Ia Fiafia i le Atua o lo Tatou Faaolataga
Ia Fiafia i le Atua o lo Tatou Faaolataga
“Ou te olioli lava ia Ieova, ou te fiafia lava i le Atua o loʻu faaolataga.”—SAPAKUKA 3:18.
1. O le ā le faaaliga na vaaia e Tanielu a o leʻi paʻū Papelonia i le 539 T.L.M.?
I LE silia ma le sefulu tausaga a o leʻi paʻū Papelonia i le 539 T.L.M., na vaaia ai e le perofeta ua āfu lona soifua o Tanielu se faaaliga mataʻina. Na valoia ai mea o le a tutupu i le lalolagi seʻia oo mai i le taua faaiʻu i le va o fili o Ieova ma lana Tupu faauuina, o Iesu Keriso. O le ā le tali atu i ai a Tanielu? Na ia faapea mai: “Sa ou vaivai, na ou . . . ofo tele i le faaaliga.”—Tanielu 8:27.
2. O le ā le taua na vaaia e Tanielu i le faaaliga, ma o ā ni ou lagona e faatatau i le lalata mai o lea taua?
2 Ae faapēfea i tatou? Ua fai si mamao o le taimi lea ua tatou ola ai nei, mai le taimi na maua ai le faaaliga! E faapēfea ona tatou tali atu pe afai ua tatou iloa ua matuā lalata mai lava le taua lea na iloa i le faaaliga e Tanielu—le taua a le Atua ia Amaketo? E faapēfea ona tatou tali atu pe a tatou iloa ua matuā faateteleina amioga leaga ia na taʻua i le valoaga a Sapakuka, ma ua lē toe mafai ai ona taofia le faaumatiaga o fili o le Atua? E foliga mai, e tutusa o tatou faalogona ma lagona o Sapakuka lava ia, e pei ona faamatala i le mataupu lona tolu o lana tusi faavaloaga.
Ua Tatalo Sapakuka mo le Alofa Mutimutivale o le Atua
3. Sa tatalo Sapakuka e fai ma sui o ai, ma e faapēfea ona tatou aafia i ana upu?
3 O le Sapakuka mataupu e 3 o se tatalo. I le fuaiupu 1, o loo faamatalaina i ni auēga, o pese o faanoanoaga po o faavauvauga. Ua faia le tatalo a le perofeta e peiseaī sa tatalo mo ia lava. Peitaʻi, o le mea moni lava, o loo talanoa Sapakuka e fai ma sui o le nuu filifilia o le Atua. I aso nei, ua matuā uigā ai lava lana tatalo mo tagata o le Atua, o ē o loo auai i le galuega talaʻi o le Malo. Pe a tatou faitauina le Sapakuka mataupu e 3 ma manatunatu i lenei mea, ona aumaia ai lea e ona upu ia i tatou le atuatuvale, ae aumai ai foʻi ma le ʻoliʻoli. O le tatalo a Sapakuka, po o le auēga, e aumai ai ia i tatou se māfuaaga malosi e ʻoliʻoli ai ia Ieova, le Atua o lo tatou faaolataga.
