo latou malamalama i luma o tagata.’ (Mataio 5:16) Mai le 1919 seʻi oo i le 1931, na matuā faatupulaʻia pea ona susulu malosi atu le malamalama o le Malo a o aveesea e i latou nei aafiaga sa iai o manatu faa-Papelonia. Sa faateleina lo latou faitau aofaʻi i le faitau sefulu o afe a o faataunuuina e Ieova lana folafolaga: “Ou te aofaiina lava e o totoe o Isaraelu, ou te faatasia i latou pei o le lafu mamoe i Posara, pei o le lafu manu i totonu o le mea e fafaga ai, latou te soona ualolo ona o le vao tagata.” (Mika 2:12) I le 1931, na manino atili mai ai le mamalu o Ieova i luga o ona tagata ina ua latou taliaina le igoa Molimau a Ieova.—Isaia 43:10, 12.
3. Sa faapefea ona oo ina manino e faapea o le a susulu mai le malamalama o Ieova i isi e ese mai i le ʻau faauuina?
3 Pe o le a susulu mai ea le malamalama o Ieova i na o luga lava o i latou o loo totoe o le “lafu mamoe itiiti”? (Luka 12:32) E leai. O le lomiga o Le Olomatamata faa-Peretania o Setema 1, 1931, sa faasino atu i se isi vaega. E ala i se faamalamalamaga manino o le Esekielu 9:1-11, sa faaalia ai e faapea o le tagata o loo iai le fagu vaitusi a le tusiupu o loo taʻua i na fuaiupu, o loo faaātaina ai le vaega totoe faauuina. O ai o loo faailogaina o latou muāulu e lena “tagata”? O “isi mamoe,” i latou o loo iai le faamoemoe o le ola e faavavau i le lalolagi parataiso. (Ioane 10:16; Salamo 37:29) I le 1935 na iloa ai lenei vaega o “isi mamoe” e faapea o i latou nei o le “motu o tagata e toatele mai atu nuu uma” sa iloa i le vaʻaiga a le aposetolo o Ioane. (Faaaliga 7:9-14) Mai le 1935 seʻia oo mai i le taimi nei, e tele se uaʻi atu o loo taulaʻi i le aoaoina mai o le motu o tagata e toʻatele.
4. O ai “tupu” ma “nuu ese” o loo faasino atu i ai le Isaia 60:3?
4 O loo faasino atu le valoaga a Isaia i lenei galuega o le aoaoina ina ua faapea mai: “E o mai nuu ese i lou malamalama, o tupu foi e o mai i latou i le pupula o lou alu ae.” (Isaia 60:3) O ai “tupu” o loo faasino atu i ai iinei? O ē o loo totoe o le 144,000 o ē, e faatasi ai ma Iesu Keriso, o suli o le Malo faalelagi ma o loo taʻimua i le galuega o le molimau atu. (Roma 8:17; Faaaliga 12:17; 14:1) I aso nei, o nai afe o ē o loo soifua pea o le vaega totoe o se aofaʻiga toʻaitiiti pe a fua atu i le aofaʻiga e sili ona toʻatele o “nuu ese,” i latou o loo iai se faamoemoe faalelalolagi o ē ua ō mai ia Ieova mo faatonuga ma ua latou valaʻauliaina isi ia faia le mea lava lea e tasi.—Isaia 2:3.
O Auauna Maelegā a Ieova
5. (a) O ā mea moni e faaalia ai e lē o faaitiitia le maelegā o tagata o Ieova? (e) O fea atunuu sa matilatila ai faatelega i le 1999? (Tagaʻi i le faasologa i le itulau e 17 e oo i le 20.)
