Le Auala o Loo Ta‘ita‘iina ai i Tatou e Ieova
Le Auala o Loo Taʻitaʻiina ai i Tatou e Ieova
“Ia . . . taʻitaʻi ia te au i le ala laulelei.”—SALAMO 27:11.
1, 2. (a) O loo faapēfea ona taʻitaʻia e Ieova ona tagata i aso nei? (e) O le ā ua aofia ai i le matuā faaaogā o aogā o loo maua i sauniga?
O IEOVA o le Puna o le malamalama ma le upu moni, e pei ona tatou aʻoaʻoina i le matāʻupu na muamua atu. Ua faamalamalamaina lo tatou ala e lana Afioga a o tatou faimalaga atu i le ala o le amiotonu. Ua taʻitaʻia i tatou e Ieova e ala i le aʻoaʻoina o i tatou i ona ala. (Salamo 119:105) Ua pei i tatou o le faisalamo o aso anamua, tatou te tali atu ma le agaga faafetai i taʻitaʻiga a le Atua ma tatalo atu: “Ieova e, ia e aʻoaʻo mai ia te au i lou ala, ma taʻitaʻi ia te au i le ala laulelei.”—Salamo 27:11.
2 O se tasi o auala o loo saunia ai e Ieova faatonuga i aso nei e ala mai i sauniga faa-Kerisiano. Po o tatou faaaogāina atoatoa lenei sauniuniga alofa e ala i le (1) auai e lē aunoa, (2) faalogologo ma le faaeteete i le polokalame, ma (3) faia ma le naunautaʻi se sao i vaega a le aofia? E lē gata i lea, po o tatou tali atu i se agaga faafetai pe a tatou mauaina ni fautuaga o le a fesoasoani ia i tatou e tūmau ai “i le ala laulelei”?
Po o Faapēfea Mai Lou Auai i Sauniga?
3. Na faapēfea ona ati aʻe e se tasi auauna faataimi atoa le masaniga lelei o le auai e lē aunoa i sauniga?
3 O nisi tagata talaʻi o le malo na auai atu e lē aunoa i sauniga talu mai lava o laiti. E manatua e se tasi faifeʻau faataimi atoa a Molimau a Ieova faapea: “A o matou tuputupu aʻe ma oʻu uso matutua i vaitausaga na amata mai le 1930, sa matou lē tau fesili atu i o matou mātua pe matou te ō i le sauniga. Na matou iloa e matou te ō, vaganā lava ua matou mamaʻi. Sa lē taitai misia e lo matou ʻāiga ni sauniga.” I le pei o le perofeta fafine o Ana, e lē taitai ona “alu ese” lenei tuafafine mai le nofoaga o le tapuaʻiga a Ieova.—Luka 2:36, 37.
4-6. (a) Aiseā ua misia ai e nisi tagata talaʻi o le Malo sauniga? (e) Aiseā ua matuā tāua ai le auai atu i sauniga?
4 Pe o aofia ai oe ia i latou o loo auai e lē aunoa i sauniga faa-Kerisiano, po o fai ma misi lou auai atu? O nisi Kerisiano na manatu sa lelei lo latou faia faapea, na latou filifili ina ia toe faamautinoa lelei. Mo ni vaiaso, sa latou faia ai se faamaumauga o sauniga taʻitasi na latou auai atu ai. Ina ua latou toe autaluina le faamaumauga i le iʻuga o le vaitaimi na faatulagaina, na latou ofo lava i le aofaʻi o sauniga na latou misia.
5 E ono faapea mai se tasi: ‘E lētioa lava, ua matuā omia tagata i aso nei ma ua faigatā ai mo i latou ona auai e lē aunoa i sauniga.’ O le mea mautinoa lava o loo tatou ola i taimi faigatā. E lē gata i lea, o le a lē taumatea le faaauau pea ona faateleina o omiga. (2 Timoteo 3:13) Ae po ua lē tatau ea ona avea na tulaga ma māfuaʻaga ua matuā tāua ai ona auai atu e lē aunoa i sauniga? Pe afai e lē o sologa lelei meaʻai aogā faaleagaga o tatou taumamafa ai ina ia tausia i tatou, e lē mafai foʻi la ona tatou faamoemoe e mafai ona tatalia omiga e aumaia e lenei faiga o mea. Ioe, pe a leai se aufaatasiga e lē aunoa, e ono tofotofoina i tatou e lafoaʻia atoatoa “le ala o e amiotonu”! (Faataoto 4:18) O le mea moni, pe a tatou taunuu mai i le fale ina ua mavae se aso sa faigatā ma mamafa galuega, atonu e lē ia i tatou i taimi uma le lagona e fia auai atu i se sauniga. Peitaʻi, pe afai tatou te auai e ui lava i so tatou lē lavavā, ona tatou maua lea o aogā mo i tatou lava, ma tatou faalāʻeiʻauina ai foʻi isi o tatou uso Kerisiano o loo iai i le Maota o le Malo.
