Ua Faatumulia le Fale o Ieova i “Mea ua Manaomia”

“[O aʻu, o Ieova,] ou te luluina foi nuu uma; ona oo mai ai lea o mea ua manaomia e nuu uma; ou te faatumuina foi lenei fale i le pupula.”—HAKAI 2:7.

1. Pe a oo mai taimi o faalavelave faafuaseʻi, aiseā e muamua ai lava ona tatou manatu i ē pele ia i tatou?

O Ā MEA manaʻomia na o loo faatumulia ai lou fale? Po o iai ea ni au meafale taugatā, sau komepiuta o le ituaiga fou faaonaponei, sau taavale fou? E tusa lava po ua e maua uma nei mea, ae pe e te lē ioe ea o mea e sili ona tautele i lou maota, o tagata ia—o tagata o lou aiga? Seʻi faapea ua toe fafagu lau moe i se po ona ua e lagonaina le manogi o le asu. Ua mu lou maota, ma ua toe lava o ni nai minute o loo totoe e te sola ese ai! O le ā le mea muamua lava e te popole i ai? Po o au meafale ea? Lau komepiuta? Lau taavale? Pe na i lo lena, e lē sili atu ea ona e manatu i ē pele ia te oe? O le mea mautinoa lena, auā e sili atu ona tāua tagata na i lo mea e leai ni ola.

2. O le ā le telē o le foafoaga a Ieova, ma o lē fea vala o le foafoaga sa sili ona fiafia i ai Iesu?

² Seʻi mafaufau nei la ia Ieova le Atua ma lona Alo, o Iesu Keriso. O Ieova o “le na faia le lagi, ma le lalolagi, ma le sami, ma mea uma lava o i ai.” (Galuega 4:24) O lona Alo, le “tufuga,” o ia lea na faaauala mai ai e Ieova le faia o isi mea uma. (Faataoto 8:30, 31; Ioane 1:3; Kolose 1:15-17) E mautinoa lava e faatāua uma e Ieova ma Iesu mea uma na foafoaina. (Faatusatusa i le Kenese 1:31.) Ae o lē fea vala o le foafoaga e te manatu e sili atu ona tāua ia i laʻua—o mea e leai ni ola po o tagata? I le faaalitino mai o le atamai, ua fetalai ai Iesu faapea: “O loʻu fiafia foi, sa i le fanau o tagata lea,” po o le faaliliuga a William F. Beck o loo faapea mai, sa “fiafia [Iesu] i tagata.”

3. O le ā le valoaga na fetalaia e Ieova e ala mai ia Hakai?

³ E lē tau fesiligia le telē o le faatāuaina e Ieova o tagata. O se tasi o faamautinoaga o lenei mea o loo maua i afioga faavaloaga sa ia fetalaia i le tausaga e 520 T.L.M. e ala mai i lana perofeta o Hakai. Na folafola mai e Ieova faapea: “Ou te luluina foi nuu uma; ona oo mai ai lea o mea ua manaomia e nuu uma; ou te faatumuina foi lenei fale i le pupula. . . . E sili le mamalu o lenei fale ua mulimuli i le na muamua.”—Hakai 2:7, 9.

4, 5. (a) Aiseā o le a lē talafeagai ai pe a manatu faapea o le faaupuga “mea ua manaomia” e faatatau atu i le matagofie o mea faaletino? (e) E faapefea ona e faamatalaina le uiga o “mea ua manaomia,” ma aiseā?

⁴ O ā “mea ua manaomia” o le a faatumuina ai le fale o Ieova ma aumaia ai le mamalu lē mafaatusalia? Po o le soona faatele o ni meafale eseese ma ni teuteuga soona papanu naʻuā? O ni auro, ario, ma maatāua? Atonu e matuā lē talafeagai lava lenei manatu. Seʻi manatua, o le uluaʻi malumalu, lea na faaulufaleina i le pe tusa ma le  lima senituri muamua atu, o se fale matuā telē lava e faitau piliona tālā na fausia ai! * E mautinoa, sa leʻi faatalitalia e Ieova o le a mafai e si nei vaega toʻaitiiti o tagata Iutaia na toe taliu ane mai lo latou faaaunuua, ona latou fausia se malumalu e sili mamao atu le matagofie o lona fausaga na i lo le malumalu o Solomona!

