Ieova—O Lē e Mataʻutia Lona Mālosi

“Ona o le tele o lona malosi ma lona mana [mālosi] tele; e leai so latou e le iloa.”—ISAIA 40:26.

1, 2. (a) O le ā le puna o le mālosiʻaga faaletino tatou te faalagolago uma i ai? (e) Faamatala pe aiseā ua avea ai Ieova o le Puna silisili o mālosi uma.

O LE mālosi o se mea e manatu māmā i ai le toʻatele o i tatou. Mo se faaaʻoaʻoga, e seāseā lava tatou mafaufau i le mālosi faaeletise lea e aumaia ia i tatou le malamalama ma le vevela po o le faigofie ona palaka so o se mea lava e alu i le eletise o ia i tatou. Seʻi vaganā ua pē faafuaseʻi le paoa, o iinā loa faatoʻā tatou manatua ai, pe a leai se paoa, o le mea moni lava o le a lē toe faagaoioia pisinisi ma mea uma o loo iai i aai a tagata. O le tele o le eletise lea tatou te faalagolago i ai, e mafai ona faapea atu e maua mai le puna e sili ona faatuatuaina mo le paoa po o le mālosiʻaga o le lalolagi—o le la lea. * O lenei foafoaga e na te faaaogāina i sekone taʻitasi le lima miliona tone o mālosiʻaga faaniukilia, ma mafai ai ona faaoo mai i le lalolagi le mālosiʻaga o loo faatumauina ai le ola.

² O fea e maua mai ai lenei paoa e ala mai le vevela o le la? O ai na faia lenei mālosiʻaga o loo i le vanimonimo? O Ieova le Atua. I le faasino atu ia te ia, ua faapea mai le Salamo 74:16: “O oe lava na e saunia le malamalama ma le la.” Ioe, o Ieova o le Puna silisili o mālosi uma, e pei lava ona avea o ia ma Puna o ola uma. (Salamo 36:9) E lē tatau lava ona tatou manatu māmā i lona mālosi po o lona mana. E ala i le perofeta o Isaia, ua faamanatu mai ai e Ieova ia i tatou ina ia tetepa aʻe i mea o i le lagi, e pei o le la ma fetu, ma mafaufau loloto i le auala na mafai ai ona iai. “Seʻi tetepa ae i luga, ma outou vaai, po o ai ea ua na faia nei mea? Na te taʻitaʻiina mai a latou ʻau ua faitauina; na te valaau ia te i latou uma i o latou igoa; ona o le tele o lona malosi ma lona mana tele; e leai so latou e le iloa.”—Isaia 40:26; Ieremia 32:17.

3. E mafai faapēfea ona tatou maua aogā i le faaalia mai o le mana o Ieova?

³ Talu ai ua ia Ieova le matuā  tele o le mālosi, e mafai la ona tatou mautinoa o le a saunia mai pea e le la le malamalama ma le vevela lea e faalagolago i ai o tatou ola. Peitaʻi, e tele atu isi mea o loo tatou faalagolago ai i le mālosi po o le mana o le Atua na i lo na o tatou manaʻoga autū faaletino. O le togiolaina o i tatou mai le agasala ma le oti, o lo tatou faamoemoe mo le lumanaʻi, ma lo tatou faatuatua atu ia Ieova, ua fesootaʻi vāvālalata uma atu i lona faaaogāina o le mana. (Salamo 28:6-9; Isaia 50:2) E anoanoaʻi faaaʻoaʻoga o i le Tusi Paia e molimau i le mana o Ieova e foafoaina ma togiolaina ai, e laveaʻi ai ona tagata ma faaumatia ona fili.

Ua Faaalia le Mana o le Atua i le Foafoaga

4. (a) Na faapēfea ona aafia Tavita a o ia vaavaai aʻe i le vanimonimo i le po? (e) O le ā ua faaalia mai e foafoaga faalelagi e tusa ai o le mana tauatua?

