Fesili Mai le ʻAufaitau

E tusa ai ma le Roma 12:19, pe sa faaalia ea e le aposetolo o Paulo faapea e lē tatau ona toʻasā pe feita Kerisiano ina ua ia fai mai: “Le au pele e, aua le taui atu ma sui, a ia outou tuu atu i le toasa”?

O le tali tuusaʻo i ai, e leai. Iinei o loo faasino atu ai le aposetolo o Paulo i le toʻasā o le Atua. O le mea moni, e lē o faapea atu la e lē āfaina pe a feita Kerisiano. O loo manino le fautuaina o i tatou e le Tusi Paia ina ia ʻalo ese mai le lotoa po o le loto ita. Seʻi manatunatu i sina faaātaga mai o le fautuaga tauatua.

“Ina soia e te ita, ma ia tuu lou tiga; aua e te faameo, neʻi e faia se mea leaga.” (Salamo 37:8) “Ai se ita i lona uso, e nofo sala o ia i le faamasinoga.” (Mataio 5:22, LF) “Ua iloa tino foi galuega a le tino, o mea faapenei; o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa.” (Kalatia 5:19, 20, LF) “Ia teʻa ma outou upu faafiufiu uma lava, ma le lotoa, ma le ita, ma le leo tele, ma le upu faaleaga.” (Efeso 4:31, LF) “Ia taitasi le tagata ma faataalise ona faalogologo, ia faagesegese ona tautala atu, ia faagesegese ona ita.” (Iakopo 1:19) E lē gata i lea, o loo fautua mai pea lava pea le tusi o Faataoto ia i tatou ina ia ʻaloʻalo ese mai le lotoa po o le loto ita i ni masei laiti ma sesē faaletagata.—Faataoto 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

E ōgatusa le agaga atoa o le Roma 12:19 ma lena fautuaga. Na fautua mai Paulo ia aua neʻi tatou faatagā alofa, ia tatou faamanuia atu i ē faasauā mai ia i tatou, ia tatou taumafai e mafaufau lelei e uiga i isi, ia tatou lē taui atu le leaga i le leaga, ma ia tatou tauivi e nonofo fīfīlēmū ma tagata uma. Ona ia augani mai lea: “Le au pele e, aua le taui atu ma sui, a ia outou tuu atu i le toasa; aua ua tusia, Ua faapea mai le Alii, O ia te au le taui ma sui, ou te taui atu.”—Roma 12:9, 14, 16-19.

Ioe, e lē tatau ona tatou faataga le ita e faapogai ai lo tatou faia o ni gaoioiga taui ma sui. E lē atoatoa lo tatou malamalama i tulaga o mea ma e lē saʻo atoatoa faaiʻuga tatou te faia. Pe afai tatou te faataga le ita e faapogaia ai ni gaoioiga fia taui ma sui, o le a tele lava ina tatou sesē. O le a faamalie ai iinā faanaunauga o Lē Tetee i le Atua, le Tiapolo. Na tusi Paulo i le isi ana tusi: “A outou ita, aua le agasala ai; aua neʻi goto le la o ita pea outou. Aua foi neʻi tuuina atu e outou se mea e mautu ai le tiapolo.”—Efeso 4:26, 27.

O le ala e sili atu ona lelei, ma sili atu ona atamai, o le lafo atu lea i le Atua na te filifilia po o āfea, ma o ai e tatau ona aumai i ai le taui ma sui. E mafai ona ia faia faapea e tusa ai o lona silafia atoatoa o mea moni, ma e so o se faasalaga na te tuu maia o le a atagia atu ai lana faamasinoga tonu atoatoa. E mafai ona tatou iloa o le manatu lenei sa taʻua e Paulo i le Roma 12:19 pe a tatou mātauina lona faasino atu i le Teuteronome 32:35, 41, lea e aofia ai upu nei: “O ia te au le taui ma sui, atoa ma le taui atu.” (Faatusatusa i le Eperu 10:30.) O lea, e ui ina lē maua le faaupuga “le Atua” i le mau faa-Eleni, ae toʻatele le ʻaufaaliliu i ona po nei ua latou faaofi i ai lea faaupuga i le Roma 12:19. O le faiga lenei ua māfua mai ai faitauga e pei o le “lafo atu i le Atua na te taui ma sui” (The Contemporary English Version); “ia tuu atu i le toʻasā o le Atua” (American Standard Version); “lafo atu i le Atua na te faasalaina pe afai o le a ia” (The New Testament in Modern English); “ia tuu se avanoa mo le taui ma sui tauatua.”—The New English Bible.

E tusa lava pe faileagaina pe sauāina i tatou e fili o le upu moni, ae mafai ona tatou faaalia lo tatou faatuatua i le faamatalaina o Ieova le Atua lea na faalogo i ai Mose, e faapea: “O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni; o lē tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala.”—Esoto 34:6, 7.