‘Ia Saili ia Ieova ma Lona Malosi’

“O fofoga o Ieova e fetaufetuliai i le lalolagi uma, na te fesoasoani ia te i latou o e ua sao o latou loto ia te ia.”—2 NOFOAIGA A TUPU 16:9.

1. O le ā le pule, ma ua faapēfea ona taulimaina e tagata?

O LE pule e tele ni mea e mafai ona faauiga i ai, e pei o le umiaina o le aiā e avatu ai ni faatonuga, le aiā e pule ai, po o le taaʻia o isi; le tomai e gaoioi pe aumaia ai se āuga; le mālosi faaletino; po o le mālosi e pulea ai le mafaufau po o amioga tatau. E lē o iai i tagata se talaaga lelei pe a oo i le faatinoina o le pule. A o talanoaina e Lord Acton, o le tusitala o talafaasolopito, le auala o loo faaaogā ai e le ʻaufaipolotiki le pule, na ia faapea mai: “E foliga mai ua faaleagaina le pule ma o le pulega e leai ni ona tapulaa, o le pulega lena e sili ona matuā leaga.” Ua matuā tumu le talafaasolopito i ona po nei i faaaʻoaʻoga o loo faaalia ai le moni o upu a Lord Acton. A o faagasolo le senituri lona 20, ‘ua pule ai le tasi tagata i le tasi, ma leaga ai o ia lava,’ o se mea e leʻi tupu muamua. (Failauga 8:9) Ua matuā faaaogā sesē e taʻitaʻi tautalatasi la latou pule ma ua faatamaʻia ai ola o le faitau miliona o tagata. E mataʻutia se pule e lē o taʻitaʻia e le alofa, le atamai, ma le faamasinotonu.

2. Faamatala mai pe faapēfea i isi uiga tauatua ona aafia ai le auala e faaaogā ai e Ieova lana pule.

² E ese mai le Atua i le toʻatele o tagata, auā na te faaaogāina pea lana pule mo le lelei i taimi uma. “O fofoga o Ieova e fetaufetuliai i le lalolagi uma, na te fesoasoani ia te i latou o e ua sao o latou loto ia te ia.” (2 Nofoaiga a Tupu 16:9) E faatonutonu e Ieova lana pule i se auala ua pulea lelei. O le onosaʻi o le Atua o loo ia taofia ai le faaoo mai o le sala i ē amioleaga, ina ia mafai ona latou maua le avanoa e salamō ai. O le alofa e uunaʻia ai o ia e faasusulu mai le la i ituaiga uma o tagata—o ē amiotonu ma ē amiolētonu. O le faamasinotonu o le a uunaʻia ai o ia e faaaogā lana pule lē gata mai e matuā nutipala ai lē o loo faapogaia le oti, o Satani le Tiapolo.—Mataio 5:44, 45; Eperu 2:14; 2 Peteru 3:9.

3. Aiseā ua avea ai le pule ua iai le mālosi uma lava a le Atua, ma māfuaʻaga mo lo tatou faatuatuaina o ia?

³ O le uigaese o le mālosi po o le pule a lo tatou Tamā faalelagi o se māfuaʻaga lena mo lo tatou faatuatuaina ma le mautinoa—e lē gata i ana folafolaga ae faapea foʻi i lana puipuiga. E lagona e se tamaitiiti laitiiti le saogalēmū i lona iai faatasi ma ni tagata ese, pe afai o loo ia uuina le lima o lona tamā, auā na te iloa o le a lē faatagaina e lona tamā se mea leaga e oo ane ia te ia. E faapena foʻi i lo tatou Tamā faalelagi, o lē “ua malosi e faaola,” o le a ia puipuia i tatou mai so o se mea e ono aumaia ai se faaleagaina tūmau ia i tatou pe afai tatou te savavali faatasi ma ia. (Isaia 63:1; Mika 6:8) Ma i le avea o se Tamā lelei, e faataunuu pea e Ieova ana folafolaga. O lana pule lē faatapulaaina ua faamautinoa mai ai faapea, o lana ‘afioga e manuia lava i le mea na te auina atu i ai.’—Isaia 55:11; Tito 1:2.