6 Ua faatū mai e le Eperu 10:25 le isi māfuaʻaga tāua e tatau ai ona tatou auai e lē aunoa i sauniga. I lea mau o loo timaʻi atu ai le aposetolo o Paulo i ona uso Kerisiano ina ia latou faapotopoto faatasi ‘ia atili ai foi ona faapea ina ua latou iloa o le Aso o loo tāulata mai.’ Ioe, e lē tatau ona tatou faagaloina le mea moni faapea, ua latalata mai “le aso o le Atua.” (2 Peteru 3:12) Pe afai tatou te faia se faaiʻuga faapea e leʻi taitai mai le iʻuga o lenei faiga o mea, e ono amata ai ona tatou faataga le sāʻilia o o tatou lava manaʻoga e faaalu ai le taimi lea sa tatau ona tatou auai ai i gaoioiga faaleagaga o loo manaʻomia, e pei o le auai i sauniga. Ona pei ai lea o le lapataʻiga a Iesu, ‘e faafuasei mai lea aso ia i tatou e pei o se mailei.’—Luka 21:34.
Ia Avea o Sē Faalogologo Lelei
7. Aiseā e tāua ai mo fanau ona uaʻi lelei i sauniga?
7 E lē lava le tau ina auai i sauniga. E tatau ona tatou faalogologo ma le faaeteete, ia uaʻi totoʻa atu i mea o loo talanoaina iinā. (Faataoto 7:24) E aofia ai i lenei vala a tatou fanau. Pe a alu atu se tamaitiiti i le aʻoga, e faatalitalia o ia e uaʻi lelei atu i le faiaʻoga, e tusa lava pe iai se matāʻupu patino e lē tau ai lona loto pe foliga mai e lē malamalama ai. E iloa e le faiaʻoga pe afai e taumafai le tamaitiiti e uaʻi lelei atu, o le a ia maua lava sina mea aogā mai le lesona. Po ua lē talafeagai ea la mo le fanau lea ua mafai ona aʻoʻoga, ina ia uaʻi lelei atu foʻi i faatonuga o loo saunia i sauniga a le faapotopotoga, na i lo le tuu e momoe i le taimi lava e amata ai le sauniga? E moni, i le tele o upu moni tautele o loo i le Tusi Paia, e i ai “nisi upu faamatalagatā.” (2 Peteru 3:16) Ae lē tatau ona tatou manatu māmā i le tomai o se tamaitiiti e aʻoaʻoina ai mea. E lē faapena le Atua. I taimi anamua o le Tusi Paia, sa ia poloaʻi atu ai i ana auauna talavou ina ia ‘faalogologo ma aʻoaʻo ia matatau ia Ieova ma anaana e fai o upu uma lava o lenei tulafono,’ ma o nisi o na tulafono e lē taumatea sa faigatā mo le fanau ona malamalama i ai. (Teuteronome 31:12; faatusatusa i le Levitiko 18:1-30.) Po ua faaitiitia ea la ni mea o faatalitalia e Ieova mai fanau i aso nei?
