Le Māfuaʻaga e Manaʻomia ai e Tagata se Fautua

‘SA OU muaʻi faasauā ma faatāutala,’ o le taʻutinoga lena a se tamāloa sa sauā ma faamaualuga muamua. Sa avea o ia o se tamāloa taufāifai amioleaga o lē na faasoesā ma le lē alofa ma faaoolima soo o Iesu Keriso o ē na matataʻu i le Atua. Na ia taʻua ma le fiafia e faapea: “A ua alofagia aʻu.” E ui e foliga mai sa lē faigofie ona talitonuina lenei mea, ae o lenei tagata sili ona faasauā na oo ina avea ma Kerisiano faamaoni, le aposetolo lea o Paulo.—1 Timoteo 1:12-16; Galuega 9:1-19.

E lē o tagata uma ua latou faia mea sa fai e Paulo. Peitaʻi, ua tatou lē taulau uma lava i le ausiaina o tapulaa a le Atua. Aiseā? Ona “ua agasala tagata uma lava, ma ua le oo i le mamalu o le Atua.” (Roma 3:23, LF) E lē gata i lea, e faigofie tele ona lofia i tatou i le atuatuvale, atonu e lagona faapea ua tatou leaga tele ma lē talafeagai ai mo le mauaina o le alofa mutimutivale o le Atua. A o manatunatu Paulo i ona faanaunauga agasala, sa auē mai ai o ia lava e faapea: “Aue o aʻu le tagata malaia! O ai sē laveai ia te au ai le tino o lenei oti?” I le taliina o lana lava fesili, na ia tusi mai: “Ou te faafetai lava i le Atua, auā o Iesu Keriso lo tatou Alii.”—Roma 7:24, 25.

E mafai faapēfea e Sē amiotonu na Foafoaina Mea ona feutagaʻi ma tagata agasala? (Salamo 5:4) Mātau na faapea mai Paulo: “Ou te faafetai lava i le Atua, auā o Iesu Keriso lo tatou Alii.” O se isi foʻi tagata na ia mauaina le alofa mutimutivale o le Atua na ia faamatalaina e faapea: “Pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu. O le togiola [“se taulaga talafeagai,” NW] foi o ia mo a tatou agasala, e le gata foi i a tatou, a e atoa foi ma agasala a le lalolagi uma lava.”—1 Ioane 2:1, 2.

Aiseā ua taʻua ai Iesu Keriso o “le fautua i luma o le Tamā”? Ma ua faapēfea ona avea Iesu o “se taulaga talafeagai” mo agasala?

Le Māfuaʻaga ua Manaʻomia ai se Fautua

Na afio mai Iesu i le lalolagi e “foaiina atu lona ola e fai ma togiola e sui aʻi tagata e toatele.” (Mataio 20:28) O le togiola o se tau lea e totogi e toe faatau mai ai, pe toe aumai ai le saʻolotoga o se tasi po o se  mea. O le veape o le upu Eperu lea e faauigaina i le “togiola” e faailoa mai ai le manatu o le ufiufia, po o le totogia, o agasala. (Salamo 78:38) O le upu Eleni, pei o lea e maua i le Mataio 20:28, sa faaaogā patino e faatatau atu i le tau sa totogia e togiolaina ai pāgotā o taua pe ina ia faasaʻolotoina ai ni pologa. Ina ia faamalieina mea e manaʻomia e le faamasinoga tonu, e avatu se mea ina ia sui ai se isi mea e talafeagai lelei o la aogā.

Ua nofo pologa le fanau a tagata talu ai le fouvale a le uluaʻi tagata i le Atua. E pei ona faaalia i le Kenese matāʻupu e 3, na filifili lena tagata lelei atoatoa—o Atamu—e uia se ala o le lē usiusitaʻi atu ia Ieova le Atua. O le faia faapea, na ia faatauina atu ai o ia lava atoa ma i latou uma o le a tupuga mai ia te ia i le nofo pologa i le agasala ma le oti. O lea la, na melea ai e Atamu le meaalofa o le ola faaletagata lelei atoatoa mo ia ma ana fanau uma.—Roma 5:12, 18, 19; 7:14.

