Po ua Uunaʻia ea Oe e Gaoioi e Pei Ona sa Faia e Iesu?

“Ua na silafia le motu o tagata e toatele, ona mutimuti vale ai lea o lona alofa ia te i latou, auā ua faapei o mamoe i latou e leai so latou leoleo; ona aʻoaʻo atu lea o ia ia te i latou.”—MAREKO 6:34.

1. Aiseā ua avea ai o se tulaga masani le faaalia e tagata o ni uiga mataʻina?

I LE gasologa mai o le talafaasolopito, e toʻatele tagata ua latou faaalia ni uiga mataʻina. Ua e malamalama i le māfuaaga ua faapea ai. O Ieova le Atua o ia e ana ma o ia foʻi o loo faaalia maia le alofa, le agalelei, le matamau, ma isi lava uiga o loo tatou faatāuaina. Sa foafoaina tagata i le faatusa o le Atua. E mafai ai la ona tatou malamalama i le pogai o le a faaalia ai e le toʻatele o tagata i se tulaga faatapulaaina, le alofa, le agalelei, tigā alofa, ma isi uma uiga tauatua, ma ua oo lava foʻi ina faaātagia mai e le toʻatele le ia i latou o se loto fuatiaifo. (Kenese 1:26; Roma 2:14, 15) Peitaʻi, atonu ua e silafia, o nisi tagata e vave atu lo latou faaalia maia o nei uiga na i lo isi.

2. O ā nisi galuega lelei ua mafai ona faatino e tagata, atonu i lo latou manatu faapea o loo faataʻitaʻi atu ai ia Keriso?

² Atonu e te silafia ni tamāloloa ma ni fafine e masani ona asiasi atu pe fesoasoani atu i tagata mamaʻi, e faaalia le loto alofa i tagata ua lē atoatoa le malosi o le tino po o le mafaufau, pe foaʻi atu ma le matamau mea mo tagata matitiva. Seʻi manatu foʻi i tagata o ē ua avea lo latou loto alofa ma uunaʻiga ua faaaogā ai o latou olaga e galulue i nofoaga o tausia ai tagata lepela po o nofoaga o tamaiti mātua oti, o ē ua tauofo e galulue i falemaʻi po o nofoaga o tausia ai manaʻoga faaletino ma faalemafaufau o ni tagata  mamaʻi tigaina, po o tagata foʻi o loo tauivi e fesoasoani i ē ua leai ni fale e nonofo ai po o tagata sulufaʻi. E foliga mai, e manatu nisi o i latou faapea o loo latou faataʻitaʻi atu ia Iesu, o lē na ia faataatia se faaaʻoaʻoga mo Kerisiano. Ua tatou faitau i Evagelia e faapea na faamālōlō e Keriso tagata mamaʻi ma fafaga i ē matelāina. (Mareko 1:34; 8:1-9; Luka 4:40) O le faaalia mai e Iesu o le alofa, le māfana ma le agalelei o faailoaga na o “le finagalo o Keriso,” o lē na faataʻitaʻi atu i lona Tamā faalelagi.—1 Korinito 2:16.

3. Ina ia maua se vaaiga paleni i galuega lelei na faia e Iesu, o le ā e manaʻomia ona tatou talanoaina?

³ Ae po o e mātauina ea, i aso nei o le toʻatele lava o ē ua pāʻia o latou loto i le tigā alofa o Iesu, o loo galo ia i latou se vala autū o le finagalo o Keriso? E mafai ona tatou maua se malamalamaga i lenei manatu pe a tatou talanoaina auiliili le Mareko mataupu e 6. Ua tatou faitau ai faapea, na aumai e tagata i latou o ē mamaʻi ia Iesu ina ia faamālōlōina. I isi fuaiupu o le mataupu lava lea, tatou te iloa ai foʻi, ina ua silasila atu Iesu i le matelāina o le afe ma afe o ē na ō ane ia te ia, sa ia fafagaina loa faavavega i latou. (Mareko 6:35-44, 54-56) O le faamālōlōina o ē mamaʻi ma le fafagaina o ē na matelāina o ni faailoaga mataʻina na o le alofa, ae pe o auala autū ea na sa fesoasoani atu ai Iesu i isi? Ma e mafai faapēfea ona tatou faataʻitaʻia i se tulaga e sili ona lelei lana faaaʻoaʻoga lelei atoatoa o le alofa ma le tigā alofa, e pei foʻi ona sa ia faataʻitaʻi atu ia Ieova?