5 Maʻeu se maelegā ua faaalia e Molimau a Ieova i aso nei a o faagasolo le 20 senituri! Ma e ui i le faateleina o omiga, ae sa lē faaitiitia ai lo latou maelegā a o tau lalata mai le tausaga e 2000. Sa latou faatāuaina pea le faatonuga a Iesu: “E fai nuu uma lava ma soo.” (Mataio 28:19, 20) O le aofaʻi o le ʻau talaʻi tiotio o le tala lelei i le tausaga faaleauaunaga mulimuli o le senituri e 20 na ausia se tumutumuga fou e 5,912,492. Sa latou faaaluina se aofaʻiga iloga o le 1,144,566,849 itula e talanoa ai i isi e uiga i le Atua ma ana fuafuaga. Sa latou faia le 420,047,796 o toe asiga i tagata fiafia ma taulimaina le 4,433,884 suʻesuʻega faale-Tusi Paia i aiga e aunoa ma se totogi. Maʻeu se tala matagofie o le auaunaga maelegā!
6. O le ā le faatulagaga fou sa faia mo paeonia, ma o le ā le tali mai na iai?
6 Ia Ianuari talu ai, na faasilasila mai ai e le Vaega Pule se fetuutuunaʻiga i itula e manaʻomia mo paeonia. E toʻatele na latou faaaogā lenei avanoa e ulu atu ai i le ʻau o paeonia sauatoa po o le lagolago. Mo se faaaʻoaʻoga, i uluaʻi masina e fā o le 1999, na mauaina ai e le ofisa o le lālā i Holani se aofaʻiga o talosaga mo le paeonia sauatoa e tusa e faafā taimi e sili atu ai na i lo le taimi lava lena i le tausaga na muamua atu. Ua lipotia mai i Ghana e faapea: “Talu mai le taimi sa faatulagaina ai le sini fou o itula mo paeonia, ua oso maualuga le faitau aofaʻi o la matou ʻau paeonia sauatoa.” I le tausaga faaleauaunaga e 1999, o le aofaʻiga o paeonia i le lalolagi atoa na ausia le 738,343—o se faamaoniga ofoofogia o le ‘maelegā mo galuega lelei.’—Tito 2:14.
7. Ua faapefea ona faamanuiaina e Ieova gaoioiga maelegā a ana auauna?
7 Po ua faamanuia ea Ieova i nei gaoioiga maelegā? Ioe. E ala mai ia Isaia ua ia fetalai: “Ia e fetepai i itu uma, ma e vaai, o loo faapotopoto mai i latou uma; ua latou o mai ia te oe, o au tama tane e o mai i latou i mea mamao, e afisi foi au tama fafine i lou itu.” (Isaia 60:4) O “tama tane” ma “tama fafine” faauuina o ē ua uma ona faapotopoto mai o loo faaauau pea ona auauna ma le maelegā i le Atua. Ma i le taimi nei, ua aoaoina foʻi isi mamoe a Iesu i le itu a “atalii” ma “afafine” faauuina a Ieova i le 234 atunuu ma motu o le sami.
“Galuega Lelei Uma Lava”
8. O ā ‘galuega lelei’ o loo tiotio ai Molimau a Ieova?
8 O loo i Kerisiano le tiute tauave e talaʻi le tala lelei o le Malo ma ia fesoasoani i tagata fiafia ina ia avea ma soo. Peitaʻi ua ‘saunia i latou mo galuega lelei uma lava.’ (2 Timoteo 3:17) O lea, o loo latou tausia lelei ai o latou aiga, faaali atu le agaga talimālō, ma asiasi atu i ē mamaʻi. (1 Timoteo 5:8; Eperu 13:16) Ma o loo aofia ai ē o loo ofo atu lo tatou taimi i galuega e pei o le fausiaina o Maota o le Malo—o se galuega o loo avatu ai foʻi se molimau. Ina ua maeʻa le fausiaina o se tasi o maota i Togo, sa naunau i latou e autū i ai se lotu e talitonu i le faia o vavega ma faamālōlōga e i lena lava vaipanoa, e fia iloa pe aiseā ua mafai ai e Molimau a Ieova ona fausia o latou lava maota ae o le latou lotu e tau suʻe mai tagata e totogi e faia le galuega! Ua lipotia mai i Togo e faapea ua oo ai ina le lelei ona fausia o Maota o le Malo ua iai ni aafiaga lelei i na vaipanoa, ua oo ai ina taumafai tagata e ō mai e nonofo i fale mautotogi po o le fausia foʻi o o latou fale i vaipanoa o le a fausia ai nei maota.
