O le a Lē Faatuai Mai Ieova
O le a Lē Faatuai Mai Ieova
“E ui lava ina tuai mai [le vaaiga], a ia faatalitali pea i ai; aua e oo mai lava, e le faatuai mai.”—SAPAKUKA 2:3.
1. O le ā le maumauaʻi ua faaalia e tagata o Ieova, ma o le ā ua uunaʻia i latou e lenei maumauaʻi e fai?
“OU TE tu i le mea ou te leoleo ai.” O le faaiʻuga maumaututū lena na fai e Sapakuka le perofeta a le Atua. (Sapakuka 2:1) Ua faaalia foʻi e tagata o Ieova i le lona 20 senituri lena lava maumauaʻi. O lea, na latou tali atu ai ma le māʻelegā i lenei valaau na fofogaina mai i se tauaofiaga mataʻina na faia ia Setema 1922 e faapea: “O le aso lenei ua silisili i aso uma. Faauta, ua pule le Tupu! O outou o ona sui o loo faailoa atu mea i le lautele. O lea, ia faalauiloa, faalauiloa, faalauiloa, le Tupu ma lona malo.”
2. I le toe faafoʻisia i se tulaga o gaoioiga olaola ina ua mavae le Taua Muamua a le Lalolagi, o le ā sa mafai loa e Kerisiano faauuina ona faalauiloa atu?
2 Ina ua mavae le Taua Muamua a le Lalolagi, sa toe faafoʻisia e Ieova le vaega totoe faauuina faamaoni i se tulaga o gaoioiga olaola. I le pei o Sapakuka, na mafai e i latou uma taʻitoʻatasi ona faalauiloa atu e faapea: “Ou te tu foi aʻu i le ʻolo, ou te vaavaai foi ina ia ou iloa pe se a se mea e fetalai mai ai o ia ia te au.” O upu Eperu mo le “vaavaai” ma le “leoleo” o loo taʻua soo mai i le tele o valoaga.
“E Le Faatuai Mai”
3. Aiseā e tatau ai ona tatou mataala pea?
3 A o faaleo atu e Molimau a Ieova le lapataʻiga a le Atua i aso nei, e tatau lava ona latou matuā mataala e utagia upu faaiʻu o le valoaga sili a Iesu e faapea: “Ia mataala ai outou; auā tou te le iloa po o afea e sau ai le alii o le aiga, po o le afiafi, po o le tautuluaga o le po, po o le vivini o moa, po o le taeao; neʻi faafuasei ona sau, e maua mai outou o momoe. O le mea ou te fai atu ia te outou, ou te fai atu ai i tagata uma: Ina mataala ia.” (Mareko 13:35-37) I le pei o Sapakuka, ma i le ōgatasi foʻi ma fetalaiga a Iesu, e tatau lava ona tatou mataala pea!
4. E faapēfea ona tutusa atu o tatou tulaga i tulaga sa iai i aso o Sapakuka i le tusa o le 628 T.L.M.?
4 Atonu na māeʻa ona tusia e Sapakuka lana tusi i le tusa o le 628 T.L.M., a o leʻi oo foʻi ina avea Papelonia ma malo malosi o le lalolagi. Mo le tele o tausaga sa faaleo atu ai pea le faasalaga a Ieova ia Ierusalema aposetate. Peitaʻi, sa leai se faailoaga manino po o āfea o le a faaoo mai ai lena sala faafaamasinoga. O ai na mafai ona talitonu faapea, sa na o le toe 21 tausaga ona oo ane lea, ma o le a avea Papelonia ma faaoosala a Ieova? E faapena foʻi i aso nei, tatou te lē iloa ‘le aso ma le itu aso’ ua faatulaga mo le iʻuga o lenei faiga o mea, peitaʻi ua muaʻi lapataʻia i tatou e Iesu: “Ia outou nofo sauni ai; auā o le itu aso tou te le manatunatu ai, e sau ai le Atalii o le tagata.”—Mataio 24:36, 44.