⁵ O ā la, “mea ua manaomia” na sa faatumulia ai le fale o Ieova? E mautinoa lava, o tagata. Ae maise ai, o mea e faafiafia ai le finagalo o Ieova, e lē o ario ma auro, ae o tagata e auauna ia te ia ona o lo latou alofa. (Faataoto 27:11; 1 Korinito 10:26) Ioe, e tausia faapelepele e Ieova o tane uma, o fafine, ma tamaiti o ē tapuaʻi atu ia te ia i se auala na te taliaina. (Ioane 4:23, 24) O ‘mea manaʻomia’ na, ma e silisili atu ona tautele i latou ia Ieova na i lo mea mananaia uma sa teuteuina ai le malumalu o Solomona.

6. O le ā le fuafuaga na fai ai le malumalu anamua o le Atua?

⁶ E ui lava i teteega ogaoga, ae na maeʻa lava le fausiaina o le malumalu i le 515 T.L.M. A o leʻi oo mai i le taimi o le taulaga a Iesu, sa tumau pea ona avea le malumalu i Ierusalema ma taulaʻiga o le tapuaʻiga mamā mo le toʻatele o “mea ua manaomia,” lea sa aofia ai Iutaia moni ma tagata liulotu mai Nuu Ese. Peitaʻi sa fai le malumalu ma sui o se mea na silisili atu, e pei ona o le a tatou tilofaʻia.

Le Faataunuuga i le Uluaʻi Senituri

7. (a) O le ā sa fai ma āta o le malumalu anamua o le Atua lea sa i Ierusalema? (e) Faamatala mai gaoioiga e fai e le ositaulaga sili i le Aso o le Togisala.

⁷ O le malumalu i Ierusalema sa fai ma āta o se faatulagaga e sili atu mo le tapuaʻiga. O le malumalu faaleagaga o le Atua, lea sa faavaeina e Ieova i le 29 T.A. ma avea ai Iesu ma Ositaulaga Sili. (Eperu 5:4-10; 9:11, 12) Seʻi manatu i se faatutusaga i tiute sa fai e se ositaulaga sili o Isaraelu ma gaoioiga sa faia e Iesu. I tausaga taʻitasi i le Aso o le Togisala, sa faalatalata atu ai le ositaulaga sili i le fata faitaulaga i le lotoā o le malumalu ma faia se taulaga i se povi poʻa taanoa e totogi ai agasala a ositaulaga. Mulimuli ane, ona ulu atu lea o ia i le malumalu e avatu le toto o le povi poʻa taanoa, e ulu atu o ia i faitotoʻa ia e vavae ai le lotoā mai le Mea Paia ma oo atu ai i tala atu o le ie puipui o loo vavae ai le Mea Paia mai le Mea e Sili ona Paia. E oo loa i totonu o le Mea e Sili ona Paia, ona sausau lea e le ositaulaga sili le toto i luma o le atolaau o le feagaiga. Pe a uma lena, ona ia toe faatinoina foʻi lea o le faasologa lava lea e tasi, i lona ofoina atu o se ʻoti e totogi ai agasala a ituaiga e 12 e lē o ni ositaulaga a Isaraelu. (Levitiko 16:5-15) E faapefea ona fesootaʻi atu lenei faamanatuga i le malumalu faaleagaga o le Atua?

8. (a) O le ā le uiga o le ofoina atu o Iesu lea na amata i le 29 T.A.? (e) O le ā le faiā faapitoa na iai ia Iesu ma Ieova i le faagasologa o lana faiva i le lalolagi?

