Taulau Manuia e Ala i le Finafinau

O LE finafinau o se uiga ua seāseā lava toe iai i nei ona po. E toʻatele tagata e iai lo latou talitonuga faapea o le taulau manuia e tele ina faalagolago i le fetaui o le nofoaga ma le fetaui o le taimi e fai ai, na i lo le faalagolago i le finafinau. O ai e mafai ona faitio atu i lena manatu? Ua tumu tala faasalalau i faaupuga o faasalalauga faatōsina ua momoli mai ai se feʻau faapea, e toetoe lava o so o se mea e te manaʻo i ai, e mafai ona e maua i le na o sina taumafaiga itiiti ma sina tupe itiiti e alu ai. Ua lolomi mai pea lava pea e nusipepa le anoanoaʻi o tala e faatatau i taulau manuia faafuaseʻi ma tagata faipisinisi latou te faia ni pisinisi ma mauaina le faitau miliona o tupe i le taimi lava e iʻu mai ai a latou aʻoaʻoga.

Na faapea mai ma le faanoanoa le tusitala o se nusipepa o Leonard Pitts: “I se sosaiete e mamafa ia i latou le vaaiga faaletagata, o se mea e faigofie le oo i se tulaga silisili. . . . E foliga mai e so o se tasi lava e mafai ona ia faia pe afai e malamalama i le auala e fai ai, pe afai e iai i lea tagata le tomai, pe faafuaseʻi foʻi ona ia maua se fesoasoani mai le Atua.”

O le ā le Finafinau?

O le finafinau o lona uiga ia ‘pipii mau ma ia maumaututū i se fuafuaga, se tulaga, po o se galuega o loo faagasolo e ui lava i ni toʻatugā po o ni tulaga e toe faavaatuʻia ai.’ E faauiga atu i le faaauau ma le maumauaʻi i se mea e ui ina fesagaʻi ma ni faigatā, e pipii mau, e lē faamaamulu. E faamatilatila mai e le Tusi Paia le tāua o lenei uiga. Mo se faataʻitaʻiga, ua timaʻi mai le Afioga a le Atua ia i tatou e faapea: “A ia outou muai saili (“pea,” NW) lona malo,” “ia outou tuʻituʻi atu (“pea,” NW), ona toina mai ai lea ia te outou,” “ia finafinau i le tatalo,” ma “ia taofi mau  i le mea lelei.”—Mataio 6:33; Luka 11:9; Roma 12:12; 1 Tesalonia 5:21.

O se vala tāua o le finafinau o le faafetaiaʻia ma le manumalo o ni tulaga lē maʻalofia e faavaatuʻia ai. Ua taʻua e le Faataoto 24:16 e faapea: “E atu fitu ona paū lē amiotonu, a e toe tu o ia.” Na i lo le ‘faamaamulu’ pe a fetaiaʻi ma se faigatā po o se lē taulau, o le tagata e finafinau e ‘toe tū aʻe i luga,’ e ‘faaauau pea,’ ma toe taumafai foʻi.

Peitaʻi o le toʻatele lava, e lē o sauniuni mo faigatā ma lē taulau latou te ono fetaiaʻi. Talu ai latou te leʻi atiina aʻe lava se faanaunauga ina ia finafinau, e faigofie ai la ona latou faamaamulu. Fai mai se faamatalaga a le tusitala o Morley Callaghan: “E matuā toʻatele lava tagata e fesagaʻi ma se tulaga ua lē taulau ai, i se auala e toe faamanuʻalia ai lava i latou. Latou te faanoanoa mo i latou lava, latou te tuuaʻia isi, latou te feita ma . . . faamaamulu.”

O se mea lenei e faanoanoa ai. Ua faapea mai Pitts: “Ua galo ia i tatou, e iai se māfuaaga e onosaʻia ai puapuaga, e iai ni mea aogā i le iai o mala.” O ā ia mea aogā? Ua faaiʻu mai ona manatu e faapea: “E iloa ai e [se tasi], o le lē taulau e lē o se mea mataʻutia e iʻu i le oti, e lē faavavau foʻi ona faatoʻilaloina ai. E maua ai e se tasi le faatelega o se uiga manaʻomia. E sauniunia ai se tasi.” E faigofie lava le auala o loo faaupu ai e le Tusi Paia: “O i ai le mau [“se mea aogā,” NW] i galuega uma.”—Faataoto 14:23.

O le mea moni, e lē faigofie ona toe faaauau pe a mavae se tulaga ua toe faavaatuʻia ai. O nisi taimi tatou te fesagaʻi ai ma luʻi atonu e foliga mai e faalēaogāina ai a tatou taumafaiga uma lava ina ia manumalo ai. Na i lo le tau lalata mai o o tatou sini, e foliga ua atili ai ona mamao ese ma tau mou atu. Atonu tatou te lagona le atuatuvale, lagona e lē mafaia se mea, e ono loto vaivai, pe oo foʻi ina lagona le mafatia. (Faataoto 24:10) Peitaʻi, ua faalāʻeiʻau mai le Tusi Paia ia i tatou e faapea: “Aua neʻi tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai.”—Kalatia 6:9.