8. O ā ni laasaga ua uia e nisi mātua e fesoasoani ai i a latou fanau ina ia uaʻi totoʻa atu i sauniga?
8 E iloa lelei e mātua Kerisiano e na o se vaega o manaʻoga faaleagaga o a latou fanau ua faamalieina i mea o loo latou aʻoaʻoina i sauniga. O lea, ua faia ai e nisi mātua se fuafuaga ina ia muaʻi faamomoe a latou fanau a o leʻi oo i le taimi o sauniga, ina ia ō mai i le Maota o le Malo ae ua faafouina le mālosi ma nofo sauni e aʻoaʻoina. O isi mātua atonu e matuā maumauaʻi lava e faatapulaa pe faia foʻi ma le atamai se tulafono e faasā ai ona matamata a latou fanau i le televise i po o sauniga. (Efeso 5:15, 16) Ma e taumafai na mātua e faaitiitia ni mea e faalavelave mai, e ala i le faalāʻeiʻau o a latou fanau e faalogo ma aʻoaʻoina, e tusa ai ma lo latou matutua ma se tomai ua iai.—Faataoto 8:32.
9. O le ā se mea atonu e fesoasoani ia i tatou ina ia faatupu aʻe ai lo tatou tomai e faalogologo?
9 Sa talanoa Iesu i tagata matutua ina ua ia fetalai atu: “Ia outou, pe faapefea lo outou faalogo.” (Luka 8:18) I aso nei, ua masani lava ona faigofie le tautala na i lo le faatino. E ioeina, o le faalogologo lelei o se gaoioiga faigatā, peitaʻi o le tomai ina ia faalogologo e mafai ona toleniina. A o e faalogologo atu i se lauga faale-Tusi Paia po o se vaega i le sauniga, taumafai e faamaʻoti manatu autū. Ia faasolo ona mafaufau pe faamata o le ā le manatu o le a sosoo ai ona taʻua mai e le failauga. Ia mātau manatu tāua e mafai ona e faaaogā i lau faiva pe faatatauina i lou olaga. Ia autalu i lou mafaufau manatu tāua a o talanoaina. Ia fai ni faamaumauga pupuu.
10, 11. Na faapēfea ona fesoasoani nisi mātua i a latou fanau ina ia avea o ni ē faalogologo lelei, ma o ā ni auala e te iloa e aogā?
10 O masaniga o le faalogologo lelei e sili ona lelei pe a aʻoaʻoina a o laitiiti. O nisi tamaiti e leʻi amata ona aʻoʻoga, e faamālosiʻau i ai o latou mātua ina ia faia ni a latou “faamaumauga” i taimi o sauniga, e tusa lava pe leʻi oo ina iloa faitau ma tusitusi. Latou te tusia se faailoga i se fasipepa pe a faaaogā mai upu masani e pei o “Ieova,” “Iesu,” po o le “Malo.” I lenei auala, e mafai ai ona iloa e le fanau ona uaʻi atu i mea o loo talanoaina mai i le pulelaa.
11 E oo foʻi i tamaiti matutua, e iai lava taimi latou te manaʻomia ai faalāʻeiʻauga ina ia uaʻi lelei atu. A o iloa atu e se tasi tamā lona atalii e 11 tausaga e ese le mea o loo alu i ai lona mafaufau a o faagasolo se tauaofiaga faa-Kerisiano, ona ia tuu atu lea i ai o le Tusi Paia ma fai atu na te suʻeina mau pe a taʻu mai e failauga. A o fai e le tamā ana faamaumauga, sa fai ma ia tilotilo atu a o uu e lona atalii le Tusi Paia. Mulimuli ane, na amata ona uaʻi ma le naunautaʻi atu le tama i le polokalame o le tauaofiaga.
Ia Faaali Atu Sou Manatu
12, 13. Aiseā e tāua ai ona pepese i pese a le faapotopotoga?
12 Na pese le tupu o Tavita: “Ona ou faataamilomilo ai lea i lou fata faitaulaga, Ieova e; ina ia lagona atu le leo o le viiga.” (Salamo 26:6, 7) Ua saunia e sauniga a Molimau a Ieova ni avanoa e sili ona lelei mo i tatou e faaleo atu ai lo tatou faatuatua. O se tasi o auala e mafai ona tatou faia ai lenei mea o lo tatou pepese i pese a le faapotopotoga. O se vala tāua lenei o la tatou tapuaʻiga, ae faigofie lava ona lafoaʻia.
