‘Le Atua e, ia E Aauina Mai Lou Malamalama’

“Ia e aauina lou malamalama ma lau upu moni, ia la taʻitaʻi mai ia te au.”—SALAMO 43:3.

1. E faapēfea ona faailoa mai e Ieova ana fuafuaga?

E MAGAFAGAFA tele Ieova i le auala na te faaalia mai ai ana fuafuaga i ana auauna. Na i lo le faaalia mai o upu moni uma i le taimi e tasi i se susulu mālosi mai o le malamalama e ono tauaso ai, ae ua faasolosolo ona ia faamalamalamaina mai i tatou. O la tatou savaliga umi i le ala o le ola e ono faatusatusa atu i se savaliga o loo savali faatopetope atu ai se tagata i se ala umi. E vave amata lava a o leʻi malamalama lelei ma e leʻi tele foʻi ni mea e mafai ona ia iloa atu. A o amata faasolosolo mālie le oso aʻe o le lā i le tafatafaʻilagi, ua mafai foʻi ona tau manino  atu i le vaʻai a le tagata savali le ātaāta mai o nai mea o loo i le vaega lea e savali atu ai. O le isi anoano o lea lava e na ona tau vavala mai. Peitaʻi, a o faasolosolo ona agaʻi aʻe i luga le lā, ua mafai foʻi ona mamao atu lava lana vaʻai i mea. E faapena tonu lava le malamalama faaleagaga ua saunia mai e le Atua. Ua ia faataga i tatou ia malamalama i ni nai mea e auauaʻi mai. O le auala foʻi faapena na saunia mai ai e le Alo o le Atua, o Iesu Keriso, le malamalama faaleagaga. Seʻi o tatou talanoaina le auala na faamalamalama ai e Ieova ona tagata i taimi anamua, ma le auala foʻi o loo ia faia ai i aso nei.

2. Na saunia mai faapēfea e Ieova le malamalama i aso anamua a o leʻi oo mai i taimi o uluaʻi Kerisiano?

² O ē na fatuina le Salamo 43, e foliga mai o atalii o Kora. Ona o i latou o ni sā Levī, sa ia i latou le faaeaga e aʻoaʻo atu le Tulafono a le Atua i tagata. (Malaki 2:7) E mautinoa lava, o Ieova o lo latou Aʻoaʻo Silisili, ma sa latou sāʻili atu ia te ia o le Puna o le atamai uma. (Isaia 30:20) “Le Atua e, . . . ia e aauina lou malamalama ma lau upu moni,” o le tatalo lea a le faisalamo. “Ia la taʻitaʻi mai ia te au.” (Salamo 43:1, 3) Afai lava e faamaoni le fanauga a Isaraelu ia Ieova, sa faapena foʻi ona ia aʻoaʻoina i latou i ona ala. I senituri mulimuli ane, na foaʻi atu e Ieova ia i latou se ituaiga sili ona mataʻina o le malamalama ma le upu moni. Na faia faapea e le Atua ina ua ia aauina mai lona Alo i le lalolagi.

3. O le ā le auala na tofotofoina ai tagata Iutaia i le aʻoaʻoga a Iesu?

³ I le avea o Iesu Keriso ma tagata, sa avea ai le Alo o le Atua ma “malamalama o le lalolagi.” (Ioane 8:12) Na ia aʻoaʻo i tagata ‘le tele o mea faatasi ma faataoto’—o mea fou. (Mareko 4:2) Na ia taʻu atu ia Ponotio Pilato: “E le mai le lalolagi nei loʻu malo.” (Ioane 18:36) O se manatu fou lena mo se tagata Roma ma e mautinoa o se manatu fou foʻi mo tagata Iutaia lotonuu, auā sa iai lo latou manatu o le a faatoʻilaloina aʻiaʻi e le Mesia le Emepaea o Roma, ma toe faafoʻisia ai le mamalu ia Isaraelu e pei ona sa iai muamua. Sa faaātagia mai e Iesu le malamalama mai ia Ieova, peitaʻi sa leʻi logo mālie ana fetalaiga i alii o Iutaia, o ē na “sili lo latou manao i le viiga mai tagata, i le viiga mai le Atua.” (Ioane 12:42, 43) O le toʻatele o tagata na latou filifili e pipii mau atu i a latou uputuu faaletagata na i lo le taliaina o le malamalama faaleagaga ma le upu moni mai le Atua.—Salamo 43:3; Mataio 13:15.