O le ā e Mafai Ona Fesoasoani Ina ia Tatou Finafinau?

O le laasaga muamua mo le finafinau i se ala ua filifilia, o le faatulaga lea o ni sini aogā ma o ni sini e mafai ona ausia. E mautinoa lava sa malamalama le aposetolo o Paulo i lenei mea. Na ia taʻu atu i Kerisiano i Korinito e faapea: “O aʻu nei foi, ua faapea ona ou momoʻe e le ma le faaletonu; ua faapea ona ou tuʻi, e le pei o se tuʻi le matagi.” Sa iloa e Paulo e faapea, pe afai e manaʻo ia taulau manuia ana taumafaiga, sa tatau ona manino lelei ona sini, ia pei o se tagata tamoʻe o loo taulaʻi atu lona mafaufau i le laasia o le tini i se tuuga. Na ia faalāʻeiʻau atu ia i latou: “Tou te le iloa ea, o e tausinio i le ala tanu, e tausinio uma i latou, a e maua le taui e le toatasi? Ia faapea ona outou tausinio, ina ia outou maua.” (1 Korinito 9:24, 26) E mafai faapēfea ona tatou faia lenei mea?

Ua faapea mai le Faataoto 14:15: “O le ua mafaufau, ua faautauta o ia i lona ala.” O se gaoioiga atamai le toe vaʻili lelei o a tatou fuafuaga o le olaga mai lea taimi i lea taimi, i lo tatou fesiligia o i tatou lava po o fea lea tatou te agaʻi atu i ai, ma pe faamata foʻi e manaʻomia ona faia ni fetuutuunaʻiga. E matuā tāua le faamanino lelei i o tatou mafaufau po o ā mea tatou te mananaʻo e faataunuu ma pe aiseā foʻi. O le a seāseā ona tatou mafaufau e faamaamulu pe afai tatou te faamausalī pea i o tatou mafaufau se vaaiga i lo tatou sini autū. “Ia vaai saʻo ou mata i ou luma,” o le faalāʻeiʻau mai lea a le faataoto faagaeeina, “ona faatumauina ai lea o ou ala uma.”—Faataoto 4:25, 26.

Pe a uma ona faamautinoa lelei ou sini, o le laasaga loa e sosoo ai o le iloilo totoʻa po o le ā le auala e mafai ona e ausia ai na sini. Na fesili mai Iesu: “O ai foi so outou ua fia fai se ʻolo, e le muai nofo i lalo e faitau tupe e totogi aʻi?” (Luka 14:28) I le ōgatusa ma lenei mataupu silisili, na taʻua ai e se tagata poto faapitoa i mataupu tau le mafaufau e faapea: “O se tasi o mea ua ou mātauina i tagata o loo taulau manuia, o lo latou malamalama manino lea i le sootaga o le māfuaaga o se mea ma āuga o lena mea i o latou olaga. Ua iloa lelei e tagata o loo taulau manuia faapea, pe afai latou te mananaʻo i se mea, e tatau ona latou uia auala talafeagai uma ina ia maua ai lena mea.” O le iai o se malamalamaga manino i laasaga talafeagai uma tatou te manaʻomia e ausia ai se mea o loo tatou mananaʻo ai, o le a fesoasoani lena e taulaʻi ai pea la tatou vaai i lena mea. O le a faigofie ai foʻi mo i tatou ona toe faavasega a tatou gaoioiga pe afai ua tatou faavaatuʻia. O se iloiloga totoʻa faapena na matuā telē sona sao i le taulau manuia o Orville ma Wilbur Wright.

O lea la, pe a toe faavaatuʻia, ia e faia le mea silisili e te mafai ina ia e tagaʻi i lena tulaga i se vaaiga mautinoa ma tagaʻi i ai o se mea e aʻoaʻo mai ai se lesona. Iloilo totoʻa le tulaga, ia faamautinoa po o gafea na e sesē ai, ona faasaʻo loa lea o le mea sesē pe fai se vaifofō mo le faafitauli po o le vaivaiga. E aogā  foʻi le talanoa atu i isi, auā “e faatumauina mafaufauga i le filifiliga.” (Faataoto 20:18) E masani lava, o taumafaiga taʻitasi, e mafai ai ona e ati aʻe atili se poto faapitoa ma ni tomai, lea e saosaolaumea i lou taulau manuia.