Na Uunaʻia e Tali Atu i Manaʻoga Faaleagaga

4. O le ā le taimi na tupu ai le mea o loo taʻua i le Mareko 6:30-34?

⁴ O le māfuaaga autū na mutimutivale ai le alofa o Iesu ia i latou na ō ane ia te ia, ona o o latou manaʻoga faaleagaga. O na manaʻoga sa sili atu ona tāua na i lo manaʻoga faaletino. Manatu foʻi i le tala o loo taʻua i le Mareko 6:30-34. O le mea o loo faamauina iinā na tupu i matāfaga o le Vai o Kalilaia, a o latalata atu i le taimi o le Paseka i le 32 T.A. Sa iai se māfuaaga lelei na fiafia ai le ʻauaposetolo. Ona o lea faatoʻā māeʻa la latou malaga tele sa taamilo ai, ua agaʻi ane nei ia Iesu, e mautinoa o loo naunau e faamatala atu ia te ia ni mea na tutupu i la latou malaga. Peitaʻi, na lolofi ane foʻi se motu o tagata. Na matuā toʻatele lava, sa lē mafai ai e Iesu ma ona aposetolo ona aai pe mālōlō. Ona fetalai atu lea o Iesu i ona aposetolo: “Ina o mai ia, tau lava o i tatou, i se mea tuufua, seʻi tou mapu ae teisi.” (Mareko 6:31) Na latou ō atu i se vaa, atonu i tala ane o Kapanaumi, ma folau atu loa i le isi itu o le Vai o Kalilaia i se nofoaga toʻafilēmū. Peitaʻi na taufetuli atu foʻi le motu o tagata i le matāfaga ma muamua taunuu a o leʻi taunuu le vaa. Na faapēfea nei ona tali atu i ai Iesu? Pe na toʻatamaʻi ea o ia ona ua faalavelave mai i lana mālōlōga? E matuā leai lava!

5. Na faapeī lagona o Iesu i le motu o tagata na ō ane ia te ia, ma o le ā lana tali atu i ai?

⁵ Sa mutimutivale le alofa o Iesu a o silasila atu i lenei motu o tagata e afe ma afe, e aofia ai ē mamaʻi, o loo faatalitali ma le naunautaʻi mai ia te ia. (Mataio 14:14; Mareko 6:44) I le taulaʻi atu i le uunaʻiga o le agalelei o Iesu ma le auala na Ia tali atu ai, na tusi Mareko e faapea: “Ua na silafia le motu o tagata e toatele, ona mutimuti vale ai lea o lona alofa ia te i latou, aua ua faapei o mamoe i latou e leai so latou leoleo; ona aʻoaʻo atu lea o ia ia te i latou i mea e tele.” (Mareko 6:34) Sa lē na o se vaega tele o ni tagata na silasila i ai Iesu. Sa ia silasila i tagata taʻitoʻatasi o loo iai o latou manaʻoga faaleagaga. Sa pei i latou o ni mamoe o loo fesēaʻi ua lē mafesoasoania, e lē o iai se leoleo mamoe e taʻitaʻia i latou i vao muʻa pe puipuia i latou. Na silafia e Iesu o taʻitaʻi lotu lē alolofa, o ē na tatau ona avea ma leoleo mamoe alolofa, o le mea moni sa latou ʻinoʻino i tagata lautele ma lē amanaʻia o latou manaʻoga faaleagaga. (Esekielu 34:2-4; Ioane 7:47-49) Peitaʻi e ese le auala na finagalo Iesu e feutagaʻi ai ma i latou, e ala i le faia o le mea e sili ona lelei na ia mafaia mo i latou. Sa amata ona ia aʻoaʻoina i latou e uiga i le Malo o le Atua.

6, 7. (a) O le ā le mea na muamua ona faatāua ua faailoa mai e Evagelia i le tali atu a Iesu i manaʻoga o tagata? (e) O le ā le uunaʻiga na māfua ai ona talaʻi ma aʻoaʻo atu Iesu?

⁶ Mātau mai le faasologa ma le faatulagaina o le mea na muamua faatāua, e pei ona taʻua i se isi faamatalaga o le mea lava lea na tupu. O le faamatalaga lenei na tusia e Luka, o ia o se fomaʻi ma sa naunau loloto i le lelei faaletino o isi. “Ona . . . mulimuli atu lea ia [Iesu o le motu o tagata]; ona talia lea o i latou e ia, ua fetalai foi ia te i latou i le malo o le Atua, ma faamalolo i e na fia faamaloloina.” (Luka 9:11; Kolose 4:14) E ui e lē o faapena ona faamatalaina vavega uma i tala uma, ae i lenei tala, o le ā na muamua lava  taʻua e le tala faagaeeina a Luka? O le mea moni faapea sa aʻoaʻo atu Iesu i tagata.