4, 5. (a) O le ā na iʻu i ai ina ua faalagolago atoatoa atu le tupu o Asa ia Ieova? (e) O le ā e ono tupu pe afai tatou te faalagolago atu i vaifofō mai tagata mo o tatou faafitauli?

⁴ Aiseā e tāua tele ai lo tatou maumauaʻi e nofouta i le puipuiga a lo tatou Tamā faalelagi? Talu ai e mafai ona lofitūina i tatou i tulaga e tulaʻi mai ma galo ai le puna moni o lo tatou saogalēmū. E faamaonia lenei manatu i le mea na oo i le tupu o Asa, o se tagata sa masani ona faalagolago atu ia Ieova. I le taimi o le nofoaʻiga a Asa, na osofaʻia ai Iuta e se ʻautau mālosi o fitafita e miliona a Aitiope. Ina ua mautinoa e Asa e ono mālō le ʻautau a ona fili, ona ia tatalo ai lea: “Ieova e, e le se mea faigata ia te oe ona fesoasoani i e toatele, po o i latou ua leai se malosi. Ieova e, lo matou Atua, ia e fesoasoani mai ia  te i matou; auā matou te faalagolago ia te oe, ua matou o atu i lou suafa lava e tau ma lena toatele. Ieova e, o oe lava lo matou Atua; aua neʻi manumalo mai tagata ia te oe.” (2 Nofoaiga a Tupu 14:11) Na talia e Ieova le talosaga a Asa ma foaʻi mai ia te ia le manumalo aʻiaʻi.

⁵ Peitaʻi, ina ua mavae le tele o tausaga o lana auaunaga faamaoni, sa amata ona mou atu le faatuatua o Asa i le mana laveaʻi o Ieova. Ina ia ʻalofia le taufaamataʻu ane o fitafita mai le malo i mātū o Isaraelu, sa liliu atu Asa ia Suria mo se fesoasoani. (2 Nofoaiga a Tupu 16:1-3) E ui na avea lona faatogafalea o le tupu Suria o Peniata ma itu na aveesea ai le faamataʻu ane o Isaraelu ia Iuta, peitaʻi o le feagaiga na osia e Asa ma Suria na faaalia ai le leai o sona faatuatuaga ia Ieova. Na tuusaʻo atu le fesili a Hanani le perofeta ia te ia: “E le o le itu taua tele ea o Aitiope ma Lipua, sa i ai kariota, ma ʻau e tietie i solofanua e matuā tele lava? A ua tuuina mai i latou i lou lima, ina ua e faalagolago ia Ieova?” (2 Nofoaiga a Tupu 16:7, 8) E ui lava i lea, sa teʻena e Asa lenei aʻoaʻiga. (2 Nofoaiga a Tupu 16:9-12) Pe a fesagaʻi ma faafitauli, seʻi aua lava neʻi o tatou faalagolago atu i vaifofō mai tagata. Na i lo lea, seʻi o tatou faaalia le mautinoa i le Atua, auā o le faatuatua atu i le mālosi o tagata e lē maʻalofia lava le iʻu atu i faanoanoaga.—Salamo 146:3-5.