4. E faapēfea ona tatou iloa o le a faaauau pea ona tuputupu aʻe le malamalama o soo o Iesu?

⁴ E ui i lea, sa iai ni nai tane ma fafine lotofaamaoni na latou talia ma le ʻoliʻoli le upu moni na aʻoaʻo atu e Iesu. Sa lelei le faagasologa o lo latou malamalama i fuafuaga a le Atua. E ui i lea, a o latalata ina māeʻa le soifuaga o lo latou Aʻoaʻo i le lalolagi, sa tele pea ni mea na tatau ona latou aʻoaʻoina. Na fetalai atu Iesu ia i latou: “Ua totoe ia te au mea e tele e fai atu ai ia te outou, a e tou te le mafaia ona talia i nei ona po.” (Ioane 16:12) Ioe, o le a faaauau pea ona tuputupu aʻe le malamalama o soo i le upu moni a le Atua.

O Loo Susulu Mai Pea le Malamalama

5. O le ā le fesili na lāgā i le uluaʻi senituri, ma o ai na iai le tiute tauave ina ia foʻia lea matāʻupu?

⁵ Ina ua mavae le maliu o Iesu ma lona toetū mai, sa matuā susulu mālosi le malamalama mai le Atua i se tulaga e leʻi faapea muamua. I se vaʻaiga na tuuina atu ia Peteru, na faaalia atu ai e Ieova faapea, o le a mafai e tagata o Nuu Ese o ē leʻi peritomeina ona avea ma soo o Keriso. (Galuega 10:9-17) O se faaaliga uigaese lea! E ui lava i lea, mulimuli ane na lāgā ai se fesili: Pe na finagalo Ieova e peritomeina na tagata o Nuu Ese ina ua oo ina avea ma Kerisiano? Sa leʻi taliina lena fesili i le vaʻaiga, ma oo ai ina avea le matāʻupu ma finauga aasa i le va o Kerisiano. Sa tatau ona foʻia le matāʻupu, ina neʻi faaleagaina ai lo latou autasi tautele. Ona “faapotopoto [ai] lea o le au aposetolo ma toeaina [i Ierusalema] e filifili i lenei mea.”—Galuega 15:1, 2, 6.

6. O le ā le faatulagaga na mulimuli i ai aposetolo ma toeaina ina ua latou iloiloina le matāʻupu o le peritomeina?

⁶ Na mafai faapēfea e i latou sa auai i lena talanoaga ona latou iloa le finagalo o le Atua mo tagata talitonu o Nuu Ese? Sa leʻi auina mai e Ieova se agelu e vaavaʻaia le talanoaga, na te leʻi faaali mai foʻi se faaaliga ia i latou na auai. Peitaʻi, e leʻi faapea na tuulafoaʻia ai aposetolo ma toeaina ua matuā aunoa lava ma se taʻitaʻiga. Sa latou talanoaina le molimau mai nisi Kerisiano Iutaia o ē na vāʻai i le auala na amata feutagaʻi ai le Atua ma tagata o nuu ese, i le liligiina ifo o lona agaga paia i luga o Kerisiano lē peritomeina. Sa latou sāʻili atu foʻi i le Tusi Paia mo taʻiala. O le iʻuga, na faia ai e le soo o Iakopo se fautuaga e faavae i se mau sa maua  ai se malamalamaga. A o latou mafaufau loloto i faamaoniga, na oo ina manino ane le finagalo o le Atua ia i latou. Sa lē manaʻomia ona peritomeina tagata o nuu ese ina ia mafai ai ona latou maua le finagalo malie o Ieova. Sa vave lava ona tusitusia e aposetolo ma toeaina le faaiʻuga ina ia mafai ona taʻitaʻia ai o latou uso Kerisiano.—Galuega 15:12-29; 16:4.