⁷ E ioe moni lenei manatu i le faamamafaga lea tatou te maua i le Mareko 6:34. O loo faaalia manino i lena fuaiupu le auala na matuā uunaʻia ai Iesu e faaalia le mutimutivale o lona alofa. Sa ia aʻoaʻo atu i tagata, e tali atu ai i o latou manaʻoga faaleagaga. I se taimi muamua atu i lana faiva, na fetalai ai Iesu e faapea: “E tatau ona ou folafola le tala lelei o le malo o le Atua i nisi aai foi; auā o le mea lea na auina mai ai aʻu.” (Luka 4:43) Peitaʻi, e sesē pe a ia i tatou le manatu faapea sa folafola atu e Iesu le feʻau o le Malo ona o se tiute, e peiseaī na pau le māfuaaga na ia faia ai le galuega talaʻi ona o se mea sa tatau ona ia faia e aunoa ma sona naunau i ai. E leai, o lona alofa mo tagata o se uunaʻiga autū lena na ia tufa atu ai le tala lelei ia i latou. O le lelei sili na mafai e Iesu ona fai—e oo foʻi mo ē mamaʻi, o ē na ulutinoina e temoni, o ē matitiva, po o ē na matelāina—o le fesoasoani atu lea ina ia latou iloa, talia, ma alolofa i le upu moni e uiga i le Malo o le Atua. O lena upu moni sa sili ona tāua, ona o le matāfaioi a le Malo o le faasilisilia o le pule silisili ese a Ieova ma le saunia o faamanuiaga tūmau mo le fanau a tagata.

8. Na faapefea ona manatu Iesu i lana galuega talaʻi ma le aʻoaʻo atu?

⁸ O le talaʻiga māʻelegā a Iesu e uiga i le Malo o le māfuaaga autū lena o lona afio mai i le lalolagi. A o lata i le iʻuga o lana faiva i le lalolagi, na fetalai atu Iesu ia Pilato: “O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i loʻu leo.” (Ioane 18:37) Ua tatou mātauina i matāʻupu e lua ua mavae atu faapea, o Iesu o se tagata sa iai ona faalogona māfana—e manatu mamafa, e faigofie ona faalatalata atu i ai, e magafagafa, na te maufaatuatuaina isi, ae o lona uiga silisili lava, o le alofa. E ao ona tatou malamalama i na vala eseese o lona uiga totino pe afai tatou te mananaʻo moni e malamalama i le finagalo o Keriso. E faapena foʻi le tāua ona iloa faapea, o le finagalo o Keriso e aofia ai le faamuamua lea sa ia faatulagaina ai lana galuega talaʻi ma le aʻoaʻo atu.

Na Ia Uunaʻia Isi e Molimau Atu

9. O ai i latou sa tatau ona faamuamuaina le galuega talaʻi ma le aʻoaʻo atu?

⁹ O le faamuamua o le galuega talaʻi ma le aʻoaʻo atu—e fai ma faailoaga o le alofa ma le agalelei—sa lē na o Iesu e ao ona faaalia. Na ia faalāʻeiʻauina ona soo ia faataʻitaʻi atu i māfuaaga o ana gaoioiga, i mea na ia faamuamua, ma galuega na ia faia. Mo se faataʻitaʻiga, ina ua uma ona filifilia e Iesu ona aposetolo e toʻa 12, o le ā sa tatau ona latou fai? Ua taʻu mai e le Mareko 3:14, 15 ia i tatou: “Ona tofia lea e ia le toatinoagafulu ma le toalua, [“o ē na ia taʻua foʻi o ‘aposetolo’,” NW] ina ia latou faatasi ma ia, ina ia aauina atu foi i latou e talaʻi le tala lelei; [ma] ia tuuina atu foi le pule ia te i latou, latou te tutuli ai temoni.” Po o e mātau maia se mea sa tatau ona faamuamua e le ʻauaposetolo?

10, 11. (a) Ina ua aauina atu le ʻauaposetolo e ō, o le ā na taʻu atu e Iesu ia i latou e fai? (e) O le ā sa taulaʻi atu i ai le aauina atu o le ʻauaposetolo?