I Isaraelu anamua, na faatulaga ai e le Atua le faia o taulaga i manu mo le togisalaina, po o le ufiufia, o agasala a tagata. (Levitiko 1:4; 4:20, 35) O lona uiga la, o le ola o le manu lea sa osia ai le taulaga na tuuina atu e sui ai le ola o le tagata agasala. (Levitiko 17:11) O le pogai lea, o “le aso o le togisala” e mafai foʻi ona taʻua o le “aso o togiola.”—Levitiko 23:26-28, NW.

Ae ui i lea, ona e maulalo ifo manu i lo tagata, sa “le mafai ona aveeseina [atoatoa] o agasala i le toto o povi poa ma ʻoti.” (Eperu 10:1-4) Ina ia lava le aogā o le taulaga mo le togisalaina, po o le aveesea e faavavau o agasala, e tatau ai ona tutusa le aogā ma le mea lea na melea e Atamu. Na manaʻomia e le faamasinoga tonu se tagata lelei atoatoa (Iesu Keriso) e faapaleniina le mea na leiloa i le isi tagata lelei atoatoa (Atamu). E na o se ola faaletagata lelei atoatoa lava e mafai ona totogia le tau o le togiola ina ia faasaʻoloto ai le fanau a Atamu mai le nofo pologa lea na faatauina atu i ai i latou e lo latou uluaʻi tamā. O le “ola e sui ai le ola” o le a ausia ai mea e manaʻomia e le faamasinoga tonu.—Esoto 21:23-25, NW.

Ina ua agasala Atamu ma faasalaina i le oti, sa oti faatasi ai o ia ma ana fanau e leʻi fananau mai. O le tagata lelei atoatoa o Iesu, “le Atamu mulimuli,” sa finagalo malie o ia e leai sana fanau. (1 Korinito 15:45) Ina ua maliu o ia o se taulaga faaletagata lelei atoatoa, sa ia te ia fanau e leʻi fananau mai. O lea la, e mafai ona faapea atu sa maliliu faatasi ma ia le fanau a tagata lea semanū na te fanauina mai. Sa avea e Iesu le ʻāiga o Atamu, lea ua agasala ma oo i ai le oti, e fai mona lava ʻāiga. Sa ia faafitia le āiā e fai ai sana ia lava fanau. E ala i le faataulagaina o lona soifua faaletagata lelei atoatoa, na toe faatauina mai ai e Iesu tagata uma lava na tupuga mai ia Atamu ina ia avea ai ma Ona ʻāiga, ma avea ai o Ia o lo latou “Tamā o le faavavau.”—Isaia 9:6, 7.

O le taulaga togiola a Iesu na tatalaina ai le ala mo tagata usiusitaʻi e mauaina ai le alofa mutimutivale o le Atua atoa ma le ola e faavavau. O lea la, na tusi mai le aposetolo o Paulo e faapea: “O le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.” (Roma 6:23) Ua uunaʻia i tatou e vivii ia Ieova mo le alofa ma le agalelei e fesootaʻi atu i le togiola, lea na saunia i se tau e tautele ia te ia atoa ma lona Alo faapelepele. (Ioane 3:16) Ma sa faamaonia moni ai lava le avea o Iesu ma “fautua i luma o le Tama” ina ua faatūina aʻe o ia i le ola faalelagi ma tuuina atu le tāua o lana taulaga togiola i le Atua i le lagi. * (Eperu 9:11, 12, 24; 1 Peteru 3:18) Peitaʻi, e faapēfea ona faamaonia nei le avea o Iesu Keriso o se fautua mo i tatou i le lagi?

[Faamatalaga pito i lalo]

[Ata i le itulau 4]

Na avea le soifua faaletagata lelei atoatoa o Iesu ma tau e togiola ai le fanau a Atamu