Auala e Fautua ai Iesu Keriso mo i Tatou

O MEA sa fai e Iesu Keriso e fesoasoani ai i tagata a o iai i le lalolagi e matuā ofoofogia lava. E faamaonia le moni tele o lenei mea ina ua uma ona toe faamatala mai le anoanoaʻi o mea sa tutupu i le soifuaga o Iesu, ona faapea mai lea o se tasi o lē sa vaaitino i ai: “O isi mea foi e tele na faia e Iesu; afai e tusia uma lava, o laʻu taofi e le mafai ona ofi i le lalolagi ia tusi pe a tusia.” (Ioane 21:25) Talu ai e anoanoaʻi mea sa fai e Iesu i le lalolagi, tatou te ono fesili ai faapenei: ‘E mafai faapēfea ona avea o ia ma fautua mo i tatou i le lagi? Pe mafai ea ona aogā ia i tatou i le taimi lenei le alofa mutimutivale o Iesu?’

E matuā faalāʻeiʻau lava ma faamāfanafana loto le tali. Ua taʻu mai ia i tatou e le Tusi Paia e faapea ua ulu atu Keriso i “le lagi lava, ina ia iloa ai nei o ia i luma o le Atua mo i tatou.” (Eperu 9:24) O le ā sa ia faia mo i tatou? Ua faamatala mai e le aposetolo o Paulo faapea: “Ona ulu faatasi lava lea o [Keriso] i totonu o le mea paia [“le lagi lava”], e le ma le toto o ʻoti ma tamai povi, a o lona lava toto, ua na maua le togiola faavavau mo i tatou.”—Eperu 9:12; 1 Ioane 2:2.

Maʻeu se na tala lelei! Na i lo le muta mai o galuega matagofie a Iesu mo tagata, o lona afio aʻe i le lagi ua atili mafai ai ona ia faia le tele o mea mo tagata. Ua māfua lenei ona o le tele o le alofa tunoa o le Atua, ua ia tofia ai Iesu e galue “o le auauna”—o se ositaulaga sili—“i le itu taumatau o le nofoālii o lē Silisili ese o i le lagi.”—Eperu 8:1, 2.

“O le Auauna”

I le lagi, o le a avea ai Iesu ma auauna mo le fanau a tagata. O le a ia faia se galuega e pei o lea sa faia e le ositaulaga sili a Isaraelu mo tagata tapuaʻi o le Atua i aso anamua. O le ā lena galuega? Ua faamatala mai e Paulo e faapea: “Ua tofia ositaulaga sili uma ina ia ositaulaga i mea alofa ma taulaga; o le mea lea e ao ai ina ia i ai foi i lenei ositaulaga sili [Iesu Keriso o lē na afio aʻe] o se mea e ositaulaga aʻi.”—Eperu 8:3, LF.

Sa ia Iesu se mea e ofoina atu e fai ma taulaga na sili mamao atu na i lo taulaga sa ofoina atu e le ositaulaga sili anamua. “Afai o le toto o povi poa, ma ʻoti” sa maua ai sina faamamāina faaleagaga mo Isaraelu anamua, “e le sili ea ona faamamāina o [tatou] loto fuatia ifo ai galuega e oti ai, i le toto o Keriso, . . . ina ia [tatou] auauna i le Atua soifua?”—Eperu 9:13, 14.

E matilatila foʻi le avea o Iesu o se auauna, ona ua foaʻi atu ia te ia le soifua pea e lē mafai ona maliu. I Isaraelu anamua “e toatele foi i latou sa fai ma ositaulaga, auā na le mafai ona tumau o i latou ona o le oti.” Ae faapēfea Iesu? Ua tusia e Paulo e faapea: “Ua i ai ia te ia le faiva o ositaulaga e tumau pea; o le mea foi lea e mafai ai ia te ia ona faaola pea lava i e faalatalata atu i le Atua ona o ia, auā o loo soifua pea ia e fautua mo i latou.” (Eperu 7:23-25, LF; Roma 6:9) Ioe, o loo  iai i le itu taumatau o le Atua i le lagi sē o loo auauna mo i tatou o lē ‘o loo soifua pea ia e fautua mo i tatou.’ Seʻi tau ina manatu i le uiga o lena mea mo i tatou i le taimi nei!

