O Faapeʻī Lau Vaaiga ia te Oe?

SA AVEA o ia o se tamāloa faamaualuga tele. Ona sa siitia i se tulaga maualuga faalemālō, sa ia nenee tele ona o le viiga ma le faaeaea sa avatu ia te ia. Peitaʻi sa matuā ita tele o ia, ona sa iai se tasi o ofisa o le mālō na te leʻi avatua lena mamalu ia te ia. Ina ia taui atu, sa fuafuaina e lenei tagata faamaualuga o le mālō ina ia faaumatia tagata uma lava o loo iai i le mālō o ē e nuu faatasi ma lē sa faatigā ane. Pagā le sesē o le uiga o le faamaualuga!

O le tagata lea sa faufau leaga o Hamanu, o se tagata maualuga i le maota o le tupu Peresia o Asueru. Ae o ai lea sa faasaga i ai lona maʻemaʻeā? O se tagata Iutaia e suafa ia Moretekai. E ui lava e fai si uiga ese o le ita fia fasioti tagata o Hamanu, ae ua faataʻitaʻia mai ai le mataʻutia atoa ma āuga leaga o le faamaualuga. E lē gata sa faapogaia e lona agaga faasausili se faigatā mo isi ae sa taʻitaʻia atu ai foʻi i le faamāsiasia ai o ia i luma o tagata ma oo atu ai i lona oti.—Eseta 3:1-9; 5:8-14; 6:4-10; 7:1-10.

E Aafia Foʻi Tagata Tapuaʻi Moni i le Faamaualuga

E finagalo Ieova ina ia tatou ‘feooai ma lo tatou Atua ma le loto faamaulalo.’ (Mika 6:8) O loo i le Tusi Paia faamatalaga eseese o ē sa lē taulau ona faatumauina se vaaiga loto maulalo ia i latou lava. Sa faapogaia ai faafitauli ma le faanoanoa mo i latou. O le iloiloina o nisi o nei faaaʻoaʻoga o le a fesoasoani ia i tatou ia iloa le leaga ma le mataʻutia o mafaufauga lē paleni.

Sa matuā lē paleni lava mafaufauga o le perofeta a le Atua o Iona ma iʻu ai ina taumafai e sola ese ina ua tofia o ia e le Atua e alu e lapataʻi tagata amio leaga o Nineva e faatatau i le faamasinoga a Ieova faasaga ia i latou. (Iona 1:1-3) Mulimuli ane, ina ua mafai e lana talaʻiga ona faapogaia tagata Nineva e salamō, sa oo ia Iona le musuā. Sa sili atu lona popole i lona lava talaaga o se perofeta ma sa itiiti ai po o le leai foʻi o sona manatu mamafa i ola o tagata Nineva. (Iona 4:1-3) Pe afai tatou te manatu faamaualuga i le soona faatāuaina o i tatou lava, e ono lē faigofie ai ona tatou tausia se vaaiga e lē faailoga tagata ma maua le manatu saʻo i tagata ma mea tutupu i lo tatou siʻomaga.

Manatunatu foʻi ia Usia, o lē sa avea ma tupu lelei o Iuta. Ina ua lē paleni i ona manatunatuga, sa ia taumafai ma le faamaualuga e faatino nisi o tiute faaositaulaga. Ona o ana gaoioiga faamaualuga ma le faafiapoto, na iʻu i le āfaina ai o lona soifua mālōlōina ma aveesea ai le finagalo malie tauatua.—2 Nofoaiga a Tupu 26:3, 16-21.

Na semanū foʻi e maileia aposetolo o Iesu i mafaufauga lē paleni. Sa latou manatu mamafa tele i le mamalu o le tagata lava ia atoa ma le pule. Ina ua oo ane le taimi o tofotofoga sili, sa latou tuua Iesu ae sosola. (Mataio 18:1; 20:20-28; 26:56; Mareko 9:33, 34; Luka 22:24) O le leai o so latou loto maulalo atoa ma lo latou manatu faamaualuga na semanū e faapogaia ai i latou e faagalo le uiga moni o le fuafuaga a Ieova atoa ma la latou vaega e fesootaʻi atu i lona finagalo.