4. Aiseā na fefe ai Sapakuka, ma o le ā le faagaoioia o le mana o le Atua e mafai ona tatou mautinoa i ai?
4 E pei ona tatou mātauina i mataupu e lua ua mavae atu, sa matuā leaga tulaga o mea i le nuu o Iuta i aso o Sapakuka. Peitaʻi o le a lē faataga e le Atua lenei tulaga ina ia faaauau pea. O le a gaoioi Ieova, e pei foʻi ona ia faia i taimi ua tuanaʻi. E lētioa alaga le perofeta: “Ieova e, ua ou faalogo i le tala ia te oe, ua ou mataʻu ai; Ieova e, . . . lau galuega”! O le ā sa uiga i ai lana faamatalaga? ‘O le tala e uiga ia Ieova’ sa faasino atu i le talafaasolopito na tusitusia o gaoioiga mamana a le Atua, e pei o lana gaoioiga i le Sami Ulaula, i le vaomatua, ma i Ieriko. Sa iloa lelei e Sapakuka nei gaoioiga, ma na fefe ai o ia auā na ia iloa, o le a toe faaaogā foʻi e Ieova lona mana tele e faasagatau atu ai i ona fili. Pe a tatou vaai atu i le amioleaga o tagata i aso nei, tatou te iloa ai foʻi o le a gaoioi Ieova e pei ona sa ia gaoioi i taimi anamua. Po o faapopoleina ea i tatou i lena mea? O le tulaga moni lena! Peitaʻi, tatou te tatalo e pei ona sa tatalo Sapakuka e faapea: “Ia e toe faaolaolaina . . . i ia tausaga, o ia tausaga ia e faailoa mai ai; ia e manatu i le alofa a o e toasa.” (Sapakuka 3:2) I le taimi atofaina a le Atua, “i ia tausaga,” talosia o le a ia toe faagaoioi ai lona mana fai vavega. Ma i lena taimi, talosia na te faaalia mai le alofa mutimutivale ia i latou o ē alolofa ia te ia!
Ua Agaʻi Atu le Savaliga a Ieova!
5. Na faapēfea ona ‘afio mai le Atua mai Timanu,’ ma o le ā ua faailoa mai e lenei mea e tusa ai o Amaketo?
5 O le ā o le a tupu pe a faafofoga mai Ieova i a tatou tatalo mo le alofa mutimutivale? Tatou te maua le tali i le Sapakuka 3:3, 4. Muamua, fai mai le perofeta: “Na afio mai le Atua mai Timanu, na afio mai foi le Paia mai le mauga o Parana.” I tuā i aso o le perofeta o Mose, o Timanu ma Parana sa i le auala e ui atu i le vaomatua agaʻi i Kanana. A o savavali atu le nuu toʻatele o Isaraelu i la latou malaga, e foliga mai sa agaʻi atu ai foʻi ma Ieova, ma e leai se mea na mafai ona taofia maia o ia. A o toeitiiti maliu Mose, na ia faapea mai: “Na afio mai Ieova mai Sinai, na afio ae foi o ia i Seira ia te i latou; na pupula mai o ia mai le mauga o Parana, na ia afio mai foi ma le au paia e manomano [o agelu].” (Teuteronome 33:2) Pe a gaoioi Ieova e tetee atu i ona fili ia Amaketo, o le a iai foʻi se faaaliga faapena o lona mana lē mateena.
6. E faaopoopo atu i le mamalu o le Atua, o le ā se mea o loo vaaia e Kerisiano faautauta?
6 Ua faapea mai foʻi Sapakuka: “Sa ufitia le lagi i [le pupula o Ieova], o lona viiga foi sa tumu ai le lalolagi. O le pupula foi sa faapei o le la.” Maʻeu se vaaiga matagofie! E moni, e lē mafai ona vaai tagata ia Ieova le Atua ma ola pea. (Esoto 33:20) Ae mo auauna faamaoni a le Atua, o loo segia mata o o latou loto pe a latou mafaufau i le matagofie o lona pupula. (Efeso 1:18) Ma o loo vaaia e Kerisiano faautauta se mea e faaopoopo atu i le mamalu o Ieova. Ua faaiʻu mai le Sapakuka 3:4 e faapea: “Sa oo mai ʻave ai lona aao, sa i ai foi le ufiufi o lona mana.” Ioe, tatou te iloa atu le sauni o Ieova e gaoioi, e faaaogā ai lona aao taumatau o le malosi ma le mana.
7. O le savaliga manumalo a le Atua o le a uiga i le ā mo i latou e fouvale ia te ia?
7 O le savaliga manumalo a le Atua o le a uiga i puapuaga mo i latou e fouvale ia te ia. Fai mai le Sapakuka 3:5: “Sa muamua atu le faamai i ona luma, sa mulimuli foi ia te ia le maʻi vevela.” A o lalata atu le fanauga a Isaraelu i tuaoi o le Nuu o le Folafolaga i le 1473 T.L.M., e toʻatele i latou na fouvale, na faia amioga lē mamā ma ifo i tupua. O le iʻuga, e silia i le 20,000 na maliliu ai i le faamaʻi mai le Atua. (Numera 25:1-9) I le lumanaʻi lata mai, pe a agaʻi atu le savaliga a Ieova i “le taua i le aso tele o le Atua e ona le malosi uma lava,” o i latou o loo fouvale ia te ia o le a faapena foʻi ona mafatia ona o a latou agasala. O nisi atonu e oo lava ina maliliu i faamaʻi moni.—Faaaliga 16:14, 16.