Ina o iai Iesu i le lalolagi, sa lolofi atu tagata ia te ia mo se fesoasoani, ma o nisi taimi sa latou malaga mamao ai ina ia mafai ona latou maua lana fesoasoani. (Mataio 4:24, 25) I le lagi, e faigofie lava ona ō atu ia Iesu tagata o atunuu uma. Mai lona tulaga ua iai i le lagi, e avanoa pea lava pea o ia o se auauna.

O le ā le Ituaiga Ositaulaga Sili e Iai Iesu?

O faamatalaga e uiga ia Iesu Keriso e pei ona faamauina ai i tala a Evagelia ua tatou iloa ai e aunoa ma se masalosalo e uiga i lona finagalo fesoasoani atoa ma le alofa faapelepele. Maʻeu lona faataulagaina tōtino sa iai! Sa ō atu soo tagata ia te ia a o latou taumafai ma ona soo e fai se mālōlōga lea sa latou manaʻomia. Na i lo le manatu ua fāoa ona taimi tāua ma le toʻafimālie, sa “mutimuti vale . . . lona alofa” i tagata sa sāʻilia lana fesoasoani. E oo lava i taimi sa vaivai ai Iesu, sa fia taumafa ma galala, “sa ia talia ma le agalelei i latou” ma sa tusa ia te ia pe lē taumafa pe afai e tatau ona ia fesoasoani atu i tagata agasala ua salamō moni.—Mareko 6:31-34; Luka 9:11-17, NW; Ioane 4:4-6, 31-34.

I le uunaʻia i le alofa mutimutivale, sa uia ai e Iesu laasaga aogā e tausia ai manaʻoga faaletino, tau i faalogona atoa ma manaʻoga faaleagaga o tagata. (Mataio 9:35-38; Mareko 6:35-44) E lē gata i lena, sa ia aʻoaʻoina i latou ina ia maua le mapusaga ma faamāfanafanaga tūmau. (Ioane 4:7-30, 39-42) Maʻeu le logoleleia, mo se faaaʻoaʻoga, o lana valaʻaulia tōtino: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga.”—Mataio 11:28, 29.

Sa matuā maoaʻe lava le alofa o Iesu i tagata, o lea na iʻu ai lava ina foaʻi atu lona soifua mo tagata agasala. (Roma 5:6-8) E faatatau i lenei tulaga na faapea mai ai le aposetolo o Paulo: “O ia [Ieova le Atua] lava sa na le faasaoina lona lava Alo, a ua tuuina mai o ia ona o i tatou uma lava, e le foai fua mai ea e ia ia te i tatou mea uma lava faatasi ma ia i se a? . . . O Keriso o ia na maliu, a ua toe tu mai lava o ia; o loo i le itu taumatau foi o le Atua, o loo fautua foi o ia mo i tatou.”—Roma 8:32-34, LF.

Se Ositaulaga Sili e Mafai Ona Tigā Alofa Mai

A o avea Iesu ma tagata, sa oo ia te ia le fia taumafa, le gālala, le vaivai, o puapuaga, o tigā, ma le oti. O mafatiaga ma omiga sa ia onosaʻia, na faaauupegaina ai o ia i se auala sili ona iloga ina ia auauna o se Ositaulaga Sili mo tagata mafatia. Na tusi mai Paulo e faapea: “Ua tatau ai ina ia avea [Iesu] ia faapei o ona uso i mea uma lava, ina ia faia o ia ma ositaulaga sili e alofa ma faamaoni i mea a le Atua, ina ia faia e ia se togiola mo agasala a le nuu. Auā na tigaina o ia ina o faaosoosoina, o le mea lea ua mafai ai o ia ona fesoasoani i e ua faaosoosoina.”—Eperu 2:17, 18, LF; 13:8.