⁸ O lona uiga, sa ofoina atu Iesu i luga o le fata faitaulaga o le finagalo o le Atua, ina ua papatiso o ia ma faauuina i le agaga paia o le Atua i le 29 T.A. (Luka 3:21, 22) O le mea moni lava, o lenei mea na tupu sa faailogaina ai le amataga o se soifuaga faataulagaina mo Iesu, lea sa faaaluina ai le tolu ma le ʻafa tausaga. (Eperu 10:5-10) I le faagasologa o lena vaitaimi, sa iai Iesu i se faiā na tofia e le agaga o le Atua. O lenei tulaga tutasi sa iai ia Iesu faatasi ma lona Tamā faalelagi sa leʻi mafai ona malamalama atoatoa i ai isi tagata. Sa peiseaī ua punitia e se pupuni o latou mata o le faautauta, e pei lava ona pupunia e se pupuni le Mea Paia ma lē mafai ai ona iloa atu e i latou sa i fafo i le lotoā o le falefetāfaʻi.—Esoto 40:28.

9. Aiseā na lē mafai ai e Iesu ona ulu atu i le lagi a o avea o se tagata, ma na faapefea ona foʻia lenei tulaga?

⁹ E ui lava i lona avea ma Alo faauuagagaina o le Atua, ae sa leʻi mafai ona maua ai i lena taimi e Iesu, i lona tino faaletagata, le soifuaga faalelagi. Aiseā? Talu ai e lē mafai e i latou ua iai tino aano ma toto ona fai mo latou tofi le Malo faalelagi o le Atua. (1 Korinito 15:44, 50) Talu ai sa avea le tino faaletagata o Iesu ma pa pupuni, o lea sa faaatagia lelei ai e le ie puipui lea na vavae ese mai ai le Mea Paia mai le Mea e Sili ona Paia i le malumalu anamua o le Atua. (Eperu 10:20) Peitaʻi i le tolu o aso talu ona mavae lona maliu, na toe faatūina aʻe Iesu o se agaga e le  Atua. (1 Peteru 3:18) Ona mafai ai lea ona ia ulu atu i le vaega o le Mea e Sili ona Paia o le malumalu faaleagaga o le Atua—o le lagi lea. Ma o le mea tonu lava lena na tupu. Ua tusi mai Paulo faapea: “Ua le ulu atu Keriso i le mea paia [e mautinoa le faasino atu i le Mea e Sili ona Paia] ua faia e lima, o le faatusa lea o le mea moni, a o le lagi lava, ina ia iloa ai nei o ia i luma o le Atua mo i tatou.”—Eperu 9:24.

10. O le ā na faia e Iesu ina ua toe taliu atu i le lagi?

¹⁰ I le lagi, na ‘sausau ai e Iesu le toto’ o lana taulaga e ala i le tauaaoina atu o le aogā faatogiola o lona toto soifua ia Ieova. Peitaʻi, sa iai ma nisi mea na faia e Iesu. A o toeitiiti lava oo i lona maliu, na ia fetalai atu ai i ona soo: ‘Ou te alu e sauni se mea e nonofo ai outou. Afai foʻi ou te alu ma sauni se mea e nonofo ai outou, ou te toe sau, ou te talia foʻi outou ia faatasi ma aʻu; ina ia i ai outou i le mea ou te i ai aʻu.’ (Ioane 14:2, 3) E ala la i lona ulu atu i le Mea e Sili ona Paia, po o le lagi, na faaavanoa mai ai e Iesu le ala mo isi ina ia ulu atu ai foʻi. (Eperu 6:19, 20) O nei tagata taʻitoʻatasi, o lo latou aofaʻi o le a iai e 144,000, o le a auauna o ni ositaulaga lagolago i le faatulagaga o le malumalu faaleagaga o le Atua. (Faaaliga 7:4; 14:1; 20:6) E pei lava ona muaʻi alu atu le ositaulaga sili a Isaraelu e momoli le toto o le povi poʻa taanoa i totonu o le Mea e Sili ona Paia ina ia togiola ai agasala a ositaulaga, sa faapena foʻi i le toto maligi o Iesu ona muaʻi aogā i nei ositaulaga lagolago e 144,000. *