7. O le ā le auala na agaʻigaʻi ai pea i luma Kerisiano o le uluaʻi senituri?

⁷ I le lē pei o taʻitaʻi lotu Iutaia, o ē na tautū i uputuu a o latou augātamā, o le toʻatele lava o Kerisiano Iutaia sa ʻoliʻoli ina ua latou maua lenei malamalamaga fou mataʻina i le fuafuaga a le Atua mo tagata o nuu ese, e ui lava o le taliaina o lea malamalamaga sa manaʻomia ai se suiga o manatu e faatatau i tagata lautele o Nuu Ese. Sa faamanuia Ieova i lo latou agaga maulalo, ma na “faamalosia foi ekalesia i le faatuatua, ma ua faatoateleina i lea aso ma lea aso.”—Galuega 15:31; 16:5.

8. (a) E faapēfea ona tatou iloa e tele atu nisi malamalama sa mafai ona faatalitalia ina ua faaiʻuiʻu le uluaʻi senituri? (e) O ā fesili ua talafeagai ona tatou talanoaina?

⁸ Sa faaauau pea ona susulu mai le malamalama faaleagaga i le gasologa o le uluaʻi senituri. Peitaʻi sa leʻi faaalia mai e Ieova vala taʻitasi o ana fuafuaga i uluaʻi Kerisiano. Na taʻu atu e le aposetolo o Paulo i ona uso talitonu o le uluaʻi senituri e faapea: “O ona po nei tatou te vaavaai ai faanenefu i le faaata.” (1 Korinito 13:12) O lena faʻata sa leʻi matuā aumaia ai se ata sili ona manino. O lea, i le amataga o le a faatapulaa mai le malamalamaga i le malamalama faaleagaga. Ina ua maliliu aposetolo, sa amata ona mu itiiti le malamalama mo se vaitaimi, peitaʻi i taimi lata mai nei, ua toe faateleina ai le poto faale-Tusi Paia. (Tanielu 12:4) E faapēfea ona faamalamalamaina e Ieova ona tagata i aso nei? Ma e tatau faapēfea ona tatou tali atu pe a ia faateleina lo tatou malamalamaga i le Tusi Paia?

E Faasolosolo Pea Ona Susulu Mālosi Mai le Malamalama

9. O le ā le auala tūtasi ma le uigā mo le suʻesuʻeina o le Tusi Paia sa faaaogā e uluaʻi Tagata Aʻoga o le Tusi Paia?

⁹ I ona po nei, o le uluaʻi susulu moni mai o le malamalama na amata aliaʻi mai i le kuata mulimuli o le lona 19 senituri, a o amata e se vaega o tane ma fafine Kerisiano ona latou suʻesuʻeina ma le naunautaʻi le Tusi Paia. Sa latou ati aʻe se auala aogā mo le suʻesuʻeina o le Tusi Paia. E lāgā e se tasi se fesili; ona iloilo lea e le vaega mau uma o le Tusi Paia e fesootaʻi atu i ai. Pe afai e iai se mau o le Tusi Paia sa foliga e feteenaʻi ma se isi mau, ona taumafai mālosi lea o nei Kerisiano faamaoni e sāʻili pe faapēfea ona fesootaʻi fuaiupu e lua. I le lē pei o taʻitaʻi lotu o na aso, sa maumauaʻi Tagata Aʻoga o le Tusi Paia (e pei ona lauiloa ai Molimau a Ieova i na taimi) ina ia avea le  Tusi Paia, ae lē o uputuu po o aʻoaʻoga e faia e tagata, e fai mo latou taʻiala. Ina ua māeʻa ona latou talanoaina faamaoniga uma faale-Tusi Paia sa mafai ona maua, ona latou faia lea o se faamaumauga o a latou faaiʻuga. O le auala lena na mafai ai ona faamaninoina lo latou malamalamaga i le tele o aʻoaʻoga faavae a le Tusi Paia.

10. O ā tusi e fesoasoani i le suʻesuʻeina o le Tusi Paia na tusia e Charles Taze Russell?

¹⁰ O lē na iloga ai i na Tagata Aʻoga o le Tusi Paia, o Charles Taze Russell. Sa ia tusia se faasologa o tusi e ono na avea ma fesoasoani i le faia o suʻesuʻega faale-Tusi Paia, ua faaulutalaina o le Studies in the Scriptures. Sa faanaunau le uso o Russell e tusia se tusi lona fitu, o le a faamatalatala ai tusi o le Tusi Paia, o le Esekielu ma le Faaaliga. Na ia faapea mai: “O le taimi lava ou te maua ai se malamalamaga, o le a ou tusia loa le Tusi Lona Fitu.” Peitaʻi, na ia toe faapea mai: “Afai o le a foaʻi atu e le Alii le malamalamaga i se isi tagata, e mafai foʻi ona ia tusia.”