9. O faapefea ona tali atu Molimau a Ieova pe a oo mai mala?
9 I nisi taimi e tulaʻi mai ai foʻi le isi ituaiga o galuega lelei. A o faagasolo le tausaga faaleauaunaga na teʻa nei, e tele atunuu sa aafia i mala, ma o le tele lava o taimi o Molimau a Ieova lava e muamua taunuu e avatu le fesoasoani. O se faaaʻoaʻoga, sa faaleagaina le tele o vaega o Honduras i le afā o Mitch. Sa vave lava ona faatulaga e le lālā ni komiti mo faalavelave faafuaseʻi latou te faamaopoopoina fesoasoani laveaʻi. Sa tauofo Molimau i Honduras ma le tele o isi atunuu e foaʻi atu lavalava, o taumafa, o vailaau mo togafitiga faafomaʻi, atoa ma isi mea e manaʻomia. Sa faaaogā e le Komiti o Faugāfale o latou tomai e toe fausia ai fale. E leʻi umi lava, ae toe maua e o tatou uso o ē sa aafia i le mala le fesoasoani ina ia toe fai a latou gaoioiga masani. I Ekutoa, sa ō atu foʻi i ai Molimau a Ieova e fesoasoani i o latou uso ina ua faaleagaina o latou fale i ni lōlōga malolosi. Ina ua maeʻa ona mātauina le lelei o le auala na latou taulimaina ai le tulaga o mea na iai, na faapea mai se sui aloaʻia o le malo: “Afai e faigaluega ia te aʻu tagata nei, e ofoofogia mea ou te faia! O tagata e pei o outou e tatau ona iai i vaega uma o le lalolagi.” O galuega lelei faapena e aumaia ai le viiga ia Ieova le Atua ma o faamaoniga o la tatou “amio Atua e aoga lea i mea uma lava.”—1 Timoteo 4:8.
Latou te “Felelei e Pei se Ao”
10. E ui lava ua faaitiitia le numera o le ʻau faauuina, ae aiseā ua faalauiloa atu ai le suafa o Ieova i se tulaga e leʻi faapea ona iai muamua?
10 Ua oo nei ina fesili mai Ieova: “O ai ea i latou na o loo felelei e pei se ao, e pei o lupe foi i o latou faitotoa? Auā e faatalitali nuu tu matafaga ia te au, e muamua foi vaa o Tasesa, e aumaia lau fanau i mea mamao . . . E atiina ae ou pa e tagata ese; e auauna mai o latou tupu ia te oe.” (Isaia 60:8-10) O ē na muamua tali mai i le ‘susulu atu’ o le malamalama o Ieova o lana “fanau,” o Kerisiano faauuina. Ona sosoo ai lea ma “tagata ese,” le motu o tagata e toʻatele, o ē o loo auauna ma le faamaoni i o latou uso faauuina, i le mulimuli atu i le latou taʻitaʻiga i le talaʻia o le tala lelei. O lea la, e ui lava ua faaitiitia le numera o le ʻau faauuina, ae ua faalauiloa atu nei le suafa o Ieova i le lalolagi atoa i se tulaga e leʻi faapea ona iai muamua.
11. (a) O le ā o loo faaauauina pea ma o le ā ua iʻu i ai i le 1999? (e) O fea atunuu sa matilatila le numera o ē na papatisoina i le 1999? (Tagaʻi i le faasologa i le itulau e 17 e oo i le 20.)