13 O nisi tamaiti e leʻi mafai ona faitau ua latou taulotoina uma upu o pese o le Malo na o le a faaaogā i sauniga i vaiaso taʻitasi. E fiafia tele ona o le mafai ona latou pepese faatasi ma tagata matutua. Peitaʻi, a o amata ona tau matutua aʻe tamaiti, e ono faaitiitia foʻi lo latou naunau e pepese i pese o le Malo. E iai nisi tagata matutua e matamumuli foʻi e pepese i sauniga. Peitaʻi, o pesega, o se vaega o la tatou tapuaʻiga, e pei lava ona avea le faiva i le fanua o se vaega o la tatou tapuaʻiga. (Efeso 5:19) E tatou te faia le mea sili tatou te mafai e vivii atu ai ia Ieova i le faiva i le fanua. Pe lē mafai ea foʻi la ona tatou faamamaluina o ia e ala i le sii aʻe o o tatou leo—pe leo malie pe leai—i pesega mai le loto o viiga?—Eperu 13:15.
14. Aiseā e matuā tatau ai ona tatou muaʻi sauniuni lelei mo matāʻupu o loo tatou suʻesuʻeina i sauniga a le faapotopotoga?
14 Tatou te avatu foʻi viiga i le Atua pe a tatou faia ni tali e ati aʻe ai i vaega o a tatou sauniga na e tāpā ai se sao o le aofia. E manaʻomia ai i lenei mea sauniuniga. E manaʻomia se taimi e manatunatu ai i vala loloto o le Afioga a le Atua. Na iloa lelei e le aposetolo o Paulo, o se tagata suʻesuʻe māʻelegā o le Tusi Paia, lenei mea. Na ia tusi mai e faapea: “Aue! le loloto o le tamaoaiga o le poto atoa ma le silafaga a le Atua.” (Roma 11:33) Ulu o ʻāiga e, e tāua tele ona tou fesoasoani i tagata taʻitoʻatasi o o outou ʻāiga ina ia latou sāʻili i le atamai o le Atua, e pei ona faaalia i le Tusi Paia. Ia faatulaga ese se taimi a o faia le suʻesuʻega faale-Tusi Paia a le ʻāiga, e faamalamalama ai manatu e faigatā ma fesoasoani ai i lou ʻāiga e sauniuni mo sauniga.
15. O ā ni fautuaga e ono fesoasoani i se tasi ina ia mafai ai ona fai ni ana tali i sauniga?
15 Pe afai e te manaʻo e fai soo ni au tali i sauniga, aiseā e te lē muaʻi sauniuni ai upu o loo e manaʻo e fai? E lē tau manaʻomia le soona sasalu fua. O se mau talafeagai o le Tusi Paia e faitau atu ma le mautinoa po o ni nai upu ua filifilia lelei e te tautala mai ai i lou loto o le a talisapaia lava. O nisi tagata talaʻi latou te talosaga atu i le faisuʻesuʻega ina ia faasao ane le tali muamua o se palakalafa latou te faia, ina ia latou lē misia ai le avanoa e faaleo atu ai lo latou faatuatua.
Ua Faapotoina Ē sa Leai se Poto
16, 17. O le ā le fautuaga na avatu e se tasi toeaina i se auauna o le faiva, ma aiseā na aogā ai lena fautuaga?
16 I sauniga a Molimau a Ieova, e masani lava ona faamanatu mai ai ia i tatou ina ia faitau le Afioga a le Atua i aso taʻitasi. O le faia faapea e faafouina ai. E fesoasoani foʻi ia i tatou e faia filifiliga atamai, e faasaʻo ni faalētonu i uiga tōtino, e teʻena tofotofoga, ma toe faaleleia lo tatou paleni faaleagaga pe afai ua tatou agaʻi atu i se ala sesē.—Salamo 19:7.
17 E nofo sauni toeaina agavaa o le faapotopotoga e saunia fautuaga faale-Tusi Paia e fetaui ma o tatou manaʻoga. E pau lava le mea e tatau ona tatou faia o le “utufia mai ai” e ala i le sāʻili atu i a latou fautuaga faale-Tusi Paia. (Faataoto 20:5) I se tasi aso, na talosaga atu ai se uso talavou naunau ma o ia o se auauna o le faiva, i se toeaina mo ni fautuaga i se auala e mafai ona telē ai sona aogā i le faapotopotoga. Talu ai e iloa lelei e le toeaina le uso talavou, o lea na ia tatala ai lana Tusi Paia i le 1 Timoteo 3:3, lea o loo taʻua ai le tatau i tane tofia ona “agamalu.” Sa ia faaali atu ma le agalelei auala e mafai e le uso talavou ona faaalia ai lona agamalū i ana faiā ma isi. Pe na faamanuʻalia ea lagona o le uso talavou i le fautuaga tuusaʻo na avatu i ai? E leai lava! Na ia faamatala mai faapea: “Sa faaaogā e le toeaina le Tusi Paia, o lea na ou iloa ai o le fautuaga sa mai ia Ieova.” Na faatatauina ma le agaga faafetai e le auauna o le faiva le fautuaga ma o loo lelei lona agaʻigaʻi i luma.