11. O le ā le sootaga i le va o le taimi ma lo tatou malamalamaga i fuafuaga a le Atua?

¹¹ O le faamatalaga e pei ona muaʻi taʻua e C. T. Russell e faaalia mai ai se vala tāua i lo tatou tomai e malamalama ai i nisi o fuaitau o le Tusi Paia—o le taimi. Na silafia e le uso o Russell e lē mafai ona ia faamālosia le mauaina o le malamalama i le tusi o Faaaliga e pei lava ona lē mafai e le tagata o loo naunautaʻi i lana savali, ona ia uunaʻia faamālosi le lā e oso aʻe a o leʻi oo i lona taimi faatulagaina.

E Faaalia—Ae i le Taimi Atofaina a le Atua

12. (a) O lē fea taimi e sili ona malamalama lelei ai i se valoaga a le Tusi Paia? (e) O le ā le faaaʻoaʻoga e faaalia ai o lo tatou tomai e malamalama ai i se valoaga a le Tusi Paia e faalagolago i le taimi faatulagaina a le Atua? (Tagaʻi i le faaopoopoga i lalo.)

¹² E pei lava ona faatoʻā malamalama aposetolo i le tele o valoaga e faatatau i le Mesia ina ua mavae le maliu ma le toetū aʻe o Iesu, ua faapena foʻi ona faatoʻā malamalama Kerisiano i aso nei i auiliiliga uma o se valoaga a le Tusi Paia pe a māeʻa ona faataunuuina. (Luka 24:15, 27; Galuega 1:15-21; 4:26, 27) O le Faaaliga o se tusi o valoaga, e tatau la ona tatou faatalitalia lo tatou matuā malamalama lelei i ai a o faataunuu mea tutupu o loo faamatala mai ai. Mo se faaaʻoaʻoga, sa leʻi saʻo lelei le malamalamaga o C. T. Russell i le uiga o le manu feʻai faafaatusa lanu mūmū o loo taʻua i le Faaaliga 17:9-11, talu ai o faalapotopotoga o loo faaāta mai e le manu feʻai, o Malo Sosoo ma Malo Aufaatasi, sa leʻi iai i lena vaitaimi ae na faatoʻā tulaʻi mai ina ua mavae lona maliu. *

13. O le ā e tupu i nisi taimi pe a faasusulu mai le malamalama i se matāʻupu faale-Tusi Paia?

¹³ Ina ua aʻoaʻoina e uluaʻi Kerisiano faapea e mafai ona avea tagata o Nuu Ese lē peritomeina ma o latou uso talitonu, na lāgā ai e lena suiga se fesili fou pe faamata e manaʻomia ona peritomeina tagata o nuu ese. O lenei fesili sa tatau ai i aposetolo ma toeaina ona latou toe iloilo le matāʻupu o le peritomeina. O le faatulagaga foʻi lena i aso nei. O se toe faapupulaina atili o le malamalama i se matāʻupu faale-Tusi Paia e taʻitaʻia ai i nisi taimi auauna faauuina a le Atua, “le auauna faamaoni ma le mafaufau,” ina ia latou toe iloiloina matāʻupu e fesootaʻi atu i ai, e pei ona faataʻitaʻia mai e le faaaʻoaʻoga o loo sosoo mai o se mea na tupu talu ai nei.—Mataio 24:45.

14-16. Na faapēfea i se toe fetuunaʻiga o lo tatou malamalamaga e faatatau i le malumalu faaleagaga ona aafia ai lo tatou malamalamaga i le Esekielu matāʻupu 40 e oo i le 48?

¹⁴ I le 1971 na lōmia ai se faamalamalamaga o le valoaga a Esekielu i le tusi “The Nations Shall Know That I Am Jehovah”—How? Ua talanoaina puupuu i se matāʻupu o lena tusi le vaʻaiga lea na vaʻaia ai e Esekielu se malumalu. (Esekielu, matāʻupu e 40-48) I lena taimi, sa taulaʻi atu manatu i le pe faapēfea ona faataunuuina le vaʻaiga a Esekielu e faatatau i le malumalu i le lalolagi fou.—2 Peteru 3:13.