O “Mea ua Manaomia” i Ona Po Nei

11. Mo agasala a ai na osi ai e le ositaulaga sili i Isaraelu le taulaga i le ʻoti, ma o le ā na fai ma āta o lenei mea?

¹¹ E foliga e oo mai i le tausaga e 1935, ua maeʻa le aoaoina atoa o le ʻau faauuina. * Peitaʻi sa leʻi faaiʻu ai iinā e Ieova le faamamaluina o lona fale. Sa iai pea isi “mea ua manaomia” e leʻi aumaia i totonu. Manatua e lua manu sa osi ai e le ositaulaga sili i Isaraelu le taulaga—o se povi poʻa taanoa mo agasala a ositaulaga ma se ʻoti mo agasala a ituaiga e lē o ni ositaulaga. Talu ai na faaatagia mai e ositaulaga le ʻau faauuina o ē o le a iai faatasi ma Iesu i le Malo faalelagi, o ai la na fai ma sui o ituaiga e lē o ni ositaulaga? E maua le tali i fetalaiga a Iesu o loo faamauina i le Ioane 10:16: “Ua ia te au foi isi mamoe e le o i lenei lotoā; e tatau ona ou taʻitaʻiina mai o i latou foi, e faalogo foi i latou i loʻu leo; ona tasi ai lea o le lafu mamoe, ma le leoleo mamoe e toatasi.” O lea la, ua aogā le toto maligi o Iesu mo ni vaega se lua o tagata—muamua, o Kerisiano o loo faamoemoe e pule faatasi ma Iesu i le lagi ma lona lua, o i latou o loo tulimataʻi atu e ola e faavavau i le lalolagi parataiso. E manino mai la, o le vaega lona lua lenei o loo faaatagia mai e “mea ua manaomia”  o le valoaga a Hakai.—Mika 4:1, 2; 1 Ioane 2:1, 2.

12. Ua faapefea ona tosina mai le tele o “mea ua manaomia” i le fale o le Atua i aso nei?

¹² O nei “mea ua manaomia” o loo faatumulia ai pea le fale o Ieova. I tausaga talu ai nei, ua aveesea ai faasāsāga i Europa i Sasaʻe, ni vaega o Aferika, ma isi atunuu, ua mafai ai e le tala lelei o le Malo faavaeina o le Atua, ona olaola i oganuu na e oo mai lava i le taimi nei e leʻi galueaʻiina. A o gāsolosolo mai tagata manaʻomia i le faatulagaga o le malumalu o le Atua, ua faapea foʻi ona latou tauivi e aumaia nisi soo, e faaalia ai lo latou usitaʻi atu i le poloaʻiga a Iesu. (Mataio 28:19, 20) A o latou faia faapea, ua latou fetaiaʻi ai ma le toʻatele o tagata, o ē talavou ma ē matutua, o ē ono avea ma “mea ua manaomia” ia o le a faamamaluina ai le fale o Ieova. Seʻi manatu i ni nai faaaʻoaʻoga o le auala o loo faia ai lenei mea.

13. Na faaalia faapefea e se teineitiiti i Polivia lona maelegā i le faasalalauina atu o le feʻau o le Malo?

¹³ I Polivia, e iai se teineitiiti e lima ona tausaga na tausi aʻe e ona mātua Molimau. Na talosaga atu lenei teineitiiti i lona faiaʻoga mo se faatagaga e lē aʻoga ai ona o le vaiaso o le asiasiga a le latou ovasia matāgaluega. Aiseā? Sa manaʻo o ia e auai atu i le talaʻiga i lena vaiaso atoa o gaoioiga faapitoa. Sa faateʻia ona mātua i lenei mea, peitaʻi sa la fiafia ona o le iai i le la tama o sea uiga lelei. I le taimi nei, o loo faia e le teineitiiti ni suʻesuʻega faale-Tusi Paia se lima i ni aiga, ma o nisi o nei tagata suʻesuʻe ua auai atu nei i sauniga faa-Kerisiano. Na mafai foʻi ona ia aumaia lona faiaʻoga i le Maota o le Malo. Atonu i se taimi, o le a avea nisi o ana tagata suʻesuʻe o le Tusi Paia o ni “mea ua manaomia” o le a faamamaluina ai le fale o Ieova.