18. (a) O le ā na fesoasoani i se tasi Kerisiano talavou e tetee atu ai i faaosoosoga a o iai i le aʻoga? (e) O ā ni mau o le Tusi Paia e te manatua pe a e fesagaʻi ma ni tofotofoga?
18 E mafai foʻi ona fesoasoani le Afioga a le Atua i talavou ina ia ‘sosola ese ai i tuʻinanau o taulelea.’ (2 Timoteo 2:22) E iai se tamaʻitaʻi talavou o se Molimau a Ieova e leʻi leva talu ona faauu mai se aʻoga maualuga, sa mafai ona ia teʻena tofotofoga a o faagasolo ona tausaga i le aʻoga, e ala i lona mafaufau loloto ma le faatatauina o ni mau o le Tusi Paia. E masani ona ia mafaufau i le fautuaga o loo faamauina i le Faataoto 13:20: “O lē latou te feoai ma tagata popoto, e poto lava ia.” E tusa ai o lea mau, sa ia ati aʻe ma le faaeteete ana faauōga ma na o i latou e faaaloalo loloto i matāʻupu silisili o le Tusi Paia. Na ia faapea mai: “E leai lava se eseesega o aʻu ma isi uma tagata. Pe ana fai e sesē tagata na ou aumea atu i ai, semanū ou te manaʻo ai e faafiafia aʻu uō, ma taʻitaʻia atu ai i faafitauli.” Sa fesoasoani foʻi ia te ia le fautuaga a Paulo lea o loo faamauina i le 2 Timoteo 1:8. Na ia tusi mai e faapea: “Aua e te mā i le molimau i lo tatou Alii, . . . a ia tiga faatasi i tatou ona o le tala lelei.” I le ōgatusa ma lena fautuaga, sa ia lototele ai e faailoa atu ona talitonuga faale-Tusi Paia i ana uō i le vasega i so o se avanoa lava e talafeagai ai. So o se taimi lava na tofia ai o ia e faamatala mai se lipoti i le vasega, na te filifilia lava se matāʻupu e na te maua ai se avanoa e aumai ai ma le faautauta se molimau e faatatau i le Malo o le Atua.
19. Aiseā na lē mafai ai e se tasi alii talavou ona ia teʻena omiga a lenei lalolagi, ae o le ā na avatua ia te ia le mālosi faaleagaga?
19 So o se taimi lava tatou te ono sē ese ai mai “le ala o e amiotonu,” e mafai e le Afioga a le Atua ona fesoasoani ia i tatou ina ia faasaʻoina o tatou ala. (Faataoto 4:18) Sa aʻoaʻoina tōtino e se alii talavou e nofo i Aferika lenei manatu. Ina ua asiasi atu se Molimau a Ieova ia te ia, sa ia taliaina ai se suʻesuʻega faale-Tusi Paia. Sa fiafia o ia i mea na ia aʻoaʻoina, peitaʻi e leʻi umi ae aafia loa o ia i aumea leaga i le aʻoga. Mulimuli ane, na solosolo mālie atu o ia i se ituaiga o olaga lē mamā. Ua ia taʻutino mai: “Sa matuā faataugā lava aʻu e loʻu loto fuatiaifo, ma na oo ai lava ina ou lē toe auai i sauniga.” Mulimuli ane, na amata ona ia toe auai i sauniga. Na faia mai e le alii talavou se faamatalaga e faamalamalamaina ai e faapea: “Na ou iloa ane, o le māfuaʻaga autū o nei mea uma talu ai sa ou matelāina faaleagaga. Sa leai ni aʻu suʻesuʻega tōtino na faia. O le pogai lena sa lē mafai ai ona ou teteeina tofotofoga. Ona amata lea ona ou faitauina Le Olomatamata ma le Ala Mai! Na faasolosolo mālie lava ona toe maua mai loʻu mālosi faaleagaga ma toe faamamāina ai loʻu olaga. O se molimau lelei lenei i ē na latou mātauina suiga sa ou faia. Na ou papatiso, ma i le taimi nei ua ou fiafia.” O le ā na avatua i lenei alii talavou le mālosi e manumalo ai i ona vaivaiga faaletino? Sa ia toe maua lona mālosi faaleagaga e ala i lona suʻesuʻeina tōtino e lē aunoa o le Tusi Paia.