5. O le ā le itu ua sili ai ona faalāʻeiʻau afioga a le Atua o loo faamauina i le Sapakuka 2:2, 3?
5 O se māfuaaga lelei na tuuina atu ai e Ieova ia Sapakuka lenei tofiga faaoso naunau: “Ia e tusi le faaaliga, ia e togitogi i papa, ina ia momoʻe o ia le na te faitauina. Auā o le faaaliga ua tuuina mo ona aso ua tuupoina, a e tautala mai pe a oo i le iuga, e le pepelo lava; e ui lava ina tuai mai, a ia faatalitali pea i ai; auā e oo mai lava, e le faatuai mai.” (Sapakuka 2:2, 3) I aso nei, ua matuā salalau atu le amioleaga ma faiga sauā i le lalolagi atoa, e faamaonia ai ua tatou tutū nei i le siʻui o “le aso tele ma le silisili o Ieova.” (Ioelu 2:31) O se mea e matuā faalāʻeiʻauina ai, o afioga a Ieova lava ia o loo faamautinoa mai e faapea: “E le faatuai mai”!
6. E mafai faapēfea ona tatou sao mai le aso o le sala faafaamasinoga lea o loo fotuaʻi mai?
6 E mafai la faapēfea, ona tatou sao mai le aso o le sala faafaamasinoga o loo fotuaʻi mai? Ua tali mai Ieova e ala i lona faia o lenei faaeseesega i le va o ē amiotonu ma ē amiolētonu: “Faauta, o le ua faafefeteina e le tonu lona loto i totonu ia te ia; a o le ua amiotonu e ola ia i lona faatuatua.” (Sapakuka 2:4) O taʻitaʻi ma tagata faamaualuluga ma le matapeʻapeʻa ua latou faapisipisia le talafaasolopito i ona po nei i le toto o le faitau miliona o tagata ua āfaina fua, ae matilatila ai lava taua e lua a le lalolagi, ma le tele o le faamasaatoto i fasiotiga tagata i va o ituaiga. Ae i le tuufaafeagai, ua tūtūmau pea ma le faamaoni auauna faauuina a le Atua o ē naunau i le filēmū. Ua avea i latou ma “nuu amiotonu o e tausi le mea moni.” O lenei nuu, ma a latou aumea, “isi mamoe,” o loo usitaʻia le timaʻiga e faapea: “Ina faatuatua ia outou ia Ieova e faavavau lava; auā o Ioa Ieova, o le papa e faavavau.”—Isaia 26:2-4; Ioane 10:16.
7. E tusa ai ma le faaaogāina e Paulo o le Sapakuka 2:4, o le ā e tatau ona tatou fai?
7 Ina ua tusi le aposetolo o Paulo i Kerisiano i Eperu, sa ia toe sii atu le Sapakuka 2:4 ina ua ia taʻu atu i tagata o Ieova e faapea: “Ua aoga ia te outou le onosai, ina ia maua e outou le mea na folafolaina, pe a uma ona faia e outou le finagalo o le Atua. Auā e toe itiiti itiiti lava, ona oo mai ai lea o lē maliu mai, e le faatuai mai lava. A e ola lē amiotonu i le faatuatua; i le ma lea, A tuumuli, e le fiafia lava loʻu loto ia te ia.” (Eperu 10:36-38) O o tatou aso e lē o se taimi mo le faifai mālie po o le maileia i le pupū atu i faiga matapeʻapeʻa ma le tuʻinanau i mea faafiafia a le lalolagi a Satani. O le ā e tatau ona tatou fai a o “toe itiiti itiiti lava” uma le taimi o loo totoe? I le pei o Paulo, o i tatou o le nuu paia o Ieova e ao ona tatou ‘tamomoʻe punouaʻi i mea o lumanaʻi, ma tausisi atu i le faailoga’ o le ola e faavavau. (Filipi 3:13, 14) Ma i le pei o Iesu, e ao ona tatou ‘onosaʻi ona o le olioli ua tuu i o tatou luma.’—Eperu 12:2.
