Le Mālosi o le Tatalo

Ua goto ifo le la i luga aʻe o le aai o Nakori i Sasaʻe Tutotonu. Ua taunuu ane se tamāloa Suria e igoa ia Elisara faatasi ma se solo a kamela e sefulu i se vaiʻeli i fafo o le aai. E ui ina mautinoa sa lē lavā ma gālala, ae sa matuā manatu mamafa lava Elisara i manaʻoga o isi. Na sau o ia mai se nuu ese e sāʻili se avā mo le alo o lona matai. E lē gata i lena, sa ao ona ia sāʻilia lenei avā mai tauʻāiga o lona matai. O le a faapēfea ona ia faataunuuina lenei tiute tauave faigatā?

NA TALITONU Elisara i le mālosi o le tatalo. Faatasi ai ma se faatuatua lē maluelue ma mataʻina, na fai atu ai ma le lotomaulalo lana talosaga lenei: “Ieova e, le Atua o loʻu matai o Aperaamo, ia e faamanuia lava ia te au i le aso, ma e alofa mai foi i loʻu matai o Aperaamo. Faauta, o aʻu nei, ou te tu i luga o le vaipuna; o le a o mai foi afafine o tagata o le aai e utu vai; ia faapea ona fai, o le teine ou te faapea atu i ai, Seʻi e tuutuu ifo lau kate soʻu inu ae; ona faapea mai lea o ia, Ina inu ia, ou te faainua foi au kamela; o le teine lea ua e tofia ma lau auauna o Isaako; ou te iloa foi i lea mea ua e alofa mai i loʻu matai.”—Kenese 24:12-14.

O le mautinoa o Elisara e faatatau i le mālosi o le tatalo sa leʻi iʻuvale. Auā o le fafine muamua lava na alu ane i le vaiʻeli o le afafine o le atalii o le uso o Aperaamo! O lona igoa o Repeka, e leʻi fai ʻāiga o ia, e mamā tauamio, ma lalelei. O le mea mataʻina, e lē gata ina ia avatu se vaiinu mo Elisara ae na ia ofoina atu foʻi ma le agalelei vai e tali ai le fia feinu o ana kamela uma lava. Mulimuli ane, ina ua māeʻa ona talanoaina e le ʻāiga, ona lotomalie ai lea o Repeka e foʻi atu faatasi ma Elisara i se atunuu mamao lava ina ia avea ma avā a Isaako le atalii o Aperaamo. Maʻeu se tali manino ma mataʻina i le tatalo a Elisara i tuā lava i le taimi na faalaa ane ai faavavega Ieova i mea na tutupu!

E tele mea e mafai ona tatou aʻoaʻoina mai le tatalo a Elisara. Ua faaalia ai le matilatila o lona faatuatua, lotomaulalo, ma le lē manatu faapito i manaʻoga o isi. Ua faaalia foʻi i le tatalo a Elisara lona gauaʻi atu i le auala a Ieova e feagai ai ma tagata. E lē taumatea sa ia nofouta e tusa ai o le sootaga faapitoa i le va o le Atua ma Aperaamo, e faapena foʻi ma Lana folafolaga faapea o faamanuiaga i le lumanaʻi mo le fanau uma a tagata o le a ala mai ia Aperaamo. (Kenese 12:3) O lea, na amata ai le tatalo a Elisara i upu nei: “Ieova e, le Atua o loʻu matai o Aperaamo.”

O Iesu Keriso na tupuga mai ia Aperaamo o lē o le a ala mai ai faamanuiaga o le fanau uma a tagata usiusitaʻi. (Kenese 22:18) Afai tatou te mananaʻo ina ia taliina a tatou tatalo i aso nei, e manaʻomia ona faaalia lo tatou amanaʻia ma le lotomaulalo o le auala e feagai ai le Atua ma tagata e ala i lona Alo. Na fetalai Iesu Keriso faapea: “Afai tou te tumau ia te au, a tumau foi aʻu upu ia te outou, o mea uma lava tou te mananao i ai, tou  te ole atu ai, ona faia lea mo outou.”—Ioane 15:7.

O se soo o Keriso na ia molimauina le moni o ia fetalaiga a Iesu o le aposetolo o Paulo. O lona talitonuga i le mālosi o le tatalo, o le mea moni sa leʻi iʻuvale. Na ia faalāʻeiʻauina uso Kerisiano ina ia tuu uma atu o latou popolega i le Atua i le tatalo ma faamaonia mai e faapea: “Ou te mafaia mea uma lava ona o ia ua faamalosi mai ia te au.” (Filipi 4:6, 7, 13, LF ) Pe o le uiga ea o lenei mea faapea o talosaga uma lava a Paulo e ala i le tatalo i le Atua na taliaina? Seʻi o tatou vāʻai.