⁴ Na faamatala e le aposetolo o Paulo e faapea, o le ‘mana e faavavau [o Lē na Foafoaina i tatou] e mafai ona vaaia i mea ua ia faia.’ (Roma 1:20) I senituri muamua atu, atonu sa fai ma masani a le faisalamo o Tavita, o ia o se leoleo mamoe lona vaavaai aʻe i le vanimonimo i le po, ma mātauina le ofoofogia o le vateatea ma le mana o Lē na Faia. Na ia tusi e faapea: “A ou vaai atu i lou lagi, o le galuega a ou tamatamai lima, o le masina atoa ma fetu na e faia; se a ea le tagata e te manatu mai ai ia te ia; ma le atalii o le tagata e te asiasi mai ai ia te ia?” (Salamo 8:3, 4) E ui sa leʻi tele sona iloa i foafoaga faalelagi, ae sa malamalama Tavita i le matuā faatauvaa o ia pe a faatusatusa atu i Lē na Foafoaina lo tatou vateatea telē. I aso nei, ua sili atu mea ua iloa e tagata suʻesuʻe i fetu e faatatau i le telē o le vateatea ma le mālosi o loo faatumauina ai. Mo se faaaʻoaʻoga, ua latou taʻu mai ia i tatou faapea, e faamatuu mai e lo tatou la i sekone taʻitasi se mālosiʻaga e tutusa ma le mālosi o le pasae aʻe o le 100,000 miliona mekatone o le TNT (trinitrotoluene). * E itiiti lava sina vaega o lena mālosiʻaga o loo paʻi mai i le lalolagi; peitaʻi ua lava lena mālosiʻaga e faatumauina ai ola uma o i lo tatou paneta. Ae ua lē o avea lo tatou la ma fetu e silisili ona mālosi i le lagi. O nisi fetu  e na o le tasi lava se sekone latou te aumaia ai le mālosi lea e mafai e le la ona aumaia i le aso atoa. Seʻi manatu la, i le mālosi o loo aumai e Lē na foafoaina na foafoaga faalelagi! Na talafeagai la le māofa o Eliu i lona faapea mai: “A o Le e ona le malosi uma lava, tatou te le mafai ona iloa o ia; e silisili ese lona malosi.”—Iopu 37:23.

5. O ā faamaoniga o le mālosi o Ieova ua mafai ona tatou iloa mai mea na ia faia?

⁵ Pe afai tatou te ‘saili i mea ua faia e le Atua’ e pei ona sa sāʻili Tavita, o le a tatou vaʻaia ai faamaoniga o lona mana i so o se mea—i le savili ma galu, i faititili ma uila, i vaitafe tetele ma mauga maualuluga. (Salamo 111:2; Iopu 26:12-14) E lē gata i lea, e pei ona faamanatu atu e Ieova ia Iopu, e molimau meaola i Lona mālosi. O se tasi o nei meaola o le Pemota, po o le puaasami. Na fetalai atu Ieova ia Iopu: “Ua i ai lona malosi i lona papātua . . . o ona ivi e pei o se ʻoso uamea.” (Iopu 40:15-18) I aso anamua o le Tusi Paia, sa lauiloa ai foʻi le mataʻutia o le mālosi o le povi poʻa taanoa tele, ma na tatalo Tavita ina ia faasaoina o ia mai “le gutu o le leona; . . . mai nifo o rema [povi poʻa taanoa tele].”—Salamo 22:21; Iopu 39:9-11.

6. O le ā ua fai ma faatusa o le povi poʻa taanoa i le Tusi Paia, ma aiseā? (Tagaʻi i le faamatalaga i lalo.)

⁶ Ona o le mālosi o le povi poʻa, ua faaaogā ai i  le Tusi Paia e fai ma faatusa o le mana o Ieova. * O le faaaliga na vaʻaia e le aposetolo o Ioane i le nofoālii o Ieova, o loo faaāta mai e meaola e fa, o se tasi o na meaola e foliga e pei o se povi taanoa. (Faaaliga 4:6, 7) E faamaonia mai faapea, o se tasi o uiga autū e fa o Ieova o loo faaātagia mai i nei kerupi, o le mālosi. O isi uiga o le alofa, le atamai, ma le faamasinotonu. Talu ai o le mālosi o se vala tāua tele o uiga tōtino o le Atua, o se malamalamaga manino la i lona mālosi ma le auala o loo ia faaaogā ai, o le a atili ai ona tatou vāvālalata atu ia te ia, ma fesoasoani ia i tatou ina ia faataʻitaʻi atu i lana faaaʻoaʻoga e ala i le faaaogā lelei o so o se mālosi ua tatou maua.—Efeso 5:1.