Ia Sāʻili Atu i le Mālosi o Foaʻi Mai e Ieova

6. Aiseā e tatau ai ona tatou ‘saili ia Ieova ma lona mālosi’?

⁶ E mafai e Ieova ona foaʻi mai le mālosi i ana auauna ma puipuia foʻi i latou. Ua faalāʻeiʻau mai le Tusi Paia ia i tatou ina ia ‘saili ia Ieova ma lona mālosi.’ (Salamo 105:4) Aiseā? Auā pe a tatou faia mea i le mālosi mai le Atua, o le a faaaogā foʻi lo tatou mālosi e faia ai mea lelei mo isi, na i lo le faaleagaina ai o i latou. E leai lava se isi mea tatou te maua i ai se faaaʻoaʻoga e sili atu ona lelei o lenei manatu na i lo le faaaʻoaʻoga a Iesu Keriso, o lē na faatinoina vavega e tele i le “mana o [Ieova].” (Luka 5:17) Sa ono mafai e Iesu ona tuu atu atoa lona mālosi e mauʻoa ai, taʻutaʻua, pe oo foʻi ina avea ma tupu e silisili ona mālosi. (Luka 4:5-7) Ae na i lo lena, sa ia faaaogā le mana na foaʻi ane e le Atua ia te ia, e toleni ma aʻoaʻo atu ai, e fesoasoani ma faamālōlō ai. (Mareko 7:37; Ioane 7:46) Maʻeu se faaaʻoaʻoga matagofie mo i tatou!

7. O le ā le uiga tāua tatou te ati aʻe pe a tatou faia mea i le mālosi mai le Atua na i lo so tatou lava mālosi?

⁷ E lē gata i lea, pe a tatou faia mea i “le malosi ua foaiina mai e le Atua,” o le a fesoasoani lena ina ia tatou lotomaulalo ai. (1 Peteru 4:11) O tagata o ē sāʻilia le pule mo i latou lava e oo ina faualuga. O se faataʻitaʻiga tonu o lenei manatu, o le tupu Asuria o Esarata, o lē na folafola mai ma le faamaualuga: “Ua ia te aʻu le mālosi, ua ia te aʻu le mālosi uma lava, o aʻu o le toa, e silisili lava aʻu, e mataʻutia lava aʻu.” I se faaeseesega, o “mea vaivai a le lalolagi ua filifilia e [Ieova] e faamāina ai mea malolosi.” O lea, pe afai e mitamita se Kerisiano moni, e mitamita o ia ia Ieova, auā na te iloa o se mea ua ia faia na semanū e lē mafai ona ia faataulau pe ana fai i lona lava mālosi. O le ‘faamaulalo ifo o i tatou i lalo o le aao mālosi o le Atua’ o le a aumaia ai le faaeaina moni.—1 Korinito 1:26-31; 1 Peteru 5:6.

8. O le ā e tatau ona tatou muaʻi faia ina ia maua ai le mana po o le mālosi mai ia Ieova?

⁸ E faapēfea ona tatou maua le mālosi mai le Atua? Muamua lava, e tatau ona tatou ōle atu i ai i le tatalo. Na faamautinoa atu e Iesu i ona soo e faapea, o le a foaʻiina mai e lona Tamā le agaga paia i ē ōle atu i ai. (Luka 11:10-13) Seʻi manatu pe na faapēfea i lenei mea ona maua ai e soo o Keriso le mana po o le mālosi ina ua latou filifili e usiusitaʻi i le Atua na i  lo le usiusitaʻi i taʻitaʻi lotu o ē na faatonuina i latou ina ia aua neʻi toe molimau atu e uiga ia Iesu. Ina ua latou tatalo mo le fesoasoani a Ieova, sa talia la latou tatalo faamaoni, ma na foaʻi mai e le agaga paia le mālosi ia i latou e faaauau ai ona talaʻi atu le tala lelei ma le māʻelegā.—Galuega 4:19, 20, 29-31, 33.

9. Taʻu mai le puna lona lua o le mālosi faaleagaga, ma ia taʻua se faaaʻoaʻoga faale-Tusi Paia o loo faaalia ai lona mana e aumaia ai āuga lelei.

⁹ Lona lua, e mafai ona tatou maua le mālosi faaleagaga mai le Tusi Paia. (Eperu 4:12) Sa faamaonia le mana o le afioga a le Atua i le vaitaimi o le tupu o Iosia. E ui ina aveesea e lenei tupu Iutaia tupua faapaupau mai le nuu, ae o le toe mauaina faafuaseʻi o le Tulafono a Ieova i le malumalu na uunaʻia ai o ia e fai māeʻaeʻa lenei gaoioiga faamamā. * Ina ua uma ona faitau atu e Iosia lava ia le Tulafono i tagata, ona osia lea e le nuu atoa se feagaiga ma Ieova, ma amataina ai foʻi se gaoioiga lona lua, ae i lea taimi ua sili atu ona maumauaʻi, ina ia tafiesea uma faiga faaifo i tupua. O le iʻuga lelei o taumafaiga a Iosia e faapea, “ua latou le o ese i ona aso uma i lo latou mulimuli atu ia Ieova.”—2 Nofoaiga a Tupu 34:33.

