O i Tatou o Ni Tagata o Ē e Faatuatua

Ofoina Atu o se Feʻau Faamāfanafana i Italia

O IEOVA “o le Atua foi e ana le faamafanafanaga uma.” E ala i le aʻoaʻoina e ana auauna ina ia faaaʻoaʻo ia te ia, ua latou ‘faamafanafana mai ia te i tatou i o tatou puapuaga uma lava.’ (2 Korinito 1:3, 4; Efeso 5:1) O se tasi lenei o sini autū o le galuega talaʻi o loo faia e Molimau a Ieova.

Fesoasoani i se Fafine Mativa

Ae maise lava i tausaga talu ai nei, o le mativa, o taua, ma le naunau i le fia sailia o se olaga e sili atu ona lelei ua uunaʻia ai le toʻatele ina ia siitia atu e nonofo mau i atunuu e sili atu ona tamaoaiga. Ae e lē o se mea faigofie ona faafetaui atu i latou i na siʻomaga fou. O Manjola sa mau ma tagata Alapania i Borgomanero. Talu ai sa nofo o ia i se tulaga e lē tusa ai ma le tulafono i Italia, sa faatalatū ai o ia e talanoa atu ia Wanda, o se tasi o Molimau a Ieova. Ae peitaʻi, na iʻu lava ina mafai ona fai e Wanda se fuafuaga e talanoa ai ma Manjola, o lē na vave lava ona faaalia le matuā naunau e suʻesuʻeina le Afioga a le Atua, e ui lava sa avea le gagana ma tulaga faigatā i lenei mea. Ae peitaʻi, ina ua mavae ni nai asiasiga, sa lē toe mafai ai e Wanda ona maua atu se tasi i le fale. Po o le ā le mea na tupu? Na iloa mulimuli ane e Wanda e faapea, o tagata uma ia sa nonofo i lena fale, na sosola ona o se tasi o i latou—le uō tama a Manjola—sa sailia e leoleo ona o le fasioti tagata!

I le fa masina mulimuli ane, na toe fetaui ai Wanda ma Manjola. Na manatua ai e Wanda e faapea: “Ua sesega ma paee, na pei uma lava o ni foliga o se tagata ua matuā oo i se tulaga faigatā.” Na faamatala e Manjola e faapea sa tuuina lana uō tama i le falepuipui ma o uō ia na alu atu i ai mo se fesoasoani, sa matuā aunoa lava ma se fesoasoani atu ia te ia. I le matuā mafatia, sa ia tatalo atu ai i le Atua mo se fesoasoani. Ona ia manatua loa lea o Wanda, o lē sa talanoa atu e uiga i le Tusi Paia. Maʻeu le fiafia o Manjola ina ua toe vaai atu ia te ia!

Na toe faaauau le suʻesuʻega faale-Tusi Paia, ma e leʻi pine ae amata ona auai Manjola i sauniga faa-Kerisiano. Sa taulau manuia o ia i le mauaina o se pemita faaletulafono e nofomau ai i Italia. Ina ua mavae se tausaga e tasi, na avea ai Manjola ma Molimau papatisoina. I le faamāfanafanaina e ala i folafolaga tauatua, ua toe foʻi atu ai o ia i Alapania ma tufa atu le feʻau faamāfanafana a le Tusi Paia i tagata o lona atunuu.

Molimau atu i se Nofoaga o Tagata e Faimalaga mai i Isi Atunuu

E tele faapotopotoga Italia ua faia ni fuafuaga e molimau atu i tagata e faimalaga atu mai isi atunuu e pei o Manjola. Mo se faaaʻoaʻoga, na faia e se faapotopotoga  i Florence ni fuafuaga e asiasi atu e lē aunoa i le nofoaga o loo nonofo ai tagata e faimalaga mai isi atunuu. O tagata e nonofo ai i lea nofoaga—o le toʻatele e mai Europa i Sasaʻe, Maketonia, ma Kosovo—sa oo i ai mea faigatā eseese. O nisi sa iai faafitauli tau i fuālaau faasāina po o le ʻava malosi. E toʻatele sa maua mea e tausi ai i latou e ala i le gaoia o ni mea.