20. E mafai faapēfea e se tagata talavou ona tetee atu i osofaʻiga a Satani?
20 Talavou Kerisiano e, o loo osofaʻia outou i aso nei! Pe afai tou te fia tetee atu i osofaʻiga a Satani, e tatau la ona fafagaina e lē aunoa outou i meaʻai faaleagaga. Sa malamalama lelei le faisalamo, lea e foliga mai o ia o se alii talavou, i lenei manatu. Sa ia faafetai atu ia Ieova mo le saunia mai o lana Afioga, ina ia ‘mafai ai e le taulealea ona faamamāina lona ala.’—Salamo 119:9.
Po o Fea Lava e Taʻitaʻia ai e le Atua, o le a Tatou Mulimuli Ai
21, 22. Aiseā e lē tatau ai ona tatou manatu faapea ua faigatā tele le ala o le upu moni?
21 Na aveesea e Ieova le nuu o Isaraelu mai Aikupito ma taʻitaʻi atu i le Nuu o le Folafolaga. O le auala na ia filifilia atonu e foliga mai i le mafaufau faaletagata sa lē tatau ona faapea le faigatā. Na i lo le uia o le auala e foliga mai e faigofie, ma oso saʻo atu i le Sami Metitirani, na taʻitaʻia e Ieova lona nuu i se auala faigatā e ui atu i le toafa. Peitaʻi, o lenei faiga, o se faaaliga moni lava o le agalelei o le Atua. E ui ina puupuu, ae o le ui atu i le sami e ono oso atu ai le fanauga a Isaraelu i laueleele o tagata e lē fiafia ane o Filisitia. O le filifilia o le isi auala, na faasaoina ai e Ieova lona nuu mai se feteenaʻiga na semanū e vave ona latou fetaiaʻi ai ma tagata Filisitia.
22 I se tulaga talitutusa, o le auala lea o loo taʻitaʻiina ai i tatou e Ieova i aso nei, atonu e foliga faigatā i nisi taimi. I vaiaso taʻitasi, e iai sa tatou faasologa e tumu i gaoioiga faa-Kerisiano, e aofia ai sauniga a le faapotopotoga, o suʻesuʻega tōtino, ma le auaunaga i le fanua. O isi auala atonu e foliga mai e faigofie. Peitaʻi, seʻi vaganā lava ua tatou mulimuli i le taʻitaʻiga a le Atua ona faatoʻā tatou oo atu lea i le taunuuga o loo tatou taumafai mālosi e ausia. O lea la, seʻi o tatou faaauau ona teuloto faatonuga matuā tāua mai ia Ieova ma tūmau ai i “le ala laulelei” e faavavau!—Salamo 27:11.
Pe Mafai Ona E Faamatala Mai?
• Aiseā tatou te mataala faapitoa ai i le manaʻoga o le auai e lē aunoa i sauniga faa-Kerisiano?
• O le ā e mafai e mātua ona fai e fesoasoani ai i a latou fanau ina ia uaʻi lelei atu i sauniga?
• O le ā e aofia ai i le avea ma sē faalogologo lelei?
• O le ā e mafai ona fesoasoani ia i tatou ina ia faia ni tali i sauniga?
[Fesili mo le Suʻesuʻega]
[Ata i le itulau 16, 17]
O le auai i sauniga faa-Kerisiano e fesoasoani ia i tatou ina ia manatua ai pea le aso o Ieova
[Ata i le itulau 18]
E iai auala eseese e vivii atu ai ia Ieova i sauniga faa-Kerisiano