14. I Korea, na faapefea ona tauia le maumauaʻi atu pea o se tuafafine i se tagata na foliga ane e peiseaī e lē fiafia?

¹⁴ A o faatalitali se fafine Kerisiano i se fale e faatali ai nofoaafi i Korea, sa ia agaʻi atu ai i se tama aʻoga o loo tuu ni mea faalogo i ona taliga  e faalogologo ai ana musika. Na fesili atu i ai le tuafafine: “E iai sau tapuaʻiga?” Na tali le tama aʻoga: “E leai ma se lotu ou te fiafia i ai.” Sa leʻi foʻi ai le tuafafine. Na ia toe faapea atu: “A o faagasolo taimi, e ono manaʻo ai se tagata e filifili sana lotu. Peitaʻi, pe afai e leai sona malamalamaga e uiga i lotu, e na te ono filifilia ai se lotu sesē.” Na suia uiga faaalia o le tama aʻoga, ma amata loa ona naunau e faalogologo ane i lo tatou tuafafine. Sa ofo atu e le tuafafine i le tama le tusi Is There a Creator Who Cares About You?, ma fai atu i ai, o le a telē se aogā o lenei tusi pe a oo i se taimi o le a ia filifilia ai se lotu. Na talia fiafia e le tama le tusi. I le vaiaso na sosoo ai, na amata ai ona suʻesuʻeina e le tama le Tusi Paia ma Molimau a Ieova, ma i le taimi nei, ua auai atu o ia i sauniga uma lava.

15. Na faapefea ona amataina e se teineitiiti i Iapani ni suʻesuʻega faale-Tusi Paia, ma ua faapefea ona tauia ana taumafaiga?

¹⁵ I Iapani, e manatu ai le teineitiiti e 12 tausaga le matua, o Megumi i lana aʻoga faapea, o se fanua e sili ona fua tele mai mo le galuega talaʻi ma le aʻoaʻo atu. E mafai ona ia amataina ni suʻesuʻega faale-Tusi Paia se tele. E faapefea ona faia e Megumi lea mea? Talu ai na te faitauina le Tusi Paia pe fai foʻi ana sauniuniga mo sauniga pe a tā le mālōlōga, e masani ai lava ona fesili ane tamaiti o lana vasega po o ā ana mea o loo fai. O nisi e fesili ane ia Megumi pe aiseā e lē auai ai i nisi o meafai a le aʻoga. E taliina e Megumi a latou fesili ma taʻu atu ia i latou faapea e iai le suafa o le Atua. O iinā e masani lava ona faaosofia ai le naunau o lana ʻau faalogologo. Ona ia ofo atu lea ia i latou se suʻesuʻega faale-Tusi Paia. I le taimi nei, o loo faia ai e Megumi ni suʻesuʻega se 20—o le toʻa 18 o i latou, o ana uō i le vasega.

16. Na mafai faapefea e se uso i Cameroon ona ia amataina ni suʻesuʻega faale-Tusi Paia ma nisi mai se vaega o ni tagata faatauemu?

¹⁶ I Cameroon, a o ofo atu e se uso ana lomiga faale-Tusi Paia i tagata na savavali ane, na tauvalaau ane ai i le uso ni tamāloloa se toʻavalu sa fai se latou galuega i lena vaipanoa. I le mananaʻo e faatauemu i le uso, na latou fesili atu ai pe aiseā e lē talitonu ai o ia i le Tasitolu, le afi i hele, po o le lē mafai ona oti o le solu. Sa faaaogā e lo tatou uso le Tusi Paia e tali ai a latou fesili. O le iʻuga, e toʻatolu tamāloloa na latou taliaina le faia o ni suʻesuʻega faale-Tusi Paia. O se tasi o i latou, o Tanielu, sa amata ona ia auai atu i sauniga, ma na oo foʻi ina ia faatamaʻia ana mea totino uma e fesootaʻi atu i faiga faaagaga. (Faaaliga 21:8) E leʻi atoa se tausaga, ae papatiso loa o ia.