11 O le iʻuga, e faitau miliona ua lolofi mai e “pei o lupe foi i o latou faitotoa,” ma maua le lafitaga i totonu o le faapotopotoga Kerisiano. E faitau selau afe o loo faaopoopoina i tausaga taʻitasi, ma o loo tatala le auala mo isi e ō mai ai. Ua faapea mai Isaia: “E avanoa pea lava ou faitotoa, e le punitia i le ao ma le po; ina ia aumaia ia te oe le oloa o nuu ese.” (Isaia 60:11) I le tausaga talu ai e 323,439 sa papatisoina e fai ma faailoga o lo latou tuuina atu ia Ieova, ma na te leʻi tapunia lava faitotoʻa. O loo faaauau pea ona lolofi mai i ia faitotoʻa le motu o tagata e toʻatele “o mea ua manaomia e nuu uma.” (Hakai 2:7) E aunoa lava ma se tasi o i latou nei o ē ua mananaʻo e tuua le pogisa e faapea o teena. (Ioane 12:46) Tau ina ia aua lava neʻi mou atu le talisapaia e i latou na o le malamalama!
Leai se Fefe e Ui i Teteega
12. Ua faapefea ona taumafai i latou o ē mananaʻo i le pouliuli e tapē le malamalama?
12 O i latou e mananaʻo i le pouliuli e ʻinoʻino i le malamalama o Ieova. (Ioane 3:19) O nisi ua oo lava ina taumafai e tapē lena malamalama. Sa faatalitalia lava o le mea lenei e ono tupu. E oo lava ia Iesu, “le malamalama moni lea, na te faamalamalamaina tagata uma lava,” sa ulagia, teena, ma mulimuli ane fasiotia e tagata o lona lava nuu. (Ioane 1:9) I le gasologa mai o le 20 senituri, sa amusia ai foʻi Molimau a Ieova, sa faafalepuipuiina, faasāina le galuega, ma oo lava ina fasiotia, a o latou faaatagia atu ma le faamaoni le malamalama o Ieova. I nai tausaga e leʻi mamao atu, sa taumafai ai ē tetee e faasalalau faamatalaga lē saʻo i nusipepa, televise, ma leitiō e uiga ia i latou o loo faaatagiaina atu le malamalama o le Atua. O nisi sa mananaʻo ia talitonu tagata e faapea o Molimau a Ieova o ni tagata faatupu faalavelave ma e tatau ona faatapulaa po o le faasā. Pe sa taulau ea nei tagata tetee?
13. O le ā ua iʻu i ai le faamatala atu ma le faautauta o mea moni e uiga i la tatou galuega i le ʻau faasalalau i nusipepa, leitiō ma televise?
13 E leai. Pe a talafeagai ai, e ō atu Molimau a Ieova i nusipepa, televise, ma leitiō e faamatala atu mea moni. O le iʻuga, sa matuā telē le faasalalauina o le suafa o Ieova i nusipepa ma mekasini atoa ma leitiō ma televise. Sa iai ni aafiaga lelei o lenei mea i le galuega talaʻi. Mo se faaaʻoaʻoga, o se polokalame i le TV a le atunuu o Tenemaka sa iai se mataupu faapea “Le pogai o loo faaitiitia ai le faatuatua o tagata Tenemaka.” Sa faatalanoa ai sui mai isi lotu, atoa ma Molimau a Ieova. Ina ua uma, sa faapea mai se fafine sa matamata i le polokalame: “Sa matuā manino lava po o ai sa iai le agaga o le Atua.” Sa amataina sana suʻesuʻega.
14. I lo latou maasiasi ma le faalumaina, o le ā ua lē o toe umi nei ona faamalosia lea o tagata tetee ia latou amanaʻiaina?
14 E iloa e Molimau a Ieova faapea e toʻatele tagata o lenei lalolagi o le a tetee mai ia i latou. (Ioane 17:14) Ae ui lava i lea, ua faamalosia i latou i le valoaga a Isaia o loo faapea mai: “O le fanau o e na faasaua ia te oe latou te o mai, ma latou ifo ia te oe; o i latou uma e na ʻinoʻino ia te oe, latou te ifo atu i ou alofivae; latou te faaigoa ia te oe, O le aai a Ieova, O Siona o le aai a le Paia o Isaraelu.” (Isaia 60:14) I lo latou maasiasi ma le faalumaina, o nei tagata tetee, ua lē o toe umi nei ona latou amanaʻiaina lea e faapea, o le mea moni o le Atua lea sa latou faasagatau i ai. O ai e mafai ona manumalo i lea ituaiga o taua?