¹⁵ Ae peitaʻi, e lua ni matāʻupu na lōmia i Le Olomatamata o Mati, 1974, sa aafia ai lo tatou malamalamaga i le vaʻaiga a Esekielu. Sa talanoaina i na matāʻupu le malumalu sili faaleagaga lea e faamatalaina e le aposetolo o Paulo i le matāʻupu e 10 o le Eperu. Na faamatala mai e le Watchtower e faapea, o le Mea Paia ma le lotoā i totonu o le malumalu  faaleagaga e faasino lea i le tulaga o ē faauuina a o latou soifua i le lalolagi. Ina ua toe iloiloina le Esekielu matāʻupu 40 e oo i le 48 i ni tausaga mulimuli ane, na iloa ai faapea, e pei lava ona faagaoioia le malumalu faaleagaga i aso nei, e tatau foʻi ona faapena le faagaoioia i aso nei o le malumalu lea na vaʻaia e Esekielu i le vaʻaiga. E faapēfea?

¹⁶ I le faaaliga na vaʻaia e Esekielu, ua vaʻaia ai le galulue o ositaulaga i totonu o lotoā o le malumalu a o faia la latou auaunaga i ituaiga e lē o ni ositaulaga. O nei ositaulaga e manino le fai ma sui o “tupu ma ositaulaga,” o auauna faauuina a Ieova. (1 Peteru 2:9) Peitaʻi, o le a lē auauna i latou i le lotoā o loo i le lalolagi o le malumalu, a o faagasolo le Afe Tausaga o le Pulega a Keriso. (Faaaliga 20:4) A o faagasolo se taimi tele o lena vaitaimi pe a lē o lena taimi atoa, o le a auauna atu ai le ʻaufaauuina i le Atua i totonu o le Mea Sili ona Paia o le malumalu, “o le lagi lava” lea. (Eperu 9:24) Talu ai o loo vaʻaia le ulufale atu ma toe ulufafo mai o ositaulaga i totonu o lotoā o le malumalu na vaʻaia e Esekielu, e foliga mai la o loo faagasolo le faataunuuga o lena faaaliga i aso nei, a o iai pea nisi o le vaega faauuina i le lalolagi. E tusa ai o lena malamalamaga, o le lōmiga ia Mati 1, 1999 o lenei mekasini na faaalia ai se manatu ua toe fetuunaʻi i lenei matāʻupu. O lea la, i le faasolo mai seʻia oo i le iʻuga o le lona 20 senituri, sa faasusuluina mai ai le malamalama faaleagaga i le valoaga a Esekielu.

Ia E Lotomalie e Toe Fetuunaʻi Ou Manatu

17. O ā ni toe fetuunaʻiga ua e faia i ou lava manatu talu ona e maua le poto o le upu moni, ma ua faapēfea ona aogā lena mea ia te oe?

¹⁷ So o se tasi lava na te fia maua le malamalamaga o le upu moni e tatau ona lotomalie e “faatoilaloina manatu uma ia anaana ia Keriso.” (2 Korinito 10:5) E lē faigofie i taimi uma lena mea, ae maise pe afai o ni manatu e matuā mauaa ona talitonuina. Mo se faaaʻoaʻoga, a o e leʻi aʻoaʻoina le upu moni a le Atua, atonu sa e fiafia e faamanatu nisi o aso mālōlō faalotu i lou ʻāiga. Ina ua amata ona e suʻesuʻeina le Tusi Paia, na e iloa ai, o nei aso faamanatu e matuā faapaupau lava lo latou amataga mai. Atonu i le taimi muamua, e te tau faatalatū e faatatauina mea ua e aʻoaʻoina. Peitaʻi, ona o lea ua sili atu le mālosi o lou alofa i le Atua na i lo ni pēlega faalotu, ua iʻu ai lava ina e taofia lou toe auai i na aso faamanatu e lē fiafia i ai le finagalo o le Atua. Po ua lē faamanuia ea Ieova i lau filifiliga?—Faatusatusa i le Eperu 11:25.

