Lotomaulalo—O se Uiga e Atiina Aʻe ai le Fīlēmū

Maʻeu se matagofie o le a iai le lalolagi pe a faaalia e tagata uma le lotomaulalo. O le a lē soona tagisā tagata, o le a faaitiitia le fetauaʻi o tagata o le ʻāiga, o le a faaitiitia faiga faatauvā i vaega o fefaatauaʻiga, ma o le a faaitiitia foʻi le fetauaʻi o mālō. Pe e te fia soifua ea i se lalolagi faapena?

O LOO sauniuni atu auauna moni a Ieova le Atua mo lana lalolagi fou ua folafolaina mai, lea o le a manatu ai i le lotomaulalo i le lalolagi aoao, e lē o se vaivaiga, ae o se uiga e faamālosia ai ma o se uiga lelei. (2 Peteru 3:13) O le mea moni, e oo lava i le taimi nei o loo latou atiina aʻe ai le uiga o le lotomaulalo. Aiseā? Ae maise lava ona o le mea lena e manaʻomia e Ieova mai ia i latou. Na tusi mai lana perofeta o Mika e faapea: “Sole, ua faaali atu e ia ia te oe le mea lelei; se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feooai ma lou Atua ma le loto faamaulalo?”—Mika 6:8.

O le lotomaulalo e mafai ona tele ona faauigaina, e pei o le lē lotovii, pe faamaualuga, e lē mitamitavale i ni ona tomai, ni mea ua ia ausia, ma ni meafaitino o ia te ia. E tusa ai o se tasi o faaliliuga, e mafai foʻi ona uiga  le lotomaulalo i le “tausisi i tapulaa.” O se tagata lotomaulalo e tausisi o ia i tapulaa o amioga lelei. Na te iloaina foʻi e iai tapulaa i mea e tatau ona ia fai ma mea e mafai ona ia fai. Na te iloa e iai mea e lē tatau ona ia faia. E mautinoa tatou te lagona le tōsina atu i tagata lotomaulalo. Na tusia e se tagata fatusolo Egelani o Joseph Addison e faapea: “E leai se mea e sili atu ona matagofie na i lo le lotomaulalo moni.”

O le lotomaulalo e lē o se uiga faalenatura o tagata lē lelei atoatoa. E tatau ona fai ni a tatou taumafaiga ina ia atiina aʻe ai lenei uiga. Mo se faalāʻeiʻauina o i tatou, ua faamatalaina i le Afioga a le Atua se aofaʻiga o mea na tutupu lea o loo faataʻitaʻia ai le lotomaulalo i ona tulaga eseese.

Tupu Lotomaulalo e Toʻalua

O se tasi o auauna aupito sili ona faamaoni a Ieova, o Tavita lea, o lē sa faauuina a o talavou lava e avea ma tupu i le lumanaʻi ia Isaraelu. Na amata mai ai lava iinā, ona faapogaia e le tupu o Saulo lea sa iai i le nofoālii i lena taimi, le tele o omiga ia Tavita e ala i le taumafai e fasioti o ia, ma le faia o ni mea na iʻu ai ina ola fesolasolataʻi.—1 Samuelu 16:1, 11-13; 19:9, 10; 26:2, 3.

E oo foʻi i na tulaga, sa iloa ai lava e Tavita e gata mai mea e tatau ona ia faia mo le puipuia o lona ola. I se tasi o mea na tupu i le vaomatua, na musu ai Tavita e faataga Apisai e fai se mea leaga i le tupu o Saulo a o tōfā i lona faapea atu: “E tusa ai ma le silafaga a Ieova, e lē talafeagai mo aʻu ona faaoo loʻu lima i lē ua faauuina e Ieova.” (1 Samuelu 26:8-11, faatusatusa i le NW) Na iloa e Tavita e lē o sana āiā le aveesea o Saulo mai le tulaga tautupu. O lea sa faaalia ai e Tavita le lotomaulalo i lenei mea na tupu e ala i le tausisi i tapulaa o amioga tatau. O le mea lava e tasi, e iloa e auauna a le Atua i aso nei faapea, “e tusa ai ma le silafaga a Ieova,” e iai mea e lē mafai ona latou faia, e tusa lava po ua tuʻua ai i se tulaga lamatia le ola faaletagata.—Galuega 15:28, 29; 21:25.

