Sui Fou o le Vaega Pule

I LE Aso Toonai, Oketopa 2, 1999, na faaiʻua ai le Fonotaga Faaletausaga a le Watch Tower Bible and Tract Society of Pennsylvania i se faasilasilaga na faateʻia ai. Sa faafiafiaina le 10,594 o ē na auai e aofia ai ma ē sa fesootaʻi mai i laina o telefoni, i le faalogo atu ua faaopoopo ni sui fou e toʻafā i le Vaega Pule a Molimau a Ieova. O nei sui fou, o Kerisiano faauuina uma, o Samuel F. Herd; M. Stephen Lett; Guy H. Pierce; ma David H. Splane.

• Na amata ona paeonia Samuel Herd i le 1958, ma mai le 1965 i le 1997, sa ia galue o se ovasia matāgaluega ma ovasia itumalo. Mulimuli ane, ua avea ai o ia ma lana avā, o Gloria, ma vaega o le aiga Peteli a le Iunaite Setete, lea sa galue ai le uso o Herd i le Matāgaluega o le Auaunaga. Sa ia auauna foʻi o se fesoasoani i le Komiti o le Auaunaga.

• O Stephen Lett sa amata ona paeonia ia Tesema 1966, ma mai le 1967 i le 1971, na ia auauna ai i Peteli i le Iunaite Setete. Ia Oketopa 1971, sa ia faaipoipo ai i lana avā, o Susan, ma ulu atu i le auaunaga paeonia faapito. Mai le 1979 i le 1998, sa ia auauna ai o se ovasia matāgaluega. Talu mai Aperila 1998, ua avea i laʻua ma Susan ma vaega o le aiga Peteli a le Iunaite Setete. A o iai iinā sa ia galue i le Matāgaluega o le Auaunaga ma na avea ma fesoasoani i le Komiti Tauaʻoaʻoga.

• Na tausia aʻe e Guy Pierce ma lana avā se la fanau ona mulimuli ane lea amata ona la paeonia ia Aperila 1982. Sa ia auauna o se ovasia matāgaluega mai le 1986 seʻia oo i le 1997, ina ua avea o ia ma lana avā, o Penny, ma vaega o le aiga Peteli i le Iunaite Setete. Sa auauna le uso o Pierce o se fesoasoani i le Komiti o le ʻAu Faigaluega.

• O David Splane na amata ona paeonia ia Setema 1963. Ina ua faauu mai le vasega 42 o Kiliata, sa ia auauna o se misionare i Senegal, i Aferika, ona galue lea o se ovasia matāgaluega i Kanata mo le 19 tausaga. Ua iai o ia ma lana avā, o Linda, i Peteli i le Iunaite Setete talu mai le 1990, lea sa galue ai le uso o Splane i matāgaluega o le Auaunaga ma Tusitusiga. Talu mai le 1998, sa avea o se fesoasoani i le Komiti o Tusitusiga.

E faaopoopo atu i sui fou e toʻafā, ua iai nei i le Vaega Pule ia C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, ma D. Sydlik. O la tatou tatalo uma ia faaauau ona faamanuia ma faamalosia e Ieova le Vaega Pule, lenei ua faatoʻateleina, a o faaauau ona latou vaavaaia le galuega a tagata o le Atua i le lalolagi aoao ma tautua mo o latou manaʻoga faaleagaga.