8. O ai le “tagata” o loo faamatalaina i le Sapakuka 2:5, ma aiseā o le a ia lē taulau ai?
8 Ua faamatalaina i le Sapakuka 2:5 se “tagata” o lē i se faaeseesega mai auauna a Ieova, ua lē taulau ona ia ausia lona sini, e ui lava sa ia “faateleina lona manao pei o seoli.” O ai lenei tagata o lē “e le maona lava”? I le manaʻo tele e pei o Papelonia i le taimi o Sapakuka, o lenei “tagata” tuufaatasi, ua faia aʻe i malo faapolotiki—pe o pulega faa-Fasi, faa-Nasi, faa-Komunisi, pe oo lava foʻi i vaega e taʻua o le faatemokalasi—o loo faia taua ina ia faalautele atu o latou laueleele. Ua ia faatumuina foʻi Seoli, le tuugamau, i tagata lē sala. Peitaʻi o lenei “tagata” tuufaatasi taufaaʻoleʻole o le lalolagi a Satani, ua onā i lona lava faafefeteina, ua lē taulau i ana taumafaiga e ‘faapotopotoina nuu uma ia te ia, ma aofaʻi mai ia te ia nuu uma.’ E na o Ieova le Atua e mafai ona ia aufaatasia tagata uma, ma o le a ia faataulauina lenei fuafuaga e ala i le Malo Faa-Mesia.—Mataio 6:9, 10.
Le Uluaʻi Auē Mai Auē Mataʻina e Lima
9, 10. (a) O le ā le mea ua faaauau ona faasilasila atu e Ieova e ala ia Sapakuka? (e) O le ā le tulaga o iai i aso nei e tusa ai o mea e maua ona o le amiolētonu?
9 E ala i lana perofeta o Sapakuka, ua faaauau ai ona faasilasila atu e Ieova se faasologa o auē e lima, o faamasinoga e ao ona faataunuu ina ia sauniunia ai le lalolagi mo le nofoia e tagata tapuaʻi faamaoni a le Atua. O na tagata loto saʻo latou te ‘saunia se faataoto’ ua tauaaoina mai e Ieova. Tatou te faitau ai i le Sapakuka 2:6: “Oi talofa i le na te faaputu mea e le ni ana mea! Seia afea? Oi talofa foi ia te ia o le na te faafaupue ia te ia oloa ese!”
10 Iinei o loo avatu ai le faamamafaga i mea e maua ona o le amiolētonu. I le lalolagi o loo tatou ola ai, o le mauʻoa o loo atili ona mauʻoa, a o le mativa o loo atili ona mativa. O i latou e faatauina atu fuālaau faasāina ma ē maua mea i ni faiga faapiopio ua faateleina lo latou tamaoaiga, ae o loo matelāina le toʻatele o nai tagata lautele. Ua taʻua faapea o le tasi vae fā o le faitau aofaʻi o le lalolagi o loo matuā pagatia lava i se tulaga matitiva. E mataʻutia le faalētonu o tulaga o le soifuaga i le tele o atunuu. O i latou o faanaunau ia iai le amiotonu i le lalolagi o loo alalaga atu: “Seia afea” o le a faaauau ai pea ona faateleina nei faiga amioleaga! Peitaʻi, ua i faitotoʻa le iʻuga! O le mea moni lava, “e le faatuai mai” le faaaliga.
11. O le ā ua fai mai ai Sapakuka e faatatau i le faamasaaina o toto o tagata, ma aiseā e mafai ai ona tatou faapea atu e matuā tele se nofosala i le toto o loo i le lalolagi i aso nei?
11 Ua taʻu atu e le perofeta i le tagata amioleaga: “Sa e vetea nuu e tele, o le mea lea e vetea ai oe e nuu uma o totoe; ona o le toto o tagata, ma le saua i le nuu, ma le aai, ma i latou uma o e nonofo ai.” (Sapakuka 2:8) E mataʻutia le nofosala i le toto ua tatou vaaia i le lalolagi i aso nei! Sa taʻua manino e Iesu faapea: “O i latou uma o e tago i le pelu, e oti i latou i le pelu.” (Mataio 26:52) Peitaʻi, i le lona 20 senituri lava ia, ua tuuaʻia ai atunuu atoa ma vaega o tagata o ē ua nofosala i le toto, i le fasiotia o le sili atu i le selau miliona tagata. Oi talofa ia i latou o loo auai i nei faamasaagātoto!
Le Auē Lona Lua
12. O le ā le auē lona lua sa faamauina e Sapakuka, ma e mafai faapēfea ona tatou mautinoa o le a lē aogā ʻoa e maua mai le lē faamaoni?