Sa faataʻitaʻia e Iesu lona agavaa atoa ma lona finagalo malie e fesoasoani i tagata ina ia faalatalata atu i le Atua. Peitaʻi, pe o lona uiga ea o lenei mea e manaʻomia ona ia faatauanauina se Atua sauā ma leai se alofa, o lē e aunoa ma se finagalo faamagalo? E matuā leai lava, auā ua faamautinoa mai e le Tusi Paia ia i tatou e faapea “e lelei Ieova ma e nofo sauni e faamagalo sala.” O loo faapea mai foʻi: “A e afai tatou te taʻu atu a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava.” (Salamo 86:5, NW; 1 Ioane 1:9, LF ) O le mea moni lava ia, o afioga ma gaoioiga faapelepele a Iesu o loo atagia mai  ai le agalelei, le mutimutivale, ma le alofa o lona Tamā.—Ioane 5:19; 8:28; 14:9, 10.

E faapēfea ona aumaia e Iesu le mapusaga i tagata agasala ua salamō? E ala i le fesoasoani ia i latou ina ia maua le ʻoliʻoli ma le faamalieina i a latou taumafaiga faamaoni e faafiafia le Atua. Ina ua tusi atu i ana aumea Kerisiano faauuina, na tāaofaʻi ai e Paulo lea tulaga i lona faapea mai: “O lenei, ua ia i tatou le ositaulaga silisili, ua afio atu i le lagi, o Iesu le Alo o le Atua, ia tatou taofi mau ai i la tatou e taʻutino atu. Auā e le ia te i tatou se ositaulaga sili e le mafaia ona tiga alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala ia te ia. O le mea lea ia tatou faalatalata atu ai ma le loto tele i le nofoālii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.”—Eperu 4:14-16, LF.

“Fesoasoani Mai i Ona Aso e Tatau Ai”

Ae o le ā e mafai ona tatou fai, pe a fesagaʻi ma faafitauli ua tatou iloa e sili atu na i lo le mea tatou te mafai ona taulimaina—se gasegase faigatā, le avega mamafa o faalogona nofosala, le lofitūina i le lotovaivai, ma le lotomafatia? E mafai ona tatou faaaogāina lelei le sauniuniga lea foʻi sa faalagolago atu i ai e lē aunoa Iesu—le faaeaga tautele o le tatalo. Mo se faaaʻoaʻoga, i le po a o lumanaʻi ona tuuina atu lona soifua mo i tatou, “ua atili ai lana tatalo; o lona afu foi ua pei o ʻaluʻalu toto ua paū ifo i le eleele.” (Luka 22:44) Ioe, e silafia e Iesu faalogona e oo i ai pe a tatalo atu i le Atua ma le matuā faatauanau. Sa ia “aioi atu ma le tagi tele ma loimata i le na mafaia ona faaola ia te ia nai le oti, na faafofogaina foi o ia ona o lona migao.”—Eperu 5:7, LF.

E silafia e Iesu le manaʻomia tele e tagata ona “faafofogaina” ma faamālosia i latou. (Luka 22:43) E lē gata i lena, na ia folafola mai: “O mea uma tou te ole atu ai i le Tamā i loʻu igoa, e foai mai e ia ia te outou. . . . Ina ole atu ia, ona outou maua ai lea, ina ia atoatoa ai lo outou olioli.” (Ioane 16:23, 24) O le mea lea, e mafai ona tatou ōle atu i le Atua ma le mautinoa o le a ia faataga lona Alo e faaaogā lana pule ma le aogā o lana taulaga togiola mo i tatou.—Mataio 28:18.