15. Ua faapefea ona “susu i le suāsusu o nuu ese” Molimau a Ieova, ma ua faapefea ona atagia mai lenei mea i la latou galuega faaevagelia ma le aʻoaʻo atu?
15 Ua folafola atili mai e Ieova e faapea: “A o lenei e faia oe e aʻu ma nuu matagofie e faavavau . . . E te susu i le suāsusu o nuu ese, e te susu foi i susu o tupu; e te iloa foi o aʻu o Ieova o lou Faaola.” (Isaia 60:15, 16) Ioe, o Ieova o le Faaola o ona tagata. Afai latou te faalagolago ia te ia, o le a latou tumau “e faavavau.” Ma o le a latou “susu i le suāsusu o nuu ese,” i le faaaogāina o ni ālāmanuia e maua mo le faaauilumaina o le tapuaʻiga moni. Mo se faaaʻoaʻoga, o le faaaogāina ma le atamai o komepiuta atoa ma fesootaʻiga faaonaponei ua mafai ai ona lolomi lomiga o Le Olomatamata i gagana e 121 ma le Ala Mai! i gagana e 62 i le taimi tutusa ma le faa-Peretania. Ua faatulagaina se polokalame fou o le komepiuta e mafai ona fesoasoani i le faaliliuina o le New World Translation i gagana fou, ma o faaliliuga faapena ua aumaia ai le olioli tele. Ina ua tatalaina se vaega o Tusitusiga Kerisiano Eleni i le gagana Croatia i le 1999, e faitau afe sa tau fai maligi loimata o le olioli. Na faapea mai se tasi uso ua matua lava: “Ua leva tele ona ou faatali i lenei Tusi Paia. O le a ou oti ma le malie o loʻu loto!” O le faasalalauina atu o le New World Translation, a lē o se tusi atoa ia o sona vaega, ua silia nei i le 100 miliona i gagana e 34.
Tapulaa Maualuluga o Amioga Tatau
16, 17. (a) E ui lava e faigatā, ae aiseā e tāua ai ona tausisia tapulaa maualuluga a Ieova? (e) O le ā le mea na tupu e faataʻitaʻia ai e mafai e tagata talavou ona ʻalofia le faaleagaina e le lalolagi?
16 Na fetalai Iesu e faapea: “O i latou uma o e fai mea leaga e ʻinoʻino i latou i le malamalama.” (Ioane 3:20) I le isi itu, o i latou o ē tumau i le malamalama e naunau i tapulaa maualuluga a Ieova. Ua fetalai Ieova e ala mai ia Isaia, e faapea: “O lou nuu foi e amiotonu i latou uma lava.” (Isaia 60:21a) E mafai ona avea ma luʻi le tausisia o tapulaa amiotonu i se lalolagi ua matuā faateleina ai feusuaʻiga lē mamā faaleituaiga, o le pepelo, o le matapeʻapeʻa, atoa ma le fiamatamuamua. Mo se faaaʻoaʻoga, i nisi atunuu, o loo matuā lelei ai le tulaga tau tamaoaiga ma e faigofie lava ona faasesēina ai se tasi i le sailia o le tamaoaiga. Peitaʻi, na lapataʻi mai Paulo e faapea: “O e manao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia.” (1 Timoteo 6:9) Pagā le mataʻutia o le a iai pe afai e matuā aafia loloto se tasi i faiga faapisinisi ma ia faalēaogāina ai mea e sili ona tāua, e pei o le aufaatasiga faa-Kerisiano, le auaunaga paia, mataupu silisili tau amio mamā, atoa ma tiute tauave faaleaiga!
