O Afioga Faavaloaga a le Atua e Aumaia le Faamoemoe  mo le Lumanaʻi

ONA o le Afioga a le Atua, le Tusi Paia, ua mafai ai e Kerisiano moni ona vaai atu i le lumanaʻi ma le faatuatua, faamoemoe, ma se uiga mautinoa. Ona o le saogalemu i la latou faiā ma Ieova le Atua, ua latou tulimataʻia ai le lumanaʻi. E pei lava ona faamatala mai e le lauga amata i Tauaofiaga Itumalo o “Afioga Faavaloaga a le Atua,” ua avea Molimau a Ieova ma ni tagata aʻoga e matuā naunau i valoaga o le Tusi Paia mo le tele o tausaga. O lea, o le ā ua teuina e Ieova mo ona tagata i nei tauaofiaga? O le iai o le Tusi Paia ia i latou uma na aofia ai, na latou tau fai naunau uma ai e fia iloa. Ua faatulaga atu matua o aso taʻitasi e avea ma tamaʻi ulutala.

ASO MUAMUA: Savavali i le Malamalama o le Afioga a le Atua

Na faamatala e le lauga ua faamatuaina “Ua Taʻitaʻia i Tatou e le Afioga a le Atua” faapea ua faapei tagata o Ieova o se tagata na amata mai lana malaga i le pogisa o le po. A o oso aʻe le la, na ia vaai atu ai i āta lafoia, ae ina ua tutonu le la, ona manino ai lea o lana vaai. E pei ona valoia i le Faataoto 4:18, ua faapena ona manino le vaai a tagata o Ieova i o latou ala i le susulu malosi mai o le malamalama o le upu moni mai afioga faavaloaga a le Atua. E lē o tuua i latou ia tautevateva i le pogisa faaleagaga.

O le lauga autū na faamatuaina, “Ia Uaʻi Atu i Afioga Faavaloaga a le Atua,” na faamanatu mai ai i le ʻau faalogologo faapea o i latou o loo vāai atu ia Ieova o loo faasaoina mai le lē fiafia ma le lē mautonu o loo aafia ai tagata o loo mulimuli atu i mesia pepelo ma perofeta pepelo. I se faaeseesega manino, e matuā anoanoaʻi faamaoniga e molimau i le Mesia moni, o Iesu Keriso. Mo se faaaʻoaʻoga, o le faaliliuina faavavega o Iesu ua muaʻi sauni ai se āta mo ia i le avea ma Tupu ua faanofotupuina o le Malo o le Atua. Talu ai lona afio mai i le mana o le Malo i le 1914, ua avea ai foʻi Iesu ma “fetu ao” o loo taʻua i le 2 Peteru 1:19. Na faapea mai le failauga: “I le avea ma Fetuao Faa-Mesia, ua ia faailoa atu ai se aso fou, po o se vaitaimi, o le tafa o āta mo le fanau uma a tagata usiusitaʻi.”

I le faatomuaina mai o le polokalame i le aoauli, na faalautele ai e le lauga o lona matua, “Ia Susulu e Pei o Mea e Faamalamalama Ai” le Efeso 5:8, lea o loo fautua mai ai le aposetolo o Paulo ia i tatou ina ia “savavali ia pei o e ua malamalama.” O Kerisiano o ni ē e susulu e pei o ni mea e faamalamalama ai, e lē i le na o le tufa atu i isi o le Afioga a le Atua ae i le faatatauina foʻi o le Tusi Paia i o latou olaga i le faaaʻoaʻo atu ia Iesu.

Ina ia tatou susulu atu e pei o ni mea e faamalamalama ai, e ao ona “Ia Fiafia i le Faitauina o le Afioga a le Atua.” O lenei matua sa talanoaina i se lauga faasolo e tolu ni ona vaega. Ina ua maeʻa ona siiina mai upu a Abraham Lincoln, o lē na ia taʻua le Tusi Paia “o le meaalofa sili ua tuuina mai e le Atua i tagata,” na fesiligia ai e le failauga muamua le aofia pe o le ā ua faaalia e la latou masani o le faitau e faatatau i le loloto o lo latou talisapaia mo le Afioga a Ieova. Na faalaeiʻauina le ʻau faalogologo ina ia faitau ma le faaeteete le Tusi Paia, i le faaalu o se taimi e faaāta ai i o latou mafaufau tala faale-Tusi Paia ma faafesootaʻi manatu fou ma manatu ua uma ona latou aʻoaʻoina.