E mafai ona tatou mautinoa e faapea i lona tulaga i le lagi, o le a saunia ai e Iesu le ituaiga saʻo o fesoasoani i le taimi ua tatau ai. Mo se faaaʻoaʻoga, afai ua tatou faia se agasala ma ua tatou matuā salamō ai, tatou te maua faamāfanafanaga mai le faamautinoaga e faapea “o ia te i tatou le fautua i luma o le Tamā, o Iesu Keriso lea, o lē amiotonu.” (1 Ioane 2:1, 2) O lo tatou Fautua ma Lē Faamāfanafana mai ia i tatou o loo i le lagi, o le a fautua o ia mo i tatou ina ia talia mai ai a tatou tatalo e talafeagai ma le Tusi Paia ma o loo faaauala atu i lona suafa.—Ioane 14:13, 14; 1 Ioane 5:14, 15.

 Faaalia le Talisapaia mo le Fautua a Keriso

E tele mea e aafia ai na i lo le ole atu i le Atua e ala i lona Alo. E ala i le aogā o lana taulaga togiola, ‘na faatauina ai e Keriso’ le fanau a tagata, ma ua peiseaī ai o ia o “le Alii na ia faatau” maia. (Kalatia 3:13; 4:5; 2 Peteru 2:1) E mafai ona faaalia lo tatou lotofaafetai i mea uma ua faia e Keriso mo i tatou e ala i le taʻutino atu e faapea o ia e ana i tatou ma ia tali atu ma le fiafia i lana valaʻaulia mai: “A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au.” (Luka 9:23, LT ) O le ‘lē toe usiusitaʻi o se tasi ia te ia lava’ e lē lava i le na ona fai mai o se faamatalaga faapea ua sui lē ua pule ia te ia. Ae maise lava, o Keriso ‘na maliu foi o ia ona o tagata uma, ina ia le usiusitai pea o e ola ia te i latou lava, a o ia o le na maliu mo i latou.’ (2 Korinito 5:14, 15) O lea la, o le talisapaia o le togiola o le a iai sona uiga loloto i la tatou vaʻaiga i mea, o o tatou sini, ma le olaga o loo tatou ola ai. O lo tatou nofo aitalafu e faavavau ia “Iesu Keriso . . . o le na foaiina mai o ia e ia mo i tatou,” e ao ona faaosofia ai i tatou e aʻoaʻoina atili mea e uiga ia te ia ma lona Tamā alofa, o Ieova le Atua. E ao foʻi ona tatou mananaʻo e ola i le faatuatua, ia ola aʻe i tapulaa aogā a le Atua, ma ia “maelega i galuega lelei.”—Tito 2:13, 14; Ioane 17:3.

O le faapotopotoga Kerisiano o le nofoaga lea tatou te mauaina ai i taimi talafeagai taumafa faaleagaga, o faalāʻeiʻauga, ma taʻitaʻiga. (Mataio 24:45-47; Eperu 10:21-25) Mo se faaaʻoaʻoga, afai ua mamaʻi faaleagaga nisi, e mafai ona latou “aami atu . . . i toeaina [tofia] o le ekalesia.” Ua faaopoopo mai e Iakopo le faamautinoaga e faapea: “O le tatalo foi e faia i le faatuatua e faaolaina ai le maʻi, e faatuina foi o ia e le Alii; afai foi ua agasala, e faamagaloina ia.”—Iakopo 5:13-15.

Ina ia faataʻitaʻia lenei mea: Sa tusi mai se tamāloa o loo faafalepuipuiina i Aferika i Saute i se toeaina o se faapotopotoga e faaali mai i ai lona talisapaia o “Molimau a Ieova uma lava o loo latou tauaveina le galuega lelei lea sa amataina e Iesu Keriso o le fesoasoani i tagata ina ia filigā i le Malo o le Atua.” Ona ia tusia lea o  upu nei: “Sa ou matuā fiafia lava ina ua ou mauaina lau tusi. Sa matuā pāʻia lava aʻu i lou manatu mamafa mai mo loʻu toe faaolaina faaleagaga. Ua matuā faamālosia ai lava aʻu ina ia amata loa ona utagia le valaʻau mai a Ieova le Atua ina ia salamō. Ua 27 nei tausaga o oʻu alu tautoʻai ma lē iloa le mea e fai i le pogisa o le agasala, taufaavalea, faiga solitulafono, o gaoioiga lē mamā tauamio, atoa ma lotu sesē. Ina ua uma ona ou feiloaʻi atu i Molimau a Ieova, ua ou lagona o lea faatoʻā ou maua le ala—le ala saʻo! Na pau lava laʻu mea ua tatau nei ona fai o le mulimuli ai.”