17 O le tausisia o tapulaa amiotonu e faapitoa lava le faigatā mo ē talavou, ona o le toʻatele o ē latou te tupulaga o loo aafia i le faaaogāsesēina o fuālaau faasāina ma amioga lē mamā faaleituaiga. I Suriname, na alu atu ai se tama aulelei lava o le aʻoga ma tauanau se teine e 14 tausaga ina ia la faia se feusuaʻiga faaleituaiga. Sa teena e le teine, ma faamatala atu e faasā e le Tusi Paia le faia faapea i fafo o le liʻo o le faaipoipoga. Sa tauemu i ai isi teine o le aʻoga ma taumafai e uunaʻia o ia ina ia sui lona mafaufau, ma fai atu i ai o loo mananaʻo uma isi teine e momoe ma le tama lena. E ui lava i lea, sa maumauaʻi pea le teine talavou. I ni nai vaiaso mulimuli ane ai, na faamaonia ai ua maua le tama i le HIV ma sa maʻi tigaina. Sa fiafia le teine ona sa ia usitaʻi i le faatonuga a Ieova ina ia ‘faamamao mai le faitaaga.’ (Galuega 15:28, 29) E matuā mitamita Molimau a Ieova i o latou talavou o ē o loo tutū mausalī mo le mea saʻo. O lo latou faatuatua, ma le faatuatua o o latou mātua, e ‘viia’—e faamamaluina ai—le suafa o Ieova le Atua.—Isaia 60:21e.
Ua Aumaia e Ieova le Faatelega
18. (a) O le ā le mea sili ua faia e Ieova mo ona tagata? (e) O le ā le faamaoniga e iloa ai e faapea o lenei tuputupu aʻe o le a faaauau pea, ma o ā faamoemoega faamamaluina o loo iai mo i latou e tumau i le malamalama?
18 Ioe, ua faasusulu mai e Ieova le malamalama i ona tagata, faamanuia i latou, taʻitaʻia i latou, ma faamalosia i latou. I le faagasologa o le senituri e 20, na latou vaai ai i le faataunuuga o upu a Isaia: “O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” (Isaia 60:22) Mai se vaega toʻaitiiti na iai i tuā i le 1919, “o le toaitiiti” ua sili atu moni lava i se “toaafe.” Ma o lenei tuputupu aʻe e leʻi gata mai lava! I le tausaga na teʻa nei e 14,088,751 sa auai i le faamanatuina o le Faamanatuga o le maliu o Iesu. O le toʻatele o i latou nei sa lē o ni Molimau o maelegā e pei ona masani ai. Tatou te fiafia ona sa latou auai mai i lena faamanatuga tāua, ma tatou te valaaulia i latou ina ia faaauau ona agaʻigaʻi atu i le malamalama. Ua matuā malamalama lava le susulu mai o Ieova i ona tagata. O loo avanoa pea le faitotoʻa i lana faalapotopotoga. O lea, tau ina ia tatou maumauaʻi uma lava e tumau i le malamalama o Ieova. Maʻeu ni faamanuiaga ua iʻu i ai mo i tatou i le taimi nei ona o le faia faapea! Ma e maʻeu se olioli o le a aumaia ai i le lumanaʻi pe a oo ina viia Ieova e foafoaga uma ma olioli ai i le pupula o lona mamalu!—Faaaliga 5:13, 14.
Pe Mafai Ona E Faamatala?
• O ai o loo faaatagiaina atu le mamalu o Ieova i nei aso e gata ai?
• O le ā ua faaalia ai e lē o faaitiitia le maelegā o tagata o Ieova?
• O ā nisi o galuega lelei o loo pisi ai Molimau a Ieova?
• E ui lava i teteega aasa, ae o le ā le mea ua tatou mautinoa ai?
[Fesili mo le Suʻesuʻega]
[Siata i le itulau 17-20]
LIPOTI A MOLIMAU A IEOVA I LE LALOLAGI AOAO MO LE TAUSAGA FAALEAUAUNAGA O LE 1999
(See bound volume)
[Ata i le itulau 15]
O loo lolofi mai pea tagata i le faalapotopotoga a Ieova
[Ata i le itulau 16]
Tatou te fiafia ona o loo matuā faaavanoa mai pea e Ieova le faitotoʻa mo ē alolofa i le malamalama