10. O le ā le auala lona tolu e maua ai le mālosi mai ia Ieova, ma aiseā e matuā tāua ai?

¹⁰ Lona tolu, tatou te maua le mālosi mai ia Ieova e ala mai i le aufaatasiga faa-Kerisiano. Sa faalāʻeiʻau atu Paulo i Kerisiano ia auai i sauniga e lē aunoa ina ia “taufaatupu ai le alofa ma galuega lelei” ma ia faalāʻeiʻau ai le tasi i le isi. (Eperu 10:24, 25) Ina ua tatala faavavega Peteru mai le falepuipui, sa ia manaʻo ina ia faatasi atu i ona uso, o lea na ia alu atu saʻo ai i le fale o le tinā o Ioane Mareko, o iinā “e toatele sa faapotopotoina ai, ma latou tatalo.” (Galuega 12:12) O le mea moni, sa ono mafai lava ona latou nonofo uma i o latou ʻāiga ma tatalo ai. Peitaʻi na latou filifili e faapotopoto faatasi ina ia tatalo ma fefaalāʻeiʻauaʻi le tasi i le isi a o faagasolo na taimi faigatā. A o latalata i le iʻuga o le malaga umi ma le mataʻutia sa faataamilo ai Paulo i Roma, na latou fetaiaʻi ai ma nisi uso i Puteoli ma mulimuli ane fetaui atu i isi o ē na faimalaga mai e feiloaʻi ia te ia. Na faapeī ona uiga faaalia? “Ua vaai atu Paulo ia te i latou [o ē na ō mai e faafeiloaʻi o ia], ona faafetai lea i le Atua, ma loto tele ai.” (Galuega 28:13-15) Sa faamālosia o ia ina ua toe faatasia ma ona uso Kerisiano. Tatou te maua foʻi le mālosi mai le aufaatasiga ma isi uso Kerisiano. Pe afai o loo tatou maua le saʻolotoga ma mafai ona tatou auaufaatasi, e lē tatau lava ona tatou taumafai e savavali na o i tatou i le ala gaoā ma lē oo atu ai i le ola.—Faataoto 18:1; Mataio 7:14.

11. Taʻu mai nisi o tulaga e manaʻomia faapitoa ai lava le “matuā tele o le mana.”

¹¹ E ala i le tatalo e lē aunoa, le suʻesuʻeina o le Afioga a le Atua, ma le aufaatasiga ma o tatou uso talitonu, e mafai ai ona tatou “loto tetele i le Alii, ma le malosi o lona mana.” (Efeso 6:10) E leai se faalētonu tatou te manaʻomia uma lava le ‘loto tele i le Alii.’ O loo mafatia nisi i ni maʻi ua lē o toe tele ai se mālosi latou te maua, o isi ua mafatia i āuga o le soifua matua pe o mafatia foʻi ona ua maliu sē na avea ma paaga i le olaga. (Salamo 41:3) O isi o loo onosaʻia teteega mai se paaga lē talitonu. O mātua, ae maise lava mātua nofo toʻatasi, atonu ua latou iloa o se tiute tauave mamafa tele le faigaluega faasoloatoa i se galuega ma tausia aʻe foʻi se ʻāiga. E manaʻomia e Kerisiano talavou le mālosi e manumalo ai i omiga mai aumea ma tetee atu ai i fuālaau faasāina ma amioga lē mamā. E leai se tasi e tatau ona faatalatū e ōle atu ia Ieova mo le “matuā tele o le mana” ina ia manumalo mai ai i na luʻi.—2 Korinito 4:7.