¹⁰ Mulimuli ane, na tuu atu e Iesu le mana i le toʻasefulu ma le toʻalua ina ia mafai ona latou faamālōlōina isi ma tutuli temoni. (Mataio 10:1; Luka 9:1) Ona ia aauina lea o i latou e ō atu i ‘mamoe ua lē iloa o le aiga o Isaraelu.’ Ina ia faia le ā? Na faatonu atu Iesu ia i latou: “A outou o, ia outou talaʻi atu, ia faapea atu, Ua latalata mai le malo o le lagi. Ia outou faamalolo i e mamai, faatutū i e ua oti, faamamā lepela, tutuli i temoni.” (Mataio 10:5-8; Luka 9:2) O le ā moni lava le mea na latou fai? “Ona latou o atu ai lea ma [1] talaʻi atu ina ia latou salamo. E [2] toatele foi temoni ua latou tulia, e toatele foi o e na mamai ua latou faauuina i le suāuu, ma faamaloloina.”—Mareko 6:12, 13.

¹¹ Talu ai e lē o taimi uma e muamua ai ona taʻua le aʻoaʻo atu, po o le mātauina ea la o le faasologa o taʻua i luga, e faapea ai ua soona faamamafa naʻuā le matāʻupu i mea e ao ona faamuamua po o uunaʻiga? (Luka 10:1-9) Manatua, e lē tatau ona tatou manatu māmā i le tāua o le taʻua soo muamua o le aʻoaʻo atu na i lo faamālōlōga. Seʻi manatu i isi fuaiupu o loo faamatala ai lenei mea. A o toe o se āga aauina atu e Iesu ona aposetolo e toʻasefulu ma le toʻalua, na ootia ona lagona i le tulaga sa iai le motu o tagata. Tatou te faitau ai faapea: “Ua faataamilo Iesu i aai uma ma faoa aai, ua aʻoaʻo i o latou sunako, ma talaʻi i le tala lelei o le malo, ua ia faamalolo foi i maʻi uma, ma maʻi tiga uma o le nuu. Ua silafia e ia le motu o tagata, ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo. Ona fetalai  atu ai lea o ia i ona soo, ‘E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.’”—Mataio 9:35-38.

12. O le ā le isi fuafuaga na mafai ona faatino e galuega faavavega a Iesu ma le ʻauaposetolo ?

¹² O le faatasi atu o le ʻauaposetolo ia te ia, na mafai ona latou aʻoaʻoina mai ai se vaega o le finagalo o Keriso. Sa mafai ona latou lagonaina faapea, o lo latou alofa moni ma le agalelei i tagata sa aofia ai le talaʻi ma le aʻoaʻo atu e uiga i le Malo—o le mea lena sa tatau ona avea ma vala autū o a latou galuega lelei. E tusa ai ma lena manatu, na faatino ai e galuega lelei faaletino e pei o le faamālōlōina o maʻi, nisi mea e sili atu na i lo le tau ina fesoasoani i ē sa manaʻomia. E pei ona e mātau mai, o nisi tagata atonu sa tosina ane ona o faamālōlōga ma le sauniunia faavavega o meaʻai. (Mataio 4:24, 25; 8:16; 9:32, 33; 14:35, 36; Ioane 6:26) Peitaʻi, e ese mai le avea o se fesoasoani faaletino, o na galuega sa uunaʻia moni ai lava i latou na vaavaai ane ia iloatino, o Iesu o le Alo o le Atua ma o le “perofeta” lea na valoia mai e Mose.—Ioane 6:14; Teuteronome 18:15.

13. O le ā le matāfaioi na faamamafa mai mo le “perofeta” na faatalitalia i le valoaga i le Teuteronome 18:18?

¹³ Aiseā na mataʻina ai le avea o Iesu ma “perofeta”? O le ā foʻi le matāfaioi autū na valoia mai mo ia lena? Pe o le a lauiloa ea le “perofeta” i le faatinoina o faamālōlōga faavavega po o le aumaia ma le agalelei o taumafa mo ē matelāina? Na valoia mai e le Teuteronome 18:18 e faapea: “Ou te faatuina mo i latou, o so latou uso, se perofeta e pei o oe; ou te tuuina atu foi aʻu upu i lona gutu, e fai atu foi e ia ia te i latou o mea uma lava ou te fai atu ai ia te ia.” E oo lava i le taimi na aʻoaʻoina ai le ʻauaposetolo ina ia latou maua ma faaali atu lagona alofa, sa latou mautinoa lelei, o le finagalo o Keriso e tatau ona faamaonia mai foʻi i la latou galuega talaʻi ma le aʻoaʻo atu. O le mea lena e sili ona lelei na mafai ona latou faia mo tagata. E ala i lena auala, e mafai ai e tagata mamaʻi ma ē matitiva ona maua aogā tūmau, ae lē na o aogā e gata mai i le olaga puupuu o le tagata pe gata mai foʻi i sina ʻaiga e tasi pe lua.—Ioane 6:26-30.