O Āuga e Faaleagaina ai o le Faamaualuga

O le iai o se vaaiga lē paleni agaʻi ia i tatou lava e ono faapogaia ai le tigā ma e faaleagaina ai a tatou faiā ma isi. Mo se faaaʻoaʻoga, atonu o loo tatou nofonofo i totonu o se potu ma tatou iloa atu ni tagata se toʻalua o femusuaʻi ma taliē. Afai tatou te faatāuaina naʻuā i tatou lava, tatou te ono faia ai se faaiʻuga lē saʻo faapea o la e ula mai ia i tatou ona o loo tau lē lagona o la leo. E ono lē faatagaina i tatou e o tatou mafaufau e manatunatu i se isi faauigaina o ā la gaoioiga. Ae maise lava, o ai se isi le la e faatatau i ai a la talanoaga? Tatou te ono lē fiafia ma filifili e lē toe talanoa atu lava i nei tagata e toʻalua. I le faia faapea ua avea ai se vaaiga lē paleni i le faatāuaina o i tatou lava ma  māfuaaga o le lē femalamalamaaʻi ma faaleagaina ai faiā ma uō, ma tagata o aiga, atoa ma isi.

O i latou o ē e soona faatāuaina naʻuā i latou lava e ono oo ai i le gugutu, i lo latou faamatala pea o ni a latou taleni iloga e faapea mai o iai, ni a latou mea na fai, po o ni a latou mea foʻi o iai. Ia po o lo latou fāoa uma foʻi o ni talanoaga, e taumafai lava e faamatala mai se mea e uiga ia i latou. O ituaiga talanoa faapena e atagia mai ai le leai o se alofa moni. O lea la, o i latou e loto vii e masani ona faaesea i latou mai i isi. —1 Korinito 13:4.

I le avea ai o ni Molimau a Ieova, tatou te ono fetaiaʻi ma tauemuga ma teteega mai i la tatou faiva i le lautele. E ao ona tatou manatua o lena teteega, e lē o agaʻi mai ia i tatou taʻitoʻatasi, ae o loo taulaʻi ia Ieova, le Puna o la tatou feʻau. Peitaʻi, o le iai o se vaaiga sesē i le faatāuaina o i tatou lava e ono oo ai i ni iʻuga lē lelei. I tausaga ua leva, sa lē taofiofi ai se uso mai lona lafo atu o ni faaupuga mamafa e tali atu ai i ni faamatalaga faatigā sa fai ane e se tagata o le aiga. (Efeso 4:29) Ina ua uma lena, e leʻi toe auai lava le uso i le faiva mai lea fale i lea fale. Ioe, e mafai e le faamaualuga ona faatupuina le ita ia i tatou a o auai i le talaʻiga. Tatou te taumafai ina ia aua lava neʻi tupu lena mea. Na i lo lena, ia tatou sailia ma le loto maulalo le fesoasoani a Ieova ina ia faatumauina le talisapaia tatau mo le faaeaga e auai i le faiva faa-Kerisiano.—2 Korinito 4:1, 7; 10:4, 5.

O le iai o se uiga fia tāua e ono taofia mai ai foʻi i tatou i le taliaina o fautuaga manaʻomia. I tausaga ua mavae i se atunuu i Amerika Tutotonu, sa faia ai se lauga a se tama talavou i le Aʻoga o le Faiva Faatiokarate i le faapotopotoga Kerisiano. Ina ua avatu e le ovasia o le aʻoga se fautuaga tuusaʻo ia te ia, sa ita le talavou ma togi lana Tusi Paia i lalo i le fola ae alu ese atu ma le Maota o le Malo ma lona manatu e lē toe foʻi mai lava. Peitaʻi ina ua mavae ni nai aso, sa tuu ese lona faamaualuga, ma toe faalelei ma le ovasia o le aʻoga, ae talia ma le loto maulalo lana fautuaga. Mulimuli ane, na iʻu ina avea lenei tama talavou ma Kerisiano taʻumatuaina.