E Lē o Talosaga Uma e Taliaina

I lana faiva lē manatu faapito, sa mafatia ai Paulo i le mea sa ia faamatalaina o se “mea matuitui i le tino.” (2 Korinito 12:7) O lenei mea atonu o ni tigā tau le mafaufau ma i faalogona ona o ē tetee ma “uso pepelo.” (2 Korinito 11:26; Kalatia 2:4) Ia pe ona o se mafatiaga foʻi faaletino ona o se faalētonu i lana vaʻai. (Kalatia 4:15) Po o le ā lava le tulaga, o lenei “mea matuitui i le tino” sa iai sona aafiaga na faavaivaia ai Paulo. “Na ou aioi faatolu atu i le Alii . . . ina ia alu ese ia te au,” o lana tusi mai lea. Peitaʻi, e leʻi taliaina le talosaga a Paulo. Na faamatala atu ia Paulo faapea o faamanuiaga faaleagaga lea ua uma ona ia mauaina mai le Atua, e pei o le mālosi e tūmau ai i tofotofoga, ua lava ma totoe lena. E lē gata i lena, na fetalai le Atua e faapea: “O le vaivai e faaatoaina ai loʻu mana.”—2 Korinito 12:8, 9.

O le ā tatou te aʻoaʻoina mai faaaʻoaʻoga a Elisara ma Paulo? O le mea moni e faafofoga Ieova le Atua i tatalo a i latou o ē sāʻili ma le lotomaulalo e auauna ia te ia. Ae e lē o le uiga o lenei mea faapea o taimi uma lava e taliaina ai a latou talosaga auā e mamao le silasila a le Atua i matāʻupu. E sili atu lona silafia na i lo i tatou i mea e sili ona lelei mo i tatou. A o le mea e sili ona tāua, e gaoioi lava o ia e ōgatusa ma lana fuafuaga ua tusia i le Tusi Paia.

Se Taimi mo Faamālōlōga Faaleagaga

Ua folafola mai e le Atua o le a faamālōlōina uma maʻi o le tino, maʻi o le mafaufau, ma faalogona faamaʻia a o faagasolo le Afe Tausaga o le Pulega a lona Alo i le lalolagi. (Faaaliga 20:1-3; 21:3-5) O loo faatalitali ma le naunautaʻi Kerisiano faamaoni i lenei lumanaʻi ua folafola mai, faatasi ai ma le faatuatua atoatoa i le mana o le Atua e faataunuuina moni ai. E ui ina lē o faatalitalia se faamālōlōga faavavega faapena i le taimi lenei, ae o loo latou tatalo i le Atua mo lana faamāfanafanaga ma le mālosi ina ia faafesagaʻia ai tofotofoga. (Salamo 55:22) Pe afai e apoia i latou i maʻi, latou te ono tatalo foʻi mo le taʻitaʻiga a le Atua ina ia maua ai se togafitiga faafōmaʻi e sili ona lelei ma mafai ona latou maua e tusa ai ma lo latou tulaga tau tamaoaiga.

Ua faalāʻeiʻauina e nisi lotu tagata mamaʻi e tatalo ina ia faamālōlōina i latou i le taimi lenei, e faasino atu lea i vaifofō faavavega sa faia e Iesu ma ona aposetolo. Ae o na vavega sa faia mo se fuafuaga faapitoa. Na avea na vavega o se faamaoniga e iloa ai o Iesu Keriso o le Mesia moni ma faailoa atu ai le suia o le finagalo malie o le Atua mai le nuu o Iutaia i le faapotopotoga fou Kerisiano. I tuā iinā, sa manaʻomia meaalofa faivavega ina ia faamālosia ai le faatuatua o faapotopotoga fou Kerisiano na faatoʻā faavaeina. Ae ina ua tū mausalī le faapotopotoga fou, ma ua taʻumatuaina, ona “faaleaogaina lea” o meaalofa faivavega.—1 Korinito 13:8, 11.

I lenei taimi tāua, ua taʻitaʻia ai e Ieova le Atua ona tagata tapuaʻi i le galuega e sili ona tāua o le faamālōlōga faaleagaga. A o latou maua pea le taimi i aso nei, e manaʻomia ai i tagata ona tali atu ma le faanatinati i le augani lenei: “Ia outou saili ia Ieova manū o mafai ona maua o ia; ia outou valaau ia te ia manū o latalata mai o ia; ia lafoai e le ua amio leaga lona ala, ma le tagata agasala ia lafoai e ia ona manatu; a ia foi mai ia Ieova, ona alofa mai lea o ia ia te ia; ia foi mai i lo tatou Atua, auā na te matuā faamagaloina.”—Isaia 55:6, 7.

O le faamālōlōga faaleagaga lenei o i latou ua salamō mai agasala ua faataunuuina e ala i le talaʻia o le tala lelei o le Malo o le Atua. (Mataio 24:14) O le faamālosia o ana auauna ina ia tauaveina lenei galuega faasaoola, ua fesoasoani ai Ieova le Atua i le faitau miliona o tagata mai nuu uma lava ina ia salamō i a latou agasala ma faia se faiā lelei ma ia a o leʻi oo mai le iʻuga o lenei faiga o mea amioleaga. O i latou uma o loo tatalo ma le faamaoni mo lena faamālōlōga faaleagaga ma i latou uma o loo tatalo mo se fesoasoani ina ia faatinoina ai lenei galuega faamālōlō ua taliina moni lava a latou tatalo.

[Faamatalaga i Ata i le itulau 3]

Eliezer and Rebekah/The Doré Bible Illustrations/Dover Publications