Na faamamafa mai e le isi vaega na sosoo ai o le lauga faasolo le manaʻoga ina ia suʻesuʻe, e lē o le tau ina faitau pe a maua se taimi, pe afai o le a tatou aveina i totonu “mea aano.” (Eperu 5:13, 14) Na taʻua e le failauga faapea e matuā atiina aʻe i tatou e le suʻesuʻe, pe afai e muaʻi ‘saunia o tatou loto,’ e pei ona sa faia e le ositaulaga Isaraelu o Esera. (Esera 7:10) Ae aiseā e tāua tele ai le suʻesuʻe? Ona e iai sana taaʻiga tuusaʻo i la tatou faiā ma Ieova. O lea, o suʻesuʻega faale-Tusi Paia e ao ona tāua, faafiafiaina ai, ma faafouina ai, e ui lava e aofia ai aʻoaʻiga tau le mafaufau ma taumafaiga. E faapefea ona tatou maua le taimi mo suʻesuʻega uigā? E ala i le ‘faaaogā tatau o le taimi’ sa faaalu i mea e lē tāua tele, e pei ona taʻua e le failauga mulimuli o le lauga faasolo. (Efeso 5:16) Ioe, o le ki i le mauaina o le taimi o le matuā faaaogā tatau lea o le taimi ua tatou maua.

Na faailoaina i le lauga o lona matua “E Faamalosia e le Atua Lē ua Vaivai” faapea e toʻatele tagata ua vaivai i aso nei. Ina ia tatou maua le “matuā tele o le mana” mo le faiva faa-Kerisiano, e manaʻomia ona tatou faalagolago ia Ieova, o lē “na te avatua le malosi i e ua vaivai.” (2 Korinito 4:7; Isaia 40:29) O fesoasoani eseese e faamalosia ai e aofia ai le Afioga a le Atua, tatalo, le faapotopotoga Kerisiano, faia e lē aunoa o se sao i le faiva faa-Kerisiano, ovasia Kerisiano, ma faaaʻoaʻoga faamaoni a isi. O le matua “Ua Tatau Ona Avea ma Aʻoaʻo Ina ua Leva” na faamatilatila mai ai le manaʻoga mo Kerisiano ina ia avea ma faiaʻoga ma ni tagata talaʻi ma ia galulue mamafa i le atiina aʻe o le ‘tomai o le aʻoaʻo atu.’—2 Timoteo 4:2.

O le lauga mulimuli o le aso, “O i Latou e Tau Faasaga i le Atua e Lē Manumalo,” na taʻua ai ni taumafaiga lē faavaea na faia talu ai nei i nisi o atunuu ina ia faaigoaina Molimau a Ieova o se vaega faalotu mataʻutia. Ae e lē manaʻomia ona tatou matataʻu, auā ua faapea mai le Isaia 54:17: “O auupega uma e faia e tau ma oe e le manuia ia; o laulaufaiva uma e finau atu ia te oe i le faamasinoga e te faasalaina ia; o le tofi lena o auauna a Ieova, o a latou amiotonu foi mai ia te au lea, ua fetalai mai ai Ieova.”

ASO LONA LUA: O Mea ua Faaalia e Ala Mai i Tusitusiga Faavaloaga

Ina ua maeʻa se talanoaga o le mau o le aso, na faalogologo ē na auai i le lauga faasolo lona lua o le tauaofiaga, ua faamatuaina “Viiaina o Ieova  i le Avea ai o ni Ē Tauaveina le Malamalama.” Na faaalia mai e le lauga muamua faapea o le sini o se Kerisiano o le faamamaluina o Ieova e ala i le talaʻi i so o se mea. Na taʻua i le vaega na sosoo ai le manaʻoga ina ia tataʻi ē ua tali mai i le faalapotopotoga a le Atua. E faapefea? E ala i le faaalu o le lima po o le sefulu minute a o leʻi faia le suʻesuʻega faale-Tusi Paia i le aiga po o le maeʻa foʻi e faaali atu ai le auala o loo faagaoioia ai le faalapotopotoga a le Atua. Na faamamafa i le lauga lona tolu o lenei lauga faasolo le manaʻoga ina ia faamamaluina le Atua i galuega lelei.

O le lauga o lona matua “Ia Matuā Naunau i Upu Faamanatu Mai ia Ieova” na talanoaina ai ni fuaiupu na filifilia mai le Salamo lona 119. O le mea moni, tatou te manaʻomia ni faamanatu mai, auā e maua uma lava i tatou i le loto galo. Maʻeu la le tāua o lo tatou ati aʻe o se naunau mo afioga faamanatu mai a Ieova, e pei ona sa fai e le faisalamo!