O “Ieova o ʻAu, o le Malosi”

7. E mafai faapēfea ona tatou mautinoa o le a faatoʻilaloina le leaga i le lelei?

⁷ I le Tusi Paia, ua taʻua ai Ieova o le “Atua e ona le malosi uma lava,” o se taʻu e faamanatu mai ai ia i tatou e lē tatau lava ona tatou manatu māmā i lona mana pe masalosalo i lona mafaia ona faatoʻilalo o ona fili. (Kenese 17:1; Esoto 6:3) Atonu e foliga mai le faiga o mea a Satani o loo matuā mautū lelei, peitaʻi i le silafaga a Ieova, “o atu nuu e tusa i latou ma si mea e sisina ifo nai le pakete; e faatatauina i latou e pei o le efuefu i le fua faatautau.” (Isaia 40:15) Ona o lena mana tauatua, e leai la se masalomia o le a faatoʻilaloina le leaga e le lelei. I lenei taimi i le matuā salalau atu o le leaga, e mafai ona faamāfanafanaina i tatou i le iloa faapea, o “Ieova o ʻau, o le Malosi o Isaraelu,” o le a ia tafiesea le leaga e faavavau.—Isaia 1:24; Salamo 37:9, 10.

8. O ā ʻau faalelagi o loo pulea e Ieova, ma o le ā se faamaoniga ua tatou iloa o lo latou mana?

⁸ O le faaupuga “Ieova o ʻau,” lea e 285 taimi o loo taʻua ai i le Tusi Paia, o se tasi lea faamanatuga o le mana po o le mālosi o le Atua. O le upu “ʻau” iinei ua faasino atu i le ʻau o foafoaga agaga o loo pulea e Ieova. (Salamo 103:20, 21; 148:2) E na o le tasi lava le po na fasiotia ai e se tasi o nei agelu le 185,000 o fitafita a Asuria o ē na faamataʻu ane ia Ierusalema. (2 Tupu 19:35) Pe afai tatou te amanaʻia le mālosi o ʻau faalelagi a Ieova, o le a lē faigofie la ona faamataʻuina i tatou e ē tetee mai. Sa leʻi popole le perofeta o Elisaia ina ua siʻosiʻo ane se ʻautau atoa e sāʻili o ia talu ai, i le lē pei o lana auauna, na mafai ona ia vaʻaia e ala i mata o lona faatuatua se ʻau tele o foafoaga faalelagi o loo lagolagoina o ia.—2 Tupu 6:15-17.

9. Aiseā e tatau ai ona tatou pei o Iesu, i lo tatou mautinoa i le puipuiga tauatua?

⁹ Sa faapena foʻi ona silafia e Iesu le lagolago ane o agelu ia te ia a o ia fetaiaʻi ma se motu o tagata na faaauupegaina i pelu ma tao i le faatoʻaga o Ketesemane. Ina ua uma ona ia faatonuina Peteru e toe sulu lana pelu i lona faamoega, ona fetalai atu lea o Iesu ia te ia e faapea, pe ana fai e manaʻomia, e mafai ona Ia ʻaiʻoi atu i lona Tamā mo nisi “agelu e sili ona toatele i lekeona e sefulu ma le lua.” (Mataio 26:47, 52, 53) Pe afai e faapena lo tatou talisapaia o ʻau faalelagi o loo faaaogā e le Atua, o le a faapena foʻi ona tatou faalagolago maumauaʻi atu i le lagolagosua tauatua. Na tusi mai le aposetolo o Paulo e faapea: “O lenei, se a sa tatou upu i nei mea? Afai ua ʻau ma i tatou le Atua, o ai sē faasaga tau mai ia i tatou?”—Roma 8:31.