O le leai o se loto maulalo ma le soona faatāua naʻuā o i tatou lava e mafai ona oo ai i le faaleagaina o la tatou faiā ma le Atua. Ua lapataʻi mai le Faataoto 16:5 e faapea: “E inosia e Ieova atoa uma e ua loto faamaualuga.”

Se Vaaiga Paleni ia i Tatou Lava

E manino lava la, e lē tatau ona tatou soona manatu mamafa ia i tatou lava. E lē faapea o fai atu nei e aua tatou te manatu mamafa i mea tatou te faia po o mea o tatou tautatala ai. O loo faaalia e le Tusi Paia e ao i ovasia, o auauna o le faiva—o le mea moni lava ia o le faapotopotoga atoa—ona iai se uiga manatu mamafa i isi. (1 Timoteo 3:4, 8, 11; Tito 2:2) E faapefea la ona atiaʻe ma faatumauina e Kerisiano se vaaiga loto maulalo, paleni, ma manatu mamafa ia i latou lava?

O loo aumaia e le Tusi Paia le tele o faaaʻoaʻoga e faalaeiʻauina ai, a ni tagata o ē sa faatumauina se vaaiga paleni o i latou lava. E matilatila ai le faaaʻoaʻoga a Iesu o le loto maulalo. Ina ia faia le finagalo o lona Tamā ma ina ia aumai le faaolataga i tagata, na tuua ai ma le loto malie e le Alo o le Atua lona tulaga mamalu i le lagi ae avea ma tagata maulalo i le lalolagi. E ui lava i le faalumaina, o faiga faatautala, atoa ai ma se maliu matagā, ae sa ia tausia pea le pulea totino ma se tulaga mamalu. (Mataio 20:28; Filipi 2:5-8; 1 Peteru 2:23, 24) Sa faapefea ona mafai e Iesu ona fai lenei mea? Sa ia faalagolago atoatoa atu ia Ieova ma sa ia maumauaʻi e fai le finagalo tauatua. Sa suʻesuʻeina ma le maelegā e Iesu le Afioga a le Atua, tatalo faatauanau, ma auai ma le faamalosi i le faiva. (Mataio 4:1-10; 26:36-44; Luka 8:1; Ioane 4:34; 8:28; Eperu 5:7) O le mulimuli i le faaaʻoaʻoga a Iesu e fesoasoani ai ia i tatou e atiaʻe ma faatumauina se vaaiga paleni ia i tatou lava.—1 Peteru 2:21.

Ia mafaufau foʻi i le faaaʻoaʻoga a le atalii o Saulo o Ionatana. Ona o le lē usitaʻi o lona tamā, na lē maua ai e Ionatana le avanoa e suitulaga ai ia Saulo e avea ma tupu. (1 Samuelu 15:10-29) Pe sa tigā ai ea Ionatana ona o le lē avea o ia ma tupu? Pe sa fuā ia Tavita, le tauleʻaleʻa talavou lea o le a avea ma tupu na i lo ia? E ui e matuā matua lava Ionatana ma atonu foʻi e tele lona poto masani na i lo Tavita, ae sa ia faamaulalo ma lolo atu ma le loto maulalo i le faatulagaga a Ieova ma lagolago ma le faamaoni ia Tavita. (1 Samuelu 23:16-18) O le iai o se vaaiga manino i le finagalo  o le Atua atoa ma se faanaunauga e lolo atu i ai o le a fesoasoani ia i tatou ina ia “aua le faasili le manatu o se tasi i le mea ua tatau ona manatu ai.”—Roma 12:3.

Sa aʻoaʻo mai e Iesu le tāua o le faaalia o le faamaulalo ma le loto maulalo. Sa ia faataʻitaʻia lenei mea i lona faapea mai afai e auai ona soo i se taumafataga o se faaipoipoga, e lē tatau ona latou nonofo i “le mea sili” auā e ono auai mai se tasi e sili atu ona iloga sona tulaga ona latou māsiasi lea i le toe ō atu i se nofoaga maulalo. Ina ua matuā faamanino atu le lesona, sa faaopoopo atu Iesu e faapea: “Aua so o se faamaualuga e ia ia te ia, e faamaulaloina lea; a o lē faamaulalo e ia ia te ia, e faamaualugaina lea.” (Luka 14:7-11) E atamai mo i tatou le manatuaina o le fautuaga a Iesu ma ia ‘oofu i tatou i le loto maulalo.’—Kolose 3:12; 1 Korinito 1:31.