O le talaʻi i lenei nofoaga sa avea o se luʻi. Ae peitaʻi, o se faievagelia faataimi atoa e igoa ia Paola na mulimuli ane feiloaʻi ma se fafine Maketonia e suafa ia Jaklina. Ina ua uma ni nai talanoaga, na faalaeiʻau ai e Jaklina lana uō o Susana ina ia suʻesuʻeina le Tusi Paia. Sa faapea foʻi ona talanoa atu Susana i isi ona tauaiga. E leʻi pine, ae suʻesuʻeina e lē aunoa e tagata e toʻalima o le aiga le Tusi Paia, auai i sauniga faa-Kerisiano, ma faatinoina mea na latou aʻoaʻoina. E ui lava i faafitauli latou te fesagaʻi, ae na latou maua le faamāfanafanaga mai ia Ieova ma lana Afioga.

Ua Talia e se Taupousā le Faamāfanafanaga Mai ia Ieova

I le aai o Formia, na talanoa atu ai se faievagelia faataimi atoa e suafa ia Assunta i se fafine sa faalēlelei lana savali. O le fafine, o se taupousā sa auai i se ituaiga faalotu e latou te tuuina atu le fesoasoani i tagata mamaʻi ma ē e lē atoatoa le malosi i falemaʻi ma i aiga.

Na faapea atu Assunta i le taupousā: “O loo e mafatia foʻi a ea? O se mea e faanoanoa ai ona e tofu uma lava i tatou ma faafitauli e ao ona onosaʻia.” I lea, na maligi ai loimata o le taupousā ma faamatala atu e faapea, sa iai ni faafitauli matuiā i lona soifua mālōlōina. Sa faalaeiʻau atu Assunta ia te ia i le faapea atu, e mafai e le Atua o le Tusi Paia ona faamāfanafanaina o ia. Na talia e le taupousā ia mekasini e faavae i le Tusi Paia na ofo atu e Assunta ia te ia.

I le isi a la talanoaga na sosoo ai, na ioeina ai e le taupousā o lona suafa o Palmira e faapea, sa mafatia tele o ia. E tele tausaga sa nofo ai o ia i se nofoaga sa pulea e taupousā. Ina ua tuua e ia lea nofoaga mo sina vaitaimi ona o faafitauli tau le soifua mālōlōina, sa leʻi faatagaina o ia e toe foʻi atu. Ae peitaʻi, sa lagona e Palmira o loo noatia pea o ia i le Atua e ala i tautoga na ia faia a o avea ma taupousā. Sa saili atu o ia i tagata fai faamālōlōga mo ni “togafitiga” ae sa oo ai ina mafatia faalemafaufau ona o lea mea. Na malie Palmira e suʻesuʻe le Tusi Paia, ma sa auai o ia i i sauniga faa-Kerisiano mo se tausaga. Ona siitia atu lea o ia i se isi vaipanoa, ma na lē mafai ai e Molimau ona toe faafesootaʻia o ia. E lua tausaga na mavae ae toe maua o ia e Assunta. Sa oo ia Palmira ni teteega malolosi mai lona aiga ma failotu. Ae peitaʻi, sa toe faaauau lana suʻesuʻega faale-Tusi Paia, na agaʻigaʻi i luma faaleagaga, ma papatisoina e avea o se tasi o Molimau a Ieova.

Ioe, e toʻatele ua faalaeiʻauina e ala i le feʻau a ‘le Atua e tupu mai ai le faamafanafanaga.’ (Roma 15:4, 5) I lea, ua filifili maumauaʻi ai Molimau a Ieova i Italia e faaauau pea ona faataʻitaʻi i le Atua e ala i le faaooina atu i isi o lana feʻau ofoofogia o le faamāfanafanaga.