8. E tusa ai o le Sapakuka 3:6, o le ā o loo faatalia maia fili o le Atua?
8 Seʻi faafofoga atu nei i se faamatalaga maʻoti o loo faamatala ai e le perofeta gaoioiga a Ieova o ʻau. I le Sapakuka 3:6, tatou te faitau ai: “Sa tu o ia [Ieova le Atua] ma fuafua le lalolagi; na ia silasila mai, ma na faagateteina nuu ese; na faataapeapeina ai foi mauga o le vavau; na faamaualaloina ai mauga iti o le vavau; o ona ala ia mai le vavau.” Muamua, e “tu” Ieova e pei o se taʻitaʻiʻau o loo vaavaai solo i le laufanua o le taua. E gatete ona fili i le matataʻu. Ua faateʻia i latou ina ua iloa mai lē o le a latou tau, ma ua latou tetemū ai i le lē mautonu. Sa valoia e Iesu le taimi o le a ‘taufaitagituʻi ai ituaiga uma o le lalolagi.’ (Mataio 24:30) O le a latou iloa ane e leai se tasi e mafai ona faasagatau atu i le finagalo o Ieova, ae ua tuai. O faalapotopotoga faaletagata—e oo lava i faalapotopotoga o loo foliga mai e tūmau e pei o ni “mauga o le vavau” ma ni “mauga iti o le vavau”—o le a faataapeapeina. O le a faapei o “ala [o le Atua] mai le vavau,” e pei o le ala sa ia gaoioi ai i taimi anamua.
9, 10. O le ā ua faamanatu mai ia i tatou e le Sapakuka 3:7-11?
9 Ua “toasa” Ieova i ona fili. Ae o ā auupega o le a ia faaaogā i lana taua tele? Seʻi faafofoga a o faamatala e le perofeta na auupega, i le faapea mai: “Na to ese lava le faamoega o lau aufana, o tautoga na e fetalai mai ai i itu aiga. Na e vaevaea le lalolagi i vaitafe. Na iloa oe e mauga, ua latou gatete ai; ua tafe ane le tafega o vai; na gagana mai le moana, ua na sisii i luga ona lima. Sa tutū pea le la ma le masina i le mea la te mau ai; o le malamalama o au u fanafana na latou savavali ai, ma le malamalama o lou tao pupula.”—Sapakuka 3:7-11.
10 I le vaitaimi o Iosua, na faapogaia ai e Ieova le lā ma le masina ina ia tūmau i se faailoaga ofoofogia o lona mana. (Iosua 10:12-14) Ua faamanatu mai ia i tatou e le valoaga a Sapakuka faapea, o le mana lava foʻi lenei o le a faaaogā e Ieova ia Amaketo. I le 1513 T.L.M., sa faaalia ai e Ieova lona pulea o vai loloto o le lalolagi ina ua ia faaaogā le Sami Ulaula e faaumatia ai ʻautau a Farao. I le fāsefulu tausaga mulimuli ane, a o tafe tetele tāfega o le vaitafe o Ioritana, sa leʻi avea lena ma faalavelave i le savaliga manumalo a Isaraelu e agaʻi atu i le Nuu o le Folafolaga. (Iosua 3:15-17) I aso o le perofeta fafine o Tepora, na tafiesea ai e timuga tetele kariota a Sesera le fili o Isaraelu. (Faamasino 5:21) O malosiaga lava foʻi nei o tāfega, o timuga tetele, ma vai loloto, o le a toe faaaogā e Ieova ia Amaketo. O loo i ona aao foʻi uila ma faititili, e faapei o se tao po o se utu e tumu i ū.