Sa faaalia foʻi e le atalii o le tupu o Tavita, o Solomona le lotomaulalo a o talavou lava, e ui ina fai sina ese o le tulaga na faaalia ai. Ina ua faanofotupu Solomona, sa ia lagona le lē agavaa e tauaveina le avega tauave mamafa o le avea ma tupu. Na ia tatalo atu faapenei: “Ieova e, loʻu Atua, ua e faia lau auauna ma tupu, o le sui o loʻu tamā o Tavita; o aʻu foi o le tama itiiti, ou te le iloa ona ulufafo ma ulufale.” E manino mai, sa iloa e Solomona le leai o sona tomai ma sona poto masani. Sa ia te ia le lotomaulalo, na te leʻi faaalia se lotovii pe faamaualuga. Sa talosaga atu Solomona ia Ieova mo le lotomatala, ma na taliaina lana faatoga atu.—1 Tupu 3:4-12.

Le Mesia ma Lona Teuteu Ala

I le silia ma le 1,000 tausaga ina ua mavae aso o Solomona, na faatino ai e Ioane le Papatiso se galuega o le sauniunia o le ala mo le Mesia. I le avea ma teuteu ala o Lē ua Faauuina, sa faataunuu ai e Ioane le valoaga a le Tusi Paia. Sa ono mafai ona ia gugutu mai e uiga i lona faaeaga. Sa ono mafai foʻi ona taumafai Ioane e faamamaluina o ia lava auā o ia o se tauʻāiga faaletino o le Mesia. Peitaʻi na taʻu atu e Ioane i isi faapea e lē aogā o ia e oo lava i le tatalaina o nonoa o seevae o Iesu. Ma ina ua ofoina atu e Iesu ia lava mo le papatisoga i le Vaitafe o le Ioritana, na faapea mai Ioane: “E ao ona e papatiso mai o aʻu, a ē maliu mai ea oe ia te au?” E faaalia ai iinei o Ioane e lē o se tagata mitamitavale. Sa lotomaulalo o ia.—Mataio 3:14; Malaki 4:5, 6; Luka 1:13-17; Ioane 1:26, 27.

Ina ua uma ona papatisoina Iesu, sa ia auai loa i se faiva faataimi atoa, o le talaʻia lea o le tala lelei o le Malo o le Atua. E ui lava sa avea Iesu o se tagata lelei atoatoa, ae na ia faapea mai: “Ou te le mafaia ona fai o se mea e tasi, na o aʻu . . . ou te le usiusitai i loʻu lava loto, a o le finagalo o le na auina mai aʻu.” E lē gata i lena, sa leʻi sāʻilia e Iesu viiga mai tagata, peitaʻi sa ia avatu ia Ieova le mamalu mo mea uma sa ia faia. (Ioane 5:30, 41-44, LF) Maʻeu se lotomaulalo!

E manino lava la, o auauna faamaoni a Ieova—e pei o Tavita, Solomona, Ioane le Papatiso, faapea foʻi le tagata lelei atoatoa o Iesu Keriso—sa latou faaalia le lotomaulalo. Latou te leʻi mitamitavale, lotovii, pe manatu faamaualuga, ae sa latou tausisi i mea sa tatau ona latou fai. O a latou faaaʻoaʻoga ua lava lena e avea ma māfuaʻaga e ao ai i auauna a Ieova i aso nei ona atiina aʻe ma faaalia le lotomaulalo. Peitaʻi, o loo iai pea isi māfuaʻaga mo le faia faapea.

I lenei vaitaimi vevesi i le talafaasolopito o le tagata, ua avea ai le lotomaulalo o se uiga e tāua tele i Kerisiano moni. E mafai ai e se tasi ona  maua le fīlēmū ma Ieova le Atua, le fīlēmū ma ona uso a tagata, ma fīlēmū ai ia lava.

Le Fīlēmū ma Ieova le Atua

E faatoʻā tatou maua lava le fīlēmū ma Ieova pe a tatou tausisi i tapulaa ua ia faatulagaina mo le tapuaʻiga moni. Na sopotapulaa o tatou uluaʻi mātua, o Atamu ma Eva, i tapulaa na faatulaga mai e le Atua, ona avea ai lea o i laʻua ma uluaʻi tagata na aafia i le leai o se lotomaulalo. Na la melea ai lo la tulaga lelei i le silafaga a Ieova, faapena ma lo la ʻāiga, lo la lumanaʻi ma o la ola. (Kenese 3:1-5, 16-19) Pagā se tau i na mamafa sa la totōgia!