17. Na faapefea e nisi uso i El Salvador ona la faaaogā le atamai e talaʻi atu ai i se tamāloa sa leʻi manaʻo muamua e faalogo i le feʻau o le Malo?

¹⁷ I El Salvador, na nonoa ai e se tamāloa lana taʻifau feʻai i luma o le faitotoʻa o lona fale i so o se taimi lava e vaai mai ai ua latalata atu ni Molimau a Ieova. E faatalitali lava le tamāloa seʻi toe ō ese Molimau ona faatoʻā aumai foʻi lea o lana taʻifau i totonu o le fale. Sa lē tāitai mafai e uso ona talanoa atu i le tamāloa. O lea, i se tasi aso, na la filifili ai e faataʻitaʻi se faafeiloaʻiga e ese mai. I lo la mautinoa e mafai lava e le tamāloa ona lagona mai a la tala ia e fai, na la filifili ai loa e talaʻi atu i le taʻifau. Na ona la oo atu lava i le fale, faafeiloaʻi atu i le taʻifau, ma faapea atu i ai, ua la fiafia lava i le avanoa ua la talanoa atu ai ia te ia. Na la talanoa e faatatau i le taimi o le a iai se parataiso i le lalolagi, pe a oo ina leai se tasi e toe ita—e oo lava i meaola o le a fifilēmū. Ona la faatōfā atu lea ma le faaaloalo i le taʻifau ma  amata ona toe savavali mai i le auala. Na matuā faateʻia i laʻua, ina ua sau i fafo le tamāloa mai lona fale ma faatoese mai ona o lona lē tuu maia o se avanoa i Molimau e talanoa atu ai ia te ia. Sa talia e le tamāloa mekasini, ma amata loa se suʻesuʻega faale-Tusi Paia. Ua avea nei lenei tamāloa ma o tatou uso—o se tasi o “mea ua manaomia”!

“Aua le Fefefe Outou”

18. O ā faafitauli ua fesagaʻi ma le toʻatele o Kerisiano, peitaʻi o le ā le silafaga a Ieova i ona tagata tapuaʻi?

¹⁸ Po o fai ea sou sao i le galuega matuā tāua o le talaʻia o le Malo ma le faia o soo? Afai o fai, ua matuā faaeaina la oe. O le mea moni, o le galuega lenei ua mafai ai ona tosina mai e Ieova “mea ua manaomia” i lona fale. (Ioane 6:44) E moni, atonu i nisi taimi e te ono lē lavā pe faavaivai foʻi. I nisi taimi, o nisi—e oo lava i auauna faamaoni a Ieova—e tauivi ma faalogona e peiseaī ua leai so latou aogā. Peitaʻi ia aua lava neʻi faavaivai! E silasila mai Ieova i ona tagata tapuaʻi taʻitoʻatasi o ni mea e manaʻomia, ma e naunau mai o ia ina ia faasaoina oe.—2 Peteru 3:9.

19. O le ā le faalaeiʻauga na saunia e Ieova e ala mai ia Hakai, ma e mafai faapefea ona avea nei upu o se puna o le malosi ia i tatou?

