Ia Utagia le Lapataʻiga!

PĀ! Ia Iuni 3, 1991, faatasi ai ma se gogolo tele, na vaʻaia ai le pupusa aʻe i luga mai le mauga o Fugen i Iapani o le āusa ma le lefulefu o le mauga mu. Na tafe mai i lalo le lava ua matuā aasa lava. Na pā le mauga mu ma maliliu ai tagata e toʻa 43. O i latou na toeitiiti a lē sao mai ai na matuā leaga tulaga o o latou mu. “Se vai, se vai faamolemole,” o le augani mai lena a nisi. Na faanatinati atu ma le popole le ʻautinei mu ma leoleo e fesoasoani ia i latou.

PE TUSA o le lua vaiaso muamua atu, na vaaia ai le asuasu o se lava i le tumutumu o le mauga o Fugen, o lea sa mataalia ai le malo ma tagata na nonofo ai iinā. Pe ā o le silia ma se vaiaso a o leʻi tupu le mala, na avatu ai se fautuaga ina ia tuua le nofoaga. I le toe tasi lava le aso ae pā le mauga mu, na talosaga atu ai leoleo i sui o nusipepa ina ia ʻalofia lo latou toe ō atu i le nofoaga ua faasāina. E ui i lea, i lena aoauli na feoti ai le toʻa 43 o i latou na iai i lena nofoaga lamatia.

Aiseā na toʻatele ai i latou na ō atu i le nofoaga pe na nonofo ai pea iinā? O nisi faifaatoʻaga na tuua o latou fale na toe foʻi atu e siaki a latou mea tōtino ma o latou fanua. E toʻatolu ni tagata suʻesuʻe i mauga mu na taumafai e matuā faalatalata atu i le mauga mu ina ia faamalieina ai lo latou naunau fiailoa e tusa o mea na latou aʻoaʻoina. O nisi o tusitala ma le ʻaupuʻeata na faamālosi lava ona latou sopoʻia le tuaoʻi na faasāina ona āsā ona sa latou mananaʻo latou te muaʻi maua mai faamatalaga faapitoa mo lea taimi e faatatau i le mauga mu. E toʻatolu ni ave taavale o taavale laʻupasese na togipau e le ʻautusitala faasalalau na iai i le mea na tupu ai le faalavelave. O leoleo ma le ʻautinei mu na tauofo ane sa galulue ai iinā. E tofu lava le tagata ma lana māfuaaga na ala ai ona alu i lea nofoaga lamatia—ma o le iʻuga na leiloa ai lona soifua.

Pe o E Iai i se Nofoaga Lamatia?

Atonu tatou te lē o nonofo latalata i se mauga mu o loo ola pea. Peitaʻi, e faapēfea pe afai o loo tatou fesagaʻi ma se mala tele i le lalolagi aoao, ua tuʻua ai i tatou uma i se nofoaga lamatia e aafia ai le lalolagi atoa? Ua lapataʻia i tatou e se tusi ua faamaonia le avea ma puna maufaatuatuaina o faamatalaga faavaloaga e faatatau i se mala o loo lalata mai e aafia ai le lalolagi atoa ma ua faamatalaina faapenei: “Ona faapogisaina loa lea o le la, e le susulu mai foi le masina, e pauu foi fetu mai le lagi, e  luluina foi ʻau a le lagi. . . . Ona taufaitagituʻi ai lea o ituaiga uma o le lalolagi.” (Mataio 24:29, 30) O le mea mataʻutia lenei e tupu i le lagi e aafia ai mea i le vateatea ua faamatalaina faapea e aafia ai “ituaiga uma o le lalolagi.” I se isi faaupuga, o loo faasino atu lenei valoaga i se mala o le a aafia ai i tatou uma.

O lenei tusi o valoaga maufaatuatuaina, o le Tusi Paia. Seʻi mātau foʻi, ua aumaia e le manatu o le mau e pei ona taʻua i luga ni faamatalaga auʻiliʻili o mea o le a tutupu e taʻitaʻia atu ai i le oo mai o le mala i le lalolagi atoa. E pei lava ona avatu e le asuasu aʻe o le lava ma isi faailoga o se mauga mu i le pulega o le aai o Shimabara māfuaaga e ao ai ona tuua le nofoaga lamatia, ua faapena foʻi ona aumaia e le Tusi Paia ia i tatou māfuaaga e mataala ma sauniunia ai i tatou mo le faasaoina. E mafai ona tatou aʻoaʻoina se lesona mai le mala i le mauga o Fugen ma faautauta ai i le mataʻutia o le tulaga o loo faaloloʻi mai.

 [Faamatalaga i Ata i le itulau 2]

FAAVAA: Yomiuri/Orion Press/Sipa Press

[Faamatalaga i Ata i le itulau 3]

Yomiuri/Orion Press/Sipa Press