Ona sosoo mai ai lea ma se vaega faapitoa—le lauga o le papatisoga ua faamatuaina “O le Usitaia o Afioga Faavaloaga e Taʻitaʻia Atu ai i le Papatisoga.” Na faamanatu atu ia i latou ua sauni mo le papatisoga faapea latou te faaaʻoaʻo atu ia Keriso e lē gata i le papatisoina ae maise foʻi i le mulimulituʻi i ona tulaga aao. (1 Peteru 2:21) Maʻeu se faaeaga mo nei tagata fou i le faia o se sao i le faataunuuina o le Ioane 10:16, lea na valoia ai e Iesu faapea o le a ia faapotopoto mai “isi mamoe” ina ia auauna faatasi ma ona soo faauuagagaina!

I le amataga o le polokalame o le aoauli, na faamatala ai e le lauga “Inā Faalogo Atu ia i Mea o Fetalai Mai ai le Agaga” faapea e fetalai mai le agaga o Ieova ia i tatou e ala mai i le Tusi Paia, le “auauna faamaoni ma le mafaufau,” ma lo tatou loto fuatiaifo ua uma ona toleniina i le Tusi Paia. (Mataio 24:45) O lea, e lē manaʻomia ai mo Kerisiano ona faalogo atu i se leo moni lava mai le lagi ina ia iloa ai le auala e faafiafia ai le Atua. Na timaʻi mai le lauga na sosoo ai, “Ia Tumau Mausalī i Aʻoaʻoga e Talafeagai ma le Amio Atua” i Kerisiano ina ia aua neʻi vaai atu i manatu e faaleagaina ai o loo faaauilumaina e lenei lalolagi. O le mea moni, o le lē puleaina o so tatou naunau fiailoa e mafai ona uunaʻia ai i tatou e taliaina ni manatu e faaleagaina ai ua fafauina e aposetate ma isi vaega a Satani. Maʻeu la le sili ona lelei o le faitauina e lē aunoa o le Tusi Paia faatasi ma mataupu uma o loo i Le Olomatamata ma le Ala Mai!

O le matua, “Ia Pipii Atu Pea i le Matua o Upu Aogā,” o le lauga lena na sosoo ai lea na faamamafa ai le tāua o le mātua masani ma “matua o upu” faale-Tusi Paia, po o mamanu o le upu moni. (2 Timoteo 1:13) O le malamalama i lenei matua o upu o le ki lea e lē gata i le mauaina o le tuutōina tauatua ae faapena foʻi i le mātauliaina o se mea e lē talafeagai ma le upu moni.

Seʻi manatu faapea ua silasila mai Ieova ia te oe o se mea e manaʻomia. Maʻeu se faaeaga! E faavae aʻe i le valoaga a Hakai, na matuā faalaeiʻau le lauga, “Ua Faatumulia le Fale o Ieova i ‘Mea ua Manaomia’” auā na faamautinoa atu ai i le ʻau faalogologo faapea e manaʻomia moni lava e Ieova sui taʻitoʻatasi o le “motu o tagata e toatele.” (Faaaliga 7:9) O lea, o le a faasaoina ai i latou e Ieova i lana ‘luluūga’ faaiʻu o nuu i le oo mai o le “puapuaga tele.” (Hakai 2:7, 21, 22; Mataio 24:21) Peitaʻi, i le taimi lenei, e ao ai i tagata o Ieova ona tausisia pea le mataala faaleagaga, e pei ona faamatalaina i le vaega o “Mau Faavaloaga o le Tusi Paia e Uunaia i Tatou ia Mataala.” Na sii mai e le failauga fetalaiga a Iesu e faapea: “O lea, ia outou mataala ai; auā tou te le iloa po o le fea aso e sau ai lo outou Alii.” (Mataio 24:42, LF) E faapefea ona tatou tumau i le mataala faaleagaga? E ala i le faaauau ona pisi i le auaunaga ia Ieova, tatalo e lē aunoa, ma tumau pea ona faatalitali i le aso tele o Ieova.

O le lauga mulimuli o le aso na faamatuaina, “O Afioga Faavaloaga i le Taimi o le Iuga.” O le a manatuaina pea i tausaga o loo sau. Aiseā? Auā na faasilasilaina ai e le failauga le tatalaina o se tusi fou—Pay Attention to Daniel’s Prophecy! Na taʻua e le failauga faapea “o lenei tusi matagofie ona āta, e 320 ona itulau o loo talanoaina ai vaega uma o le tusi o Tanielu.” Maʻeu ni faamaoniga e faamalosia ai le faatuatua faapea o loo faasusulu mai pea e Ieova le malamalama i lana Afioga faavaloaga!