Seʻi o tatou aʻoaʻoina se lesona mai le lē taulau o Atamu ma Eva, auā ua faatulaga mai e le tapuaʻiga moni tapulaa i auala e ao ona tatou gaoioi ai. Mo se faataʻitaʻiga, ua taʻua i le Tusi Paia faapea “o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua.” (1 Korinito 6:9, 10) Ua faatulaga ma le atamai e Ieova nei tapulaa mo lo tatou lelei, ma tatou te faaalia le atamai e ala i le tausisi i nei tapulaa. (Isaia 48:17, 18) Ua taʻu mai ia i tatou e le Faataoto 11:2 e faapea: “O i ai le poto i e faamaulalo.”

E faapēfea pe a taʻu mai ia i tatou e se faalapotopotoga faalotu faapea e mafai lava ona tatou sopotapulaa i nei faatulagaga ma mauaina pea le fīlēmū ma le Atua? O loo taumafai lena faalapotopotoga e faasesē i tatou. I le isi itu, e fesoasoani le lotomaulalo ia i tatou e ati aʻe se faiā vāvālalata ma Ieova le Atua.

Le Fīlēmū ma Uso a Tagata

E faaauilumaina foʻi e le lotomaulalo faiā toʻafīmālie ma isi. Mo se faataʻitaʻiga, pe a faataatia e mātua se faaaʻoaʻoga lelei i le lotomalie i mea ua latou maua ae tuu atu le faamuamua i mea faaleagaga, e foliga mai e ono faataʻitaʻia foʻi e a latou fanau le uiga lava lea e tasi. O le a faigofie i fanau ona maua le lotomalie, e tusa lava pe lē maua i taimi uma mea latou te mananaʻo ai. O le a fesoasoani lenei ia i latou e ola aʻe ai i le lotomaulalo, ma o le a sili atu ai ona fīlēmū le olaga faaleʻāiga.

O i latou o loo tutū i matagiʻolo e manaʻomia faapitoa lava ona faaalia le lotomaulalo ma ia lē faaaogāsesēina la latou pule. Mo se faaaʻoaʻoga, ua faatonuina Kerisiano: “Ia le sili lo outou manatu i le mea ua tusia.” (1 Korinito 4:6) E iloa e toeaina i le faapotopotoga e lē tatau ona latou taumafai e faaofi atu i isi o latou lava manatu. Na i lo lena, latou te faaaogāina le Afioga a le Atua e  fai ma faavae i le faalāʻeiʻauina o ala saʻo i matāʻupu e faatatau i amioga, o lāʻei, o teuga, po o faafiafiaga. (2 Timoteo 3:14-17) Afai e mātauina e sui o le faapotopotoga le tausisi atu o toeaina i tapulaa a le Tusi Paia, o le a faaauilumaina ai le faaaloalo mo nei tane ma saosaolaumea i le agaga māfana, alofa ma le fīlēmū i le faapotopotoga.

Le Fīlēmū o le Tagata Lava Ia

O i latou e faaalia le lotomaulalo ua tauia i le fīlēmū tōtino. O le tagata e lotomaulalo e lē o āfaina i āuga o le fia taʻutaʻua. E lē o le uiga o lenei mea faapea ua aunoa ai o ia ma ni sini tōtino. Mo se faaaʻoaʻoga, atonu e faanaunau atu o ia i faaeaga faaopoopo i le auaunaga, peitaʻi e faatalitali o ia i le Atua, ma o so o se faaeaga faaopoopo na te ono maua e pogai mai ia Ieova. E lē manatu i ai o ni iʻuga o ana ia lava taumafaiga. O le faia faapea e tōsina vāvālalata atu ai le tagata lotomaulalo ia Ieova, “le Atua e ona le manuia [“fīlēmū,” NW].”—Filipi 4:9.

Seʻi faapea i nisi taimi tatou te lagona ai le lē amanaʻiaina o i tatou e isi tagata. Pe lē sili ai ea le lē amanaʻiaina ona tatou te lotomaulalo na i lo le faauaʻi mai o manatu ia i tatou ona tatou te lē lotomaulalo? O tagata lotomaulalo e leai ni o latou faanaunauga fia taʻutaʻua. O lea ua fīlēmū ai i latou lava, o se uiga e aogā mo le lelei faaletino ma tau i faalogona.