O Loo “Avatua le Malosi i E ua Vaivai”

12. E faapēfea ona tausia pea i tatou e Ieova i le faiva faa-Kerisiano?

¹² E lē gata i lea, e foaʻi mai e Ieova le mālosi i ana auauna pe a latou faatinoina la latou faiva. Ua tatou faitau i le valoaga a Isaia e faapea: “Na te avatua le malosi i e ua vaivai; a o e ua leai se malosi, na te faatuputele i ai le malosi. . . . O e faatalitali ia Ieova, e toe faafouina lo latou malosi; latou te sii ae apaau e pei o aeto; latou te femoei, a e le vaivai; latou te savavali, a e le tigaina.” (Isaia 40:29-31) Na maua tōtino e le aposetolo o Paulo le mana po o le mālosi e faatino ai lana faiva. O le iʻuga, na uigā ai lana faiva. Na ia tusi atu i Kerisiano i Tesalonia e faapea: “E lei oo atu la matou tala lelei ia te outou na o le upu, a o le mana, ma le Agaga Paia.” (1 Tesalonia 1:5) Sa iai i lana talaʻiga ma lana aʻoaʻo atu le mana e aumai ai ni suiga tetele i olaga o i latou na faalogologo ia te ia.

13. O le ā na faamālosia ai Ieremia e onosaʻi e ui lava i teteega?

 ¹³ Pe a tatou fetaiaʻi ma se uiga faalēfiafia i la tatou oganuu—se oganuu atonu sa tatou talaʻi soo ai mo le tele o tausaga ae itiiti lava se tali lelei mai—atonu tatou te lotovaivai. Na faapena foʻi ona lagona e Ieremia le lotovaivai ona o teteega, o tauemuga, ma uiga faalēano na faaali mai ia te ia. Na ia faapea ifo ia te ia lava: “Ou te le taʻutaʻuina [le Atua], ma ou le toe tautala i lona suafa.” Peitaʻi sa lē mafai ona fifilēmū o ia. O lana feʻau sa “peiseai o se afi mumū sa i ai, ua punitia i [ona] ivi.” (Ieremia 20:9) O le ā na avatua ia te ia le mālosi toe faafouina a o fesagaʻi ma le tele o mala? Na faapea mai Ieremia: “Ua ia te au Ieova e pei o le toa e matautia.” (Ieremia 20:11) O le talisapaia e Ieremia o le matuā tāua o lana feʻau ma le tofiga na foaʻi mai e le Atua, na mafai ai ona ia talia lelei le faalāʻeiʻauga a Ieova.

O le Pule e Faatigā ai ma le Pule e Faamālōlō Ai

14. (a) O le ā le mālosi o loo i le meafaigaluega lenei o le laulaufaiva? (e) Aumai ni faaaʻoaʻoga o le faaleagaina e mafai e le laulaufaiva ona fai.

¹⁴ E lē o pule uma o loo ia i tatou e sau saʻo mai le Atua. Mo se faaaʻoaʻoga, o loo iai i le laulaufaiva le pule e faatigā ai faapea foʻi le pule e faamālōlō ai. Ua lapataʻi mai Solomona: “O le oti ma le ola, o loo i le pule a le laulaufaiva ia.” (Faataoto 18:21) O āuga o le talanoaga puupuu lava lea na fai e Satani ma Eva, ua faaalia ai le matuā telē o se faaleagaina e mafai ona faatupuina e upu. (Kenese 3:1-5; Iakopo 3:5) E mafai foʻi ona telē se faaleagaina e mafai ona tatou faia e ala i le laulaufaiva. O ni faaupuga e faifaipona ai i le lapoʻa o se tamaʻitaʻi talavou e mafai ona taʻitaʻia ai o ia i se maʻi leaga ona ua lē fiafia e taumafa. O le taʻutaʻu soo ma le lē magafagafa o se tala taufaaleaga e ono faaleagaina ai se faigauō ua leva ona fai. Ioe, e manaʻomia lava ona pulea lelei le laulaufaiva.