Ia Ati Aʻe le Finagalo o Keriso i Aso Nei

14. E faapēfea ona aafia i la tatou galuega talaʻi le mauaina o le finagalo o Keriso?

¹⁴ E leai se tasi o i tatou o le a manatu faapea o le finagalo o Keriso o se mea sa patino lava i le uluaʻi senituri—ia Iesu ma uluaʻi soo o ē na tusi atu i ai le aposetolo o Paulo: “Ua tatou maua le finagalo o Keriso.” (1 Korinito 2:16) E tatou te ioe foʻi ma le mautinoa ua faatalitalia i tatou e talaʻi atu le tala lelei ma faia soo. (Mataio 24:14; 28:19, 20) Peitaʻi, e aogā ona toe tomānatu i o tatou lava uunaʻiga mo le faia o lena galuega. E lē tatau ona faia mai se lagona faapea ua na o se tiute e ao ona fai. O le alofa i le Atua o le māfuaaga autū lena tatou te auai atu ai i le faiva, ma o le avea moni ia pei o Iesu e aofia ai le uunaʻia e le agalelei ina ia talaʻi ma aʻoaʻo atu.—Mataio 22:37-39.

15. Aiseā ua avea ai le agalelei ma vaega talafeagai o la tatou faiva i le lautele?

¹⁵ E mautinoa lava, e lē faigofie i taimi uma ona iai lagona agalelei mo i latou e lē tutusa o tatou talitonuga, ae maise pe a tatou fesagaʻi ma uiga e faalēano mai, e mumusu, pe tetee mai. Peitaʻi, pe afai e mou ese atu lo tatou alofa ma le agalelei mo tagata, e mafai foʻi la ona mou ese atu mai ia i tatou se uunaʻiga matuā tāua mo le faia o se sao i le faiva faa-Kerisiano. E faapēfea la, ona tatou ati aʻe le agalelei?  E mafai ona tatou taumafai e vaai i tagata i le auala na silasila ai Iesu ia i latou, e peiseaī ‘ua lāiloa ma tuulafoaʻiina, e pei o mamoe e leai so latou leoleo.’ (Mataio 9:36) Pe lē o le tulaga ea lena o loo iai le toʻatele o tagata i aso nei? Ua tuulafoaʻia ma faatauasoina faaleagaga i latou e leoleo mamoe o lotu sesē. O le iʻuga, ua latou lē iloa ai taʻiala saʻo o loo maua i le Tusi Paia, ua latou lē iloa foʻi tulaga faa-Parataiso ua toe o se āga ona aumaia lea e le Malo o le Atua i lo tatou lalolagi. Ua latou fesagaʻi ma faafitauli o le soifuaga i aso taʻitasi—e aofia ai le mativa, o feteenaʻiga i totonu o aiga, o maʻi, ma le oti—ae aunoa ma le iai o le faamoemoe o le Malo. O loo ia i tatou le mea latou te manaʻomia: le tala lelei faasaoola o le Malo o le Atua lea ua faavaeina nei i le lagi!

16. Aiseā e tatau ai ona tatou mananaʻo e tufa atu le tala lelei i isi?

¹⁶ Pe a e mafaufau i manaʻoga faaleagaga o i latou e te silafia, pe lē uunaʻia ai ea oe e lou loto ina ia e manaʻo e fai mea uma e te mafai e taʻu atu ai ia i latou fuafuaga alofa a le Atua? Ioe, o la tatou galuega o se galuega o le agalelei. Pe a mutimutivale lo tatou alofa i tagata e pei ona sa lagona ai e Iesu, o le a atagia atu i o tatou leo, o tatou foliga vaaia, ma le auala tatou te aʻoaʻo atu ai. O na mea uma o le a atili ai ona logoleleia la tatou feʻau ia i latou ‘ua saunia mo le ola e faavavau.’—Galuega 13:48.