10. Mo le lelei o ai ua faaaogā ai e Ieova lona mana?

¹⁰ Ua ia i tatou la māfuaʻaga uma, e faalagolago atu ai i le puipuiga a Ieova. Na te faaaogā pea lona mana mo iʻuga lelei ma ia ōgatusa ma isi ona uiga—le faamasinotonu, le atamai, ma le alofa. (Iopu 37:23; Ieremia 10:12) A o fai ma masani a ē mālolosi ona solipalaina nai tagata matitiva ma faatauvaa mo le mauaina o o latou lava manuia manatu faapito, ua ‘faatulaʻi e Ieova le tagata lautele nai le efuefu’ ma ‘faateleina lona malosi e faaola ai.’ (Salamo 113:5-7; Isaia 63:1) O Maria, le tinā lotomaulalo ma le lē faualuga o Iesu, sa ia iloa lelei e faapea, “o Le e ona le mana” ua ia faatinoina ma le lē manatu faapito lona mana mo le lelei o i latou e matataʻu ia te ia, e ala i lona faamaulaloina o ē faamaualuluga ae faaeaina o ē faamaulalo.—Luka 1:46-53.

E Faaalia e Ieova Lona Mana i Ana Auauna

11. O le ā le faamaoniga o le mana o le Atua na molimauina e le fanauga a Isaraelu i le tausaga e 1513 T.L.M.?

¹¹ E iai ni mea na tutupu na faaalia ai e Ieova  lona mālosi i ana auauna. O se tasi o na mea, na tupu lea i le Mauga o Sinai i le 1513 T.L.M. A o faagasolo lena tausaga, ua uma ona vaʻai le fanauga a Isaraelu i faamaoniga ofoofogia o le mana o le Atua. O mala mataʻutia e sefulu na faaalia ai le aao mālosi o Ieova ma le leai o se mālosi o i atua o Aikupito. E leʻi leva talu ona mavae lena mea, ae toe aumai foʻi e le āsaina faavavega o le Sami Ulaula ma le faaumatiaga o ʻautau a Farao, ni faamaoniga atili o le mālosi tauatua. I le tolu masina mulimuli ane, i lalo ifo o le Mauga o Sinai, na valaʻaulia ai e Ieova le fanauga a Isaraelu e avea ma ana “oloa tāua . . . e sili i nuu uma.” Mo la latou vaega e faatino, na latou folafola mai: “Matou te faia lava mea uma ua fetalai mai ai Ieova.” (Esoto 19:5, 8) Ona aumaia loa lea e Ieova se faaaliga sili ona mataʻina o lona mana. A o pāpā faititili tetele ma feemo uila, ma lagonaina le leo o le pu, sa pupusa aʻe le Mauga o Sinai ma ua galulu. O tagata na tutū mamao mai, sa matuā gatete i le matataʻu. Peitaʻi na taʻu atu e Mose ia i latou e faapea, o lenei mea e tatau ona aʻoaʻoina ai i latou ia matataʻu i le Atua, o se mataʻu o le a uunaʻia ai i latou e usitaʻi i lo latou Atua moni e toʻatasi o loo iai le mana uma, o Ieova lea.—Esoto 19:16-19; 20:18-20.

12, 13. O ā mea sa tutupu na māfua ai ona tuʻua e Elia lona tofiga, ae na faapēfea ona faamālosia o ia e Ieova?

¹² I nisi senituri mulimuli ane, i le taimi o Elia, na tupu ai i le Mauga o Sinai se isi faaaliga o le mana tauatua. Ua uma ona vaʻai le perofeta i le faatinoina o le mana o le Atua. E mo le tolu ma le ʻafa tausaga, na ‘punitia ai le lagi’ e le Atua ona o le aposetasi o le nuu o Isaraelu. (2 Nofoaiga a Tupu 7:13) A o faagasolo le lāmala lea na iʻu i ai, sa fafaga e oreva Elia i le ālia o Kirita, ma mulimuli ane, na faavavega ona faateleina si toe falaoamata ma sina suāuu sa iai i se fafine ua oti lana tane, ma saunia ai meaʻai mo Elia. Na oo foʻi ina foaʻi atu e Ieova le mana ia Elia e toe faatū aʻe ai le tama a lenei fafine ua oti lana tane. Ma le mea mulimuli, i se tofotofoga sili ona mataʻina na faia i le Mauga o Karamelu e faamaonia ai le tulaga tauatua o le Atua, na paʻū ifo ai le afi mai le lagi ma faamū ai le taulaga a Elia. (1 Tupu 17:4-24; 18:36-40) E ui lava i lea, e leʻi leva talu ona mavae lena mea, na iʻu ina fefe Elia ma lotovaivai ina ua faamataʻu ane Iesepela o le a fasiotia o ia. (1 Tupu 19:1-4) Na sola ese o ia ma le nuu, ma lona manatu ua muta ai iinā lana galuega o se perofeta. Ae ina ia faalāʻeiʻauina ma faamālosia o ia, sa faaali ma le agalelei ia te ia e Ieova lava ia se faaaliga o le mana tauatua.