Faamanuiaga o le Iai o se Vaaiga Paleni

O le iai o se agaga agamalū ma le loto maulalo o le a mafai ai e auauna a Ieova ona maua le olioli i le latou faiva. O le a sili ona faigofie le ō mai o tagata i toeaina pe a latou loto maulalo i le “tausia ma le faapelepele o le lafu.” (Galuega 20:28, 29 NW ) Ona lelei ai lea o le faalogona a tagata uma i le faapotopotoga ma faigofie ona talanoa atu ia i latou ma sailia le latou fesoasoani. Ona mafai ai lea ona autasia le faapotopotoga i le agaga o le alofa, māfana, ma le fetalitonuaʻi.

O le lē soona faatāuaina naʻuā e i tatou o i tatou lava e mafai ai ona fai ni uō lelei. O le faamaulalo ma le loto maulalo o le a taofia ai i tatou mai le atiina aʻe o se agaga tauvā e ala i le taumafai ia sili atu i isi i gaoioiga po o mea faitino. O uiga faaleatua nei o le a fesoasoani ia i tatou ia sili ona tatou magafagafa, ma faigofie ai ona tatou iai i se tulaga sili atu ona lelei e faamāfanafana atu ai ma lagolago ia i latou o manaʻomia se fesoasoani. (Filipi 2:3, 4) Pe a oo ina pāʻia tagata e le alofa ma le agalelei, e masani ona latou tali lelei mai. Ma pe lē o ituaiga faiā lē manatu faapito ea faapena o loo avea ma faavae e atiaʻe ai faauōoga malolosi? Maʻeu se faamanuiaga ona o le lē faamaualuga i le soona faatāuaina naʻuā o i tatou lava!—Roma 12:10.

O le iai foʻi o se vaaiga paleni ia i tatou lava o le a faigofie ai ona taʻutino o tatou sesē pe a tatou faatigā i se isi. (Mataio 5:23, 24) O le a iʻu ai i ni faiā sili atu ona lelei, ma faigofie ai ona fai ni faaleleiga ma maua le faaaloalo. O i latou o i tulaga e vaaia ai isi, pei o toeaina Kerisiano, o le a ia i latou avanoa e faia ai mea lelei mo isi pe afai latou te loto maulalo ma agamalū. (Faataoto 3:27; Mataio 11:29) O le tagata loto maulalo e faigofie foʻi ona faamagalo atu i isi e agasala mai ia te ia. (Mataio 6:12-15) O le a ia lē soona gaoiā i nai mea iti e sesē mai a isi ma e faamoemoe atu ia Ieova na te faasaʻoina ni mea e lē mafai ona faasaʻo i nisi auala.—Salamo 37:5; Faataoto 3:5, 6.

O le faamanuiaga aupito sili tatou te maua mai i le iai o se vaaiga agamalū ma le loto maulalo ia i tatou lava o le olioli lea i le finagalo malie ma le faamaoniga a Ieova. “E tetee atu le Atua i e faamaualuluga, a e foaiina mai le alofa tunoa i e faamaulalo.” (1 Peteru 5:5) Aua lava neʻi tatou paʻūʻū i le mailei o le manatunatu lea e sili ona lelei i tatou na i lo le tulaga moni lava o iai. Na i lo lena, seʻi tatou amanaʻiaina ma le loto maulalo lo tatou tulaga i le faatulagaga o mea a Ieova. E matagofie faamanuiaga o loo teuina mo i latou o ē e ausia mea na te faafinagaloina o le ‘savavali ma le faamaulalo ma le Atua.’

[Ata i le itulau 22]

Sa lagolagoina ma le loto maulalo e Ionatana ia Tavita