17. (a) O ā nisi o auala e mafai ona tatou faaalia ai lo tatou alofa ma le agalelei i isi? (e) Aiseā ua lē o se matāʻupu ai e filifili pe tatau ona faia galuega lelei po o le auai i le faiva i le lautele?

¹⁷ O le mea moni, o lo tatou alofa ma le agalelei e tatau ona faaalia atu i lo tatou olaga atoa. E aofia ai lo tatou agalelei i ē lē tagolima, o ē mamaʻi, ma ē matitiva—i le faia o le mea sili tatou te mafai e avatu ai se mapusaga i o latou mafatiaga. E faaaofia i a tatou taumafaiga upu ma gaoioiga ina ia tafiesea ai le faavauvau o i latou ua toesea e le oti ē pele ia i latou. (Luka 7:11-15; Ioane 11:33-35) Peitaʻi, o na faailoaga o le alofa ma le agalelei e lē tatau ona avea ma taulaʻiga autū o a tatou galuega lelei, e pei ona faia e nisi o loo faatinoina foʻi galuega alofa mo tagata. O taumafaiga e sili atu ona tūmau lo latou tāua, o taumafaiga ia e uunaʻia foʻi e uiga tauatua e pei ona muaʻi taʻua, peitaʻi e faaalia mai e ala i le faia o so tatou sao i le galuega faa-Kerisiano o le talaʻi ma le aʻoaʻo atu. Seʻi manatu i fetalaiga a Iesu e uiga i taʻitaʻi lotu Iutaia: “Ua outou avatu mea e sefulu aʻi o le mili, ma le aneto, ma le kumina, a ua tuu e outou o mea silisili o i le tulafono, o le amiotonu, ma le alofa, ma le faamaoni; e tatau pe ana faia nei mea, a e aua foi le tuu na mea.” (Mataio 23:23) I le tulaga o Iesu, sa leʻi tau manaʻomia ona ia filifili po o lē fea mea e fai—pe fesoasoani i tagata i o latou manaʻoga faaletino po o le aʻoaʻo o i latou i matāʻupu faaleagaga e maua ai le ola. Sa faatino e Iesu mea uma na. Peitaʻi, o loo manino mai sa ia faamuamua lana galuega o le aʻoaʻo atu auā o mea lelei na ia faataulauina ai e mafai ona aogā e faavavau.—Ioane 20:16.

18. O le ā e tatau ona uunaʻia ai i tatou, a o tatou iloiloina le finagalo o Keriso?

¹⁸ Maʻeu la so tatou loto faafetai ona ua faaalia mai e Ieova le finagalo o Keriso ia i tatou! E ala mai i Evagelia, ua mafai ai ona tatou iloa lelei mafaufauga, o faalogona, o uiga, o gaoioiga, ma mea sa faamuamua e le tagata silisili i ē uma na soifua mai. E ia i tatou le faitalia pe tatou te faitauina, mafaufau loloto i ai, ma faatatau mea ua faaalia mai e le Tusi Paia e uiga ia Iesu. Manatua, afai tatou te fia gaoioi moni lava faapei o Iesu, e ao ona tatou muaʻi iloa ona mafaufauga, lagona, ma fefuafuataʻi matāʻupu i le auala sa ia faia ai, i se mea sili e oo i ai lo tatou tomai o ni tagata lē lelei atoatoa. O lea la, seʻi o tatou filifili maumauaʻi e ati aʻe ma faatino le finagalo o Keriso. Ua na o le pau lea o le ala e sili atu ona lelei e ola ai, ua na o le pau lea o le ala e sili atu ona lelei e feutagaʻi ai ma tagata, ma ua na o le pau foʻi lea o le ala e sili atu ona lelei mo i tatou ma isi, e vāvālalata atu ai i lē na ia faaātagia maia i se tulaga lelei atoatoa lo tatou Atua alofa, o Ieova.—2 Korinito 1:3; Eperu 1:3.

E Faapēfea Ona E Tali?

• O le ā le malamalamaga ua aumaia e le Tusi Paia e tusa o le auala sa masani ona tali atu ai Iesu i tagata na latou manaʻomia se fesoasoani?

• O le ā na faamamafa e Iesu i le faatonuina o ona soo?

• E mafai faapēfea ona tatou faaalia “le finagalo o Keriso” i mea tatou te faia?

[Fesili mo le Suʻesuʻega]

 [Tagaʻi i le lomiga mo le ata atoa i le itulau 23]

[Ata i le itulau 24]

O le ā le mea e silisili ona lelei e mafai e Kerisiano ona latou faia mo isi?