12 O le auē lona lua, o loo faamauina i le Sapakuka 2:9-11, e oo i lē “na te maua i le amio leaga le oloa mā lona aiga, ina ia tuu lona ofaga i le mea maualuga, ina ia laveaiina o ia i le malaia!” O le a lē aogā le manuia e maua mai le lē faamaoni, e pei ona faamanino mai e le faisalamo: “Aua e te fefe pe a faatamaoaigaina se tasi, pe a faateleina le mamalu o lona aiga; auā e leai se mea na te avea pe a oti o ia; e le mulimuli ifo ia te ia lona mamalu.” (Salamo 49:16, 17) E lelei foʻi ona mātau le fautuaga atamai a Paulo: “Ia e matuā fai atu i e mauoa i lenei olaga, aua neʻi faamaualuluga i latou, aua foi le faamoemoe i le oloa e faaletumau, a o le Atua soifua, o loo foai tele mai ia te i tatou mea uma lava e faafiafia ai.”—1 Timoteo 6:17, LF.
13. Aiseā e tatau ai pea ona tatou faaauau e faaleo atu le lapataʻiga a le Atua?
13 Maʻeu le tāua o le faaleo atu o feʻau faafaamasinoga a le Atua i aso nei! Ina ua tetee atu le ʻau Faresaio i le motu o tagata i lo latou viiviia o Iesu o “le tupu o loo maliu mai i le suafa o [Ieova],” na fetalai atu i ai Iesu: “Ou te fai atu ia te outou, a le feganavai i latou nei, e alalaga mai lava o maa.” (Luka 19:38-40) E faapena foʻi pe a lē taulau i tagata o le Atua i aso nei ona latou faailoa atu le amioleaga o loo iai i lenei lalolagi, ‘o le a matuā alalaga mai lava maa.’ (Sapakuka 2:11) O lea la, seʻi o tatou faaauau pea ma le loto tetele e faaleo atu le lapataʻiga a le Atua!
Le Auē Lona Tolu ma le Matāʻupu i le Nofosala i le Toto
14. O le ā le nofosala i le toto o loo tuuaʻia ai lotu a le lalolagi?
14 O le auē lona tolu sa faasilasila e ala atu ia Sapakuka ua talanoaina ai le mataupu o le nofosala i le toto. Ua faapea mai le Sapakuka 2:12: “Oi talofa i le na te faia se aai i le toto, ma faatumauina se aai i le amioletonu!” I lenei faiga o mea, e masani lava ona faifaimea faatasi le amiolētonu ma le faamasaatoto. E iloga le aafia ai o lotu a le lalolagi i faamasaagātoto e sili ona inosia i le talafaasolopito. Tatou te amata mai i Taua Paia lea e tau i le va o ē faapea mai o Kerisiano ma Musalimi; o Sauāga Faalotu a le Katoliko i Sepania ma Amerika Latina; le Taua e Tolusefulu Tausaga i Europa i le va o Porotesano ma Katoliko; ma taua e lua a le lalolagi lea e aupito sili ona faamasaatoto, o na taua e lua na amata ona tauina i nofoaga o Kerisinetoma.
15. (a) Ona o le lagolagosua po o le ioega a lotu, o le ā le mea ua faaauau ai pea ona faia e atunuu? (e) Pe mafai e Malo Aufaatasi ona faamuta le iai pea o auupega o taua i lenei lalolagi?