11. O le ā o le a tupu pe a tatala mai e Ieova le malosi atoatoa o lona mana?
11 Ma le mautinoa lava, o le a avea o se mea e fefe ma mataʻu ai pe a tatala mai e Ieova le malosi atoatoa o lona mana. E foliga mai i upu a Sapakuka e faapea o le a liua le po e avea ma ao ma o le a sili atu le malamalama o le ao na i lo le malamalama o le lā. E tusa lava pe faaletino pe faafaatusa lenei faamatalaga faavaloaga na faagaeeina e faatatau ia Amaketo, ae tasi le mea ua mautinoa—o le a manumalo Ieova, ma e leai se fili e mafai ona sao mai ai.
Ua Mautinoa le Faaolataga mo Tagata o le Atua!
12. O le ā o le a faia e le Atua i ona fili, ae o ai o le a faasaoina?
12 Ua faaauau ona faamatala mai e le perofeta gaoioiga a Ieova i le faaumatiaina o Ona fili. I le Sapakuka 3:12, tatou te faitau ai: “Sa e afio atu i le lalolagi ma le toatamai, sa e soli nuu ese i lou toasa.” Peitaʻi, o le a lē faasoloatoa le faaumatiaga a Ieova. O le a iai ni tagata e faasaoina. Fai mai le Sapakuka 3:13: “Sa e afio atu e faaola i lou nuu, e faaola i le na e faauuina.” Ioe, o le a faasaoina e Ieova ana auauna faauuina faamaoni. O le a atoatoa ai loa iinā le faaumatiaga o Papelonia le Aai Tele, le emepaea o lotu sesē i le lalolagi. Ae peitaʻi i aso nei, o loo taumafai atunuu e soloiesea le tapuaʻiga mamā. Ua lē o toe umi, ona osofaʻia lea o auauna a Ieova e ʻau a Koku o Makoku. (Esekielu 38:1–39:13; Faaaliga 17:1-5, 16-18) Pe o le a taulau ea lena osofaʻiga faasatani? E leai! Ona taia lea ma le ita e Ieova ona fili, o le a solia i latou e pei o saito i le mea e soli ai saito. Ae o le a ia faasaoina i latou o ē tapuaʻi ia te ia i le agaga ma le upu moni.—Ioane 4:24.
13. O le a faapēfea ona faataunuuina le Sapakuka 3:13?
13 O loo valoia mai le faaumatiaga aʻiaʻi o ē amioleaga i upu nei: “Sa e foa [Ieova] le ulu i le fale o lē amio leaga, i lou faataatia fua le faavae ia oo i le ua lava.” (Sapakuka 3:13) O lenei “fale” e faasino atu i le faiga leaga o mea ua tuputupu aʻe ona o taaʻiga a Satani le Tiapolo. O le a matuā nutipalaina. O le “ulu,” po o taʻitaʻi o loo tetee i le Atua, o le a faaumatia. O le a nutipalaina le fausaga atoa, e oo lava i lona faavae. O le a lē toe iai lava. Maʻeu se mapusaga o le a iai!
14-16. E tusa ai ma le Sapakuka 3:14, 15, o le ā o le a tupu i tagata o Ieova ma i o latou fili?
14 Ia Amaketo, o le a lē mautonu ai i latou o loo taumafai e faaumatia ‘lē na faauuina’ e Ieova. E tusa ai o le Sapakuka 3:14, 15, ua faapea atu le perofeta i le Atua: “Sa e sosoa le alii sili o ona taʻitaʻi i ona lava tao; sa latou feosofi mai pei se afā e faataapeape ia te au; sa fai mo latou mitamita le faaumatia faalilolilo o le tagata mativa. Sa e afio i totonu o le sami ma au solofanua, sa e afio foi i le faupuegāvai e tele.”