¹³ A o lafi Elia i se ana, na ia vaʻaia ai se faaaliga ofoofogia o mālosiʻaga e tolu o mālosiʻaga o loo pulea e Ieova: se matagi tele, se mafuiʻe, ma le mea mulimuli o le afi. Peitaʻi, ina ua fetalai Ieova ia Elia, sa ia fetalai mai i ai i se “leo filemu ma le itiiti.” Sa ia tuu mai ia te ia nisi foʻi galuega e fai ma logoina o ia faapea, o loo totoe pea tagata tapuaʻi faamaoni e 7,000 a Ieova i le nuu. (1 Tupu 19:9-18) Pe afai, e iai se taimi e ono pei ai i tatou o Elia, tatou te lagona le lotovaivai ona o le leai o ni iʻuga lelei i la tatou faiva, e mafai ona tatou ōle atu ia Ieova mo le “matuā tele o le mana”—o le mana po o le mālosi e mafai ona faamālosia i tatou e faaauau ona talaʻia le tala lelei e aunoa ma le faavaivai.—2 Korinito 4:7.

O le Mana o Ieova e Faamautinoa Maia le Faataunuuga o Ana Folafolaga

14. O le ā ua faaalia mai e le suafa tōtino o Ieova, ma ua faapēfea ona fesootaʻi atu lona mana i lona suafa?

¹⁴ E fesootaʻi vāvālalata foʻi le mana o Ieova ma lona suafa ma le faatinoina o lona finagalo. O le suafa tūtasi o Ieova, o lona uiga “O Ia Lava ua Māfua ai Ona Iai,” e faaalia ai o ia lava na faapogaia o ia ma Lē Faataunuuina folafolaga. E leai se mea pe leai se tasi e mafai ona taofia maia le Atua i le faataunuuina o ana fuafuaga, e tusa lava po o le ā le faigatā ona talitonuina e tagata masalosalo. E pei ona taʻu atu e Iesu i ona soo i se tasi taimi, “e mafaia mea uma e le Atua.”—Mataio 19:26.

15. Na faapēfea ona faamanatu atu ia Aperaamo ma Sara e leai se mea e faigatā ia Ieova?

¹⁵ O se faataʻitaʻiga, na folafola e Ieova ia Aperaamo ma Sara o le a ia faia le la fanau e avea ma nuu tele. Peitaʻi, sa leʻi iai se la fanau mo le tele o tausaga. Na la taufai matutua uma i le taimi na fetalai atu ai Ieova ia i laʻua o le a faataunuu le folafolaga ma na ʻata ai Sara. Ona faapea mai lea o le agelu: “E [i] ai ea se mea e faigata ia Ieova?” (Kenese 12:1-3; 17:4-8; 18:10-14) I senituri e fa mulimuli ane, ina ua mafai ona faapotopoto e Mose le fanauga a Aperaamo—lea ua avea  ma nuu tele—i Laugatasi o Moapi, sa ia faamanatu ia i latou le faataunuuina e le Atua o lana folafolaga. Na faapea atu Mose: “Na . . . alofaina [e Ieova] ou tamā, o le mea lea na ia filifilia ai a latou fanau, ina ua mavae atu i latou, ua na aumaia foi oe i ona luma i lona mana tele nai Aikupito; ina ia tulia nai ou luma o nuu e sili ona malolosi ma le toatele ia te oe, ina ia faaoo ia te oe, ma ia avatu lo latou laueleele e fai mou tofi, faapei ona fai i le aso nei.”—Teuteronome 4:37, 38.