15. E mafai faapēfea ona tatou faaaogā o tatou laulaufaiva e ati aʻe ma faalāʻeiʻau ai?

¹⁵ Peitaʻi, e lē gata ina mafai e le laulaufaiva ona ati aʻe ai, ae mafai foʻi ona faaleagaina ai. Fai mai se faataoto a le Tusi Paia: “O i ai le soona tautala, e pei o tutuʻi i le pelu; a o laulaufaiva o e popoto e malolo ai.” (Faataoto 12:18) O Kerisiano atamamai latou te faaaogāina le pule a le laulaufaiva e faamāfanafana ai i ē mafatia ma lotofaavauvau. O upu o le tigā alofa e mafai ona faalāʻeiʻauina ai talavou o loo tauivi ma omiga leaga mai aumea. O se laulaufaiva e magafagafa lelei e mafai ona faamautinoa atu ai i uso ma tuafāfine matutua e faapea, o loo manaʻomia pea ma alofagia i latou. O upu agalelei e mafai ona mauaina ai se aso e fiafia mo i latou o loo gasegase. Ae o le sili o na mea uma, e mafai ona tatou faaaogā o tatou laulaufaiva e tufa atu ai le feʻau mālosi o le Malo ia i latou uma o le a faalogologo mai. Ua iai i la tatou pule le folafolaina atu o le Afioga a le Atua pe afai o iai iinā o tatou loto. Ua faapea mai le Tusi Paia: “Aua neʻi e faafiti se mea  lelei i e ua tatau i ai, pe a ua e mafai [“iai le pule,” NW ] ona faia.”—Faataoto 3:27.

Le Faaaogāina Tatau o le Pule

16, 17. E mafai faapēfea e toeaina, o mātua, o tane, ma avā, ona faataʻitaʻi ia Ieova i le faatinoina o a latou pule na foaʻiina mai e le Atua?

¹⁶ E ui o ia e ona le mālosi uma lava, ae pulea ma le alofa e Ieova le faapotopotoga. (1 Ioane 4:8) I le faataʻitaʻi atu ia te ia, e tausia ai e ovasia Kerisiano le lafu mamoe a le Atua i se uiga alofa—i le faaaogā tatau o la latou pule, ae lē faaaogāsesēina. O le mea moni, o nisi taimi e manaʻomia ai e ovasia ona ‘faatonu atu, aoai atu, apoapoai atu,’ peitaʻi e faia lenei mea “ma le onosai uma atoa ma le aʻoaʻo atu.” (2 Timoteo 4:2) O lea e mafaufau loloto ai pea toeaina i upu na tusi atu ai le aposetolo o Peteru ia i latou na iai tulaga pule i le faapotopotoga e faapea: “Ia outou leoleo i le lafu mamoe a le Atua o ia te outou, ia tausi i ai ma le loto, a e le o le faatauanauina; aua foi neʻi faia ma le fia fai oloa, a o le loto fiafia. Aua foi neʻi faapei o e pule faasaua i e ua tofia i ai outou, a ia fai outou ma faaaʻoaʻo i le lafu mamoe.”—1 Peteru 5:2, 3, LF; 1 Tesalonia 2:7, 8.

¹⁷ E iai foʻi i mātua ma tane le pule ua foaʻiina mai i ai e Ieova, ma o lenei pule e tatau ona faaaogā ina ia fesoasoani atu, ia tausi atu, ma ia faapelepele atu. (Efeso 5:22, 28-30; 6:4) Ua faaalia i le faaaʻoaʻoga a Iesu faapea, e mafai ona faatinoina ma le uigā le pule i se auala alofa. Pe afai e paleni ma faifai pea le avatuina o aʻoaʻiga, o le a lē oo ina lotovaivai le fanau. (Kolose 3:21) E faamalosia faaipoipoga pe a faatino ma le alofa e tane Kerisiano o latou tulaga ulu ma faapea foʻi ona faaaloalo loloto avā i a latou tane o ē ua fai ma o latou ulu, na i lo le sopo tapulaa atu i o latou tofiga ua uma ona tofia mai e le Atua, e ala i le taumafai e fia pule pe fai a latou lava auala.—Efeso 5:28, 33; 1 Peteru 3:7.