ASO LONA TOLU: E Lē Tāitai Ona Iuvale Afioga Faavaloaga a le Atua

Na amata le aso mulimuli o le tauaofiaga i le lauga faasolo “O Afioga Faavaloaga mo le Taimi  Atofaina.” Na iloiloina i vaega e tolu faalauiloaga e tolu a le perofeta o Sapakuka e faatatau i le faaooina mai o faamasinoga a Ieova. Muamua na faasaga ia Iuta faalogogatā ma lona lua ia Papelonia faasauā. O le faalauiloaga mulimuli, e leʻi faataunuuina, e faatatau atu i le faaumatiaga mataʻutia o tagata amioleaga uma lava. E tusa ai o Amaketo, na toe faamanatu mai ai e le uso na faia le vaega mulimuli o le lauga faasolo le mataʻu moni tauatua i lana ʻau faalogologo i le faapea mai: “Ma le mautinoa lava, o le a avea o se mea e fefe ma mataʻu ai pe a tatala mai e Ieova le malosi atoa o lona mana uma.”

“Talisapaia o lo Tatou Tofi Faaleagaga” o le matua lena o le tala faale-Tusi Paia faagaee loto o le tauaofiaga. Na faaeseese mai e lenei taulimaga lea na uunaʻia ai tagata ina ia tilofaʻia i latou lava uiga o Iakopo ma Esau agaʻi i mea faaleagaga. Na lē amanaʻiaina e Esau lona tofi faaleagaga, o lea na avatu ai le tofi faaleagaga ia Iakopo, o lē na ia faatāuaina. Na fesiligia le ʻau usufono e faapea: “O ā [tofi faaleagaga] ua foaʻi mai e Ieova mo i tatou?” Na tali le failauga: “O le upu moni o lana Afioga, le Tusi Paia; le faamoemoe o le ola e faavavau; ma le faaeaga e fai mona sui i le avea ma ē faalauiloa le tala lelei.”

O le vaega na sosoo ai ua faamatuaina, “O le ā le Uiga o lo Tatou Tofi Tāua ia te Oe?” Tatou te faaalia le uiga saʻo i lo tatou tofi faaleagaga e ala i le faamuamua o le auaunaga ia Ieova ma faaeaga faaleagaga na i lo manaʻoga faaletino po o manaʻoga totino. O le faia faapea ua tatou faia aʻe ai o tatou olaga e faavae i la tatou faiā ma Ieova, o se matuā eseesega lena ma Atamu, Esau, ma Isaraelu lē faamaoni.

O le lauga lautele ua faamatuaina, “Faia ia Fou Mea Uma Lava—E Pei Ona Valoia Mai,” na ia faafesootaʻi nei valoaga iloga e fā e faatatau i le “lagi fou” ma le “lalolagi fou.” (Isaia 65:17-25; 66:22-24; 2 Peteru 3:13; Faaaliga 21:1, 3-5) E manino mai, sa iai i le finagalo o Ieova se faataunuuga sili ona telē o nei valoaga na i lo le faataunuuga i ona tagata toe faafoʻisia i le 537 T.L.M. Ioe, sa iai i lona finagalo lana pulega faalemālō, (le “lagi fou”) ma ana tagatānuu faalelalolagi (le “lalolagi fou”) o ē o le a aināina le lalolagi parataiso faamamaluina.

Na aumaia le tauaofiaga i sona faaiʻuga faagaeeloto ma uunaʻia ai e le lauga “Mea o Tatou Faatalitalia a o Taʻitaʻia i Tatou e le Afioga a le Atua.” Na faamanatu atu i tagata uma faapea “ua itiiti ona aso ua totoe” mo le faamaeʻaina o le galuega o le faalauiloaina o le Malo. (1 Korinito 7:29) Ioe, ua tatou iai nei i le tauamatamataga o le faataunuuga o faaiʻuga faafaamasinoga a Ieova faasaga ia Satani ma lana faiga amioleaga o mea atoa uma. Tau ina ia pei o tatou lagona o le faisalamo o lē na pese: “O loo faatalitali o tatou loto ia Ieova; o ia lava lo tatou fesoasoani ma lo tatou talita.” (Salamo 33:20) Maʻeu se faamoemoe mamalu o loo taatia mai i luma mo i latou o loo faavae aʻe o latou faamoemoega i afioga faavaloaga a le Atua!

[Ata i le itulau 7]

Se tala faagaeeloto na faalolotoina ai le talisapaia mo le tofi faaleagaga o auauna a Ieova

[Ata i le itulau 7]

O le toʻatele na utagiaina afioga faavaloaga a le Atua na papatisoina