16. Aiseā na sesē ai le ʻau Satukaio i lo latou faafitia o le toetutū mai o ē ua oti?

¹⁶ I senituri mulimuli ane, na aʻoaʻia ai e Iesu le ʻau Satukaio, o ē na lē talitonu i le toetū. Aiseā na latou mumusu ai e talitonu i le folafolaga a le Atua faapea o le a ia toe faatutūina mai ē ua oti? Na fetalai atu Iesu ia i latou: “Ua outou le iloa upu o Tusi, ma le mana o le Atua.” (Mataio 22:29) Ua faamautinoa mai e le Tusi Paia ia i tatou faapea ‘o le a faalogo i le leo [“o le Atalii o le tagata,” NW] i latou uma ua i tuugamau, ma latou o mai ai.’ (Ioane 5:27-29) Pe afai tatou te iloa le faamatalaga a le Tusi Paia e faatatau i le toetū, o le a faapena foʻi i lo tatou mautinoa i le mana o le Atua ona faatalitonu ai i tatou faapea, o le a toetutū mai ē ua oti. O le a “faaumatia e [le Atua] le oti e faavavau; . . . auā ua fetalai mai ai Ieova.”—Isaia 25:8.

17. O le ā le aso i le lumanaʻi o le a matuā tāua ai ona tatou faalagolago atu ia Ieova i se auala faapitoa?

¹⁷ I le lumanaʻi ua latalata mai, o le a iai se taimi e manaʻomia ai e i tatou taʻitoʻatasi ona faalagolago atu i le mana laveaʻi o le Atua i se auala faapitoa. O le a uunaʻia mai e Satani le Tiapolo se osofaʻiga i tagata o le Atua, o ē o le a foliga atu e lē o malupuipuia. (Esekielu 38:14-16) Ona faaalia mai lea e le Atua lona mana tele mo le puipuia o i tatou, ma o le a faamālosia ona iloa e tagata uma o ia lava o Ieova. (Esekielu 38:21-23) O le taimi lenei e ati aʻe ai lo tatou faatuatua ma le mautinoa i le Atua e Ona le Malosi Uma Lava, ina ia tatou lē faalotolotolua ai i lena taimi sili ona tāua.

18. (a) O ā aogā tatou te maua pe a mafaufau loloto i le mana o Ieova? (e) O le ā le fesili o le a talanoaina i le matāʻupu o loo sosoo mai?

¹⁸ Ma le lē masalomia, e tele māfuaʻaga e manatunatu loloto ai i le mana o Ieova. A o tatou mafaufau i ana galuega, e uunaʻia i tatou ma le lotomaulalo e vivii atu i Lē Sili na Foafoaina i tatou, ma sii aʻe le faafetai ona o le faaaogāina o lona mana i sea auala atamai ma le alofa. E lē taitai ona faamataʻuina i tatou pe afai tatou te faatuatua ia Ieova o ʻau. O le a lē maluelue lo tatou faatuatua i ana folafolaga. Ae ia manatua, ua foafoaina i tatou i le faatusa o le Atua. O lea la, ua ia i tatou foʻi le mālosi—e ui ina tapulaa. E mafai faapēfea ona tatou faataʻitaʻi i Lē na Foafoaina i tatou i le auala e faaaogā ai lo tatou mālosi? O le a talanoaina lena fesili i le matāʻupu o sosoo mai.

[Faamatalaga pito i lalo]

Pe Mafai Ona E Taliina Nei Fesili?

• E faapēfea ona molimau mai le foafoaga i le mana o Ieova?

• O ā ʻau e mafai ona faaaogā e Ieova e lagolagoina ai ona tagata?

• O ā nisi o taimi na faatinoina ai e Ieova lona mana po o lona mālosi?

• O le ā se faamautinoaga o ia i tatou e faamaonia ai o le a faataunuu lava e Ieova ana folafolaga?

[Fesili mo le Suʻesuʻega]

[Ata i le itulau 10]

“Seʻi tetepa ae i luga, ma outou vaʻai, po o ai ea ua na faia nei mea?”

[Faamatalaga i Ata]

Photo by Malin, © IAC/RGO 1991

[Ata i le itulau 13]

O le mafaufau loloto i faaaliga o le mana o Ieova e ati aʻe ai le faatuatua i ana folafolaga