O le tāfa tāua lona tolu o le finafinau o gaoioiga e faifai pea. Ua timaʻi mai le aposetolo o Paulo ia i tatou e faapea: “A ia tatou amio e tusa ma le tulaga ua tatou aulia.” (Filipi 3:16) E pei ona faaupuina e se tasi alii faiaʻoga, “o le iai o le pulea ma le faifai pea i le faagasologa o taimi e maua ai iʻuga lelei.” Ua lelei ona faataʻitaʻia mai lenei manatu i le tala faafagogo lauiloa i le laumei ma le lapiti. Na mua le laumei i le tuuga, e ui lava sa matuā telegese o ia na i lo le lapiti. Aiseā? Talu ai sa maumauaʻi ma faatonutonu lelei le alu a le laumei. Sa leʻi faamaamulu ae na ia filifilia se saoasaoa e mafai ona ia faaauau ai pea, ona ia tausisi pea lea i ai seʻia oo ina taunuu i le tini. Talu ai o le tagata e maopoopo lelei ma maumauaʻi e mafai ona faaauau pea ona agaʻigaʻi i luma, e tumau foʻi la ona iai ni ana uunaʻiga atili, ma lē ono faamaamulu ai pe alu ese mai le tausinioga. Ioe, ia “tausinio” i se tulaga o le a e mauaina ai lou sini.

Filifilia o Sini e Aogā

O le mea moni, ina ia aogā le finafinau, e manaʻomia ona iai ni o tatou sini aogā. E toʻatele tagata e tauivi ia maua mea e lē aumaia ai se fiafiaga. Peitaʻi ua faasino mai e le Tusi Paia faapea: “O lē matuā matamata i le tulafono o le saʻolotoga ua atoatoa ona lelei, ma ua tumau i ai o ia . . . e manuia o ia i lona lava anaana.” (Iakopo 1:25) Ioe, o le suʻesuʻe ina ia malamalama i tulafono a le Atua e pei ona faatulaga mai ai i le Tusi Paia o se sini e matuā aogā lava. Aiseā? O le māfuaaga e sili ona tāua, talu ai o le tulafono a le Atua e faavae aʻe i ana tapulaa lelei atoatoa ma amiotonu. Ona o ia o Lē na Foafoaina Mea, ua ia silafia ai le mea e sili ona lelei mo ana foafoaga. O lea, afai tatou te maumauaʻi i le aʻoaʻoina o faatonuga a le Atua ma faatatauina i o tatou olaga, e mautinoa o lena maumauaʻi o le a aumaia ai ia i tatou le fiafia. Ua folafola mai le Faataoto 3:5, 6: “Ia e faatuatua ia Ieova ma lou loto atoa . . . Ia e manatua o ia i ou ala uma, ona faatonuina ai lea e ia lava ou ala.”

E lē gata i lea, o le iloaina o le poto e uiga i le Atua ma Iesu e taʻitaʻia atu ai i “le ola e faavavau,” e pei ona fetalai ai Iesu. (Ioane 17:3) O valoaga a le Tusi Paia ua faaalia ai faapea, o loo tatou ola nei i “aso e gata ai” o lenei faiga o mea. (2 Timoteo 3:1-5; Mataio 24:3-13) Ua lē o toe mamao ona faatino loa lea e le Malo o le Atua, lana faigāmālō amiotonu i tagata o loo ʻaināina le lalolagi. (Tanielu 2:44; Mataio 6:10) O le faigāmālō lena o le a faaofi maia se vaitaimi o le filēmū e leʻi faapea ona iai muamua, le sologa lelei, ma le manuia mo tagata usiusitaʻi uma lava. (Salamo 37:10, 11; Faaaliga 21:4) Ua faapea mai le Galuega 10:34: “E le faailogaina tagata e le Atua.” Ioe, ua valaaulia tagata uma lava ina ia latou tofutofusia i ona aogā!

O le Tusi Paia o se tusi anamuā ua tumu i le atamai ma le uiga loloto. O le taumafai ia malamalama i ai e tele se taimi ma ni taumafaiga e alu ai. Peitaʻi e ala i le fesoasoani a le Atua—ma pe afai tatou te maumauaʻi e saili i le poto o loo iai—o le a avea ai o se tusi e faigofie ona tatou malamalama i ai. (Faataoto 2:4, 5; Iakopo 1:5) Ua ioeina faapea, o le faatatauina o mea ua tatou aʻoaʻoina e ono avea o se luʻi. Tatou te ono manaʻomia ai le faia o ni fetuutuunaʻiga i o tatou mafaufauga po o a tatou masaniga. Atonu ona o ni faanaunauga lelei e ono tetee mai ai ni a tatou uō po o tagata o o tatou aiga i lo tatou suʻesuʻeina o le Tusi Paia. E matuā manaʻomia ai la le maumauaʻi. Ua faamanatu mai e le aposetolo o Paulo ia i tatou e faapea, o le a foaʻi mai e le Atua le ola e faavavau ia i latou o ē faaalia le “tumau pea i galuega lelei.” (Roma 2:7) O le a fiafia Molimau a Ieova e fesoasoani atu ia te oe ina ia e maua lenei sini.

Ia mautinoa o le a e mauaina le taulau manuia pe afai e te finafinau e aʻoaʻoina mea e uiga i le Atua ma lona finagalo, ma ia e maumauaʻi e faatatauina mea ua e aʻoaʻoina.—Salamo 1:1-3.

[Ata i le itulau 6]

O le a e mauaina le taulau manuia pe afai e te finafinau e aʻoaʻoina mea e uiga i le Atua ma lona finagalo

[Faamatalaga i Ata i le itulau 4]

Culver Pictures