18. (a) E tatau faapēfea ona tatou faataʻitaʻi atu i le faaaʻoaʻoga a Ieova i le puleaina o lo tatou ita? (e) O le ā e tatau ia i latou o iai le pule ona taumafai e totō ifo i loto o ē o loo i lalo o la latou tausiga?

¹⁸ O i latou o iai le pule i le ʻāiga ma i le faapotopotoga e tatau ona latou matuā faaeteete i le puleaina o le ita, talu ai o le ita e totō ifo ai le mataʻu na i lo le alofa. Na faapea mai le perofeta o Nauma: “O Ieova e tele gese lona toasa, a e tele lona mana.” (Nauma 1:3; Kolose 3:19) O le puleaina o lo tatou ita o se faailoga o le mālosi, ae o le lolo atu i le lotoa o se faamaoniga o le vaivai. (Faataoto 16:32) E tatau ona avea ma sini i totonu o le ʻāiga ma totonu foʻi o le faapotopotoga, le totōina o le alofa—le alofa mo Ieova, le alofa o le tasi i le isi, ma le alofa i matāʻupu silisili tonu. O le alofa o le fusi lea e sili ona mālosi o se faatasiga ma o le uunaʻiga sili ona mālosi mo le faia o le mea ua tonu.—1 Korinito 13:8, 13; Kolose 3:14.

19. O le ā le faamautinoaga faamāfanafanaloto ua tuuina mai e Ieova, ma e tatau faapēfea ona tatou tali atu i ai?

¹⁹ O le iloaina o Ieova o lona uiga, ia amanaʻia lona mana, lona mālosi po o lana pule. E ala mai ia Isaia, na fetalai ai Ieova: “E te le iloa ea? E te lei faalogo ai ea? O le Atua o le vavau, o Ieova o le na faia tuluiga o le lalolagi, e le vaivai o ia, e le tigaina foi.” (Isaia 40:28) E lē mafai ona vaivai le pule a Ieova. Pe afai tatou te faalagolago atu ia te ia na i lo ia i tatou lava, o le a ia lē tuulafoaʻia i tatou. Ua ia faamautinoa mai ia i tatou: “Aua e te fefe, auā ou te ia te oe; aua le fetepatepai, auā o aʻu o lou Atua; ou te faamalosia oe; e moni, ou te fesoasoani ia te oe; e moni, ou te taofia oe i loʻu lima taumatau e i ai le amiotonu.” (Isaia 41:10) E tatau faapēfea ona tatou tali atu i lana tausiga alofa? I le pei o Iesu, seʻi o tatou faaaogāina pea po o le ā lava le pule e foaʻi mai e Ieova ia i tatou, ina ia fesoasoani atu ma ati aʻe ai. Tau ina ia tatou pulea o tatou laulaufaiva ina ia faamālōlō ai isi na i lo le faaleagaina ai. Ma tau ina ia tatou tūmau pea i le mataala faaleagaga, ia tutū mausalī i le faatuatua, ma ia mālolosi i le mana o Lē Sili na Foafoaina i tatou, o Ieova le Atua.—1 Korinito 16:13.

[Faamatalaga pito i lalo]

Pe Mafai Ona E Faamatala?

• E faapēfea ona faaaogā e Ieova lana pule?

• I ā auala e mafai ona tatou māfana atu ai i le pule a Ieova?

• E tatau faapēfea ona faaaogāina le pule a le laulaufaiva?

• E mafai faapēfea ona avea le pule ua foaʻiina mai e le Atua o se faamanuiaga?

[Fesili mo le Suʻesuʻega]

[Ata i le itulau 15]

Sa faaaogā e Iesu le mālosi mai ia Ieova e fesoasoani atu ai i isi

[Ata i le itulau 17]

Ua iai i la tatou pule le folafolaina atu o le Afioga a le Atua pe afai o iai iinā o tatou loto