¹⁹ Pe a tatou lagona le faavaivai, pe ona o teteega po o isi lava tulaga lē lelei, e mafai ona avea ma puna o lo tatou malosi fetalaiga a Ieova i tagata Iutaia na toe taliu ane mai lo latou faaaunuua. I le Hakai 2:4-6, tatou te faitau ai e faapea: “A o lenei, ia e faamalosi o oe o Serupapelu, ua fetalai mai ai Ieova; ma ia e faamalosi o oe o Iosua le atalii o Iosataka le faitaulaga sili; ma ia faamalolosi outou tagata uma o le nuu, ua fetalai mai ai Ieova, ma ia outou galulue; auā o aʻu, ou te ia te outou, ua fetalai mai ai Ieova o ʻau. O le feagaiga na ou osia ma outou ina ua o mai outou nai Aikupito, atoa ma loʻu Agaga o loo tumau ia te outou; aua le fefefe outou. Auā o loo faapea ona fetalai mai o Ieova o ʻau, E toe tasi, e toe itiiti lava, ona ou luluina ai lea o le lagi, ma le lalolagi, ma le sami, atoa ma le eleele matutu.” Seʻi mātau, e lē gata ina timaʻi mai Ieova ina ia tatou malolosi ae ua ia saunia mai foʻi mo i tatou le auala mo le mauaina o le malosi. E faapefea? Seʻi mātau mai fetalaiga faalaeiʻau nei: “Ou te ia te outou.” Maʻeu se faamalosi faatuatua o le iloaina e tusa lava po o ā toʻatugā tatou te fetaiaʻi, ae o loo faatasi mai Ieova ia i tatou!—Roma 8:31.

20. I le ā le itu o loo faatumulia ai nei le fale o Ieova i le mamalu i se tulaga sa leʻi faapea muamua?

²⁰ Ua faamaonia moni lava le faatasi mai o Ieova i ona tagata. O le mea moni, e pei lava ona ia fetalai e auala mai i le perofeta o Hakai: “E sili le mamalu o lenei fale ua mulimuli i le na muamua . . . ou te avatu foi le manuia i le mea nei.” (Hakai 2:9) O le mea moni lava, o le mamalu silisili i aso nei e mafai ona maua i le malumalu faaleagaga o Ieova. Ioe, e faitau selau afe o loo lolofi mai i le tapuaʻiga moni i tausaga taʻitasi. Ua lelei ona fafagaina faaleagaga i latou nei, ma e oo lava i totonu o lenei lalolagi ua tumu i faalavelave, ua latou maua ai le filēmū lea o le a matuā olioli ai i le lalolagi fou a le Atua.—Isaia 9:6, 7; Luka 12:42.

21. O le ā e tatau ona avea ma a tatou filifiliga maumauaʻi?

²¹ Ua toe lava o se āga ona lūlūina loa lea e Ieova nuu ia Amaketo. (Faaaliga 16:14, 16) O lea la, seʻi o tatou faaaogā le taimi o totoe e fesoasoani atu ai e faasaoina mai nisi ola. Tau ina ia tatou malolosi ma faatuatua atoatoa atu ia Ieova. Seʻi avea ma a tatou filifiliga maumauaʻi le faaauau pea ona tapuaʻi atu i lona malumalu sili faaleagaga, e ala i lo tatou faatumuina pea i nisi “mea ua manaomia” seʻia oo ina fetalai mai Ieova ua maeʻa la tatou galuega.

[Faamatalaga pito i lalo]

E te Manatua?

• O le ā le mea e sili atu ona tautele ia Ieova na i lo mea faitino?

• O ā vaega e lua o tagata ua aogā i ai le toto maligi o Iesu?

• O ai “mea ua manaomia” na sa tatau ona faatumulia ai le fale o Ieova i le mamalu?

• O le ā se faamaoniga tatou te faamaonia ai ua faataunuuina le valoaga a Hakai i aso nei?

[Fesili mo le Suʻesuʻega]

[Siata i le itulau 16]

(Tagaʻi i le lomiga mo le ata atoa)

Po o e iloa le uiga faafaatusa o le malumalu anamua o Ieova?

Ie Pupuni

Mea Paia

Fata Faitaulaga

Mea e Sili ona Paia

Faapaologa

Lotoā

[Ata i le itulau 17]

Sa osia e le ositaulaga sili le taulaga i se povi poʻa taanoa mo agasala a le ʻau ositaulaga ae o le ʻoti mo agasala a ituaiga e lē o ni ositaulaga a Isaraelu

[Ata i le itulau 18]

O le galuega talaʻi o le Malo i le lalolagi aoao ua tosina mai ai le vao o tagata e toʻatele i le fale o Ieova