15 Ina ua faapea mai Sapakuka o “taʻitaʻi . . . sa latou feosofi mai pei se afā e faataapeape ia te au,” o loo tautala le perofeta e fai ma sui o auauna faauuina a Ieova. I le pei o tagata faomea o loo faatalitali solo i le ala e faatalitali ai, o le a faapena ona feosofi atu atunuu i tagata tapuaʻi o Ieova ina ia faaumatia i latou. O nei fili o le Atua ma o fili foʻi o ona tagata, o le a latou “mitamita” i lo latou mautinoa faapea ua latou manumalo. O le a foliga atu Kerisiano faamaoni ua vaivai, e pei o se “tagata mativa.” Peitaʻi o le taimi lava e gaoioi ai le osofaʻiga a ʻautau o ē tetee i le Atua, o le a faapogaia loa e Ieova i latou e toe fefasiaʻi i latou lava. O le a latou faaaogā o latou lima, po o “tao,” e osofaʻia ai o latou lava tagata tau.
16 Ae o le a iai foʻi ma isi mea. O le a faaaogā e Ieova malosi agaga e sili atu na i lo tagata ina ia faamaeʻa lelei ai le faaumatiaga o ona fili. E ala i “solofanua” a ana ʻautau faalelagi i le taʻitaʻiga a Iesu Keriso, o le a faaauau ai ona ia agaʻi atu i luma ma le manumalo i “le sami” ma “faupuegāvai e tele,” o lona uiga, o le anoanoaʻi o tagata ua avea ma ona fili. (Faaaliga 19:11-21) Ona aveesea ai lea o tagata amioleaga mai le lalolagi. Maʻeu se faailoaga malosi o le faamasinotonu ma le mana tauatua!
Ua Oo Mai le Aso o Ieova!
17. (a) Aiseā e mafai ai ona tatou mautinoa i le faataunuuga o upu a Sapakuka? (e) E mafai faapēfea ona tatou pei o Sapakuka a o tatou faatalitali atu i le aso tele o Ieova?
17 E mafai ona tatou mautinoa e lē o toe umi ona faataunuu lea o upu a Sapakuka. O le a lē faatuai mai lava. E faapēfea ona e tali atu i lenei malamalamaga ua e muaʻi mauaina? Manatua, sa tusia e Sapakuka ana upu ina ua faagaeeina e le Atua. O le a gaoioi Ieova, ma o le a iai se faaumatiaga tele i le lalolagi pe a tupu lena mea. E lētioa lava tusi mai le perofeta: “Na ou faalogo ai, ona sapotuvale ai lea o loʻu manava, sa tete oʻu laugutu i le leo; ua oo mai ai le pala i oʻu ivi, ua ou tetemu ai lava; a e filemu aʻu i le aso o le puapuaga, pe a alu ae o ia i le nuu e sii mai le taua ia te i tatou.” (Sapakuka 3:16) Sa matuā tetemū lava Sapakuka—ma ua tatau ai. Ae pe sa maluelue ai lona faatuatua? E matuā leai lava! Sa loto malie o ia e faatalitali ma le filēmū i le aso tele o Ieova. (2 Peteru 3:11, 12) Pe lē o le uiga foʻi lena e ao ona tatou faaalia? E mautinoa o lena! Ua ia i tatou le faatuatuaga atoatoa o le a faataunuuina le valoaga a Sapakuka. Peitaʻi, a o leʻi oo mai lena taimi, o le a tatou faatalitali pea ma le onosaʻi.
18. E ui lava sa faatalitalia e Sapakuka faigatā, ae o le ā le uiga sa ia faaalia?
18 E masani lava ona oo mai faigatā ona o faigā taua, e oo lava i ē manumalo. Atonu e faaitiitia taumafa. Atonu e leiloloa meatotino. Atonu e tulaga faalētonu le soifuaga. Afai e tutupu na mea ia i tatou, o le a faapēfea ona tatou tali atu i ai? Sa faaalia e Sapakuka se uiga lelei e fai ma faaaʻoaʻoga, e pei ona ia faapea mai: “E ui lava ina le fuga mai le mati, e leai foi ni fua i vine, e iu vale le fua o le olive, e le tupu mai foi ni mea e ʻai i le fanua; e faaumatia le lafu mamoe i le lotoā e leai foi ni povi i le fale povi; a e peitai aʻu, ou te olioli lava ia Ieova, ou te fiafia lava i le Atua o loʻu faaolataga.” (Sapakuka 3:17, 18) Sa faatalitalia ma le mautinoa e Sapakuka le oo mai o faigatā, atonu o se oge. Peitaʻi, sa lē taitai mou atu ai lona ʻoliʻoli ia Ieova, o lē na maua mai ai lona faaolataga.