15 O se tasi o vala e sili ona leaga o le Taua Lona Lua a le Lalolagi o le Fasiotiga Tagata a le Nasi, lea na matuā mafatia ai le faitau miliona o tagata Siū ma isi tagata lē sala i Europa. E leʻi leva tele atu na taʻutino mai ai e le pulega a le lotu Katoliko Roma i Falani e faapea, sa latou leʻi teena le auina atu o le faitau selau afe o tagata i nofoaga o faasalaga oti a le Nasi. Peitaʻi, o loo faaauau pea ona nofo sauni atunuu e faamasaa le toto, faatasi ai ma le lagolagosua po o le ioega a lotu. I le tautala e faatatau i le Lotu Orthodox i Rusia, na taʻua talu ai nei e le mekasini o le Time (se mataupu faava-o-malo) e faapea: “O loo faatino foʻi e le lotu toefuataʻiina sana taaʻiga tele lava i se mataupu e leʻi tau muamua i ai ni mafaufau o nisi: o vaegāʻau a Rusia. . . . Ua toetoe lava o se faasologa masani o meafai le avatu o faamanuiaga i vaaleletau ma nofoaga o fitafita. Ia Novema, i le Monaseri i Danilovsky i Moscow, le nofoaga o le Augatamā i Rusia, na matuā aafia ai le lotu i le faapaiaina o meatau faaniukilia a Rusia.” Pe mafai e Malo Aufaatasi ona taofia le faia o auupega sili ona mataʻutia mo taua a lenei lalolagi? E matuā faigatā lava! Sa taʻua e se tasi o lē na manumalo i le Nobel Peace Prize i sana faamatalaga i le Guardian, o se nusipepa a Lonetona i Egelani e faapea: “O le mea e sili ona faapopoleina ai ona o atunuu ia e taʻua o malo e lima e tumau ona avea ma sui o le Fonotaga mo le Saogalemu Aoao a Malo Aufaatasi, o malo foʻi na e lima o loo taulamua i le fausiaina ma faatau atu o auupega.”
16. O le ā o le a faia e Ieova i atunuu fetauaʻi?
16 Po o le a aumaia ea e Ieova le sala faafaamasinoga i atunuu fetauaʻi? Ua taʻu mai e le Sapakuka 2:13 e faapea: “Faauta, e le mai ia Ieova o ʻau ea ona ia galulue tagata ma le afi, ma ia lailoa nuu ia i latou lava i mea le aoga lava?” “Ieova o ʻau”! Ioe, e iai ʻau o agelu faalelagi a Ieova, o le a ia faaaogā i le faafanoina o tagata ma atunuu o loo iai uiga fia faitaua!
17. O le ā le telē o le a tumu ai le lalolagi i le poto e uiga ia Ieova pe a uma ona faaoo mai lana sala faafaamasinoga i atunuu sauā?
17 O le ā o le a sosoo ai pe a uma ona faaoo mai e Ieova le sala faafaamasinoga i na atunuu sauā? Ua tali mai le Sapakuka 2:14: “E tumu le lalolagi i le malamalama o le mamalu o Ieova, faapei ona ufitia o le iliti tai i le suāsami.” Maʻeu se faamoemoe matagofie! Ia Amaketo, o le a faasilisilia ai e faavavau le pule silisili ese a Ieova. (Faaaliga 16:16) Ua ia faamautinoa mai ia i tatou e faapea, o le a ia ‘faalaleleia le mea e tū ai ona aao,’ o le lalolagi lenei o loo tatou ola ai. (Isaia 60:13) O le a aʻoaʻoina tagata uma lava i le ala a le Atua i le ola, ina ia tumu le lalolagi i le poto e uiga i fuafuaga mamalu a Ieova, e pei ona ufitia o le ilititai i le suāsami.
Le Auē Lona Fā ma Lona Lima
18. O le ā le auē lona fā na faasilasila e ala atu ia Sapakuka, ma ua faapēfea ona faaātagia atu i le tulaga tau amio a le lalolagi i aso nei?
18 O le auē lona fā o loo faamatala mai i le Sapakuka 2:15 i upu nei: “Oi talofa i le na te faainu i le tasi tagata, o oe o lē liligi atu lau mea oona ia te ia, ua e faaonā foi ia te ia, ina ia e vaai atu i lo latou le lavalavā.” Ua faamatalaina e lenei mea le tulaga soonafai ma le lē pulea o le lalolagi i ona po nei. O ana amioga lē mamā faaleituaiga, ua lagolagoina e ni vaega faalotu o loo faia uiga tuufau, ua matuā paʻū maulalo lava. O mala, e pei o le AIDS ma isi faamaʻi pipisi e māfua mai feusuaʻiga lē mamā, ua matuā faateleina i le lalolagi aoao. Na i lo le faaātagia atu ai o “le mamalu o Ieova,” ua paʻū atili atu le tupulaga manatu faapito o aso nei i se tulaga maulalo lava ma taʻitaʻia ai i le sala faafaamasinoga a le Atua. ‘I le tumu i le maasiasi na i lo le mamalu,’ ua lē o toe umi ona inu lea o lenei lalolagi lē taupulea i le ipu o le toʻasā o Ieova, lea o loo fai ma sui o lona finagalo mo i latou. ‘E iai foʻi le faamāina i luga o lona mamalu.’—Sapakuka 2:16.