E Tele Nisi Fesoasoani ua Latalata Mai

O tulaga o loo faaleagaina pea o le lalolagi o faamaoniga manino ia ua tatou ola nei i le taimi e sili ona tāua a o toe o se āga ona gāpā mai loa lea o “le puapuaga tele.” I le taimi lava lenei, o loo iai se motu o tagata e toʻatele mai atunuu uma, ma ʻāiga, ma nuu, ma gagana eseese o loo “ta foi o latou ofu, ma ua faasinasinaina o latou ofu i le toto o le Tamai mamoe.” (Faaaliga 7:9, 13, 14; 2 Timoteo 3:1-5) E ala i le faatuatua i le taulaga togiola a Iesu, ua faamagaloina ai a latou agasala ma fesoasoani ai ia i latou ina ia maua se faiā vāvālalata ma le Atua—o le mea moni lava, ia avea ma ana uō.—Iakopo 2:23.

O le Tamaʻi Mamoe, o Iesu Keriso, o le a ia “fafaga [i ē faasaoina mai le puapuaga tele] ma taʻitaʻi ia te i latou i puna o vai ola; e sōloieseina foi e le Atua o loimata uma nai o latou mata.” (Faaaliga 7:17) O iinā o le a faaauau ai e Keriso ona tiute o se Ositaulaga Sili seʻia oo ina faamāeʻaina. O le a ia fesoasoani atu i uō uma lava a le Atua ina ia latou maua atoatoa aogā mai “puna o vai ola”—i le faaleagaga, faaletino, faalemafaufau, ma i faalogona. O le mea sa amataina e Iesu i le 33 T.A. atoa ma mea o loo faaauau ona ia faia mai le lagi talu mai lava lena taimi, o le a faia i se tulaga lelei atoatoa.

O lea la, ʻaua lava neʻi faavaivai i le faaalia o le talisapaia loloto mo mea uma ua faia e le Atua ma Keriso—ma o loo faia—mo i tatou. Sa pulunaunau mai le aposetolo o Paulo e faapea: “Ia outou olioli i le Alii e le aunoa; . . . Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”—Filipi 4:4, 6, 7.

E iai se auala mataʻina e mafai ona faaalia ai lou talisapaia o Iesu Keriso, Lē o loo Fautua mo i tatou i le lagi. Pe a goto le la i le Aso Lulu, Aperila 19, 2000, o le a faapotopoto ai Molimau a Ieova i le lalolagi atoa e faamanatu le Faamanatuga o le Maliu o Keriso. (Luka 22:19) O se avanoa lelei lenei e faaloloto ai lou talisapaia o le taulaga togiola a Keriso. E valaʻaulia ma le māfana oe ina ia e auai mai ma faafofoga i le auala e mafai ona e maua ai aogā e faavavau mai sauniuniga ofoofogia a le Atua mo le faaolataga e ala mai ia Keriso. Faamolemole ia faamautinoa ane i Molimau a Ieova i lou vaipanoa le taimi tonu ma le nofoaga tonu e fai ai lenei sauniga faapitoa.

[Ata i le itulau 7]

E silafia e Iesu lagona o le tatalo faatauanau i le Atua

[Ata i le itulau 8]

O le a fesoasoani Keriso ia i tatou ina ia fesagaʻi ma faafitauli e sili atu na i lo le mea tatou te mafai ona taulimaina na o i tatou lava

[Ata i le itulau 9]

E fesoasoani Keriso ia i tatou e ala mai i toeaina alolofa