Atiina Aʻe ma Faatūmauina le Lotomaulalo

Na lolo atu Atamu ma Eva i le leai o se lotomaulalo—o se uiga na la tuufaasolo mai i a la fanau. O le ā e mafai ona fesoasoani ia i tatou e ʻalofia ai le faia o le measesē lava lea e tasi na fai e o tatou uluaʻi mātua? E mafai faapēfea ona tatou atiina aʻe le uiga lelei o le lotomaulalo?

O le mea muamua lava o le a fesoasoani mai, o le iai lea o se malamalamaga saʻo i lo tatou tulaga i le fesootaʻi atu ia Ieova, o Lē na Foafoaina le vateatea. O ā ni mea sa mafai ona tatou ausia e mafai ona tatou faatusatusaina i mea na faia e le Atua? Na fesili Ieova i lana auauna faamaoni o Iopu: “O ifea sa e i ai ina o ou faavaeina le lalolagi? Ina faaali mai ia pe afai ua e iloa mafaufau.” (Iopu 38:4) E leʻi mafai ona tali atu Iopu. Pe lē o faapena ea foʻi ona gata mai so tatou iloa, se tomai, ma se poto masani? Pe lē aogā ea mo i tatou le amanaʻia o mea e gata ai lo tatou mafai?

E lē gata i lea ua taʻu mai ia i tatou e le Tusi Paia: “O le lalolagi ma mea ua tumu ai e a Ieova ia; o le atu laulau ma e o nonofo ai.” E aofia ai i lenei manatu “manu uma i le vao matua, o manu e tataa i mauga e afe.” E mafai ona fetalai mai Ieova faapea: “O loo ia te au le ario, o loo ia te au foi le auro.” (Salamo 24:1; 50:10; Hakai 2:8) O ā ni a tatou mea o iai e mafai ona tatou faaali atu e faatusatusa i mea o loo ia Ieova? O le mea moni, e oo lava i le tagata aupito i mauʻoa e leai se māfuaʻaga e gugutu mai ai i mea ua ia te ia! O lea la, e atamai le mulimuli i le fautuaga faagaeeina a le aposetolo o Paulo na avatu i Kerisiano i Roma: “O le alofa tunoa ua tuuina mai ai ia te au, ou te fai atu ai ia te outou uma, aua le faasili le manatu o se tasi i le mea ua tatau ona manatu ai.”—Roma 12:3.

I le avea ai ma auauna a le Atua o loo faanaunau e atiina aʻe le lotomaulalo, e ao ona tatou tatalo ia maua fua o le agaga—le alofa, le ʻoliʻoli, le fīlēmū, le onosaʻi, le mataalofa, le agalelei, le faamaoni, le agamalū, ma le lē gaoiā. (Luka 11:13; Kalatia 5:22, 23, LT) Aiseā? Auā o uiga taʻitasi nei o le a faigofie ai ona tatou lotomaulalo. Mo se faataʻitaʻiga, o le alofa i uso a tagata o le a fesoasoani ia i tatou e tetee atu i se faanaunauga mitamitavale po o le lotovii. Ma o le lē gaoiā o le a tatou faatali teisi ai ma mafaufau muamua a o leʻi faia se gaoioiga lē lotomaulalo.

E ao lava ona tatou faaeteete! E manaʻomia ona puipuimalu i tatou e lē aunoa mai le lamatiaga o le lē lotomaulalo. E toʻalua nisi o tupu na taʻua i le amataga sa leʻi lotomaulalo i taimi uma. Sa lē tāofiofi le tupu o Tavita ma ia faitauina ai le nuu o Isaraelu, o se mea sa lē tusa ai ma le finagalo o Ieova. Na oo ina avea le tupu o Solomona ma tagata lē lotomaulalo ma iʻu ai ina auai atu i tapuaʻiga sesē.—2 Samuelu 24:1-10; 1 Tupu 11:1-13.

A o iai pea lenei faiga o mea lē amio atua, e manaʻomia le mataala e lē aunoa ina ia tūmau i le lotomaulalo. Peitaʻi, o se taumafaiga alu aogā. I le lalolagi fou a le Atua, o le a faia aʻe ai le sosaiete o le fanau a tagata i na o ē lotomaulalo. O le a latou manatu i le lotomaulalo o se uiga e faamālosia ai, e lē o se vaivaiga. Maʻeu se matagofie o le a iai pe a faamanuiaina tagata taʻitoʻatasi ma ʻāiga i le fīlēmū lea e ō mai faatasi ma le lotomaulalo!

[Ata i le itulau 23]

Sa avatu ma le lotomaulalo e Iesu le mamalu ia Ieova mo mea uma na ia faia