19. O le ā le mea e fesootaʻi i ai le faatomuaga o le auē lona lima lea na faasilasila atu e Sapakuka, ma aiseā ua matuā tāua ai na upu i le lalolagi i aso nei?
19 O le faatomuaga o le auē lona lima ua lapataʻi malosi mai e faatatau i tapuaʻiga i faatusa. Ua tuuina e Ieova i le perofeta na te faasilasila atu upu malolosi nei: “Oi talofa i le na te fai atu i le laau, Ala mai ia; ma le maa e le magagana, Tulai mai ia! E aʻoaʻo mai ea lena mea? Faauta ia te ia, ua ufitia i le auro ma le ario, a e leai lava se mānava i totonu ia te ia.” (Sapakuka 2:19) I aso nei, ua tutusapau Kerisinetoma ma i latou ua taʻua o ē faapaupau i lo latou ifo atu i a latou koluse, o latou Tinā Paia, o tupua, ma isi faatusa o tagata ma manu. E aunoa ma se tasi o nei mea e mafai ona tulaʻi mai e laveaʻi i o latou tagata tapuaʻi pe a afio mai Ieova e faaoo le sala faafaamasinoga. O le anoanoaʻi o a latou auro ma ario o loo teuteuina ai nei mea e matuā leai lava se aogā pe a faatusatusa atu i le mamalu o le Atua e faavavau, o Ieova, ma le matagofie o ana foafoaga ola. Tau ina ia tatou viiviia e faavavau lona suafa silisili e lē mafaatusalia!
20. O le ā le faatulagaga o le malumalu lea ua faaeaina i tatou e auauna ai ma le olioli?
20 Ioe, ua onomea ona avatu viiga uma i lo tatou Atua, o Ieova. I le iai o o tatou faalogona o le matuā migao mo ia, seʻi tatou utagia lena lapataʻiga malosi e faatatau i le ifo i tupua. Ae seʻi faalogo foʻi! O loo fetalai mai pea Ieova: “O Ieova ua i lona malumalu paia o ia; ina faalologo ia le lalolagi uma i ona luma.” (Sapakuka 2:20) E lē taumatea sa mafaufau le perofeta i le malumalu i Ierusalema. Peitaʻi, ua faaeaina i tatou i aso nei e tapuaʻi atu i se faatulagaga o le malumalu faaleagaga e sili atu lona matagofie, lea ua faanofo ai lo tatou Alii o Iesu Keriso o le Ositaulaga Sili. Iinei i le lotoā faalelalolagi o lena malumalu, o loo tatou faapotopoto ai, auauna ai, tatalo ai, ma avatu ai ia Ieova le viiga ua tatau mo lona suafa mamalu. Ma e maʻeu se olioli ua tatou maua a o tatou avatu le tapuaʻiga ma le loto atoa i lo tatou Tamā alofa faalelagi!
Pe E te Manatua?
• O le ā sou manatu i le fetalaiga a Ieova: “E le faatuai mai”?
• O le ā le faauigaina i aso nei o auē sa faasilasila atu e ala ia Sapakuka?
• Aiseā e tatau ai ona tatou faaauau pea e faaleo atu le lapataʻiga a Ieova?
• O le lotoā o lē fea malumalu lea ua faaeaina i tatou e auauna ai?
[Fesili mo le Suʻesuʻega]
[Ata i le itulau 15]
I le pei o Sapakuka, ua iloa e auauna a le Atua i aso nei faapea o le a lē faatuai mai Ieova
[Ata i le itulau 18]
Pe e te talisapaia ea le faaeaga o le tapuaʻi atu ia Ieova i le lotoā o lona malumalu faaleagaga?
[Faamatalaga i Ata i le itulau 16]
U.S. Army photo