19. O ā puapuaga ua oo i le toʻatele o Kerisiano, ae o le ā e mafai ona tatou mautinoa pe afai tatou te faamuamua Ieova i o tatou olaga?
19 I aso nei, a o lumanaʻi le taua a Ieova e faasagatau ai i ē amioleaga, e toʻatele ua mafatia i puapuaga. Na valoia e Iesu faapea o taua, oge, mafuiʻe, ma faamaʻi o le a avea ma vaega o ‘le faailoga o lona faatasi mai’ i le mana tautupu. (Mataio 24:3-14; Luka 21:10, 11) E toʻatele o tatou uso talitonu o loo ola i atunuu ua matuā aafia i le faataunuuga o fetalaiga a Iesu, ma o le iʻuga, ua latou matuā mafatia ai i puapuaga. O isi Kerisiano atonu o le a aafia foʻi faapena i le lumanaʻi. Mo le toʻatele o isi o i tatou, e mafai ona faapea atu ‘o le a lē fuga mai le mati’ a o leʻi oo mai le iʻuga. Peitaʻi, ua tatou iloa le māfuaaga ua tutupu ai nei mea, ma ua faamalosia ai i tatou. E lē gata i lena, o loo tatou maua le lagolagosua. Na folafola mai e Iesu faapea: “A ia outou muai saili lona malo ma lana amiotonu [a le Atua]; ona faaopoopoina atu lea o ia mea uma ia te outou.” (Mataio 6:33) E lē o faamautinoa mai e lena mea se olaga sologalelei, peitaʻi o loo faamautinoa mai ai ia i tatou faapea, afai tatou te faamuamua Ieova i o tatou olaga, o le a ia tausia i tatou.—Salamo 37:25.
20. E ui lava i faigatā lē tūmau, ae o le ā e tatau ona tatou maumauaʻi e fai?
20 Po o ā lava faigatā lē tūmau e ao ona tatou fetaiaʻia, o le a tatou lē loto vaivai ai pe mou atu lo tatou faatuatua i le mana laveaʻi o Ieova. E toʻatele o tatou uso ma tuafāfine i Aferika, Europa i Sasaʻe, ma isi nofoaga o loo latou fetaiaʻi ma faigatā matuitui, ae o loo ‘olioli pea ia Ieova.’ Tau ina ia tatou pei o i latou, ia faaauau pea ona tatou faia lea lava mea e tasi. Manatua, o le Alii Pule Silisili Ese o Ieova, o le Puna o lo tatou “malosi.” (Sapakuka 3:19) O le a lē taitai ona ia tuulafoaʻia i tatou. E mautinoa le oo mai o Amaketo, ma e mautinoa foʻi le sosoo mai ai o le lalolagi fou ua folafola mai e le Atua. (2 Peteru 3:13) Ona ‘tumu ai lea o le lalolagi i le malamalama o le mamalu o Ieova, faapei ona ufitia o le ilititai i le suāsami.’ (Sapakuka 2:14) A o leʻi oo i lena taimi, seʻi o tatou mulimuli atu i le faaaʻoaʻoga lelei a Sapakuka. Seʻi lē aunoa ona tatou ‘olioli ia Ieova ma fiafia i le Atua o lo tatou faaolataga.’
Pe E te Manatua?
• E ono aafia faapēfea i tatou i le tatalo a Sapakuka?
• Aiseā ua agaʻi atu ai le savaliga a Ieova?
• O le ā ua taʻua i le valoaga a Sapakuka e faatatau i le faaolataga?
• O le ā le uiga faaalia e tatau ona ia i tatou e faatalitalia ai le aso tele o Ieova?
[Fesili mo le Suʻesuʻega]
[Ata i le itulau 23]
Pe e te iloa o ā malosiaga o le a faaaogā e le Atua e faasagatau atu ai i ē amioleaga ia Amaketo?