Lipoti a Ē Faalauiloa le Malo

Fesoasoani i Ituaiga Uma o Tagata i Holani

O APERAAMO o se tagata sa matuā tulaga ese lona faatuatua. Na faapea mai le aposetolo o Paulo, “ina ua valaauina o ia,” sa usiusitaʻi Aperaamo i le siʻufofoga o le Atua ma “na ia alu foi e lei iloa po o fea a alu i ai.” Ina ua uma ona siitia atu e Aperaamo lona aiga atoa, “sa āumau ai o ia i le nuu na folafolaina” mo le isi selau tausaga na totoe o lona soifuaga.—Eperu 11:8, 9.

E faapena foʻi aso nei, e toʻatele Molimau a Ieova ua talia le tulaga faigatā o le siitia atu i se isi atunuu e auauna ai i le mea o loo sili atu ona manaʻomia ai le fesoasoani. O isi, ua aʻoaʻoina se gagana e ese ina ia mafai ai ona latou avatu se molimau i tagata mai isi atunuu o ē ua faimalaga atu ma nonofo mau i lo latou atunuu. E pei ona faaalia i faaaʻoaʻoga ia o loo mulimuli mai, o lenei agaga lelei ua tatala ai “se faitotoʻa lautele e taʻitaʻia atu i galuega” i Holani, o iinā o loo nonofo ai le tasi le miliona o tagata mai isi atunuu mai le 15 miliona tagata o loo aināina Holani.—1 Korinito 16: 9, NW.

□ O Bahram, o se tasi na avea muamua ma faiaʻoga o le karate faa-Saina e taʻua o le Kung Fu, na sau mai se atunuu i Sasaʻe Tutotonu. Sa ia maua se kopi o le Tusi Paia ma ni lomiga a le Sosaiete o le Olo Matamata. Pe tusa ma se masina ae iloa e Bahram e faapea ua ia maua le upu moni. Na amataina se la suʻesuʻega ma lana avā, ae sa iai se faafitauli—o lo la faiaʻoga o le Tusi Paia sa lē iloa tautala i la laʻua gagana. Sa manatua e lenei ulugalii e faapea, sa mafai ona latou fesootaʻi e ala i le faaaogāina o tāga, a latou talanoa e “faaaogā lima ma vae.” I se taimi mulimuli ane, na mafai ai ona maua e Bahram ma lana avā se faapotopotoga e tāutala i la laʻua lava gagana, ma mulimuli ane sa vave lava ona la agaʻigaʻi i luma. Ua avea nei Bahram ma Molimau papatisoina.

□ Na faalatalata atu se ulugalii paeonia mai Holani i se tamāloa Initonesia sa tūtū i luma ane o se faleoloa. Sa matuā faateʻia ma le fiafia lava le tamāloa ina ua talanoa atu le ulugalii ia te ia i lana lava gagana. Sa faia ai i le taimi lena ni fuafuaga e toe asiasi atu ia te ia i lona fale. Sa iloa ai e faapea, e sili atu ma le 20 tausaga na nofo ai le tamāloa i Rusia, ma i lena taimi sa avea ai o ia ma fomaʻi faapitoa o gasegase tau i tamaʻitaʻi. Sa ia faapea mai, o ia e lē talitonu e iai se Atua, ae na ia taʻutino mai e faapea, o taimi taʻitasi e na te faafanauina ai se pepe, e matuā māofa ai lava o ia ma faapea ane, “Maʻeu le matuā lelei atoatoa o le tino o le tagata! O se matuā vavega lava!” Na malie o ia e suʻesuʻe le Tusi Paia ma e leʻi pine ae talitonu o ia e faapea, e iai Sē na Foafoaina Mea o lē e manatu alofa mai i le fanau a tagata. (1 Peteru 5:6, 7) Ua avea nei o ia ma uso papatisoina ma o loo auauna i le faapotopotoga e tāutala i le gagana Initonesia i Amsterdam.

□ I Rotterdam, o se tasi o uafu aupito sili ona telē i le lalolagi mo vaa, sa oo ina faaauau ona avea ai se vaega o paeonia ma ni ē e matuā tomai i le talaʻi atu i ni vaega o tagata o atunuu ma gagana eseese e ō mai i le uafu i aso taʻitasi. O le iʻuga o le galuega a lenei vaega maelegā o tagata talaʻi, na talia ai le upu moni e nisi tagata o ʻauvaa, e aofia ai se kapeteni, se alii ofisa o se vaa, ma se tasi na avea muamua ma faafeao. I le taimi nei, ua fesoasoani ai foʻi i latou na i le faasalalauina atu o le tala lelei o le Malo o le Atua i le lalolagi aoao.—Mataio 24:14.

E pei ona iai i isi vaega o le lalolagi, ua maumauaʻi ai Molimau a Ieova i Holani e faia la latou vaega i le folafolaina atu o le tala lelei e faavavau i atunuu uma, ituaiga, gagana ma tagata uma.—Faaaliga 14:6.