18. O ā o tatou uiga e tatau ona iai pe a faamaninoina lo tatou malamalamaga i upu moni o le Tusi Paia?

¹⁸ E maua pea e i tatou aogā e ala i le faia o mea i le auala a le Atua. (Isaia 48:17, 18) O lea pe a faamaninoina atili so tatou malamalamaga i se vaega o le Tusi Paia, seʻi o tatou ʻoliʻoli ona ua faamalamalamaina atili le upu moni! O le mea moni, o le faaauau ona faamalamalamaina o i tatou o se faamautinoaga lea o lo tatou iai i le ala saʻo. O “le ala o e amiotonu,” lea “e tusa ia ma le malamalama o le ao, o loo tupu pea lona malamalama e oo i le tutonu o le la.” (Faataoto 4:18) E moni, i le taimi nei ‘e nenefu ai’ la tatou vaʻai i nisi o vala o le fuafuaga a le Atua. Peitaʻi, pe a oo mai le taimi atofaina a le Atua, o le a tatou vaʻaia ai le upu moni i lona matagofie atoatoa, pe afai lena e mausalī ona tatou tūtūmau i “le ala.” I le taimi nei, seʻi o tatou fiafia i upu moni ua faamanino mai e Ieova, ma faatalitali atu i le faamalamalamaina o isi upu moni na e leʻi oo ina matuā faamalamalamaina mai.

19. O le ā se tasi o auala e faaalia ai tatou te alolofa i le upu moni?

¹⁹ E mafai faapēfea ona tatou faaalia lo tatou alofa mo le malamalama i se auala e aogā? O se tasi o auala, o le faitauina e lē aunoa o le Afioga a le Atua—i aso taʻitasi pe afai e mafai. Po o e faatulagaina ea se polokalame faifai pea o le faitau Tusi Paia? Ua aumaia foʻi e mekasini o Le Olomatamata ma le Ala Mai! le anoanoaʻi o meaʻai lelei faaleagaga e ʻoliʻoli ai. Ia iloiloina foʻi tusi, polosiua, ma isi lōmiga na ua  uma ona sauniunia mai mo lo tatou lelei. Ae faapēfea lipoti faalāʻeiʻau o galuega talaʻi o le Malo o loo lōmia i le Yearbook of Jehovah’s Witnesses?

20. O le ā le sootaga i le va o le malamalama ma le upu moni mai ia Ieova, ma lo tatou auai atu i sauniga faa-Kerisiano?

²⁰ Ioe, ua taliina e Ieova i se auala ofoofogia le tatalo lea o loo faamatalaina i le Salamo 43:3. I le iʻuga o lena fuaiupu, tatou te faitau ai faapea: “Ia faaoo [mai e lou malamalama ma lau upu moni] ia te au i lou mauga paia ma lou malumalu.” Po o e naunautaʻi e tapuaʻi atu ia Ieova, faatasi ma le anoanoaʻi o isi tagata e toʻatele? O faatonuga faaleagaga o loo tauaaoina i a tatou sauniga o se auala tāua lea ua saunia mai ai e Ieova le faamalamalamaga i aso nei. O le ā e mafai ona tatou fai e faalolotoina ai lo tatou talisapaia o sauniga faa-Kerisiano? Matou te valaʻaulia oe ina ia e iloiloina faatasi ma le tatalo lenei manatu i le matāʻupu o loo sosoo mai.

[Faamatalaga pito i lalo]

Pe Mafai Ona E Tali?

• Aiseā e faasolosolo ai ona faaalia mai e Ieova ana fuafuaga?

• Na faapēfea ona foʻia e aposetolo ma toeaina i Ierusalema le matāʻupu o le peritomeina?

• O le ā le auala mo le suʻesuʻeina o le Tusi Paia na faaaogā e uluaʻi Tagata Aʻoga o le Tusi Paia, ma aiseā na tūtasi ai lena auala?

• Ia faataʻitaʻi mai po ua faapēfea ona faaalia mai le malamalama faaleagaga i le taimi atofaina a le Atua.

[Fesili mo le Suʻesuʻega]

[Ata i le itulau 12]

Na iloa e Charles Taze Russell o le a susulu mai le malamalama i le tusi o Faaaliga i le taimi atofaina a le Atua